ﺍﺑﻮ ﺯﻳﺎﺩ: ﺍﻧﺖ ﻣﺎﺗﻔﻜﺮ ﺍﻻ ﻓﻲ ﻧﻔﺴﻚ
ﺯﻳﺎﺩ : ﻫﺎﺫﻱ ﺣﻴﺎﺗﻲ ﻭﺃﻧﻲ ﺣﺮ ﻓﻴﻬﺎ
ﺃﺑﻮ ﺯﻳﺎﺩ ﺑﺤﺰﻡ : ﻛﻠﻤﺔ ﻭﺣﺪﺓ ﺑﻨﻘﻮﻟﻬﺎ ﻭﻣﺶ ﺣﻨﻌﺎﻭﺩﻫﺎ ﻳﺎﺗﺘﺰﻭﺝ ﺯﻱ
ﻣﺎﻗﺘﻠﻚ ﻳﺎﺇﻣﺎ ﻻ ﺇﻧﺖ ﻭﻟﺪﻱ ﻭﻻﻧﻌﺮﻓﻚ ...
ﺯﻳﺎﺩ : ﻳﺎﺑﻮﻱ ﺣﺮﺍﻡ ﻋﻠﻴﻚ ﻋﻼﺵ ﺇﺩﻳﺮ ﻓﻴﺎ ﻫﻜﻲ ﻣﺮﺗﻲ ﻧﺤﺒﻬﺎ ﻭﻣﺎﻧﺒﻴﺶ
ﻧﻜﺴﺮﻫﺎ ﻭﻧﺠﻴﺐ ﻋﻠﻴﻬﺎ ﺿﺮﺓ
ﺍﺑﻮﺯﻳﺎﺩ ﺑﻌﺼﺒﻴﺔ : ﻫﺎﺫﺍ ﺃﺧﺮ ﻛﻼﻡ ﻋﻨﺪﻱ ﻭﻃﻠﻊ ﻭﺳﻜﺮ ﺍﻟﺒﺎﺏ ...
ﺯﻳﺎﺩ ﻗﻌﻤﺰ ﻉ ﺍﻟﺼﺎﻟﻮﻥ ﻭﺣﻂ ﺇﻳﺪﻳﻪ ﻋﻠﻲ ﺭﺍﺳﻪ ﻭﻫﻮ ﻣﺤﺘﺎﺭ ﻛﻴﻒ
ﺑﻴﺘﺼﺮﻑ ( ﺣﺮﺍﻡ ﻋﻠﻴﻚ ﻳﺎﺑﻮﻱ ﻋﻼﺵ ﺗﻘﺘﻞ ﻓﻴﺎ ﻭﺍﻧﻲ ﺣﻲ ﺍﻟﻠﻪ
ﻳﺴﺎﻣﺤﻚ )
ﻗﺮﺑﺖ ﻣﻨﻪ ﺃﻣﻪ ﺑﻜﻞ ﺣﻨﻴﺔ : ﻳﺎﻭﻟﻴﺪﻱ ﺍﻟﻠﻪ ﻳﻬﺪﻳﻚ ﺃﺳﻤﻊ ﻛﻼﻡ ﺑﻮﻙ ﻳﺒﻲ
ﻳﺸﻮﻑ ﺻﻐﺎﺭﻙ ﻗﺒﻞ ﻻﻳﻤﻮﺕ ﻣﺎﺗﺤﺮﻣﺎﺵ ﻣﻦ ﺃﻣﻨﻴﺘﻪ ﻣﺎﺩﺍﻡ ﺍﻧﺖ
ﺗﻘﺪﺭ ..
ﺯﻳﺎﺩ ﻣﺎﺯﺍﺩﺵ ﻭﻻﻛﻠﻤﺔ ﻭﻗﻌﺪ ﻳﺸﺒﺢ ﻓﻲ ﻋﻴﻮﻥ ﺃﻣﻪ ﺍﻟﺘﺮﺟﻲ ﺃﻧﻪ ﻳﻮﺍﻓﻖ
ﻋﻠﻲ ﻃﻠﺐ ﺑﻮﻩ ﻧﺎﺽ ﻭﺑﺎﺱ ﻋﻠﻲ ﺭﺍﺱ ﺃﻣﻪ ﻭﻃﻠﻊ ...
( ﻧﻌﺮﻓﻜﻢ ﺑﻌﻴﻠﺔ ﺯﻳﺎﺩ ... ﺯﻳﺎﺩ ﺷﺎﺏ ﻭﺳﻴﻢ ﻋﻤﺮﻩ 29 ﺷﺨﺼﻴﺘﻪ ﻗﻮﻳﺔ
ﻭﻣﺎﺳﻚ ﺷﻐﻞ ﺑﻮﻩ ﻭﻋﻤﻪ ﻣﺤﻤﺪ ﻛﻠﻪ .. ﺭﺍﺿﻊ ﻣﻊ ﻋﻤﻪ ﺧﺎﻟﺪ ﺍﻟﻠﻲ
ﺗﻮﻓﻲ ﻣﻦ ﻓﺘﺮﺓ ..ﺑﺲ ﻓﻴﻪ ﻃﺒﻊ ﺑﺎﻳﺦ ﺃﻧﻪ ﻋﺼﺒﻲ ... ﻣﺘﺰﻭﺝ ﺃﻣﻴﺮﺓ
ﺑﻨﺖ ﺧﺎﻟﺘﻪ ﻭﻋﻤﺮﻫﺎ 23 ﻳﺤﺒﻬﺎ ﺣﺐ ﺟﻨﻮﻧﻲ ﻭﻣﺎﻳﺮﺿﻲ ﻓﻴﻬﺎ ﺷﻲ ﺑﺲ
ﻟﻼﺳﻒ ﺟﻴﻨﺎﺗﻬﻢ ﻣﺘﺸﺎﺑﻬﺔ ﻣﺎﻳﻘﺪﺭﻭﺵ ﻳﺠﻴﺒﻮ ﺻﻐﺎﺭ ﻻﻥ ﺻﻌﺐ
ﻳﻌﻴﺸﻮ ... ﻋﻨﺪﻩ ﺧﻮﻩ ﺩﻛﺘﻮﺭ ﺇﺳﻤﻪ ﺧﺎﻟﺪ ﻋﻠﻲ ﺇﺳﻢ ﻋﻤﻪ ...ﻭﺯﻭﺯ ﺧﻮﺍﺕ
ﺣﻨﻴﻦ ﻣﺘﺰﻭﺟﺔ ﻭﻟﺪ ﻋﻤﻬﺎ ﻓﻮﺍﺯ ﻭﻋﻨﺪﻫﺎ ﻭﻟﺪ ﺇﺳﻤﻪ ﺯﻳﺎﺩ ﻭﻣﺴﺎﻓﺮﺓ
ﻣﻌﺎﻩ ﺑﺮﺍ ﻟﻠﺪﺭﺍﺳﻪ .. ﻭﺃﺻﻐﺮ ﻭﺣﺪﺓ ﻫﻨﺎﺩﻱ ... )
ﻫﻨﺎﺩﻱ ﻧﺎﺯﻟﺔ ﻣﻦ ﺍﻟﺪﺭﻭﺝ ﺗﻼﻗﺖ ﻣﻊ ﺧﻮﻫﺎ ﺍﺑﺘﺴﻤﺖ : ﻫﻼ ﺯﻳﺰﻭ
ﻳﺎﻏﺎﻟﻲ
ﻃﻠﻊ ﺯﻳﺎﺩ ﻣﺮ ﻣﻦ ﺟﻨﺒﻬﺎ ﺑﺪﻭﻥ ﻣﺎﻳﺰﻳﺪ ﻭﻻ ﻛﻠﻤﺔ ..ﻫﻨﺎﺩﻱ ﺍﺳﺘﻐﺮﺑﺖ
( ﺃﻛﻴﺪﺓ ﺑﻮﻳﺎ ﻛﻠﻤﻪ ﻉ ﺍﻟﺰﻭﺍﺝ ﻣﺮﺓ ﺛﺎﻧﻴﺔ ﻣﺴﻜﻴﻦ ﺯﻳﺎﺩ)
~~~~~~~~~~~~~~~~~~~~~~~~~~
ﺧﺶ ﺯﻳﺎﺩ ﻟﻠﺠﻨﺎﺡ ﺍﻟﺨﺎﺹ ﺑﻴﻪ ﻭﻟﻘﻲ ﺃﻣﻴﺮﺓ ﻣﻘﻌﻤﺰﺓ ﺗﺘﻔﺮﺝ ﻉ
ﺍﻟﺘﻠﻔﺰﻳﻮﻥ ﻭﺃﻭﻝ ﻣﺎﺷﺎﻓﺎﺗﻪ ﺃﻣﻴﺮﺓ ﻭﺍﺳﺖ ﺗﻘﻌﻤﻴﺰﺗﻬﺎ ﻭﺑﺄﺑﺘﺴﺎﻣﺔ : ﻫﻼ
ﺣﺒﻲ
ﺯﻳﺎﺩ ﻭﻫﻮ ﻣﻀﺎﻳﻖ: ﻫﻼ ﺑﻴﻚ ..... ﻭﻗﻌﻤﺰ ﻉ ﺍﻟﻜﻨﺒﺔ ﻭﺣﻂ ﺭﺍﺳﻪ ﺑﻴﻦ
ﻛﻔﻮﻓﻪ
ﺃﻣﻴﺮﺓ: ﺑﺴﻢ ﺍﻟﻠﻪ ﺧﻴﺮﻙ ﺯﻳﺎﺩ؟؟؟
ﺯﻳﺎﺩ : ﻻﺷﻲ ﺣﺒﻴﺒﺘﻲ ﺑﻨﺮﻗﺪ
ﺃﻣﻴﺮﺓ ﺗﻌﺮﻑ ﺯﻳﺎﺩ ﻛﻮﻳﺲ ﻭﺗﻌﺮﻑ ﻟﻮ ﺃﻧﻪ ﻣﻀﺎﻳﻖ ﻣﺎﻳﺤﺒﺶ ﻳﺘﻜﻠﻢ :
ﺍﻭﻛﻲ ﺣﻴﺎﺗﻲ ﺍﺭﻗﺪ
ﺍﻣﺘﺪ ﺯﻳﺎﺩ ﻉ ﺍﻟﺴﺮﻳﺮ ﻭﺗﻐﻄﺎ ﺑﻌﺪ ﻣﺎﺧﺪﻱ ﻣﻨﻮﻡ ﻋﺸﺎﻥ ﻳﻨﺴﻲ ﻛﻞ ﺍﻟﻠﻲ
ﺻﺎﺭ ﻭﺃﻣﻴﺮﺓ ﻧﺰﻟﺖ ﺗﺤﺖ ﻟﻠﺼﺎﻟﺔ ﺗﺒﻲ ﺗﺸﻮﻑ ﺷﻦ ﻓﻲ ...
ﻫﻨﺎﺩﻱ ﻣﻘﻌﻤﺰﺓ ﺗﺒﻜﻲ ﻋﻠﻲ ﺣﺎﻝ ﺧﻮﻫﺎ ﻭﺧﺼﻮﺻﺎ ﺑﻌﺪ ﻣﺎﺣﻜﺘﻠﻬﺎ ﺃﻣﻬﺎ ..
ﺃﻣﻴﺮﺓ ﺍﻧﺨﻠﻌﺖ : ﺧﻴﺮﻙ ﻫﻨﺎﺩﻱ ﺷﻦ ﻓﻲ؟؟؟؟
ﻫﻨﺎﺩﻱ ﺭﻓﻌﺖ ﺭﺍﺳﻬﺎ ﻭﺷﺎﻓﺖ ﺃﻣﻴﺮﺓ ﻭﺍﻗﻔﺔ ﻗﺪﺍﻣﻬﺎ ﺯﺍﺩﺕ ﻓﻲ
ﺍﻟﺒﻜﻲ ...
ﺃﻣﻴﺮﺓ ﺿﻤﺘﻬﺎ : ﻫﻨﺎﺩﻱ ﺣﺒﻴﺒﺘﻲ ﺷﻦ ﻓﻴﻚ ﻭﺷﻨﻮ ﻣﺰﻋﻞ ﻓﺮﺍﺷﺘﻨﺎ
ﺍﻟﺤﻠﻮﺓ ...
ﻫﻨﺎﺩﻱ ﺣﻜﺖ ﻛﻞ ﺷﻲ ﻷﻣﻴﺮﺓ ﻋﺸﺎﻥ ﺗﺨﻠﺺ ﺧﻮﻫﺎ ﻣﻦ ﻣﻮﺍﺟﻬﺔ ﺃﻣﻴﺮﺓ
ﺑﺎﻟﻤﻮﺿﻮﻉ ...
ﺃﻣﻴﺮﺓ: ﺍﻧﺘﻲ ﺷﻦ ﺗﻘﻮﻟﻲ 0_0
ﻫﻨﺎﺩﻱ : ﺣﺒﻴﺒﺘﻲ ﺃﻣﻴﺮﺓ ﻣﺎﺗﺤﻄﻴﺶ ﻓﻲ ﺑﺎﻟﻚ ﺍﻧﺘﻲ ﻋﺎﺭﻓﺔ ﻟﻴﺶ ﺯﻳﺎﺩ
ﺑﻴﺘﺰﻭﺝ ﻫﻮ ﻳﺤﺒﻚ ﺍﻧﺘﻲ ﻭﺑﺲ
ﺃﻣﻴﺮﺓ ﺑﺼﻮﺕ ﻋﺎﻟﻲ : ﻛﻴﻒ ﻣﺎﻧﺤﻄﺶ ﻓﻲ ﺑﺎﻟﻲ ﻳﺎﻫﻨﺎﺩﻱ ... ﺯﻳﺎﺩ
ﺑﻴﺘﺰﻭﺝ ﻋﺎﺭﻓﺔ ﺷﻦ ﻣﻌﻨﺎﻫﺎ ﺑﻴﺘﺰﻭﺝ ﻳﻌﻨﻲ ﻳﻮﻡ ﻣﻮﺗﻲ ﻳﺎﻫﻨﺎﺩﻱ
ﻋﻠﻲ ﺧﺸﺖ ﺃﻡ ﺯﻳﺎﺩ : ﺑﻌﻴﺪ ﺍﻟﺴﻮ ﻋﻠﻴﻚ ﻳﺎﺑﻨﻴﺘﻲ
ﺃﻣﻴﺮﺓ ﻧﺎﺿﺖ ﺗﺠﺮﻱ ﻭﺍﺭﺗﻤﺖ ﻓﻲ ﺣﻀﻦ ﺧﺎﻟﺘﻬﺎ ﻭﺗﺒﻜﻲ ﺑﺤﺮﻗﺔ ... ﺃﻡ
ﺯﻳﺎﺩ : ﻳﺎﺍﺑﻨﻴﺘﻲ ﺍﻟﻤﺮﺍﺓ ﻣﺎﺿﺮﺵ ﺍﻟﻤﺮﺍﺓ ﻣﺎﺩﺍﻡ ﺍﻟﺮﺍﺟﻞ ﻛﻮﻳﺲ
... ﻭﺍﻧﺘﻲ ﺯﻳﺎﺩ ﻭﻋﺎﺭﻓﺘﻴﻪ
ﺃﻣﻴﺮﺓ ﻭﺻﻮﺗﻬﺎ ﻣﺒﺤﻮﺡ ﻣﻦ ﻛﺜﺮ ﺍﻟﺒﻜﻲ : ﻳﺎﺍﺍﺍﺭﺏ ﻧﻤﻮﺕ ﻗﺒﻞ ﻳﻮﻡ ﺯﻭﺍﺟﻪ
ﺍﻡ ﺯﻳﺎﺩ : ﺑﻌﻴﺪ ﺍﻟﺸﺮ ﺍﻥ ﺷﺎﺀ ﺍﻟﻠﻪ ﻓﻲ ﺍﻟﻠﻲ ﻳﻜﺮﻫﻮﻙ
ﻧﺎﺿﺖ ﺃﻣﻴﺮﺓ ﻭﻫﻲ ﻣﺠﺮﻭﺣﺔ ﻭﺭﻛﺒﺖ ﻓﻮﻕ ﻟﺠﻨﺎﺣﻬﺎ ..
ﺍﻡ ﺯﻳﺎﺩ ﻟﺒﻨﺘﻬﺎ: ﺍﻧﺘﻲ ﻋﻼﺵ ﻗﻮﻟﺘﻴﻠﻬﺎ؟؟؟
ﻫﻨﺎﺩﻱ : ﻳﺎﻡ ﻧﺒﻲ ﻧﺮﻳﺢ ﺯﻳﺎﺩ ﻻﻧﻲ ﻋﺎﺭﻓﺔ ﻣﺶ ﺣﻴﻘﺪﺭ ﻳﻘﻮﻟﻠﻬﺎ
ﺍﻡ ﺯﻳﺎﺩ : ﺭﺑﻲ ﻳﻌﻴﻨﻚ ﻳﺎﻭﻟﻴﺪﻱ
~~~~~~~~~~~~~~~~~~~~~~~~~
ﻓﻲ ﻣﻨﻄﻘﺔ ﺛﺎﻧﻴﺔ ﻣﻦ ﻣﻨﺎﻃﻖ ﺍﻟﻤﺪﻳﻨﺔ ﺍﻟﺒﺴﻴﻄﺔ ....
ﺭﻳﻢ ﺑﺪﻟﻊ :ﻻ ﻳﺎﻣﺎﻣﺎ ﻻ
ﺍﻡ ﺭﻳﻢ : ﻧﻮﺿﻲ ﺑﺴﺮﻋﺔ ﺑﻼ ﺩﻟﻊ ﺯﺍﻳﺪ ﻗﻮﻟﻲ ﻟﻌﻤﻚ ﻉ ﺍﻟﺤﺎﺟﺎﺕ
ﺭﻳﻢ ﺑﺎﺳﺖ ﺧﺪ ﺃﻣﻬﺎ : ﺣﺎﺿﺮ ﻣﻦ ﻋﻴﻮﻧﻲ ﻳﺎﻏﺎﻟﻴﺔ ^_^
ﻣﺸﺖ ﺭﻳﻢ ﻟﻌﻤﻬﺎ ﻭﻛﺎﻥ ﻣﻘﻌﻤﺰ ﻓﻲ ﺍﻟﻤﺮﺑﻮﻋﺔ : ﺍﻟﺴﻼﻡ ﻋﻠﻴﻜﻢ ﻋﻤﻲ
ﻋﻢ ﺭﻳﻢ : ﻭﻋﻠﻴﻜﻢ ﺍﻟﺴﻼﻡ
ﺭﻳﻢ ﻣﺘﺮﺩﺩﺓ : ﻋﻤﻲ ﻧﺒﻮ ﺷﻮﻱ ﺣﺎﺟﺎﺕ ﻧﺎﻗﺼﻴﻨﺎ
ﻋﻢ ﺭﻳﻢ : ﺑﺎﻫﻲ ﺍﻥ ﺷﺎﺀ ﺍﻟﻠﻪ
ﻃﻠﻌﺖ ﺭﻳﻢ ﻣﻦ ﻋﻨﺪﻫﺎ ﻋﻤﻬﺎ ﻭﻫﻲ ﺗﻔﻜﺮ ﻓﻲ ﺣﺎﻟﻬﻢ ﻭﻛﻴﻒ ﻣﺘﺤﻤﻠﻬﻢ
ﻣﻦ ﻳﻮﻡ ﻣﺎﺗﻮﻓﻲ ﺑﻮﻫﺎ .. ﻭﺧﺼﻮﺻﺎ ﺍﻧﻪ ﺣﺎﻟﺘﻪ ﺍﻟﻤﺎﺩﻳﺔ ﺿﻌﻴﻔﺔ ﻭﺭﺑﻲ
ﺑﺎﻟﻴﻪ ﺑﺎﻟﺴﻜﻴﺮ ﺑﺲ ﻣﻊ ﻫﺎﺫﺍ ﻛﻠﻪ ﻗﺎﻳﻢ ﺑﻴﻬﻢ ...
( ﺭﻳﻢ ﺑﻨﺖ ﺣﻠﻮﺓ ﻭﺟﺴﻤﻬﺎ ﺣﻠﻮ ﻋﻤﺮﻫﺎ 18 ﺗﻘﺮﺍ ﺛﺎﻟﺚ ﺛﺎﻧﻮﻱ ... ﻋﻨﺪﻫﺎ
ﺧﻮﻫﺎ ﺻﻐﻴﺮ ﺍﺳﻤﻪ ﻭﺍﺋﻞ ﻭﺑﻮﻫﺎ ﻣﺘﻮﻓﻲ ... ﻳﺴﻜﻨﻮ ﻓﻲ ﺣﻮﺵ ﺟﻨﺐ
ﺣﻮﺵ ﻋﻤﻬﻢ )
ﻣﺮﺕ ﻋﻤﻬﺎ: ﻫﻼ ﺭﻳﻮﻣﺔ ... ﺃﺳﻤﻌﻲ ﻗﻮﻟﻲ ﻻﻣﻚ ﺗﺠﻲ ﺗﺸﺮﺏ ﻣﻌﺎﻳﺎ
ﻗﻬﻮﺓ ...
ﺭﻳﻢ : ﺣﺎﺿﺮ ﻣﻦ ﻋﻴﻮﻧﻲ
~~~~~~~~~~~~~~~~~~~~~~~~
ﻧﺎﺽ ﺯﻳﺎﺩ ﻣﻦ ﺍﻟﻨﻮﻡ ﻣﺘﺄﺧﺮ ﻭﺷﺎﻑ ﻧﻘﺎﻟﻪ ﻟﻘﻲ ﻓﻴﻪ ﺍﻛﺜﺮ ﻣﻦ ﻣﻜﺎﻟﻤﺔ
ﻣﻦ ﻋﻤﻪ ﻭﺑﻮﻩ ﻭﻭﻟﺪ ﻋﻤﻪ ﻓﺮﻳﺪ ... ﺣﻮﻝ ﺍﻟﻐﻄﺎ ﻣﻦ ﻋﻠﻴﻪ ﻭﻃﻠﻊ ﻟﻠﺼﺎﻟﺔ
ﻟﻘﻲ ﺃﻣﻴﺮﺓ ﻣﻘﻌﻤﺰﺓ ﻭﻭﺍﺿﺢ ﻋﻠﻴﻬﺎ ﺍﻟﺤﺰﻥ ..
ﻗﻌﻤﺰ ﺯﻳﺎﺩ ﺟﻨﺒﻬﺎ ﻭﺑﺤﻨﺎﻥ : ﺧﻴﺮﻫﺎ ﺃﻣﻴﺮﺗﻲ؟؟؟؟
ﻗﺎﻣﺖ ﺃﻣﻴﺮﺓ ﺭﺍﺳﻬﺎ ﻭﺟﺖ ﻋﻴﻨﻬﺎ ﻓﻲ ﻋﻴﻦ ﺯﻳﺎﺩ : ﺣﻘﺎ ﺑﺘﺘﺰﻭﺝ؟؟؟
ﺯﻳﺎﺩ ﺗﻘﻮﻝ ﻣﻦ ﺻﺐ ﻋﻠﻴﻪ ﺍﻣﻴﻪ ﺑﺎﺭﺩﺓ : ﻣﻨﻮ ﻗﺎﻟﻚ
ﺃﻣﻴﺮﺓ ﻭﺩﻣﻮﻋﻬﺎ ﻋﻠﻲ ﺧﺪﻫﺎ : ﺑﺎﻟﻠﻪ ﻋﻠﻴﻚ ﺟﺎﻭﺑﻨﻲ .. ﺑﺘﺘﺰﻭﺝ؟؟
ﺯﻳﺎﺩ ﺿﻤﻬﺎ ﻟﻴﻪ : ﺑﺎﻩ ﻗﻮﻟﻴﻠﻲ ﺷﻦ ﺍﻧﺪﻳﺮ ﻭﻛﻴﻒ ﻧﺘﺼﺮﻑ ﻭﺃﻧﻲ ﺣﺎﺿﺮ
ﺃﻣﻴﺮﺓ ﺣﺎﺿﻨﺔ ﺯﻳﺎﺩ ﺑﻜﻞ ﻗﻮﺗﻬﺎ ﺗﻘﻮﻝ ﺑﻴﻄﻴﺮ ﻣﻨﻬﺎ ﻭﺗﺒﻜﻲ ﻭﺧﻼﺹ
ﻗﻌﺪ ﺯﻳﺎﺩ ﻳﻤﺴﺤﻠﻬﺎ ﻋﻠﻲ ﺷﻌﺮﻫﺎ ﻭﺑﻬﺪﻱ ﻓﻴﻬﺎ ﻭﻫﻮ ﻳﺘﻤﻨﻲ ﻛﻞ ﺍﻟﻠﻲ
ﻗﺎﻋﺪ ﻳﺼﻴﺮﻟﻪ ﻣﺠﺮﺩ ﺣﻠﻢ ﻭﺣﻴﻨﻮﺽ ﻣﻨﻪ ..
~~~~~~~~~~~~~~~~~~~~~~~~
ﻓﺮﻳﺪ ﻳﻜﻠﻢ ﻓﻲ ﺃﺧﺘﻪ ﺩﺍﻧﺔ ﻉ ﺍﻟﺘﻠﻴﻔﻮﻥ : ﺍﻧﺘﻲ ﺗﺆﻣﺮﻱ ﻳﺎﻏﺎﻟﻴﺔ
ﺩﺍﻧﺔ : ﺳﻠﻤﻪ ﻳﺎﺭﺑﻲ ﻣﺎﻳﺆﻣﺮ ﻋﻠﻴﻚ ﻇﺎﻟﻢ
ﻓﺮﻳﺪ : ﺧﻼﺹ ﻏﺪﻭﺓ ﻧﻔﻮﺕ ﻋﻠﻴﻚ ﺍﻥ ﺷﺎﺀ ﺍﻟﻠﻪ
ﺩﺍﻧﺔ : ﺧﻼﺹ ﻧﺴﺘﻨﺎﻙ
ﺳﻜﺮ ﻓﺮﻳﺪ ﻣﻦ ﺩﺍﻧﺔ ﻭﺧﺶ ﺑﻴﺸﻮﻑ ﺑﻮﻩ ﺷﻦ ﺩﺍﺭ ﻓﻲ ﻣﻮﺿﻮﻉ ﺯﻳﺎﺩ
ﻗﺪﺭ ﻳﻘﻨﻊ ﻋﻤﻪ ﺍﻭ ﻻ ...
ﻓﻬﺪ ﻟﻘﻲ ﻋﺒﻴﺮ ﺍﺧﺘﻪ ﻣﻘﻌﻤﺰﺓ؛ ﺍﻟﺴﻼﻡ ﻋﻠﻴﻜﻢ
ﻋﺒﻴﺮ : ﻋﻠﻴﻜﻢ ﺍﻟﺴﻼﻡ ..
ﻓﺮﻳﺪ : ﺃﻣﻲ ﻭﺑﻮﻳﺎ ﻭﻳﻦ؟؟؟
ﻋﺒﻴﺮ : ﻣﺎﻧﻨﺪﺭﻳﺶ
ﻓﺮﻳﺪ ﻗﻌﻤﺰ : ﻛﻴﻒ ﻣﺎﺗﻨﺪﺭﻳﺶ؟؟؟
ﻋﻠﻲ ﺧﺸﺖ ﺍﻡ ﻓﺮﻳﺪ : ﻫﻼ ﺑﺎﻟﻐﺎﻟﻲ
ﻓﺮﻳﺪ : ﻫﻼ ﺑﺮﻭﺡ ﺍﻟﻐﺎﻟﻲ
ﺧﺶ ﺑﻮ ﻓﺮﻳﺪ : ﺍﻟﻠﻪ ﺍﻟﻠﻪ ﻗﺎﻋﺪ ﺗﺘﻐﺰﻝ ﻓﻲ ﻣﺮﺗﻲ ﻗﺪﺍﻣﻲ
ﻓﺮﻳﺪ ﻳﻀﺤﻚ ﺑﺼﻮﺕ ﻋﺎﻟﻲ : ﻫﻮ ﺍﻧﻲ ﻧﻘﺪﺭ *_^
ﺍﻡ ﻓﺮﻳﺪ ﻭﺟﻬﺎ ﺗﺤﻤﺮﻁ : ﺗﺤﺸﻢ ﻳﺎﻭﻟﺪ
(ﻋﻴﻠﺔ ﻋﻢ ﺯﻳﺎﺩ .. ﻋﻤﻪ ﻣﺤﻤﺪ ﻭﻣﺮﺕ ﻋﻤﻪ .. ﻓﺮﻳﺪ ﺭﺍﺱ ﻭﻟﺪ ﻭﺯﻭﺯ ﺑﻨﺎﺕ
ﺩﺍﻧﺔ ﻣﺘﺰﻭﺟﺔ ﻭﻋﻨﺪﻫﺎ ﺑﻨﻮﺗﻪ ... ﻭﻋﺒﻴﺮ ﺗﺤﺐ ﺧﺎﻟﺪ ﻭﻳﺤﺒﻬﺎ ﻭﺧﺎﻃﺒﻬﺎ )
~~~~~~~~~~~~~~~~~~~~~~~~~~
ﻗﺎﻡ ﺯﻳﺎﺩ ﺃﻣﻴﺮﺓ ﻭﺣﻄﻬﺎ ﻉ ﺍﻟﺴﺮﻳﺮ ﺑﻌﺪ ﻣﺎﺭﻗﺪﺕ ﻭﻫﻲ ﻓﻲ
ﺣﻀﻨﻪ ... ﻭﻃﻠﻊ ﺍﻣﺸﻲ ﻟﺤﻮﺵ ﻋﻤﻪ ﻣﺤﻤﺪ ﺑﺎﻟﻚ ﻳﻠﻘﺎﻟﻪ ﺣﻞ ﻟﻤﺼﻴﺒﺘﻪ ..
ﻫﻨﺎﺩﻱ ﺗﻜﻠﻢ ﻓﻲ ﺣﻨﻴﻦ ﺃﺧﺘﻬﺎ ﻉ ﺍﻟﺘﻠﻴﻔﻮﻥ: ﻳﺎﻭﺩﻱ ﺍﻧﺘﻲ ﺧﻴﺮﻙ ﺣﺎﺭﻗﺔ
ﺃﻋﺼﺎﺑﻚ ﺯﻳﺎﺩ ﻣﺶ ﺃﻭﻝ ﺭﺍﺟﻞ ﻳﺘﺰﻭﺝ ﻋﻠﻲ ﻣﺮﺗﻪ
ﺣﻨﻴﻦ ﺑﻌﺼﺒﻴﺔ : ﻋﺎﺭﻓﺔ ﻣﺶ ﺃﻭﻝ ﺭﺍﺟﻞ ﻳﺎﻓﺎﻟﺤﺔ ﺑﺲ ﺯﻳﺎﺩ ﻳﺤﺐ ﺃﻣﻴﺮﺓ
( ﺣﻨﻴﻦ ﺗﺤﺐ ﺃﻣﻴﺮﺓ ﺑﻨﺖ ﺧﺎﻟﺘﻬﺎ ﻫﻠﺒﺎ ﻭﻓﺮﺣﺎﻧﻪ ﺍﻥ ﺯﻳﺎﺩ ﺗﺰﻭﺟﻬﺎ)
ﻫﻨﺎﺩﻱ : ﺑﺲ ﺍﻧﺘﻲ ﻋﺎﺭﻓﺔ ﺃﻣﻴﺮﺓ ﻣﺴﺘﺤﻴﻞ ﺗﺠﻴﺐ ﺻﻐﺎﺭ ﺳﻠﻤﻴﻴﻦ
ﺣﻨﻴﻦ : ﺑﺎﻩ ﻣﺎﻋﺮﻓﺘﻴﺶ ﻣﻦ ﺑﻴﺘﺰﻭﺝ؟؟؟
ﻫﻨﺎﺩﻱ : ﻻ ﻭﺍﻟﻠﻪ
ﺧﺶ ﺯﻳﺎﺩ ﻟﺤﻮﺵ ﻋﻤﻪ ﻣﺤﻤﺪ ... ﺗﻼﻗﻲ ﻣﻊ ﻋﺒﻴﺮ ﻓﻲ ﺍﻟﺼﺎﻟﺔ
ﻋﺒﻴﺮ : ﻫﻼ ﻫﻼ ﺑﻌﻤﻲ ﺍﻟﻐﺎﻟﻲ
ﺯﻳﺎﺩ؛ ﻭﻳﻦ ﺑﻮﻙ؟؟
ﻋﺒﻴﺮ : ﻗﺎﻋﺪ ﻓﻲ ﻣﻜﺘﺒﻪ ﻫﻮ ﻭﻓﺮﻳﺪ
ﺧﺶ ﻭﺍﻭﻝ ﻣﺎﺷﺎﻓﻪ ﻋﻤﻪ ﻋﺮﻓﻪ ﺳﺒﺐ ﺟﻴﺘﻪ : ﻣﻦ ﻗﺒﻞ ﻣﺎﺗﻘﻮﻟﻲ ﻭﺍﻟﻠﻪ
ﻛﻠﻤﺘﻪ ﺑﻮﻙ ﻭﻣﺴﻜﺮ ﺭﺍﺳﻚ ﺍﻟﺨﻤﻴﺲ ﺑﻴﺨﻄﺒﻠﻚ ﺑﻨﺖ ﺧﺎﻟﻚ
ﺯﻳﺎﺩ ﺍﻧﺼﺪﻡ ؛ ﺑﺲ ﺍﻧﻲ ﻣﺎﻧﺒﻴﺶ ﺑﻨﺖ ﺧﺎﻟﻲ
ﻓﺮﻳﺪ : ﺑﺎﻩ ﺧﻼﺹ ﺍﻧﺖ ﺍﺧﺘﺎﺭ ﺑﺮﻭﺣﻚ
ﺯﻳﺎﺩ ﺑﻌﺼﺒﻴﺔ : ﻳﺼﻴﺮ ﺧﻴﺮ ﻭﻃﻠﻊ ﺑﺴﻴﺎﺭﺗﻪ ﻳﺪﻭﺭ ﻓﻲ ﺍﻟﺸﺎﺭﻉ ﻭﻣﺶ
ﻋﺎﺭﻑ ﻛﻴﻒ ﻳﻨﻘﺬ ﻧﻔﺴﻪ ﻣﻦ ﺍﻟﻤﺼﻴﺒﺔ ﺍﻟﻠﻲ ﻫﻮ ﻓﻴﻬﺎ
~~~~~~~~~~~~~~~~~~~~~~~
ﺧﺎﻟﺪ ﺭﻭﺡ ﺍﻟﺤﻮﺵ ﻭﺳﻤﻊ ﺍﻟﺨﺒﺮ ﻣﻦ ﻫﻨﺎﺩﻱ ...ﻭﻗﻌﺪ ﻳﻔﻜﺮ ﻛﻴﻒ ﻳﻠﻘﻲ
ﺣﻞ ﻟﺨﻮﻩ . ﻭﻓﻲ ﺧﺎﻃﺮﻩ ( ﻣﺎﻓﻴﺶ ﺣﻞ ﺍﻻ ﺍﻧﻪ ﻳﺘﺰﻭﺝ ﻭﺣﺪﺓ ﺍﻗﻞ ﻣﻦ
ﺃﻣﻴﺮﺓ ﻓﻲ ﻛﻞ ﺷﻲ ﻋﺸﺎﻥ ﻣﺎﺗﺤﻂ ﺭﺍﺳﻬﺎ ﺑﺮﺍﺳﻬﺎ)
ﻫﻨﺎﺩﻱ : ﺑﺎﻟﻠﻪ ﻋﻠﻴﻚ ﺍﺗﺼﻞ ﺑﻴﻪ ﻳﺎﺧﺎﻟﺪ ﻣﻦ ﺍﻟﻌﺼﺮ ﻃﻠﻊ ﻭﻣﺎﺯﺍﻝ ﻣﺎﺭﻭﺡ
ﺍﺗﺼﻞ ﺑﻴﻪ ﺧﺎﻟﺪ ﻭﻟﻘﻲ ﺗﻠﻴﻔﻮﻧﻪ ﻣﻘﻔﻞ ﺭﻋﺶ : ﺧﻴﺮﻩ ﻫﺎﺫﺍ ﻗﺎﻓﻞ
ﻧﻘﺎﻟﻪ ؟؟؟؟؟؟؟ ﺷﻮﻳﺎ ﻭﺿﺮﺏ ﺯﻳﺎﺩ
ﺧﺎﻟﺪ ﺭﺩ : ﺗﻲ ﻭﻳﻨﻚ ﻳﺎﺭﺍﺟﻞ ﻣﺴﻜﺮ ﻧﻘﺎﻟﻚ
ﺯﻳﺎﺩ ﻳﻀﺤﻚ : ﺧﻴﺮﻙ ﺷﻦ ﻓﻴﻚ؟؟؟
ﺧﺎﻟﺪ : ﺗﻀﺤﻚ ﻭﺍﺣﻨﻲ ﺧﺎﻳﻔﻴﻦ ﻭﻧﻘﻮﻟﻮ ﺑﺎﻟﻚ ﺻﺎﻳﺮ ﻓﻴﻪ ﺷﻲ
ﺯﻳﺎﺩ : ﻣﺎﺗﺨﺎﻓﺶ ﻣﺶ ﺣﻴﺼﻴﺮ ﻓﻴﺎ ﺍﻛﺜﺮ ﻣﻦ ﺍﻟﻠﻲ ﺻﺎﺭ
ﺧﺎﻟﺪ : ﺑﺎﻩ ﻏﻴﺮ ﺗﻌﺎﻝ ﻧﺒﻴﻚ
ﺯﻳﺎﺩ : ﺑﺎﻩ ﺷﻮﻱ ﺛﺎﻧﻲ ﻭﻣﺮﻭﺡ .
~~~~~~~~~~~~~~~~~~~~~~~~~~
ﺩﺍﻧﺔ ﺗﻜﻠﻢ ﻓﻲ ﺍﺧﺘﻬﺎ ﻋﺒﻴﺮ ﻉ ﺍﻟﺘﻠﻴﻔﻮﻥ .: ﺑﺎﻩ ﻭﻋﻤﻲ ﺯﻳﺎﺩ ﺷﻦ ﻗﺎﻝ؟؟
( ﻳﻌﺘﺒﺮ ﺯﻳﺎﺩ ﻋﻤﻬﻢ ﻋﻠﻲ ﺧﺎﻃﺮ ﺭﺍﺿﻊ ﻣﻊ ﻋﻤﻬﻢ ﺍﻟﻤﺘﻮﻓﻲ )
ﻋﺒﻴﺮ : ﻣﺎﻗﺎﻝ ﺷﻲ ﺷﻜﻠﻪ ﺑﻴﻮﺍﻓﻖ ﻭﺧﻼﺹ
ﺩﺍﻧﺔ : ﻣﺴﺘﺤﻴﻞ ﻳﺘﺰﻭﺝ ﺯﻳﺎﺩ ﻋﻠﻲ ﺃﻣﻴﺮﺓ ﻣﻬﻤﺎ ﺻﺎﺭ
ﻋﺒﻴﺮ : ﻏﺼﺒﺎ ﻋﻨﻪ ﺑﻴﻮﺍﻓﻖ ﻋﻤﻲ ﺣﺎﻟﻒ ﻛﺎﻥ ﻣﺎﻭﺍﻓﻖ ﺑﻴﺘﺒﺮﻱ ﻣﻨﻪ
ﺩﺍﻧﺔ : ﺣﺮﺍﻡ ﺃﻣﻴﺮﺓ ﻳﺎﻧﺎﺭﻱ ﻣﺎﺳﺪﺵ ﻣﺼﻴﺒﺘﻬﺎ ﻭﻳﺰﻳﺪﻭ ﻓﻴﻬﺎ
ﻓﺮﻳﺪ ﻓﺘﺢ ﺍﻟﺒﺎﺏ ﺑﺸﻮﻳﺎ : ﺑﻮﻭﻭﻭﻭﻭﻭﻭﻭﻭﻭ
ﻋﺒﻴﺮ ﻗﻌﻤﺰﺕ : ﻭﻭﻭﻭﻩ ﺭﻋﺸﺘﻨﻲ
ﻓﺮﻳﺪ : ﻓﻲ ﻣﻨﻮ ﺗﻜﻠﻤﻲ؟؟؟
ﻋﺒﻴﺮ : ﺩﺍﻧﺔ
ﻓﺮﻳﺪ : ﺍﻛﻴﺪ ﻋﺎﺩ ﺗﺨﺒﺮﻱ ﻓﻴﻬﺎ ﺑﺎﻟﻠﻲ ﺻﺎﺭ ﺍﻧﺘﻢ ﺍﻟﻨﺴﺎﻭﻳﻦ ﻋﺎﺩ ﻳﺎﺑﻠﺒﻮﻟﺔ
ﻣﺎﺗﻨﺒﻞ ﻓﻲ ﻓﻤﻚ ﻓﻮﻟﺔ
~~~~~~~~~~~~~~~~~~~~~~~
ﺭﻭﺡ ﺯﻳﺎﺩ ﻟﻠﺤﻮﺵ ﻭﻟﻘﻲ ﺧﺎﻟﺪ ﻳﺴﺘﻨﻲ ﻓﻴﻪ : ﺍﻫﻮ ﺭﻭﺣﺖ ﻗﻮﻝ ﺷﻦ
ﺗﺒﻲ ؟؟؟؟
ﺧﺎﻟﺪ : ﺍﻧﺖ ﻟﻴﺶ ﺭﺍﻓﺾ ﺗﺘﺰﻭﺝ؟؟؟
ﺯﻳﺎﺩ ﺑﻌﺼﺒﻴﺔ : ﻟﻴﺶ ﺭﺍﻓﺾ !!!!!!!!!!
ﺧﺎﻟﺪ : ﺯﻳﺎﺩ ﻣﻦ ﻏﻴﺮ ﺍﻧﻔﻌﺎﻝ ﺧﻠﻲ ﻧﺘﻜﻠﻤﻮ ﺑﺎﻟﻌﻘﻞ ..ﺍﻧﺖ ﻋﺎﺭﻑ ﺑﻮﻳﺎ
ﺃﻣﻨﻴﺘﻲ ﻳﺸﻮﻑ ﺻﻐﺎﺭﻙ ... ﻭﺍﻧﺖ ﻭﺃﻣﻴﺮﺓ ﻣﺴﺘﺤﻴﻞ ﺗﺠﻴﺒﻮ ﺻﻐﺎﺭ ﻳﻌﻴﺸﻮ
ﻻﻛﺜﺮ ﻣﻦ 40 ﻳﻮﻡ ﺑﺴﺒﺐ ﺟﻴﻨﺎﺗﻜﻢ
ﺯﻳﺎﺍﺩ: ﻭﺍﻧﻲ ﺭﺍﺿﻲ ﺑﺤﻴﺎﺗﻲ
ﺧﺎﻟﺪ : ﻟﻜﻦ ﺑﻮﻳﺎ ﻣﺶ ﺭﺍﺿﻲ
ﺯﻳﺎﺩ ﺑﻘﻬﺮ : ﺑﺎﻩ ﻭﺍﻧﻲ ﻣﻔﺮﻭﺽ ﺍﻧﻔﺬ ﺃﻣﻨﻴﺘﻪ
ﺧﺎﻟﺪ : ﺷﻮﻑ ﺍﻧﻲ ﻋﻨﺪﻱ ﻟﻴﻚ ﺣﻞ
ﺯﻳﺎﺩ : ﻗﻮﻝ ﺑﺴﺮﻋﺔ
ﺧﺎﻟﺪ : ﺗﺰﻭﺝ ﻭﺣﺪﺓ ﻭﻭﻗﺖ ﺗﺠﻴﺒﻠﻚ ﻃﻔﻞ ﻃﻠﻘﻬﺎ ﻻﻧﻚ ﻣﺴﺘﺤﻴﻞ ﺗﻘﺪﺭ
ﺗﻌﻴﺶ ﻣﻌﺎﻫﺎ ﻭﻫﻜﻲ ﺗﺮﺿﻲ ﺑﻮﻳﺎ ﻭﺗﻌﻴﺶ ﺣﻴﺎﺗﻚ ﻋﺎﺩﻱ
ﺯﻳﺎﺩ : ﺍﻧﻲ ﻣﺎﻧﺒﻴﺶ ﻧﻈﻠﻢ ﺣﺪ ﻭﻛﺎﻥ ﻃﻠﻘﺖ ﺍﻟﻠﻲ ﺑﻨﺘﺰﻭﺟﻬﺎ ﺑﻨﻈﻠﻤﻬﺎ ﻫﻲ
ﻭﺍﻟﺒﻴﺒﻲ ﻣﻌﺎﻫﺎ
ﺧﺎﻟﺪ : ﺍﻧﺖ ﻣﺶ ﺍﻭﻝ ﻭﻻﺍﺧﺮ ﻭﺍﺣﺪ ﻳﻄﻠﻖ ﻭﻋﻨﺪﻩ ﺻﻐﺎﺭ ﻭﺍﻟﻄﻔﻞ ﺑﻴﻌﻴﺶ
ﻋﻨﺪﻫﺎ ﻭﺍﻣﺘﻲ ﻣﺎﺗﺒﻲ ﺗﻘﺪﺭ ﺗﺸﻮﻓﻪ
ﺯﻳﺎﺩ ﺍﻗﺘﻨﻊ ﺑﺎﻟﻔﻜﺮﺓ : ﺑﺎﻩ ﻣﻨﻴﻦ ﻧﺠﻴﺒﻮﻫﺎ ﺍﻟﺰﻭﺟﺔ ﻫﺎﺫﻱ
ﺧﺎﻟﺪ : ﻭﻻﻳﻬﻤﻚ ﺗﻮ ﻧﺪﻭﺭﻟﻚ ﻋﻴﻠﺔ ﻓﻘﻴﺮﺓ ﻭﺍﻫﻠﻬﺎ ﻳﻜﻮﻧﻮ ﻣﺴﺘﻌﺪﻳﻦ ﻳﺒﻴﻌﻮ
ﻧﻔﺴﻬﻢ ﻋﻠﻲ ﺧﺎﻃﺮ ﺍﻟﻔﻠﻮﺱ
ﺯﻳﺎﺩ : ﻣﻨﻴﻦ ﺑﺘﺠﻴﺒﻬﺎ ﻫﺎﻟﻌﺎﻳﻠﺔ ؟؟؟
ﺧﺎﻟﺪ : ﻓﻲ ﻭﺍﺣﺪ ﻣﻌﺎﻧﺎ ﻓﻲ ﺍﻟﻤﺴﺘﺸﻔﻲ ﻳﺸﺘﻐﻞ ﺑﻮﺍﺏ ﻭﺳﻤﻌﺖ ﺍﻧﻪ
ﻳﺼﺮﻑ ﻋﻠﻲ ﻣﺮﺕ ﺧﻮﻩ ﻭﺑﻨﺘﻬﺎ ﻭﺍﻛﻴﺪ ﺣﻴﻮﺍﻓﻖ
ﺯﻳﺎﺩ : ﺷﻦ ﻗﺎﻟﻮﻟﻚ ﺍﻟﻔﻘﻴﺮ ﻣﺎﻋﻨﺪﺍﺵ ﻛﺮﺍﻣﺔ ﻳﻌﻨﻲ
ﺧﺎﻟﺪ : ﻫﺎﺫﺍ ﺑﺎﻟﺬﺍﺕ ﺣﻴﻮﺍﻓﻖ ﻻﻧﻪ ﺳﻜﻴﺮ ﻭﺍﻧﺖ ﻋﺎﺭﻑ ﺷﻦ ﻣﻌﻨﺎﻫﺎ
ﺳﻜﻴﺮ
ﺯﻳﺎﺩ : ﺗﻲ ﻭﻛﻴﻒ ﺗﺒﻴﻨﻲ ﺃﻧﺎﺳﺐ ﻋﻴﻠﺔ ﻛﻴﻒ ﻫﺎﺫﻱ ؟؟
ﺧﺎﻟﺪ ﺑﻤﻜﺮ: ﻫﺎﺫﺍ ﺍﻟﻤﻄﻠﻮﺏ ﻋﺸﺎﻥ ﻟﻮ ﻃﻠﻘﺘﻬﺎ ﻣﺎﺣﺪﺵ ﻳﺤﺎﺳﺒﻚ
ﺯﻳﺎﺩ : ﺑﻮﻳﺎ ﻣﺴﺘﺤﻴﻞ ﻳﻮﺍﻓﻖ
ﺧﺎﻟﺪ : ﺍﻧﺖ ﻏﻴﺮ ﺧﻠﻲ ﺍﻟﻤﻮﺿﻮﻉ ﻋﻠﻴﺎ ﻭﻣﺎﺗﺨﻤﻤﺶ ... ﺑﺲ ﺣﻘﺎ ﺗﻘﺮﻳﺒﺎ
ﺍﻟﺒﻨﺖ ﻛﺒﻴﺮﺓ ﻓﻲ ﺍﻟﻌﻤﺮ ﺭﺍﻩ
ﺯﻳﺎﺩ : ﻛﻢ ﻳﻌﻨﻲ؟؟؟؟
ﺧﺎﻟﺪ : ﺗﻘﺮﻳﺒﺎ ﻓﻲ ﺍﻟﺜﻼﺛﻴﻨﺎﺕ
ﺯﻳﺎﺩ : ﻫﺎﺫﺍ ﺍﻟﻤﻄﻠﻮﺏ ﻳﺎﻋﻴﻨﻲ ﻋﻠﻴﻚ
ﺧﺎﻟﺪ : ﺧﻼﺹ ﺗﻢ ﻭﺧﻠﻲ ﻛﻞ ﺷﻲ ﻋﻠﻴﺎ
ﺯﻳﺎﺩ ﺑﺈﺑﺘﺴﺎﻣﺔ : ﺗﻮ ﻧﺸﻮﻓﻮ ﻭﻳﻦ ﺑﺘﻮﺩﻳﻨﺎ ﺃﻓﻜﺎﺭﻙ ﻳﺎﺍﺑﻮ ﺍﻻﻓﻜﺎﺭ
~~~~~~~~~~~~~~~~~~~~~~~~~~~~
ﻛﻤﻞ ﺯﻳﺎﺩ ﻣﻊ ﺧﺎﻟﺪ ﻭﺭﻛﺐ ﻟﻠﺠﻨﺎﺡ ﺍﻟﺨﺎﺹ ﺑﻴﻪ ﻭﻟﻘﻲ ﺃﻣﻴﺮﺓ ﺗﺘﻔﺮﺝ ﻉ
ﺍﻟﺘﻠﻔﺰﻳﻮﻥ ﻭﺳﺎﺭﺣﺔ ﻗﺮﺏ ﻣﻨﻬﺎ : ﺃﻣﻴﺮﺗﻲ
ﺃﻣﻴﺮﺓ: ﻳﻤﻪ ﺭﻋﺸﺘﻨﻲ ﺣﺒﻲ
ﺯﻳﺎﺩ ﺷﺪ ﺇﻳﺪﻫﺎ ﻭﺑﺎﺳﻬﺎ : ﻫﻬﻬﻬﻬﻬﻬﻪ ﻓﻲ ﺷﻨﻮ ﺳﺮﺣﺎﻧﺔ؟؟؟
ﺃﻣﻴﺮﺓ ﻧﺰﻟﻮ ﺩﻣﻮﻋﻬﺎ ﻣﺶ ﻗﺎﺩﺭﺓ ﺗﻘﻮﻟﻪ ﻓﻲ ﺷﻨﻮ ﺳﺮﺣﺎﻧﺔ
ﺿﻤﻬﺎ ﺯﻳﺎﺩ ﻟﺼﺪﺭﻩ ﺑﺤﻨﺎﻥ : ﺃﻣﻴﺮﺗﻲ ﻋﻼﺵ ﺗﺒﻜﻲ؟؟؟
ﺭﺩﺕ ﺃﻣﻴﺮﺓ ﺑﺼﻮﺕ ﻣﺨﻨﻮﻕ : ﻛﻴﻒ ﻣﺎﺗﺒﻴﺶ ﻧﺒﻜﻲ ﻭﺍﻧﺖ ﺑﺘﺘﺰﻭﺝ؟؟؟
ﺯﻳﺎﺩ : ﺍﻟﻠﻪ ﻳﺨﻠﻴﻚ ﺳﺎﺩ ﻋﺎﺭﻓﺘﻴﻨﻲ ﻣﺎﻧﺘﺤﻤﻞ ﻧﺸﻮﻑ ﺩﻣﻌﺔ ﻣﻦ ﻋﻴﻮﻧﻚ
ﻋﻨﺪﻱ ﻧﻤﻮﺕ ﺍﺭﺣﻢ
ﺭﻓﻌﺖ ﺃﻣﻴﺮﺓ ﺭﺍﺳﻬﺎ ﻣﻦ ﻋﻠﻲ ﺻﺪﺭﻩ ﻭﺷﺎﻓﺖ ﻟﻌﻴﻮﻧﻪ : ﺑﻌﻴﺪ ﺍﻟﺸﺮ
ﻋﻠﻴﻚ
ﺯﻳﺎﺩ : ﺷﻮﻓﻲ ﺣﻴﺎﺗﻲ ﺑﻨﻘﻮﻟﻚ ﺣﺎﺟﺔ ﻭﻧﺒﻴﻚ ﺗﻔﻬﻤﻴﻬﺎ .. ﺍﻧﻲ ﻗﺮﺭﺕ ﻧﺘﺰﻭﺝ
ﻟﻜﻦ .....
ﺣﻂ ﺃﻣﻴﺮﺓ ﻳﺪﻫﺎ ﻋﻠﻲ ﻓﻤﻪ : ﺍﻟﻠﻪ ﻳﺨﻠﻴﻚ ﻣﺎﺗﻜﻤﻠﺶ
ﻣﺴﻚ ﺯﻳﺎﺩ ﺇﻳﺪﻫﺎ ﻭﺣﻄﻬﺎ ﺑﻴﻦ ﺇﻳﺪﻩ : ﺣﺒﻲ ﻫﺎﺫﺍ ﺷﻲ ﻣﻘﺪﺭ ﻭﻣﺎﻓﻴﺶ
ﻣﻨﻪ ﻫﺮﻭﺏ
ﺃﻣﻴﺮﺓ ﺗﺒﻜﻲ ﺑﺤﺮﻗﺔ :ﻣﻌﻨﺎﻫﺎ ﺍﺣﻔﺮﻟﻲ ﻗﺒﺮﻱ ﻗﺒﻞ ﻣﺎﺗﺘﺰﻭﺝ ﻭﺻﻠﻲ ﻋﻠﻴﺎ
ﻗﺒﻞ ﻳﻮﻡ ﺯﻓﺘﻚ
ﺯﻳﺎﺩ ﻣﺎﺯﺍﺩﺵ ﻭﻻﻛﻠﻤﺔ ﻛﻞ ﺍﻟﻠﻲ ﺩﺍﺭﻩ ﺿﻤﻬﺎ ﻟﺼﺪﺭﻩ ﺑﻘﻮﺓ ﺑﺎﻟﻚ ﻳﻘﺪﺭ
ﻳﺨﻔﻒ ﻋﻠﻴﻬﺎ ﺍﻻﻟﻢ ﺍﻟﻠﻲ ﺗﺤﺲ ﺑﻴﻪ
~~~~~~~~~~~~~~~~~~~~~~~~~
ﻓﻲ ﺍﻟﺼﺒﺢ ﻧﺎﺽ ﺧﺎﻟﺪ ﻣﻦ ﺍﻟﻨﻮﻡ ﻭﻧﺰﻝ ﻳﻔﻄﺮ ﻣﻊ ﺑﻮﻩ ﻭﺍﻣﻪ : ﺻﺒﺎﺡ
ﺍﻟﺨﻴﺮ
ﺍﻡ ﺯﻳﺎﺩ ﻭﺑﻮ ﺯﻳﺎﺩ : ﺻﺒﺎﺡ ﺍﻟﻨﻮﺭ
ﺧﺎﻟﺪ : ﺑﻮﻳﺎ ﻣﻤﻜﻦ ﺗﺨﻠﻴﻨﻲ ﺍﻧﻲ ﻧﺨﻄﺐ ﻟﺰﻳﺎﺩ ؟؟؟
ﺍﺑﻮ ﺯﻳﺎﺩ ﻋﺎﺭﻑ ﺍﻥ ﺧﺎﻟﺪ ﻟﻮ ﺗﺪﺧﻞ ﻓﻲ ﻣﻮﺿﻮﻉ ﺃﻛﻴﺪ ﺣﻴﻜﻤﻠﻪ : ﺍﻭﻛﻲ
ﺑﺲ ﻏﻴﺮ ﺧﻠﻴﻪ ﻳﻮﺍﻓﻖ ﺍﻻﻭﻝ
ﺧﺎﻟﺪ : ﻭﻻﻳﻬﻤﻚ ﺍﻟﻤﻮﺿﻮﻉ ﻋﻨﺪﻱ ... ﻃﻠﻊ ﺧﺎﻟﺪ ﻭﻗﻌﺪ ﻳﺘﺼﻞ ﺑﺰﻳﺎﺩ ﻟﻘﻲ
ﺗﻠﻴﻔﻮﻧﻪ ﻣﻘﻔﻞ
ﺯﻳﺎﺩ ﻧﺎﺽ ﻣﻦ ﺍﻟﻨﻮﻡ ﻭﺭﺍﺳﻪ ﻣﺼﺪﻉ ﻻﻧﻪ ﻣﺎﺭﻗﺪﺵ ﻟﻌﻨﺪ ﺻﻼﺓ
ﺍﻟﻔﺠﺮ ... ﺷﺎﻑ ﻷﻣﻴﺮﺓ ﺟﻨﺒﻪ ﻟﻘﻲ ﺃﺛﺎﺭ ﺍﻟﺪﻣﻮﻉ ﻋﻠﻲ ﺧﺪﻫﺎ ... ﺑﺎﺳﻬﺎ
ﻋﻠﻲ ﺧﺪﻫﺎ ﻭﺧﺶ ﺩﻭﺵ ﻭﻟﺒﺲ ﺩﺑﺸﻪ ﻭﻃﻠﻊ ﺑﻴﻤﺸﻲ ﻟﻌﻤﻠﻪ ..
ﺧﺎﻟﺪ ﻭﺻﻞ ﻟﻠﻤﺴﺘﺸﻔﻲ ﻭﻧﺎﺩﻱ ﻋﻢ ﺭﻳﻢ ﻋﺸﺎﻥ ﻳﻜﻠﻤﻪ .. ﺑﺲ ﻣﺎﺣﺒﺶ
ﻳﺨﺶ ﻓﻲ ﺍﻟﻤﻮﺿﻮﻉ ﻃﻮﻝ: ﺍﻧﺖ ﻛﻢ ﺭﺍﺗﺒﻚ ؟؟؟
ﻋﻢ ﺭﻳﻢ : 700 ﺩﻳﻨﺎﺭ
ﺧﺎﻟﺪ : ﺷﻮﻳﺎ ﻣﺎﻳﺪﻳﺮﻭ ﺷﻲ ﺗﻮﺍ
ﻋﻢ ﺭﻳﻢ : ﻭﺍﻟﻠﻪ ﻣﺎﻳﺪﻳﺮﻭ ﺣﺎﺟﺔ ﺧﺼﻮﺻﺎ ﺍﻧﻲ ﻧﺼﺮﻑ ﻋﻠﻲ ﻋﻴﻠﺘﻴﻦ
ﺧﺎﻟﺪ ﻳﺴﺘﻌﺒﻂ: ﻋﻴﻠﺘﻴﻦ ﻛﻴﻒ؟؟؟
ﻋﻢ ﺭﻳﻢ : ﻋﻴﻠﺔ ﺧﻮﻱ
ﺧﺎﻟﺪ : ﺧﻮﻙ ﻣﺘﻮﻓﻲ ﻗﺼﺪﻙ؟؟؟
ﻋﻢ ﺭﻳﻢ : ﺍﻱ ﻣﺘﻮﻓﻲ ﻣﻦ ﻓﺘﺮﺓ ﻭﻋﻨﺪﻩ ﻭﻟﺪ ﻭﺑﻨﺖ ﻣﺘﻜﻔﻞ ﺑﻴﻬﻢ
ﺧﺎﻟﺪ : ﺑﺎﻩ ﻋﻼﺵ ﻣﺎﺗﺰﻭﺝ ﺍﻟﺒﻨﺖ ﻭﺗﺮﺗﺎﺡ
ﻋﻢ ﺭﻳﻢ : ﻫﻮ ﺟﺎﻧﻲ ﺣﺪ ﻭﻗﻠﺖ ﻻ؟؟؟
ﺧﺎﻟﺪ : ﺑﺎﻩ ﺷﻦ ﺭﺍﻳﻚ ﻋﻨﺪﻱ ﻟﻴﻬﺎ ﻋﺮﻳﺲ ﻣﺤﺘﺮﻡ
ﻋﻢ ﺭﻳﻢ : ﺣﻘﺎ ؟؟؟؟؟؟ !!!!!!
ﺧﺎﻟﺪ : ﺍﻱ ﺑﺼﺪﻕ ﺑﺲ ﻟﺤﻈﺔ ﻫﻲ ﺍﻟﺒﻨﺖ ﻛﻢ ﻋﻤﺮﻫﺎ
ﻋﻢ ﺭﻳﻢ : 18 ﺳﻨﺔ
ﺧﺎﻟﺪ 0_0: ﻧﻌﻢ!!!!!!!!!!!
يتبع.......
