الضحية

العودة

نهى ...نهى..نهى ..
نمنا كلنا بالطريق والسايق هم نام الظاهر لأن فقد السيطرة وطلع على السايد الثاني ضرب سيارة وراح على الترابي،،انكلبت السيارة مرتين أو تلاثة ما ادري سمعت نهى تصيح 'بابا'وبعدها حسيت روحي اكدر اتحرك بس نهى مغطاية بدمها وما تتحرك ،،بنتي لا إله إلا ألله ربي نجينا، ،سمعت الناس تصيح عايشين ،،وبعدها كلبوا السيارة وأنا
اصيح بنتي يمعودين بنتي،،،طلعوني من السيارة وطلعوا السايق والولد إللي بالصدر جانوا فاقدين الوعي ،،آخر شئ
طلعوا نهى ،،،
- عايشة حجي ،،عايشة لاتخاف. .
التمت علينا العالم وبدوا اهل الخير ينقلونا للمستشفى...

وسام ،،،.
اليوم أنا خفر كسور ،،جنت نايم ودك تلفون الخفاره،رفعته ..
- الو أحمد ،ماكو شي؟
- هلو دكتور،،اجانا نداء حادث على الطريق السريع واربع مصابين ،،بينهم أثنين بحالة خطرة..
- جايك..
بدلت ونزلت ركض الطوارىء ،،،وصلوا أول اثنين جانت اصابتهم أكثر شي بالراس فسوينالهم الاسعافات الاولية وحولناهم للجملة العصبية بغير مستشفى،،،
بعدها وصولوا الاثنين البقية ،،لا ياربي هذا خالي ونهى ،،،

- وسام خالي الحكلي نهى فاقدة وما أعرف شبيها ..
خالي جان صاحي ويمشي بطولة مع كدمات وإصابات طفيفة بس نهى لا جانت وضعيتها أصعب ،،أنا هنا جمدت ما اعرف شسوي،المقيم الدوري ركض إلها ،،هنا استعاديت الوعي وصرت أركض وصلتلها، ،اكو نبض وقلبها يدك
عدها جرح برأسها هو مصدر الدم على وجهها سوينالها الاسعافات الاولية ووديناها بعدها للأشعة وأنا وياهم حتى
خالي نسيته ،،
الخال،جنت يم الطبيب الثاني جيكني ووداني للضماد،،صحتله، ،
- ها عمو شرايد؟
- عمو لحكو وسام انا خاله والبنية المضروبه مرته ،،تره ظل يردم..
- حاضر عمو تدلل ..
عافني وظل يخابر، ،شوية واجو تلاث اطباء شايفهم بفاتحة المرحومة زوجة وسام ،،واحد ظل يمي جيكني والاثنين
تبعوا وسام للاشعة،،،

وسام، ،،تخربطت واحس اجر بروحي وماعرف شسوي، ،سوينالها أشعة وطلع عدها كسر بذراعها الأيمن وساقها
الأيسر، ،شوية بدت تكعد،
-بابا ،،بابا،،بابا،،
- عايش خالي ما بي شي لا تخافين..
-وسام!!
صفنت بوجهي وبعدها رجعت غابت عن الوعي...
هنا لحكوني الولد حيدر ومحمد وانا كعدت على اقرب كرسي أحس حيل بعد مابيه،،،
- شوفوها شبيها تره أنا دخت ..
اخذوها الولد ورجعوها للردهة ،،لكيتهم مسوين اللازم،،مضمدين راسها ومعلكيلها مغذي ومتصلين باخواني، ،،
رحت عليهم لكيت خالي كاعد يمها ويتصل بالتلفون، ،،رحت علي بوسته، ،
- الحمد لله على السلامة خالي ،،لاتخاف نهى ما بيها شي..
- قدر ولطف ،،قدر ولطف..خالي خابر اياد خلي يمر على أم زينب يجيبها..
خابرت إياد وصارت هوسه لأن جان يم اهلي. .
شويه واجا إياد ومرت خالي وإخواني البقية،،وعمامي ركضوا لخالي وأم زينب شافت نهى وتخبلت، ،،
- يمه بنتي ،يمه بنتي ..
سكتها خالي والولد ،،أنا كاعد على جهة حاط رأسي بين ادي، ،ومنتظر جية الأخصائي حتى ندخلها عمليات لأن جماعتي مخابري، ،الطوارئ انملت ناس جاية وناس رايحة،،صحت على أياد كتله راح احولهم للخاص صرنا هوسه هنا ،،كمت حولتهم للخاص وكعدنا ننتظر وانا احس روحي طلعت من الخوف والقلق وهاي المواقف يامه مرت علي واليوم انعادت ،،كعدت نهى وحجت ويه خالي ومرته وانا كاعد مالي عين أقترب منها ،،