بارت17
غسان- مرت كم يوم امي متباوع بوجهي زعلانه عليه كطعت كلبي ايلاف سويتلها بلوك بالتلفون والحارث رجع من السفر اثنى على عملي بالرضا فرحني بهالشي ولزمني كم بيت وهو لزم الباقي صارت طلعتي من الفجر لل9بليل وي شفتات العماله ارجع غادي طينه الف راسي وانام وقبل لا اغفى يبقى طيفها يناغيني برقه قبل اخر لحضات من النوم
شهد- مااعرف شون صاير حبه الي غريب كلش عيونه يباوع بلئم ومن اقترب واكون بين ايده ويكون بيدي يصير طفل حته عيونه تغرغر يومين واسبوع انكطع العلاج وكام ميحتاجه ومن يبدي الوجع اعصره بحضني دقايق ويغفى بس بدت معاناتي وي مرت عمي وكلسا سامتني بكلمه
انتي ماكله هيج اكل
لو انتي وين جنتي تحلمين بهيج بيت
لو هاي من شايل من جزداني فلوس وتباوعلي جنت اغلس ممهتمه لحد ما فد يوم صاحت
وييينج بت اسراء
ها عمه
وعمه العماج تعاي هنا هاي شمسويه بقنصان عمج
شكو نزلت ركض جان البيت فارغ بس اني وياها كالت
مطكعتهن كلهن
عمه اني بس قصرتهن لان واحد منهن بيها حبر مال قلم
وانتي من صخم وجهج وكالج
عمو كلي والله
هااا عمج اي اليوم اجي واساله
تقربت يم القميص اشوفه دفعتني عن الغساله كالت
وخررري انتي شكول اوتاماتك انتي الطشت مال امج زايد عليج من وكت ببيتج بقيت ساكته. وهي تدردم طلعت من الحمام عيوني غرغرت واشوف محمود بوجهي من شفته شكو دموع ذبيتها اشرلي فوك بحاجبه واصبعه صعد وصعدت وراه اول مطبيت للغرفه جرني حضنني باوعتله كال
ماابقى اطلع ااجر بره ماابقى هنا
هزيت راسي اي خليت راسي على صدره باسني من راسي وكال
امشي صبيلي تحملي بس خل تكمل السنه ونطلع
الله كريم جريت نفس نزلنا اعرف بي خايف لا اروح اشكي لاهلي وغسان ميرجعني بعد ادري بي شديفكر نزلت صبيتله اله ولعمي وكعدت اكل توني اكعد صاحت
متستحين تكعدين قبل عمتج امج معلمتج الاصول
بقيت ساكته عمي جر نفس كال اكلي عمي اكلي معليج
مديت ايدي صتحت
ضل صل طلع عينها هاي متنطي عين بابا مشايفه وشافت درت وجهي خزرتها وكفت اصعد لزم ايدي محمود شفتها افترت وكعدت تاكل ممهتمه عمي يباوعلي بتوسل كعدت وامري لاالله الواحد القهااار وبدت تحجي عاللي شافتهم بعمان البنات شون جسم وشون طول وشون شعر كالت
اني تندمت كلت لو منتضره منزوجه محمود ماخذته ويايه ومزوجتها هناك لك محمود. كل وحده تكلك اني جسم وشعر وطول وضهرها مرمر
شهد- ابتسمت منهتمه وباوعت لمحمود ابتسم ساكت عرفت غرضها تكيدني لبستهاضلت ترطن حجي فااارغ هاي عمي شون طايفها مااعرف
غسان- مرت فتره ونزلت اعلى امي ابوس واحضن بيها اريد تصالحني كالت
وخر عني وخر مارضى عنك اذا متكمل نص دينك
يمه شون متفصلين البس
لعد كوم البس نروح بيت صاحبك عمار
ياعمارداده عكدت حاجبي تخوصرت
عمار صاحبك اللي جان وياك بالثانويه
عمار عماررر هااا
اييي
شعدي هناك هاي اذا تذكرني صار 4سنين مشايفه
لا يتذكرك كلما شافني سال عليك وعده اخته تخخبببل من الحسن شفتها بقرابتهم انعجنت بكلبي
صفنت واتذكر من رفعت راسي فوك الباب وشفتها بالحديقه مااتذكر شكلها جريت نفس انقبض كلبي ماشي يمه البسي لبست اني واني لبست وطلعنا بسياره الحارث لبيتهم دكينا الباب فتحت امه وطببت امي شوي وطلع عمار تسالمت وياه بحراره ودخلني بالصاله سولفنا وهاي بعدها دخلت امي للصاله وي امها وفتحت امي موضوع ضلو يتصفنون بوجهنا عمار كال
يجي ابويه والمعلومات يمنا طونا مجال نسال ويصير خير ترخصنا بعدها بشويه واني كلبي انعصر كون ميقبلون واخلص رجعنا وره سبوع دكو علينا وكالو تفضلو موافقين خلي الولد يشوف البنيه امي طارت من الفرح واني تكابت وبالفعل رحت وي امي داشوف البنيه دخلنا وامي بصفي جتي امها وراها طبت بنيه حلوه وطولها حلو شاورتني امي باوعلها شون حسن جريت نفس باوعتلها فعلا كانت كلش حلوه باوعت لامي شاورتها
يوم اريد ابقى وياها دقايق احاجيها وحدنا باوعتلي متفاجاه ورجعت باوعت لامها كلتلها امها كالت ماشي شكو منها صاحت
تعاي ابابيل تعاي يوم كعدي
غسان- ابابيل شهالاسم الغريب هاي اذا تزعل ترميني بحجاره من سجيل ضحكت بداخلي جتي كعدت بعد كرسي باوعت لامها من طلعت من الهول بقيت اباوعلها خدودها صارت حمر من الخجل راسن تذكرت خدود نرجسه اوف الله اني صدك حتزوج غيرها تنهدت احمم
شونج
ههلاو زينه
مم اسمج ابابيل مو
اي
غريب اسمج
موجود بالقران
خو ادري ههه احم زين انتي شمكمله
سادس ادبي
ماشاء الله زين جريت نفس زين اريد احاجيج بله خجل
اي عادي احجي
جريت نفس باعي يبنت الناس اني جنت بالسجن واكيد تعرفون ليش
اي كال عمار
زين المهم اني من الطفوله احب بنت عمي ومن انسجنت اتزوجت جريت نفس
شفتها فاتحه عينها كلها هزيت راسي مهون عليها السالفه --- فحبيت تعرفين كلشي نصت راسها ورجعت رفعته
لعد شكو متقدملي
لعد مااتزوج شون ابقى بله زواج
ها بقيت صافنه بوجهه بقه يباوع بملامحي مبتسم
هاي شنو انتي حلوه هه
شكرا نصيت رجعت رفعت راسي باوعتله يكمل كلامه كال
فانتي لازم تعرفين بكلشي ماريد نبدي بالكذب اذا صرتي من قسمتي
هزيت راسي كيفت من صارحني تذكرت عبد الله الكذاب
اذا تكدرين تعيشين ويايه اعيشج ملكه بدون تقصير باي شي بس حب مااعرف يبنت الناس ماريد اخدعج
هزيت راسي مبتسمه
ابتسمت لابتسامتها موافقه
اي اي
شعجب هه
لان انت صادق
لالا اني غسان ههه جريت الباكيت من جيبي بقيت اباوعلها ورثت باوعت بعيني ابتسمت ونصت جريت نفس بداخلي اكول لو مموافقه تسويلي فضل --- اني اشوف لو تفكرين بالموضوع فد اسبوع وبعدها ردي جواب
- اوك ماشي هزيت راسي موافقه
- اوك يله اترخص بس وياج صيحي امي
ماشي هسه اصيحها
طلعت من الطرمه مالتهم وصعدت بالسياره شوي وجتي امي كالت
ها يمه شفتها شون حلوه
اي الله يسترعليها بقيت اباوع بوجه امي طايره يمكن تكون احلى من نرجس بس جنت اشوفها احلى البنات لان شافتني اول رجل بكل حياتها. جريت نفس وحركت رجعت للبيت بيومها عزمت محمود وشهد ببيتنا عالعشا جبت عشا من بره وبهاء هم اجه ويا
شهد- بدلت ونزلت من الدرج بصايتي محمود جان واكف يحجي وي امه
يوم لتضلين تلحين تره اطلع من البيت-- عشتو وبت اسراء يصيرلها بيت وحدد والله بيهن بخت والله --- يمه تره وصلت روحي لخشمي لتضلين تقيسين صبري--- اي امشي ولي اربي واتعب ويروح للحراميه
شهد- سمعتها وعثرت بالدرج رفعت راسها صاحت
شوف تتصنط ست الحسن
شهد- خزرني محمود شلت صايتي وطلعت من كدامه مشه ورايه بسرعتي وصلت لباب اهلي لزمني قوي من ايدي كال
شوفي شهد اذا واحد من اهلج سمع بالصار اطيح حضضج فاهمه
شتسويلي يعني باوعتله رفعت حاجبي شنسوي محمود
ماسوي شي بس متدرين شيجرالج
بقيت صافنه بعينه كلها غضب خفت منه سكتت ونصيت راسي فتح غسان الباب لان جنت داكتها طبيت رحت لامي بوسته خنكتني العبره رفعت راسي محمود ورايه باوعلي بغضب ضميت دموعي وكعدنا تعشينا كوه اكلت تشاقى هو واخوتي وبهاء على غفله سمعنا صوت صياح بفرعنا كمزو الولد وابويه طب يركض كال حريق بيت ام علي
شهد- عزه عدهم عرس بتهم الحنه اليوم
بهاء- وين بيتهم كومو يمعودين العالم خاف يصير بيهم شي
محمود- تعال انت هييي فدائيو صددام
بهاء- بس خل نشوف امشي ايمن يله غسان
يله امشي
شهد- الولد طلعو والعالم جانت صافنه عالنخله دتحترك والبيت وج الكهرباء طاكه ونازل عالنخله بهاء ديفوت غسان لزمه جر ايده صاح مدتشوف نسوان تتصارخ جوه
بهاء- طبيت والنسوان كلهم طلعو بعبي ويتصايحون جانت وحده واكفه تريد تطلع متكدر لابسه ثوب كلش قصير الطرمه مبيها نار بس البيت الداخلي طلعت للطرمه كلها زلم ورجعت وره الباب صحت
تعاي يمعوده اطلعي حتحتركين ردت
عفيه بس اي شي يسترني الله يخليك
يمعوده محد يباوع انتي بيا حال ردت وصوتها يبجي بحركه
الله عليك بستر خواتك بس شي يسترني جانت تحجي من وره الباب الخشب مال استقبال جبيره عين عالباب لتاخذ وعين عالباب مال بيت ركضت على بيت عمي اخذت عبايه مرت عمي ورجعت الها شفت العالم تقنع بيها تطلع وهي تتوسل بيهم صحت
هاج لبسي شمرت وره الباب العبايه لبستها شون مجال وطلعت منصيه وتشهك جريتها ركض من البيت لان اخر نفر ضل هيه باوعتلها النسوان تطشرو
انتي وين اهلج جاوبت ترجف وعيونها عالعالم اللي ضلو يباوعولها من ضمنهم غسان وايمن وعمي
مو هنا اهلي وووتلفوني جوه
ادري يمعوده اهلج مجايبن وياج للعرس
لالا اني صديقه العروس والخط رقمه بتلفوني وتلفوني بالغرفه مال عروس فوك هسه احترك
كالتها وبجت يمعوده هو عالتلفون بيت كب باوعت لغسان -- غسان ناخذها بيت عمي شوي ونوصلها لبيتهم بس خلي يفك الفرع
غسان- ها اي يله شكو منها لعد تبقى بالشارع والعالم يتفرجون عليها زين النسوان الباقين وين راحو
كلمن بصفحه كال غسان ودار وجهه يتلفت عالبيت الديطفو بالسيارات مال اطفائيه
بهاء- امشي اختي تفضلي هناك بيت عمي ضلت صافنه بوجهي بحيره وتباوع عالزلم والناس كلها تباوعلها كالتعفيه بس اي احد منكم يحاجي العروسه او امها اخابر اهلي
حافضه رقم واحد من اهلج طلعت تلفوني باوعتلها وهي تفوت للطرمه ترجف ايدها كالت
اي طبعا رقم اخويه اعرفه
ديله هاج لعد وكفت بالطرمه مقبلت تفوت للبيت طلعت مرت عمي وشهد عليها
شهد- حبيبتي فوتي غسلي وجهج ولبسي شي مستر
لا عفيه اريد اروح لتهلي
غير تغسلين وجهج ترحين هيج والعدسات والهوسه
لا ممخليه عدسات
بهاء - باوعتلها ابتسمت ودرت وجهي باوعت لشهد رباني يابه همست غمزت نغتني شهد بعكسها طلعت ضام الضحكه وي الولد بره شوي وره ساعه طبيت بعدها بالطرمه متقبل تفوت مغسله وجهه بمغسله الطرمه وناطيتها شهد مانتو شكد نزاكه وعيون عسلي تنكرط رجعت طلعت شوي اجه ولد يسال بغضب باوعتله حاير تذكرت البنيه يمكن اخوها هذا رجعت فتت للبيت كتلها
شسمج انتي كالت ها
شسمج يمعوده يمكن جوي اهلج
هاله اسمي
هاله رفعت حاجبي التفتت انضربت بجتف غسان شبيك متوخر
لك ولك ديسال يمكن عليها
سالك على هاله
شمعرفني هاله كاله كال وين النسوان راحو
كتله ببيت ام فراس ونصهك راحو بقو بس بيت العروس كال اختي مو وياهم اكيد هي
اي خل اطلع طلعت باوعتله يسال حاير تقربت همست خويه تسال عن هاله باوعلي رفع حاجبه بغضب ---يابه يمنا يم اختي ليضل بالك تفضل اجه ورايه واسمعه يشتم همس وصلت لبيت عمي صحتها طلعت بس شافها سبها هي نصت تشكر مني واخذها وراح تلفتت باوعتلي ورجعت باوعت شون عيون بزونه طبيت وي غسان وايمن يقلدون عليه شوي واجه محمود اخذ شهد واني بقيت وي الولد ستلفه وضحكه ومنشوف الا صارت ب2 وابويه يدك عليه
يابه تجي لو تبات بره
لالا يابه جاي كمزت في امان الله حنطرد من البيت
غسان- عود روح لهاله
صدقه لمحمد شون هاله اخخخخ عضيت اصبعي ورجعت صعدت راسن فوك سمعت العينتين يتغزل بشهد ضحكت
محمود- شهوده
نعم
تعاي يمي احاجيج
محمود انت كلشي متحجي
مو احسن افعال يابه احنا رجال الافعال
ههه والنعم
همست تقربت يمي حضنتها والنعم منج سلحوفتي
اهووو محمود
اصلا احلا اسم
ما
ليش همست باوعت بعينها
احس نفسي زاحفه
هههه اموت عالزواحف
هههه
شهد- محمود ايامي ىيا صارت حلوه رغم اذيه ومغثه عمتي بس اطبب منا واطلع منا كمت مااهتم ابد اخر همي صارت مدام دااحس بحبه ولو بجيس حب او جبس او نستله اوكلمه حلوه وغزل علاجه متركه بس صار بين يوم ويوم ويكتفي بحضن قوي وبعدها يرجف ويغفه الحمد لله بقت صلاته الميقبل يصليها اتوسل بي وميقبل بس اني معليه بي صلاتي مااكطعها
غسان- مرت الايام وردو خبر بالموافقه ولحد الان نرجس مشايفها روحي ترف عليها من اباوع على شباكها من اسمع هوسه عدهم امول يمكن جتي بس لا ماكو سمعت كم مره انه امها هي تروحلها وهي متجي توقعت هالشي من اول تخاف تشوفني مثل مااني اخاف اذا شفتها وي زوجها اهجم عليها واقتله بيدي بله مااحس على نفسي
صارت القسمه وي ابابيل الطيره الجديده اللي حتطب حياتي مااعرف شون حتعامل وياها ومااعرف هل راح نتوالم او لا امي رادت راسن
مهر واسبوع الوراه حنه وزفه. وافقت لان الحال احسن من قبل ولله الحمد اذا قبل جنت الزم بيت هسه اربع بيوت لازم كمت اتخابر وياها بس روحي متجرعها بكل همسه اتذكر نرجسه وكل سكوت خجل اتذكر اكثر صرت جريء وياها ردت اتقربلها ولو جنسيا شوي اكدر اطلع من محور كلبي عمي احسبها حالها حال ايلاف بس ببرائه جانت مطيعه وملبيه لرغباتي رغم جنت اخجلها واحرجها بس كانت تكتفي بسكوتها ومن الح عليها تقبل راسن كانت جميله جسم ورشاقه روحتي صارت بالاسبوع مرتين لبيتهم عمار صاحبي اخوها كان مامن بيه كم مره اخذتها وطلعت مره لبيتنا مره نفتر بالسياره واخذ راحتي بهواي مواقف قربتني منها كلش لحد يوم العرس بيده العد التنازلي بديت اتراجع شوي شوي بده كلبي يلوب كمت اكثر من مره ادك على رقم نرجس بس حتى اسمه كلمه
الجهاز مغلق
وارتاح واعرف انها مموجوده بحياتي اعتبرها ميته غسان اصحه لروحك بسسس
ابابيل- تعلقت بي وكمت كل يوم اتحلم بنضراته وتصرفاته وحركاته من يقترب مني ابتسامته الحقيره من انحرج اموت عليها. بقه للعرس 5ايام بس هو انشغل عني تعلمت احاجي بليل كام ميرد لو مغلق اشتاقيتله كلش يله مبقه شي للعرس وازين شقته واشبع منه
عبد الله ابن خالي سوالي كم مشكله وي اهلي ابويه وامي واجه كم مره يصيح للبيت ومره لمحني تقدملي ركض يريد يضربني اتهمني انه اني جنت من اول احب هالولد مهتميت عفته وصعدت فوك وعفت العركه كابه للستار---- اليوم حنتي ودنتحضر مخبوصه وي اخته لغسان وامه تحضرنا لكل شي الحنه صارت تخبل
غسان- عفيه روحي شوكت تايس الحنه بيدي وعيني على شباك غرفتها اخ ياكلبي المعلك بذيالها بس لو اشوفها بس نضره بس وين بعد وهي سافرت بره تزوجت اباوع لحلقتي خانكه اصبعي خنننك تذكرت حلقتها ياترى هل بعدها تباوع عليها وتتذكرني باوعت عالكمر هم تتذكرني من ترفع راسها فوك. هم تتذكر ايام السطح حضنت ضلوعي كتفت نفسي جريت نفس هم تتذكرحضني فزيت على صوت بهاء صاح عريسسس
ها بهاء شونك
ها ولك شبيك جننك هونت
ههه لا يابه نصيت راسي ورجعت رفعته ابتسم --- شر لابدمنه
بها- يله اني وراك
ها المن عالخير
هاله هههه اندليت بيتهم وسالت عنها كلش خوش بنيه وخوش ناس وكلت لاهلي امي رحبت بالفكره مااعرف بعد
الله يوفقك يابه هذا حب من اول عبايه
اي ههههه يوم لايمن بعد
الله يسهل خلي يتخرج يلحك
الله كريم يله امشي ابوك يريدك
اي كله جيت طببت السياره للكراج وكعد ايمن وبهاء يزينوها سياره الحارث هي الراح انزف بيها طبيت لابويه وعمي ومحمود سالفه منا وضحكه منا محمو خله ايده على كتفي كال
انشاء الله منك المال ومنها البنون
باوعت بعينه كومه حسره ابتسمت ونصيت يكون الله يرزقهم محمود مااعرف شغيره بقيت اباوعله شون يباوع لاختي عيونه مليانه حب تذكرت سبحه جدي النطتنياها بيبيتي المفروض هو الجبير بينا هو الياخذها لزمته من كتفه كتله تعال ويايه
ها خير شكو
تعال رايدك بسالفه
اي يمعود اي شي هاي متعرف كولي ابن عمك خبره
هههه لا والله بابا السجن علمني شفت شكول بحياتي مشايفها وسمعت حجي اذا احجي الك تضل صافن يومين صعدنا عالدرج ونحجي وصلت لغرفتي شغلت الاضاءه التفتت عليه ابتسم تخوصر مستغرب
شبيك يول بس لاتريد تطلع بيه تراي
من طاح حضك دشوف وجهك بالمرايه حتى شوفه مبيك
باوعت للمرايه اضحك شووو اي والله عمي حقك هسه اصيح بهاء اقلها اشكر ههههه جريت نفس كول حبيبي محتاج شي
- بقيت اباوع بوجهه محمود تدري شكد تغيرت نضرتي تجاهك
- اعرف جريت نفس اني هم تره مو ادمي
لا حشاك نصيت راسي ورجعت باوعتله داشوف اختي شكد مرتاحه وياك
ابتسمت نصيت اني هم مرتاح وياها الحمد لله
الحمد لله شوف يابه عدي امانه الك
امانتيش عكدت حاجبي مستغرب
السبحه مال جدي انت جبيرنا ولو الفرق شهر بس المفروض الك ومن بعدك لابنك اباوعله دمعت عينه ونصه راسه
- بيبي نطتها الك
- حتى لو بيبي لو باقيه لهذا يومنا جان خلتها بيدك فكيت الجرار وطلعتها وخليتها بيده حتى ايدك جبيره تكعد وياها جريت نفس هسه صارت يم ابويه وحده ويمك وحده مال ابويه اكيد حينطيها الي وهاي الك ميعرف وين يودي وجهه
- تتوقع يجي يوم انطيها لابني
- ليش لعد انت مفكرت تتعالج
- هزيت راسي بالرفض اخجل كلتها همس
- دكول يا الله وروح اخذ شهوده وروح
- الله كريم تنهدت الله كريم باوعت عالسبحه تقربت بخجل حضنته اشكرك غسان- 1
- العفو دير بالك عليها
- انشاء الله يله اترخص ارتاح باجر وراك عرس
- اي جريت نفس هسه راح انام طلع من الغرفه ذبيت روحي نمت ثاني يوم العرس زفه عاديه كانت اهلي واهلها والحارث وجماعتي التمو اخذتها وجيت لبيتي بالسياره من اباوعلها مو هذا حلمي والله مو هذا حلمي دموعها تجري على اهلها ودمعتي على خدي وياها بالشقه من بدت توخر البركع واني صافن عليها جانت بمعنى الكلمه جميله بس مو هاي الردتها. مو هاي الردتها وتمنيتها ساعدتها باوعت بعينها مدمعه
شبيج
مابيه شي
منو الولد الجان واكف يم ابوك الضخم
هاه
سمعتيني
اايمكن ابن خالي عبد الله
هذا جان رايدجمو باوعت بعينها رفعت حاجبي ارتبكت ودارت وجهها براءتها متسمحلها بالكذب همست لا اني رفضته ونزعت الماشات من راسها فتت للحمام ذبيت العرك العله جسمي وطلعت لكيتها بسيت النوم سبحان من صورها كان بيها من خجل نرجسه واغراء ايلاف تقربت منها خليت روحي بحكم جسمي مو كلبي واخذتها نامت بعدها بسرعه واني خنكتني الحسره واشهك بنفس الجكاره لحد ما ضاق نفسي طلعت للسطح بمكاننا القديم -------
يتبع
