ﺯﻳﺎﺩ : ﺣﻨﺠﺮﺏ ﻭﻧﺸﻮﻑ ﺍﺻﻼ ﺧﻼﺹ ﻣﻌﺎﺵ ﻋﻨﺪﻱ ﺷﻲ ﻧﺨﺴﺮﻩ ﺃﻣﻴﺮﺓ
ﻣﺴﺘﺤﻴﻞ ﻣﺎﺯﺍﻝ ﺗﺮﺟﻌﻠﻲ
ﻓﺮﻳﺪ : ﺑﺎﻩ ﺍﺭﺟﻊ ﺑﻴﺎ ﻟﻠﺤﻮﺵ ﺑﻨﺮﻗﺪ
ﺯﻳﺎﺩ : ﻫﻬﻬﻬﻬﻬﻬﻬﻪ ﻣﻌﻠﻴﺶ ﺗﻌﺒﺘﻚ ﻣﻌﺎﻱ .... ﻭﺭﺩﻩ ﻟﻠﺤﻮﺵ
ﻧﺰﻝ ﻓﺮﻳﺪ : ﻧﺒﻲ ﻧﺴﻤﻊ ﺍﺧﺒﺎﺭ ﺣﻠﻮﺓ ﺭﺍﻩ
ﺯﻳﺎﺩ : ﺍﻥ ﺷﺎﺀ ﺍﻟﻠﻪ ﺧﻴﺮ ... ﻭﺭﻭﺡ ﺯﻳﺎﺩ ﻟﻠﺤﻮﺵ ﻭﺣﻂ ﺷﻮﻳﺔ ﺣﻮﺍﻳﺞ ﻓﻲ
ﺍﻟﺸﻨﻄﺔ ﻭﻃﻠﻊ ﻃﻮﻝ ﻟﻠﻤﺪﻳﻨﺔ ﺍﻟﻠﻲ ﻓﻴﻬﺎ ﺣﻮﺵ ﺧﺎﻟﺔ ﺭﻳﻢ ... ﻭﻭﺻﻞ
ﻣﺘﺄﺧﺮ ﻓﺤﺠﺰ ﻓﻲ ﻓﻨﺪﻕ ﻋﺸﺎﻥ ﻳﺒﺎﺕ ﻓﻴﻪ ...
~~~~~~~~~~~~~~~~~~~~~~
ﺭﻳﻢ ﻭﺍﻗﻔﺔ ﺗﺸﺒﺢ ﻟﺸﻌﺮﻫﺎ ﻓﻲ ﺍﻟﻤﺮﺍﻳﺔ: ﺣﻲ ﻋﻠﻴﺎ ﺷﻜﻠﻲ ﻗﺼﺮﺗﻪ ﻫﻠﺒﺎ
ﺭﻧﻴﻢ : ﻫﻮ ﺻﺢ ﻗﺼﻴﺮ ﺑﺲ ﻃﺎﻟﻌﺔ ﺗﻬﺒﻠﻲ
ﺭﻳﻢ : ﺧﺎﻳﻔﺔ ﺍﻣﻲ ﺗﻌﺎﺭﻛﻨﻲ ﻻﻧﻲ ﻗﺼﻴﺘﻪ
ﺭﻧﻴﻢ ﺷﺪﺗﻠﻬﺎ ﺷﻌﺮﻫﺎ ﻋﻠﻲ ﻇﻬﺮﻫﺎ: ﻣﺶ ﻗﺼﻴﺮ ﻫﻠﺒﺎ ﻫﺎ ﺷﻮﻓﻲ ﺗﺤﺖ
ﻛﺘﻮﻓﻚ ﺍﻧﺘﻲ ﺗﺤﺴﻲ ﻓﻴﻪ ﻗﺼﻴﺮ ﻉ ﺧﺎﻃﺮ ﺍﻣﺪﺭﺝ
ﺭﻳﻢ : ﻣﺶ ﻋﺎﺭﻓﺔ ﺣﺘﻲ ﻟﻮﻧﻪ ﻣﺶ ﻋﺎﺟﺒﻨﻲ
ﺭﻧﻴﻢ : ﺑﻼﺩﻟﻊ ﺍﻧﺘﻲ ﺍﺧﺘﺮﺗﻲ ﺍﻟﻠﻮﻥ ﺑﺮﻭﺣﻚ ... ﻫﻴﺎ ﺧﻠﻲ ﻧﺮﻗﺪﻭ ﺧﻴﺮ
ﻣﺎﻏﺪﻭﺓ ﻓﻲ ﺍﻟﻌﺮﺱ ﻧﺒﺎﻧﻮ ﺗﻌﺒﻨﺎﺕ ﻭﻣﺮﻫﻘﺎﺕ .
~~~~~~~~~~~~~~~~~~~~~~~~
ﻓﻲ ﺍﻟﺼﺒﺢ ﻧﺎﺽ ﻓﺮﻳﺪ ﻭﻛﺎﻥ ﻣﺘﺄﺧﺮ ﻋﻠﻲ ﺷﻐﻠﻪ ﻭﻃﺎﺭﺗﻠﻪ ﺍﻥ ﻫﻨﺎﺩﻱ
ﻣﺎﻧﻮﺿﺘﺎﺵ ...ﻏﻴﺮ ﺩﺑﺸﻪ ﻭﻧﺰﻝ ﻟﻠﻤﻄﺒﺦ ﺑﻴﻔﻄﺮ ﻟﻘﻲ ﻫﻨﺎﺩﻱ ﻣﻘﻌﻤﺰﺓ
ﻭﺗﺸﺮﺏ ﻓﻲ ﻋﺼﻴﺮ ...
ﻓﺮﻳﺪ ﺑﻌﺼﺒﻴﺔ : ﻋﻼﺵ ﻣﺎﻧﻮﺿﺘﻴﻨﻲ ؟؟؟
ﻫﻨﺎﺩﻱ ﻛﻤﻠﺖ،ﺗﺸﺮﺏ ﻓﻲ ﺍﻟﻌﺼﻴﺮ ﻭﻣﺎﺭﺩﺗﺶ ﻋﻠﻴﻪ ..
ﻓﺮﻳﺪ ﻗﺮﺏ ﻣﻨﻬﺎ : ﺍﺳﻤﻌﻲ ﻣﺎﺗﺨﻠﻴﻨﻲ ﻧﻌﺼﺐ
ﻫﻨﺎﺩﻱ ﺧﺪﺕ ﺍﻟﻄﺎﺳﺔ ﻭﻧﺎﺿﺖ ﺑﺘﻄﻠﻊ ﺷﺪﻫﺎ ﻓﺮﻳﺪ ﻣﻦ ﻳﺪﻫﺎ: ﺷﻦ
ﻗﺼﺪﻙ ﺑﺎﻟﺤﺮﻛﺎﺕ ﻫﺎﺫﻱ
ﻫﻨﺎﺩﻱ : ﻣﺎﻗﺼﺪﻱ ﺷﻲ
ﻓﺮﻳﺪ : ﻣﺶ ﻋﻠﻴﺎ ﻳﺎﺑﻨﺖ ﻋﻤﻲ
ﻫﻨﺎﺩﻱ ﺳﺤﺒﺖ ﻳﺪﻫﺎ ﻭﻃﻠﻌﺖ ﺑﺪﻭﻥ ﻣﺎﺗﺰﻳﺪﻩ ﻭﻻ ﺣﺮﻑ ... ﻭﻓﺮﻳﺪ ﻳﺘﺒﻊ
ﻓﻴﻬﺎ ﺑﻌﻴﻮﻧﻪ ﻭﻣﺴﺘﻐﺮﺏ ﻋﻼﺵ ﻫﻨﺎﺩﻱ ﺗﺘﺼﺮﻑ ﻫﻜﻲ
~~~~~~~~~~~~~~~~~~~~~~~
ﺯﻳﺎﺩ ﻧﺎﺽ ﻓﻄﺮ ﻭﺍﻣﺸﻲ ﻟﻠﺤﻼﻕ ﺣﻠﻖ ﻭﻟﺒﺲ ﺑﺪﻟﻪ ﺣﻠﻮﺓ ﻭﺧﺪﻱ
ﻣﻔﺎﺗﻴﺤﻪ ﻭﻃﻠﻊ ...
ﺭﻳﻢ ﻟﺒﺴﺖ ﻗﻔﻄﺎﻥ ﻗﺼﻴﺮ ﻭﺩﺭﺍﺕ ﺗﺴﺮﻳﺤﺔ ﺣﻠﻮﺓ ﻭﻣﻴﻚ ﺍﺏ ....
ﺍﻡ ﻓﺎﺭﺱ : ﻣﺎﺷﺎﺀ ﺍﻟﻠﻪ ﻋﻠﻲ ﺑﻨﻴﺔ ﺍﺧﺘﻲ ﻃﺎﻟﻌﺔ ﺗﻬﺒﻠﻲ
ﺭﻳﻢ ﺗﺒﻮﺱ ﺧﺎﻟﺘﻬﺎ : ﺭﺑﻲ ﻳﺨﻠﻴﻚ ﻟﻴﺎ ﻳﺎﺧﺎﻟﺘﻲ
ﺭﻧﻴﻢ ﺍﺩﻑ ﻓﻴﻬﺎ : ﻫﻴﺎ ﻫﻴﺎ
ﺭﻥ ﺟﺮﺱ ﺍﻟﺒﺎﺏ ﻭﻃﻠﻊ ﻣﻌﺎﺫ ﻳﻔﺘﺢ ﻭﺑﺼﺪﻣﺔ : ﺯﻳﺎﺩ !!!!
ﺯﻳﺎﺩ ﺣﻮﻟﺖ ﻧﻄﺎﺭﺗﻪ ﻭﺍﺑﺘﺴﻢ : ﺍﻱ ﺯﻳﺎﺩ
ﻣﻌﺎﺫ: ﺗﻔﻀﻞ ﺗﻔﻀﻞ
ﺯﺑﺎﺩ ﺧﺶ ﻭﻫﻮ ﻓﻲ ﺑﺎﻟﻪ ﻣﻦ ﺍﻟﻠﻲ ﻳﺒﻲ ﺭﻳﻢ ﻣﻌﺎﺫ ﻭﺍﻻ ﻓﺎﺭﺱ؟؟؟
ﺩﺧﻞ ﻣﻌﺎﺫ ﺯﻳﺎﺩ ﻟﻠﻤﺮﺑﻮﻋﺔ ﻭﻃﻠﻊ ﻟﺮﻧﻴﻢ : ﺗﻌﺎﻟﻲ ﺩﻳﺮﻱ ﻗﻬﻮﺓ ﻋﻨﺪﻧﺎ
ﺿﻴﻮﻑ
ﺭﻧﻴﻢ : ﺯﻳﺎﺩ ﺻﺢ؟؟؟
ﻣﻌﺎﺫ: ﻛﻴﻒ ﻋﺮﻓﺘﻲ؟؟؟
ﺭﻧﻴﻢ : ﻧﻌﺠﺒﻚ ... ﺍﺳﻤﻊ ﻣﺎﺗﻘﻮﻝ ﻟﺤﺪ ﺑﺎﻫﻲ
ﻣﻌﺎﺫ: ﺑﺎﻫﻲ ﺍﻟﻤﻬﻢ ﺍﻟﻘﻬﻮﺓ ﺑﺴﺮﻋﺔ ﺑﺲ
ﺭﻳﻢ ﻭﺍﻗﻔﺔ ﻉ ﺍﻟﻤﺮﺍﻳﺔ ﺗﺴﺎﻭﻱ ﻓﻲ ﺭﻭﺣﻬﺎ .. ﻭﺟﺖ ﺭﻧﻴﻢ ﺗﺒﺨﺒﺨﻠﻬﺎ ﻓﻲ
ﺍﻟﻌﻄﺮ
ﺭﻳﻢ : ﺳﺎﺩ ﺧﻨﻘﺘﻴﻨﻲ
ﺭﻧﻴﻢ : ﻧﺒﻴﻚ ﺗﻄﻠﻌﻲ ﺃﺣﻠﻲ ﻭﺣﺪﺓ
ﺍﻡ ﻓﺎﺭﺱ : ﻫﻴﺎ ﻳﺎﺑﻨﺎﺕ ﻋﻄﻠﻨﺎ
ﺭﻧﻴﻢ : ﺑﻨﻤﺸﻮ ﻣﻊ ﻣﻌﺎﺫ ﺍﺣﻨﻲ ... ﺍﻧﺘﻲ ﺍﻣﺸﻲ ﻣﻊ ﺧﺎﻟﺘﻲ
ﺭﻳﻢ : ﻻ ﻣﺎﻧﻘﺪﺭﺵ ﻧﻤﺸﻲ ﻣﻊ ﻣﻌﺎﺫ ... ﺭﻳﺤﺘﻲ،ﻛﻠﻬﺎ ﻋﻄﺮ
ﺭﻧﻴﻢ ﻛﺮﺗﻬﺎ : ﻏﻴﺮ ﺗﻌﺎﻟﻲ ﻧﺒﻴﻚ ﺷﻮﻱ
ﺍﻡ ﻓﺎﺭﺱ : ﺩﺑﺮﻭ ﺭﻭﺳﻜﻢ ﺃﻧﻲ ﺑﻨﻤﺸﻲ
ﺯﻳﺎﺩ ﻣﻘﻌﻤﺰ ﻣﻊ ﻣﻌﺎﺫ ﻭﺍﻧﺴﺠﻢ ﻣﻌﺎﻩ ﻻﻧﻪ ﺟﻮﻩ ﺣﻠﻮ: ﻣﻤﻜﻦ ﺗﻨﺎﺩﻳﻠﻲ
ﺭﻳﻢ؟؟؟
ﻣﻌﺎﺫ ﺍﺗﺼﻞ ﺑﺮﻧﻴﻢ ﻭﻗﺎﻟﻠﻬﺎ ﺍﻥ ﺯﻳﺎﺩ ﻳﺒﻲ ﻳﺸﻮﻑ ﺭﻳﻢ .
ﺭﻧﻴﻢ : ﺭﻳﻢ ﺗﻌﺎﻟﻲ ﺑﻨﻮﺭﻳﻚ ﺣﺎﺟﺔ ﻓﻲ ﺍﻟﻤﺮﺑﻮﻋﺔ
ﺭﻳﻢ : ﺍﻧﺘﻲ ﺧﻴﺮﻙ ﺍﻟﻴﻮﻡ ؟؟؟؟
ﺭﻧﻴﻢ : ﻏﻴﺮ ﺗﻌﺎﻟﻲ ﺑﺲ ....ﻭﻭﺻﻠﻮ ﻟﻌﻨﺪ ﺍﻟﻤﺮﺑﻮﻋﺔ : ﺣﻲ ﻧﺴﻴﺖ ﺣﺎﺟﺔ
ﺧﺸﻲ ﺍﻧﺘﻲ ﻭﺗﻮ ﻧﺠﻲ
ﺧﺸﺖ ﺭﻳﻢ ﻟﻠﻤﺮﺑﻮﻋﺔ ﻭﺍﻧﺼﺪﻣﺖ ﺷﺎﻓﺖ ﺍﺧﺮ ﺷﺨﺺ ﻣﺘﻮﻗﻌﺔ
ﺗﺸﻮﻓﻪ ...... ﺯﻳﺎﺩ ﻗﻌﺪ ﻳﺸﺒﺤﻠﻬﺎ ﻣﻦ ﻓﻮﻕ ﻟﺘﺤﺖ ﺑﺪﻫﺸﺔ ... ﻭﺩﻗﺎﻳﻖ
ﻭﻫﻤﺎ ﻋﻴﻮﻧﻬﻢ ﻣﻌﻠﻘﺔ ﻓﻲ ﺑﻌﺾ ...
ﺯﻳﺎﺩ : ﺷﻦ ﺍﺧﺒﺎﺭﻙ؟؟؟
ﺭﻳﻢ : ﺍﻟﺤﻤﺪ ﻟﻠﻪ ﻛﻮﻳﺴﺔ
ﺯﻳﺎﺩ : ﺷﻦ ﻣﺎﺗﺒﻴﺶ ﺗﻌﺮﻓﻲ ﺍﺧﺒﺎﺭﻱ؟؟؟؟
ﺭﻳﻢ : ﻣﺎﻳﻬﻤﻨﻴﺶ
ﺯﻳﺎﺩ : ﺑﺎﻫﻲ ﻣﺎﺗﺒﻴﺶ ﺗﻌﺮﻓﻲ ﻋﻼﺵ ﺟﺎﻱ؟؟؟؟
ﻧﺰﻟﺖ ﺭﻳﻢ ﻋﻴﻮﻧﻬﺎ ﻟﻮﻃﺎ : ﺍﻱ ﺣﺎﺟﺔ ﺗﺨﺼﻚ ﻣﺎﺗﻬﻤﻨﻴﺶ
ﺯﻳﺎﺩ : ﺑﺎﻩ ﺍﺭﻓﻌﻲ ﻋﻴﻮﻧﻚ ﻭﺍﻧﺘﻲ ﺗﻜﻠﻤﻲ ﻓﻴﺎ
ﺭﻳﻢ : ﺷﻦ ﺍﻟﻔﺎﻳﺪﺓ ﻣﺎﻓﻲ ﺷﻲ ﺣﻴﺘﻐﻴﺮ
ﺯﻳﺎﺩ : ﺑﺎﻟﻚ ﺗﺸﻮﻓﻴﻨﻲ ﻭﺗﺼﻌﺐ ﻋﻠﻴﻚ ﺣﺎﻟﺘﻲ
ﺭﻳﻢ : ﻣﻤﻜﻦ ﺗﻘﻮﻝ ﺷﻦ ﺗﺒﻲ ﺑﺴﺮﻋﺔ ﻻﻧﻲ ﻣﺸﻐﻮﻟﺔ
ﻗﺮﺏ ﻣﻨﻬﺎ ﺯﻳﺎﺩ ﻭﻣﺴﻜﻠﻬﺎ ﺇﻳﺪﻫﺎ : ﻣﺎﻛﻨﺘﺶ ﻧﺘﻮﻗﻊ ﺑﻌﺪﻱ ﻋﻠﻴﻚ ﺣﻴﺨﻠﻴﻚ
ﺣﻠﻮﺓ ﻫﻜﻲ
ﺭﻳﻢ ﻧﺰﻟﺖ ﻋﻴﻮﻧﻬﺎ : ﺍﻧﺖ ﺷﻦ ﺟﺎﺑﻚ؟؟؟
ﺯﻳﺎﺩ : ﺟﺎﺑﻨﻲ ﺍﻟﺸﻮﻕ
ﺭﻳﻢ : ﺷﻮﻕ ﺟﻲ ﻣﺘﺄﺧﺮ
ﺯﻳﺎﺩ ﻗﺮﺏ ﻭﺑﺎﺱ ﺟﺒﻬﺘﻬﺎ: ﺍﻧﺴﻲ ﻛﻞ ﺍﻟﻠﻲ ﻓﺎﺕ ﻭﺧﻠﻴﻨﺎ ﻧﻔﺘﺤﻮ ﺻﻔﺤﺔ
ﺟﺪﻳﺪﺓ
ﺭﻳﻢ : ﻣﻌﺎﺵ ﻓﻲ ﺑﻴﻨﺎ ﺻﻔﺤﺎﺕ ﻧﻔﺘﺤﻮﻫﻢ
ﺯﻳﺎﺩ : ﺍﻧﻲ ﺑﻴﻦ ﺇﻳﺪﻳﻚ ﻭﻃﺎﻟﺐ ﺍﻟﺴﻤﺎﺡ
ﺭﻳﻢ : ﺧﺎﻳﻔﺔ ﺗﻔﺘﺤﻠﻲ ﺟﺮﻭﺣﻲ ﻭﺗﺨﻠﻴﻬﺎ ﺗﻨﺰﻑ
ﺯﻳﺎﺩ ﺣﻀﻨﻬﺎ : ﻭﺍﻟﻠﻪ ﺍﻧﻲ ﻣﺤﺘﺎﺟﻠﻚ ﺍﻛﺜﺮ ﻣﺎﻧﺘﻲ ﻣﺤﺘﺎﺟﺘﻴﻨﻲ ... ﻭﺑﻌﺪﻳﻦ
ﻣﺴﻚ ﻭﺟﻬﺎ ﺑﻴﻦ ﺇﻳﺪﻳﻪ : ﺗﻌﺮﻓﻲ ﺍﻧﻚ ﺣﻠﻮﺓ
ﺭﻳﻢ : ﻋﻴﻮﻧﻚ ﺍﻟﺤﻠﻮﺓ
ﺯﻳﺎﺩ : ﻳﻌﻨﻲ ﻧﻔﻬﻢ ﺍﻧﻚ ﻣﻌﺠﺒﺔ ﺑﻌﻴﻮﻧﻲ ﻫﻬﻬﻬﻬﻬﻬﻬﻬﻪ
ﺭﻳﻢ ﺗﺤﺸﻤﺖ : ﻻ ﻣﺎﻗﻮﻟﺘﺶ ﻫﻜﻲ
ﺯﻳﺎﺩ ﺑﺎﺳﻬﺎ ﻋﻠﻲ ﺷﻔﺎﻳﻔﻬﺎ ﻭﺗﺒﻌﺘﻬﺎ ﻛﺬﺍ ﺑﻮﺳﺔ ﻉ ﺍﻟﺨﺪﻭﺩ ﻭﺍﻟﺸﻔﺎﻳﻒ ...
ﺭﻧﻴﻢ ﺧﺎﻓﺖ ﺍﻥ ﺭﻳﻢ ﺗﺄﺧﺮﺕ ﻭﺍﻣﺸﺖ ﺧﺒﻄﺖ ﺍﻟﺒﺎﺏ ... ﺯﻳﺎﺩ ﺑﻌﺪ ﻋﻠﻲ
ﺭﻳﻢ ﻭﻫﻮ ﻳﻀﺤﻚ : ﺷﻦ ﺩﺭﺗﻲ ﻓﻴﺎ ﻳﺎﺑﻨﺖ
ﺭﻳﻢ ﺗﺴﺎﻭﻱ ﻓﻲ ﺷﻌﺮﻫﺎ : ﻣﺎﺩﺭﺕ ﺷﻲ
ﺯﻳﺎﺩ : ﺑﺎﻫﻲ ﺷﻮﻓﻲ ﻣﻦ ﻳﺨﺒﻂ ﺍﻟﺒﺎﺏ
ﺭﻳﻢ : ﺍﻛﻴﺪﺓ ﻫﺎﺫﻱ ﺭﻧﻴﻢ ﺑﻨﺖ ﺧﺎﻟﺘﻲ ﺗﺎﺧﺮﻧﺎ ﻉ ﺍﻟﺼﺎﻟﺔ ﺍﻟﻴﻮﻡ ﻋﺮﺱ
ﻓﺎﺭﺱ
ﺯﻳﺎﺩ : ﺑﺎﻩ ﺍﻣﺸﻴﻠﻬﺎ ﻭﺟﻴﺒﻴﻠﻲ ﻃﺎﺳﺔ ﺍﻣﻴﺔ
ﺭﻳﻢ : ﺣﺎﺿﺮ .... ﻭﻃﻠﻌﺖ ﻭﻗﻌﺪ ﺯﻳﺎﺩ ﻳﺸﺒﺤﻠﻬﺎ ﻭﺑﻀﺤﻚ ﻋﻠﻲ ﺭﻭﺣﻪ
( ﻫﺎﻟﺒﻨﺖ ﻫﺎﺫﻱ ﻫﺒﻠﺘﻨﻲ ﺭﺳﻤﻲ) ....
ﺭﻧﻴﻢ ﺷﺎﻓﺖ ﻭﺟﻪ ﺭﻳﻢ ﻣﺘﻐﻴﺮ : ﺧﻴﺮﻙ ﺷﻦ ﺩﺍﺭﻟﻚ؟؟؟ ﺿﺮﺑﻚ؟؟؟؟
ﺭﻳﻢ ﺧﺪﺕ ﺍﻳﺪ ﺭﻧﻴﻢ ﻭﺣﻄﺘﻬﺎ ﻉ ﻗﻠﺒﻬﺎ : ﺷﻮﻓﻲ ﺷﻦ ﺩﺍﺭ ﻓﻴﺎ
ﺭﻧﻴﻢ : ﻳﺎﻋﻴﻨﻲ ﻳﺎﻋﻴﻨﻲ ﻉ ﺍﻟﺤﺐ ... ﺑﺎﻩ ﺷﻦ ﻗﺎﻟﻚ؟؟؟
ﺭﻳﻢ : ﻗﺎﻟﻲ ﻧﻨﺴﻮ ﺍﻟﻤﺎﺿﻲ
ﺭﻧﻴﻢ : ﻭﺍﻧﺘﻲ ﺷﻦ ﻗﻠﺘﻲ؟
ﺭﻳﻢ : ﻣﺎﻗﻠﺖ ﺷﻲ ... ﺑﺲ ﺑﻨﻮﺍﻓﻖ ﻭﻧﺸﻮﻑ ﺟﺮﺡ ﻭﺟﺮﺣﻨﻲ ﻣﻦ ﻗﺒﻞ ﺷﻦ
ﺑﻴﺠﻴﻨﻲ ﺍﻛﺜﺮ
ﺭﻧﻴﻢ : ﺍﻳﻮﻩ ﻫﻜﻲ ﺗﻌﺮﻓﻲ ﺗﻔﻜﺮﻱ ... ﺧﻔﺘﻚ ﺗﺮﻓﻀﻲ
ﺭﻳﻢ : ﺣﺘﻲ ﺍﻧﻲ ﻣﺤﺘﺎﺟﻠﺘﻪ ... ﻭﺍﻻ ﺗﺒﻲ ﻋﻤﻲ ﻳﺮﺟﻊ ﻳﺒﻴﻌﻨﻲ ﻟﻐﻴﺮﻩ ﻣﻦ
ﺟﺪﻳﺪ
ﺭﻧﻴﻢ : ﺧﻼﺹ ﺍﺭﺟﻌﻴﻠﻪ ﻭﺧﻠﻴﻪ ﻣﺎﻳﺸﻮﻑ ﻏﻴﺮﻙ
ﺭﻳﻢ ﺗﺼﺐ ﻓﻲ ﺍﻟﻤﻴﺔ : ﺧﺎﻳﻔﺔ ﺧﻴﺎﻝ ﺍﻣﻴﺮﺓ ﻳﺪﻣﺮ ﺣﻴﺎﺗﻲ
ﺭﻧﻴﻢ : ﻓﺎﺭﺱ ﻗﺎﻝ ﺍﻥ ﻭﻟﺪ ﻋﻤﻬﺎ ﺧﻄﺒﻬﺎ ﻭﻋﺮﺳﻬﻢ ﺑﻤﺠﺮﺩ ﻣﺎﺍﺗﻢ ﺃﻣﻴﺮﺓ
ﻋﺪﺗﻬﺎ
ﺭﻳﻢ : ﻭﻓﺎﺭﺱ ﻛﻴﻒ ﻋﺮﻑ؟؟؟؟
ﺭﻧﻴﻢ : ﻓﺎﺭﺱ ﻭﻋﺎﺩﻝ ﻛﺎﻧﻮ ﻳﻘﺮﻭ ﻣﻊ ﺑﻌﺾ ﻭﻛﺎﻧﻮ ﺯﻱ ﺍﻟﺨﻮﺕ .... ﺭﻳﻢ
ﺻﺒﺖ ﺍﻟﻤﻴﺔ ﻭﺩﺧﻠﺘﻬﺎ ﻟﺰﻳﺎﺩ ﻓﻲ ﺍﻟﻤﺮﺑﻮﻋﺔ
ﺯﻳﺎﺩ : ﺭﺑﻲ ﻣﺎﻳﺤﺮﻣﻨﻲ ﻣﻨﻚ ....ﻭﺧﺪﻱ ﺍﻟﻄﺎﺳﺔ ﻭﻗﻌﺪ ﻳﺸﺮﺏ ﻭﺭﻳﻢ
ﻣﻘﻌﻤﺰﺓ ﻭﺗﺸﺒﺤﻠﻪ
ﺯﻳﺎﺩ ﺣﻂ ﺍﻟﻄﺎﺳﺔ : ﺷﻦ ﻫﺎﻟﻨﻈﺮﺍﺕ ﺍﻋﺠﺎﺏ ﻭﺍﻻ ﺣﺪ،ﻭﺍﻻ ﺣﻘﺪ
ﺭﻳﻢ : ﻣﺶ ﻻﺯﻡ ﺗﻌﺮﻑ
ﺯﻳﺎﺩ ﻭﻗﻒ: ﺣﻘﺎ ﺍﻧﺘﻲ ﺑﺠﺪ ﺗﺒﻲ ﺗﺘﺰﻭﺟﻲ ﻣﻌﺎﺫ؟؟؟
ﺭﻳﻢ ﺿﺤﻜﺖ ... ﺯﻳﺎﺩ : ﺍﻇﻨﻲ ﻣﺎﻗﻠﺘﺶ ﻧﻜﺘﺔ ﺻﺢ
ﺭﻳﻢ : ﻛﺎﻥ ﻗﺼﺪﻙ ﻉ ﺍﻟﺮﺳﺎﻟﺔ ... ﺑﻨﺖ ﺧﺎﻟﺘﻲ ﻫﻲ ﺍﻟﻠﻲ ﺑﻌﺘﺘﻬﺎ ﻣﺶ ﺍﻧﻲ
ﺯﻳﺎﺩ : ﺑﺎﻩ ﻋﻼﺵ
ﺭﻳﻢ ﺣﺒﺖ ﺗﺜﻴﺮ ﻏﻴﺮﺗﻪ : ﻻﻧﻬﺎ ﺗﺒﻴﻨﻲ ﻟﺨﻮﻫﺎ ... ﻭﻏﻤﻀﺖ ﻋﻴﻮﻧﻬﺎ ﻻﻧﻬﺎ
ﺗﻮﻗﻌﺖ ﺯﻳﺎﺩ ﻳﺸﺪﻟﻬﺎ ﻭﺷﻌﺮﻫﺎ ﺍﻭ ﻳﻀﺮﺑﻬﺎ ﻛﻒ
ﺯﻳﺎﺩ ﺑﺄﺑﺘﺴﺎﻣﺔ : ﻋﻼﺵ ﻣﻐﻤﻀﺔ ﻋﻴﻮﻧﻚ؟؟؟
ﺭﻳﻢ : ﺧﻔﺖ ﻣﻦ ﺭﺩﺕ ﻓﻌﻠﻚ
ﺯﻳﺎﺩ : ﺍﻣﺸﻲ ﺟﻴﺒﻲ ﺣﻮﺍﻳﺠﻚ ﺑﻨﻤﺸﻮ ...
ﺭﻳﻢ : ﺑﻨﻤﺸﻲ ﻟﻠﺼﺎﻟﺔ ﻧﺤﻀﺮ ﺣﻔﻠﺔ ﻓﺎﺭﺱ ﻗﺒﻞ
ﺯﻳﺎﺩ : ﺑﺎﻫﻲ ﻏﻴﺮ ﺟﻴﺒﻲ ﺣﺎﺟﺎﺗﻚ ﻭﺗﻮ ﻧﺮﻓﻌﻚ ...
ﺭﻳﻢ : ﺍﻭﻛﻲ ..... ﻭﻃﻠﻌﺖ ﻭﺯﻳﺎﺩ ﻳﻔﻜﺮ ﺑﻴﻨﻪ ﻭﺑﻴﻦ ﻧﻔﺴﻪ ﺯﻋﻤﺎ ﻫﻮ ﻓﻌﻼ
ﻳﺤﺐ ﺭﻳﻢ ﻭﺍﻻ ﻫﻮ ﺑﺲ ﻣﻔﺘﻮﻥ ﺑﻴﻬﺎ ﻛﺎﻣﺮﺃﺓ ﻭﺧﻼﺹ
~~~~~~~~~~~~~~~~~~~~~~
ﻫﻨﺎﺩﻱ ﻃﻮﻝ ﺍﻟﻴﻮﻡ ﻛﺎﻧﺖ ﻓﻲ ﺣﻮﺵ ﺍﻫﻠﻬﺎ ﻭﻣﺴﻜﺮﺓ ﻧﻘﺎﻟﻬﺎ ﻭﻛﻞ
ﻣﺎﻳﺘﺼﻞ ﻓﺮﻳﺪ ﺑﺤﻮﺷﻬﻢ ﻳﻘﻮﻟﻮﻟﻪ ﺭﺍﻗﺪﺓ ...ﻭﻋﺒﻴﺮ ﺣﺘﻲ ﻫﻴﺎ ﻣﺴﻜﺮﺓ
ﻧﻘﺎﻟﻬﺎ
ﺭﻭﺣﺖ ﺑﻌﺪ ﺍﻟﻤﻐﺮﺏ ... ﻓﺘﺤﺖ ﻫﻨﺎﺩﻱ ﺍﻟﺒﺎﺏ ﻭﺧﺸﺖ ...ﻭﻓﺮﻳﺪ ﺍﻭﻝ
ﻣﺎﺷﺎﻓﻬﺎ ﻭﻗﻒ : ﻣﺎﺯﺍﻝ ﺑﺪﺭﻱ ﻋﻼﺵ ﺟﺎﻳﺔ
ﻫﻨﺎﺩﻱ : ﻗﺒﻞ ﻣﺶ ﺣﻨﺠﻲ
ﻓﺮﻳﺪ : ﻭﻳﻦ ﻛﻨﺘﻲ
ﻫﻨﺎﺩﻱ : ﻭﻳﻦ ﺑﻨﻜﻮﻥ ﻳﻌﻨﻲ !!!!
ﻓﺮﻳﺪ ﺑﻌﺼﺒﻴﺔ : ﺗﻌﺮﻓﻲ ﺍﻟﺒﺎﺏ ﻫﺎﺫﺍ ﻣﺎﺯﺍﻝ ﺗﻄﻠﻌﻲ ﻣﻨﻪ ﻣﺎﺗﻠﻮﻣﻲ ﺍﻻ
ﻧﻔﺴﻚ ﻓﺎﻫﻤﺔ
ﻫﻨﺎﺩﻱ : ﺑﻨﻄﻠﻊ ﻭﻣﺎﺗﻬﻤﻨﻴﺶ
ﻓﺮﻳﺪ : ﺟﺮﺑﻲ ﺍﻃﻠﻌﻲ ﻭﺷﻮﻓﻲ ﺷﻦ ﻳﺼﻴﺮﻟﻚ
ﻫﻨﺎﺩﻱ ..................
ﻃﻠﻊ ﺯﻳﺎﺩ ﻭﻗﺮﺑﻊ ﺍﻟﺒﺎﺏ ﺑﻘﻮﺓ ..ﻭﺍﺗﺼﻠﺖ ﺑﻴﻪ ﻋﺒﻴﺮ ﺑﻌﺪ ﻣﺎﻟﻘﺎﺗﻪ ﺑﺎﻋﺘﻠﻬﺎ
ﺍﻛﺜﺮ ﻣﻦ ﻋﺸﺮﻳﻦ ﻣﺴﺞ
ﻋﺒﻴﺮ : ﻓﺮﻳﺪ ﺷﻦ ﻓﻲ ؟؟؟؟
ﻓﺮﻳﺪ : ﻻ ﻻ ﻏﻴﺮ ﻛﻨﺖ ﻧﺸﻮﻑ ﻓﻲ ﻫﻨﺎﺩﻱ ﻋﻨﺪﻛﻢ ﺍﻭ ﻻ؟
ﻋﺒﻴﺮ : ﻋﻼﺵ ﻫﻲ ﻣﺎﺭﻭﺣﺘﺶ؟؟؟؟
ﻓﺮﻳﺪ : ﻻ ﺭﻭﺣﺖ ﺑﺲ ﺧﻔﺖ ﻋﻠﻴﻬﺎ ﺑﻌﺪ ﺗﺄﺧﺮﺕ
ﻋﺒﻴﺮ : ﺍﻫﺎ ... ﻛﻨﺎ ﻓﻲ ﺍﻟﺴﻮﻕ ﻫﺎﺫﺍ ﻋﻼﺵ ﺗﺄﺧﺮﻧﺎ
ﻓﺮﻳﺪ : ﺑﺎﻫﻲ ﺑﺎﻩ ..... ﻫﻴﺎ ﺳﻼﻡ ﺗﻮﺍ ﻧﻌﺴﺎﻥ ﺑﻨﺮﻗﺪ ﻋﺒﻮﺭﺓ
ﻋﺒﻴﺮ : ﺍﻭﻛﻲ ﻧﻮﻡ ﺍﻟﻌﻮﺍﻓﻲ
ﺳﻜﺮ ﻓﺮﻳﺪ ﻣﻦ ﻋﺒﻴﺮ ﻭﻫﻮ ﻣﻨﻘﻬﺮ ﻋﻼﺵ ﻣﺎﺷﺎﻭﺭﺍﺗﻪ ﻫﻨﺎﺩﻱ ﻗﺒﻞ
ﻣﺎﺗﻤﺸﻲ ﻟﻠﺴﻮﻕ .... ﺍﻣﺎ ﻫﻨﺎﺩﻱ ﻓﺎﺭﺗﻤﺖ ﻉ ﺍﻟﺴﺮﻳﺮ ﻭﻃﺎﺣﺖ ﻓﻴﻬﺎ
ﺍﺑﻜﻲ
~~~~~~~~~~~~~~~~~~~~~~~~
ﺯﻳﺎﺩ ﺣﻂ ﺭﻳﻢ ﻗﺪﺍﻡ ﺍﻟﺼﺎﻟﺔ : ﻫﻴﺎ ﻧﺴﺘﻨﻲ ﻓﻴﻚ ﻧﺺ ﺳﺎﻋﺔ ﻭﺍﻃﻠﻌﻲ
ﺭﻳﻢ : ﺍﻧﺖ ﻣﺶ ﻧﺎﺯﻝ
ﺯﻳﺎﺩ : ﺑﻨﻨﺰﻝ ﻧﺒﺎﺭﻙ ﻭﻧﻄﻠﻊ
ﺭﻳﻢ : ﺍﻭﻛﻲ ....ﺑﺎﻱ ﺗﻮﺍ
ﺯﻳﺎﺩ ﺿﺤﻚ ﻭﺍﻣﺸﻲ ﻟﻠﺮﺟﺎﻟﺔ .... ﻭﺭﻳﻢ ﺧﺸﺖ ﻭﻗﻌﻤﺰﺕ ﻓﻲ ﺟﻨﺐ ﺭﻧﻴﻢ
ﺭﻧﻴﻢ : ﻳﺎﺍﻭﺧﻴﺘﻲ ﺭﺍﺟﻠﻚ ﻳﻬﺒﻞ ﻣﺎﻧﻠﻮﻣﻜﺶ ﻓﻲ ﺣﺒﻪ ﺍﻟﺤﻖ
ﺭﻳﻢ : ﻭﺍﻧﺘﻲ ﻭﻳﻦ ﺷﻔﺘﻴﻪ 0_0
ﺭﻧﻴﻢ : ﺗﻮﺍ ﺷﻔﺘﻪ ﻭﻫﻮ ﺟﺎﻳﺒﻚ
ﺍﻡ ﻓﺎﺭﺱ : ﻭﻳﻨﻚ ﺭﻳﻢ ﻟﺘﻮﺍ ﺗﺄﺧﺮﺗﻲ
ﺭﻳﻢ : ﺟﻲ ﺯﻳﺎﺩ ﻭﺃﺧﺮﻧﺎ ﺷﻮﻱ
ﺍﻡ ﺭﻳﻢ : ﻭﺷﻦ ﺗﺼﺎﻟﺤﺘﻮ؟؟؟؟
ﺭﻳﻢ ﺑﺄﺑﺘﺴﺎﻣﺔ : ﺍﻳﻪ
ﺍﻣﻬﺎ ﺣﻀﻨﺘﻬﺎ : ﺭﺑﻲ ﻳﻬﺪﻱ ﺳﺮﻛﻢ ﻳﺎﺍﺑﻨﻴﺘﻲ
ﺯﻳﺎﺩ ﺑﺎﺭﻙ ﻟﻔﺎﺭﺱ ﻭﻉ ﺍﺳﺎﺱ ﺑﻴﻤﺸﻲ ﺑﺲ ﺷﺪﻭ ﻓﻴﻪ ﻟﻠﻌﺸﻲ ﻓﺎﺿﻄﺮ
ﻳﻘﻌﺪ ﻭﻳﺴﺎﻳﺮﻫﻢ
ﺟﺖ ﺍﻟﻌﺮﻭﺳﺔ ﻭﻛﺎﻧﺖ ﻃﺎﻟﻌﺔ ﺯﻱ ﺍﻟﻘﻤﺮ ﻭﺑﺪﻭ ﺍﻟﺒﻨﺎﺕ ﻳﻬﻴﺠﻮ
ﻭﻳﺮﻗﺼﻮ .... ﻭﺟﻮﻫﻢ ﺗﻤﺎﻡ ...ﺷﻮﻳﺎ ﻭﻗﺎﻟﻮ ﻓﺎﺭﺱ ﺑﻴﺨﺶ ...
ﺯﻳﺎﺩ ﺍﺗﺼﻞ ﺑﺮﻳﻢ ﺑﻌﺪ ﺧﺶ ﻓﺎﺭﺱ : ﻫﻴﺎ ﺍﻃﻠﻌﻲ ﻧﺴﺘﻨﻲ ﻓﻴﻚ ﻭﻗﻮﻟﻲ
ﻻﻣﻚ ﺗﻄﻠﻌﻠﻲ ﻧﺒﻲ ﻧﺴﻠﻢ ﻋﻠﻴﻬﺎ
ﺍﺳﺘﻐﺮﺑﺖ ﺭﻳﻢ ﻣﻦ ﻃﻠﺒﻪ ﻻﻥ ﺯﻳﺎﺩ ﻣﺶ ﻣﻬﺘﻢ ﺑﺄﻫﻠﻬﺎ ﻭﻻﻳﺪﻭﺭ
ﻓﻴﻬﻢ ...ﺭﻳﻢ : ﻣﺎﻣﺎ ﺯﻳﺎﺩ ﻳﺒﻴﻚ ﺑﺮﺍ
ﺍﻡ ﺭﻳﻢ ﺑﺎﺳﺘﻐﺮﺍﺏ : ﺷﻦ ﺑﺒﻲ؟؟؟
ﺭﻳﻢ ﺑﺄﺑﺘﺴﺎﻣﺔ : ﻳﺒﻲ ﻳﺴﻠﻢ ﻋﻠﻴﻚ
ﻭﻃﻠﻌﻮ .... ﻭﺍﻭﻝ ﻣﺎﺷﺎﻓﻬﻢ ﺯﻳﺎﺩ ﻧﺰﻝ ﻣﻦ ﺍﻟﺴﻴﺎﺭﺓ ﻭﺑﺎﺱ ﻋﻠﻲ ﺭﺍﺱ
ﺍﻡ ﺭﻳﻢ : ﻛﻴﻒ ﺣﺎﻟﻚ ﻳﺎﺧﺎﻟﺘﻲ
ﺍﻡ ﺭﻳﻢ : ﺍﻟﻠﻪ ﻳﺴﻠﻤﻚ ﻳﺎﻭﻟﺪﻱ
ﺯﻳﺎﺩ : ﺑﻨﺮﻭﺡ ﺑﺮﻳﻢ ﻭﺍﻥ ﺷﺎﺀ ﺍﻟﻠﻪ ﻧﺸﻮﻓﻮﻙ ﻋﻦ ﻗﺮﻳﺐ
ﺍﻡ ﺭﻳﻢ : ﺭﺑﻲ ﻳﺴﻌﺪﻛﻢ ﻳﺎﺭﺏ .. ﻭﺭﺩ ﺑﺎﻟﻚ ﻣﻨﻬﺎ
ﺯﻳﺎﺩ : ﺭﻳﻢ ﻓﻲ ﻋﻴﻮﻧﻲ ﻳﺎﺧﺎﻟﺘﻲ ﻣﺎﺗﻮﺻﻴﻨﻲ ﻋﻠﻴﻬﺎ
ﻭﺍﻣﺸﻮ ﺯﻳﺎﺩ ﻭﺭﻳﻢ ﻟﻠﻔﻨﺪﻕ ﻭﻗﻀﻮ ﻟﻴﻠﺔ ﻣﻦ ﺍﺣﻠﻲ ﺍﻟﻠﻴﺎﻟﻲ ﻣﻊ
ﺑﻌﺾ ....
~~~~~~~~~~~~~~~~~~~~~~~~~
ﻓﻲ ﺍﻟﺼﺒﺢ ﻧﺎﺽ ﺯﻳﺎﺩ ﻫﻮ ﻭﺭﻳﻢ ﺻﻠﻮ ﻣﻊ ﺑﻌﺾ ....ﻭﺧﺪﺕ ﺭﻳﻢ
ﺍﻟﻤﺼﺤﻒ ﺗﻘﺮﺍ ﻓﻲ ﺷﻮﻱ ﻗﺮﺁﻥ ... ﺑﻌﺪﻳﻦ ﻃﻠﺒﻮ ﺍﻟﻔﻄﻮﺭ ﻭﺭﻛﺒﻮ ﻓﻲ
ﺍﻟﺴﻴﺎﺭﺓ ﺑﻴﺮﺟﻌﻮ ﻟﺤﻮﺵ ﺍﻫﻞ ﺯﻳﺎﺩ ....
ﻋﺒﻴﺮ ﺣﺎﺳﺔ ﺑﻤﻠﻞ ... ﺧﺎﻟﺪ ﻃﻮﻝ ﺍﻟﻮﻗﺖ ﻓﻲ ﺍﻟﻤﺴﺘﺸﻔﻲ ﻓﻨﺰﻟﺖ
ﺑﺘﻬﺪﺭﺯ ﻋﻠﻲ ﻋﻤﺘﻬﺎ ﺗﺤﺖ ﻟﻘﺘﻬﺎ ﻃﺎﻟﻌﺔ ﻓﻘﻌﻤﺰﺕ ﺗﺮﺍﺟﻲ ﻓﻴﻬﺎ
ﺯﻳﺎﺩ : ﺍﻟﺴﻼﻡ ﻋﻠﻴﻜﻢ
ﻋﺒﻴﺮ : ﻭﻋﻠﻴﻜﻢ ﺍﻟﺴﻼﻡ ... ﺍﻧﺖ ﻭﻳﻨﻚ ﺍﻣﻐﻄﺲ ﻫﺎﻻﻳﺎﻡ
ﺯﻳﺎﺩ ﺍﺑﺘﺴﻢ : ﻣﺸﻐﻮﻝ
ﻋﺒﻴﺮ : ﺍﻭﻭﻭﻭﻑ ﻛﻠﻜﻢ ﻣﺸﻐﻮﻟﻴﻦ
ﺯﻳﺎﺩ : ﺟﺒﺘﻠﻚ ﻭﺣﺪﺓ ﺗﺴﻠﻴﻚ .. ﻭﺑﻌﺪ ﻉ ﺍﻟﺒﺎﺏ ﻋﺸﺎﻥ ﺗﺨﺶ ﺭﻳﻢ
ﻋﺒﻴﺮ ﺷﺎﻓﺘﻬﺎ ﻗﺮﻳﺐ ﻃﺎﺭﺕ ﻣﻦ ﺍﻟﻔﺮﺣﺔ ﻭﻣﺸﺖ ﺗﺠﺮﻱ ﺗﺤﻀﻦ ﻓﻴﻬﺎ
ﺯﻳﺎﺩ ﺑﻌﺪﻫﺎ : ﻣﺎﻧﺴﻤﺤﻠﻜﺶ ﺗﺤﻀﻨﻲ ﻣﺮﺗﻲ
ﻋﺒﻴﺮ : ﺣﺮﺍﻡ ﻋﻠﻴﻚ ﻣﺴﺘﺎﺣﺸﺘﻬﺎ
ﺯﻳﺎﺩ : ﻋﻨﺪﻙ ﺳﺎﻋﺔ ﻭﺣﺪﺓ ﻭﺑﻨﺠﻲ ﻧﺎﺧﺪﻫﺎ ﻣﻨﻚ
ﻋﺒﻴﺮ ﺷﺪﺕ ﺍﻳﺪ ﺭﻳﻢ : ﻏﻴﺮ ﺍﻣﺸﻲ ﺗﻮﺍ ﻭﺑﻌﺪﻳﻦ ﺳﺎﻫﻞ
ﻭﺍﻧﺘﺸﺮ ﺧﺒﺮ ﺭﺟﻮﻉ ﺭﻳﻢ ﻓﻲ ﺍﻟﻌﻴﻠﺔ ﻭﻛﺎﻥ ﺍﻟﻜﻞ ﻓﺮﺣﺎﻥ ﺍﻻ ﻋﺒﻴﺮ ﺍﺧﺖ
ﺯﻳﺎﺩ ﻻﻧﻬﺎ ﻛﺎﻧﺖ ﺗﺒﻲ ﺍﻣﻴﺮﺓ ﺗﺮﺟﻊ
~~~~~~~~~~~~~~~~~~~~~~~~~
ﺟﻲ ﻳﻮﻡ ﺯﻭﺍﺝ ﻏﺎﻟﻴﺔ ﺑﻨﺖ ﻋﻤﺘﻬﻢ ....
ﺧﺸﺖ ﻏﺎﻟﻴﺔ ﻭﺩﺧﻠﺘﻬﺎ ﻓﺮﻗﺔ ﺳﻮﺭﻳﺔ ﺑﺎﻟﺪﺑﻜﺔ ﻭﻗﻌﻤﺰﺕ ﻓﻲ ﺍﻟﻜﻮﺷﺔ
ﻭﻛﺎﻧﺖ ﻣﺎﺷﺎﺀ ﺍﻟﻠﻪ ﻋﻠﻴﻬﺎ ﻭﺑﺪﺕ ﺍﻟﻤﺼﻮﺭﺓ ﺗﺼﻮﺭ ﻓﻴﻬﺎ ﻛﻢ
ﻟﻘﻄﺔ ... ﺑﻌﺪﻳﻦ ﻗﺎﻟﻮ ﺍﻟﻌﺮﻳﺲ ﺑﻴﺨﺶ .... ﻭﺧﺶ ﺍﻟﻌﺮﻳﺲ ﻭﺩﺧﻠﻪ ﺯﻳﺎﺩ
ﻭﺭﺍﺟﻞ ﺩﺍﻧﺔ ....
ﺯﻳﺎﺩ ﺑﺎﺱ ﺭﺍﺱ ﺑﻨﺖ ﻋﻤﺘﻬﺎ: ﺍﻟﻒ ﻣﺒﺮﻭﻙ
ﻏﺎﻟﻴﺔ: ﺍﻟﻠﻪ ﻳﺒﺎﺭﻙ ﻓﻴﻚ ﻳﺎﺧﺎﻟﻲ ( ﻣﻦ ﻗﺒﻞ ﻗﻠﻨﺎ ﺯﻳﺎﺩ ﺭﺍﺿﻊ ﻣﻊ ﻋﻤﻪ
ﺍﻟﻤﺘﻮﻓﻲ ... ﻳﻌﻨﻲ ﻫﻮ ﻳﻌﺘﺒﺮ ﻋﻢ ﺍﻟﺸﺒﺎﺏ ﻭﻭﻟﺪ ﻋﻤﻬﻢ ﻓﻲ ﻧﻔﺲ
ﺍﻟﻮﻗﺖ .. ﻭﺧﺎﻝ ﻏﺎﻟﻴﺔ ﻭﻭﻟﺪ ﺧﺎﻟﻬﺎ)
ﺭﺍﺟﻞ ﺩﺍﻧﺔ ﻳﻜﻮﻥ ﺧﻮ ﻏﺎﻟﻴﺔ ....ﺧﺶ ﻭﺑﺎﺱ ﺭﺍﺳﻬﺎ ﻭﻭﺻﻲ ﺭﺍﺟﻠﻬﺎ
ﻋﻠﻴﻬﺎ ... ﺷﻮﻳﺎ ﻭﻧﺎﺿﻮ ﺍﻟﻌﺮﺳﺎﻥ ﻋﺸﺎﻥ ﻳﻤﺸﻮ ﻟﻠﻤﻄﺎﺭ ﻻﻧﻬﻢ ﺣﺎﺟﺰﻳﻦ
ﻓﻲ ﺭﺣﻠﺔ ﺷﻬﺮ ﺍﻟﻌﺴﻞ ....
ﺭﻭﺣﻮ ﺍﻟﻤﻌﺎﺯﻳﻢ ﻛﻠﻬﻢ ﻭﻗﻌﺪﻭ ﺍﻟﻌﻴﻠﺔ ﺑﺲ ﻓﻲ ﺍﻟﺼﺎﻟﺔ ... ﺯﻳﺎﺩ : ﻫﻴﺎ ﻛﺎﻥ
ﺑﺘﺮﻭﺣﻮ
ﻋﺒﻴﺮ ﻭﺍﻗﻔﺔ ﻉ ﺍﻟﻤﻨﺼﺔ ﻭﺗﺄﺷﺮ ﻟﺰﻳﺎﺩ : ﻋﻤﻲ ﺗﻌﺎﻝ ﺍﺭﻗﺺ ﻣﻌﺎﻱ
ﻫﻨﺎﺩﻱ ﺑﺪﺕ ﺗﺼﻔﺮ ﻟﺨﻮﻫﺎ ﻋﺸﺎﻥ ﻳﻤﺸﻲ .....ﻳﺮﻛﺐ ﺯﻳﺎﺩ ﻭﻳﻀﺤﻚ :
ﺗﻲ ﻛﻴﻒ،ﻣﺎﻧﻌﺮﻓﺶ؟؟؟؟
ﺧﺪﺕ ﻋﺒﻴﺮ ﺳﻴﻒ ﻣﻦ ﺍﻟﻔﺮﻗﺔ ﺍﻟﺴﻮﺭﻳﺔ ﺍﻟﻠﻲ ﺩﺧﻠﺖ ﻏﺎﻟﻴﺔ ... ﻭﻗﻌﺪ
ﺯﻳﺎﺩ ﻳﺮﻗﺺ ﺑﺎﻟﺴﻴﻒ ﻭﻣﻌﺎﻩ ﻋﺒﻴﺮ ﻭﻫﻨﺎﺩﻱ ﻭﺍﻟﺒﺎﻗﻲ ﻳﺼﻔﻘﻮ
ﻭﻳﺰﻏﺮﻃﻮ ...
ﺟﺖ ﺩﺍﻧﺔ ﻟﺮﻳﻢ : ﻧﻮﺿﻲ ﺍﺭﻗﺼﻲ
ﺭﻳﻢ : ﻣﺎﻧﻌﺮﻓﺶ
ﺩﺍﻧﺔ ﻛﺮﺗﻬﺎ ﻭﺭﻓﻌﺘﻬﺎ ﻟﻠﻤﻨﺼﺔ : ﻫﻴﺎ ﺑﻼﺣﺸﻢ ﻏﻴﺮ ﺍﺭﻗﺼﻲ
ﺭﻳﻢ : ﻧﺘﺤﺸﻢ ...... ﻭﻛﺮﺕﻫﺎ ﻋﺒﻴﺮ ﻭﻗﻌﺪﺕ ﺭﻳﻢ ﺗﺮﻗﺺ ﻭﺍﻟﻜﻞ ﻳﺸﺒﺤﻠﻬﺎ
ﺑﺄﻋﺠﺎﺏ ﻻﻥ ﺭﻗﺼﻬﺎ ﺣﻠﻮ ﻭﺭﻭﻋﺔ ....ﺷﺮﻳﺎ ﻭﺍﻧﺴﺤﺒﻮ ﻋﺒﻴﺮ
ﻭﻫﻨﺎﺩﻱ .... ﻭﻗﺮﺏ ﻣﻨﻬﺎ ﺯﻳﺎﺩ ﻭﻗﻌﺪ ﺍﻳﺮﻗﺺ ﻓﻴﻬﺎ ....ﻭﻛﻠﻬﻢ ﻓﺮﺣﺎﻧﻴﻦ
ﺍﻻ ﺣﻨﻴﻦ ﻃﺒﻌﺎ ﻭﻣﺴﺘﻐﺮﺑﺔ ﻛﻴﻒ ﺯﻳﺎﺩ ﻳﺮﻗﺺ ﻣﻌﺎﻫﺎ ﻻﻧﻪ ﻋﻤﺮﻩ ﻣﻊ
ﺩﺍﺭﻫﺎ ﺣﺘﻲ ﻣﻊ ﺍﻣﻴﺮﺓ
ﺭﻳﻢ ﺗﺤﺸﻤﺖ ﻭﺟﺖ ﺑﺘﻨﺰﻝ ﺷﺪﻫﺎ ﺯﻳﺎﺩ ﻣﻦ ﺍﻳﺪﻫﺎ : ﻣﺎﻛﻨﺘﺶ ﻧﻌﺮﻑ ﺍﻥ
ﺭﻗﺼﻚ ﺣﻠﻮ
ﺭﻳﻢ : ﻋﺎﺩﻱ ﺭﻗﺼﻲ
ﺣﻨﻴﻦ ﻗﺎﻃﻌﺘﻬﻢ : ﻫﻴﺎ ﺯﻳﺎﺩ ﻭﺍﺗﻴﻦ ﻛﺎﻥ ﺑﺘﺮﻭﺣﻮ ﺑﻴﻨﺎ
ﺯﻳﺎﺩ : ﺍﻭﻛﻲ ﻣﻦ ﻋﻴﻮﻧﻲ ... ﻭﻃﻠﻊ
ﻋﺒﻴﺮ : ﻋﻼﺵ ﺣﻨﻴﻦ ﺗﺘﺼﺮﻑ ﻫﻜﻲ؟؟؟
ﻫﻨﺎﺩﻱ : ﺣﻨﻴﻦ ﺗﺤﺐ ﺍﻣﻴﺮﺓ ﻭﻣﺎﺗﺒﻴﺶ ﺯﻳﺎﺩ ﻳﺤﺐ ﻏﻴﺮﻫﺎ
ﻋﺒﻴﺮ : ﺣﺮﺍﻡ ﺭﻳﻢ ﻣﺎﻟﻴﻬﺎ ﺫﻧﺐ ﻋﺸﺎﻥ ﺗﺤﺎﺭﺑﻬﺎ ﻫﻜﻲ ..
~~~~~~~~~~~~~~~~~~~~~~
ﺭﻭﺣﻮ ﻛﻠﻬﻢ ﻣﻦ ﺍﻟﻔﻨﺪﻕ ....ﻫﻨﺎﺩﻱ ﺧﺸﺖ ﻟﻠﺪﺍﺭ ﺑﺴﺮﻋﺔ ﺑﺘﺎﺧﺪ ﺷﺮﺷﻒ
ﻭﻣﺨﺪﺓ ﻗﺒﻞ ﻳﺠﻲ ﻓﺮﻳﺪ ﻭﻓﺘﺤﺖ ﺍﻟﺪﻭﻻﺏ ﺑﻄﻠﻊ ﺣﺎﺟﺔ ﺗﻠﺒﺴﻬﺎ
ﻓﺘﺢ ﻓﺮﻳﺪ ﺍﻟﺒﺎﺏ ﻭﺧﺶ : ﺷﻦ ﺍﺩﻳﺮﻱ؟
ﻫﻨﺎﺩﻱ ﺭﻋﺸﺖ ﻣﻨﻪ .... ﻓﺮﻳﺪ ﺑﺄﺑﺘﺴﺎﻣﺔ : ﺧﻔﺘﻲ؟؟؟
ﻫﻨﺎﺩﻱ ﺑﺒﺮﻭﺩ : ﻻ ﻣﺎﺧﻔﺘﺶ
ﻓﺮﻳﺪ : ﻋﻼﺵ ﺗﺘﻜﻠﻤﻲ ﻫﻜﻲ؟؟؟؟
ﻫﻨﺎﺩﻱ ﺑﺘﻄﻠﻊ : ﺷﻲ
ﻓﺮﻳﺪ : ﻭﻳﻦ ﺍﻟﻌﺰﻡ ﺍﻥ ﺷﺎﺀ ﺍﻟﻠﻪ
ﻫﻨﺎﺩﻱ : ﺑﻨﺮﻗﺪ ﻓﻲ ﺍﻟﺪﺍﺭ ﺍﻟﺜﺎﻧﻴﺔ
ﻓﺮﻳﺪ : ﻭﺍﻟﻠﻪ ... ﺍﻇﻨﻲ ﻣﻦ ﺍﻭﻝ ﻳﻮﻡ ﻗﺘﻠﻚ ﻧﺒﻲ ﺣﻘﻮﻗﻲ
ﻫﻨﺎﺩﻱ : ﻣﺎﻋﻨﺪﻛﺶ ﺣﻘﻮﻕ ﻋﻨﺪﻱ
ﻓﺮﻳﺪ : ﺷﻦ ﻗﺼﺪﻙ؟؟؟؟
ﻫﻨﺎﺩﻱ : ﻗﺼﺪﻱ ﻭﺍﺿﺢ ﻭﻃﻠﻌﺖ .....ﻭﻗﻌﻤﺰ ﻓﺮﻳﺪ ﻉ ﺍﻟﺴﺮﻳﺮ ﻭﻳﻔﻜﺮ
ﻋﻼﺵ ﻫﻨﺎﺩﻱ ﺗﺘﺼﺮﻑ ﻣﻌﺎﻩ ﻫﻜﻲ
~~~~~~~~~~~~~~~~~~~~~'~~~
ﺣﻨﻴﻦ ﻟﺮﺍﺟﻠﻬﺎ : ﻣﺶ ﻋﺎﺭﻓﺔ ﻛﻴﻒ ﺯﻳﺎﺩ ﻗﺪﺭ ﻳﻨﺴﻲ ﺍﻣﻴﺮﺓ
ﺭﺍﺟﻞ ﺣﻨﻴﻦ: ﻭﺍﻧﺘﻲ ﺷﻦ ﺍﻟﻠﻲ ﻭﺍﺟﻌﻚ
ﺣﻨﻴﻦ : ﻣﺎﻧﺒﻴﺶ ﻳﺤﺐ ﻏﻴﺮﻫﺎ
ﺭﺍﺟﻞ ﺣﻨﻴﻦ: ﻭﺍﻧﺖ ﺷﻦ ﻟﻴﻚ ﻋﻼﻗﺔ ﻳﺤﺐ ﻏﻴﺮﻫﺎ ﺍﻭ ﻻ
ﺣﻨﻴﻦ : ﺍﻧﺖ ﻣﺶ ﺣﺘﻔﻬﻤﻨﻲ
ﺭﺍﺟﻞ ﺣﻨﻴﻦ: ﺍﺻﻼ ﺍﻧﺘﻲ ﻣﺶ ﻋﺎﺭﻓﺔ ﺧﻴﺮﻙ ﻣﻦ ﻳﻮﻡ ﺭﻭﺣﻨﺎ ﺗﻐﻴﺮﺗﻲ
ﻫﻠﺒﺎ
ﺣﻨﻴﻦ : ﺷﻦ ﺍﻟﻠﻲ ﺗﻐﻴﺮ ﻓﻴﺎ ﺍﻥ ﺷﺎﺀ ﺍﻟﻠﻪ
ﺭﺍﺟﻞ ﺣﻨﻴﻦ ﻛﺮ ﺍﻟﻐﻄﺎ : ﺗﺼﺒﺤﻲ ﻋﻠﻲ ﺧﻴﺮ
~~~~~~~~~~~~~~~~~~~~~~~
ﻓﻲ ﺍﻟﺼﺒﺢ ﻧﺎﺿﺖ ﻫﻨﺎﺩﻱ ﻭﺭﺍﺳﻬﺎ ﻣﺼﺪﻉ .... ﻧﺰﻟﺖ ﺗﺤﺖ ﺑﺘﻔﻄﺮ
ﻫﻨﺎﺩﻱ : ﺻﺒﺎﺡ ﺍﻟﺨﻴﺮ
ﺍﻡ ﻓﺮﻳﺪ : ﺻﺒﺎﺡ ﺍﻟﻨﻮﺭ ....ﺧﻴﺮﻙ ﺗﻌﺒﺎﻧﺔ
ﻫﻨﺎﺩﻱ : ﻻ ﻣﺎﻓﻴﺎ ﺷﻲ،
ﺍﻡ ﻓﺮﻳﺪ : ﻭﺟﻬﻚ ﻣﺶ ﻋﺎﺟﺒﻨﻲ
ﻫﻨﺎﺩﻱ : ﻣﺎﺗﺨﺎﻓﻴﺶ ﻳﻤﻜﻦ ﺍﺭﻫﺎﻕ ﺑﺲ
ﻫﻨﺎﺩﻱ ﺯﺍﺩ ﻋﻠﻴﻬﺎ ﺍﻟﺼﺪﺍﻉ ﻓﺮﻛﺒﺖ ﻟﺠﻨﺎﺣﻬﺎ ﻓﻮﻕ ..
ﺭﻭﺡ ﻓﺮﻳﺪ ﻣﻦ ﺍﻟﺸﺮﻛﺔ ﻣﻊ ﺍﻟﻈﻬﺮ : ﺍﻟﺴﻼﻡ ﻋﻠﻴﻜﻢ
ﺍﻡ ﻓﺮﻳﺪ : ﻭﻋﻠﻴﻜﻢ ﺍﻟﺴﻼﻡ
ﺍﺭﺗﻤﻲ ﻓﺮﻳﺪ ﻉ ﺍﻟﺼﺎﻟﻮﻥ : ﻧﺤﺲ ﻓﻲ ﺭﻭﺣﻲ ﻣﻴﺖ ﺑﺎﻟﺠﻮﻉ ..
ﺍﻡ ﻓﺮﻳﺪ : ﺗﻮ ﻧﻘﻮﻝ ﻟﻠﺸﻐﺎﻟﺔ ﺗﺤﻄﻠﻚ ﻏﺪﺍﻙ ...
ﻓﺮﻳﺪ : ﻭﻳﻦ ﻫﻨﺎﺩﻱ؟؟؟؟
ﺍﻡ ﻓﺮﻳﺪ : ﻗﺎﻋﺪﺓ ﻓﻮﻕ ﺗﻌﺒﺎﻧﺔ
ﻓﺮﻳﺪ ﺑﺨﻮﻑ : ﺧﻴﺮﻫﺎ؟؟؟؟
ﺍﻡ ﻓﺮﻳﺪ : ﻣﺎﻧﻌﺮﻓﺶ ﻗﺎﻟﺖ ﺗﻌﺒﺎﻧﺔ .
ﺭﻛﺐ ﻓﺮﻳﺪ ﺑﺴﺮﻋﺔ ﻭﻟﻘﻲ ﻫﻨﺎﺩﻱ ﺭﺍﻗﺪﺓ ﻉ ﺍﻟﻜﻨﺒﺔ ﻗﺮﺏ ﻣﻨﻬﺎ : ﻫﻨﺎﺩﻱ
ﻫﻨﺎﺩﻱ ﻓﺘﺤﺖ ﻋﻴﻮﻧﻬﺎ : ﻧﻌﻢ
ﺣﻂ ﺃﻳﺪﻩ ﻋﻠﻲ ﺟﺒﻴﻨﻬﺎ ﻟﻘﺎﻩ ﻣﺶ ﺳﺎﺧﻦ : ﻧﻮﺿﻲ ﻧﺮﻓﻌﻚ ﻟﻠﻤﺴﺘﺸﻔﻲ
ﻫﻨﺎﺩﻱ : ﻻ ﻣﺎﻧﺒﻴﺶ
ﻓﺮﻳﺪ : ﻧﻮﺿﻲ ﻣﺶ ﻭﻗﺖ ﺩﻟﻌﻚ .. ﻭﻧﺎﺿﺖ ﻫﻨﺎﺩﻱ ﺧﺪﺕ ﻋﺒﺎﻳﺘﻬﺎ ﻭﻫﻲ
ﺣﺎﺳﺔ ﺑﺪﻭﺧﺔ
ﻭﺻﻠﻮ ﻟﻠﻤﺴﺘﺸﻔﻲ ...
ﺍﻟﺪﻛﺘﻮﺭ: ﻣﺒﺮﻭﻙ ﺍﻟﻤﺪﺍﻡ ﺣﺎﻣﻞ
ﻓﺮﻳﺪ ﺑﺼﺪﻣﺔ : ﺣﺎﻣﻞ !!!!!!!
ﺍﻟﺪﻛﺘﻮﺭ ﺑﺄﺑﺘﺴﺎﻣﺔ : ﺍﻱ ﻟﻴﻬﺎ ﺷﻬﺮﻳﻦ ... ﺷﻦ ﻣﺎﺗﺒﻴﺶ ﺗﺸﻮﻑ ﺍﻟﻤﺪﺍﻡ
ﻓﺮﻳﺪ : ﺍﻛﻴﺪ ﺑﻨﺸﻮﻓﻬﺎ .... ﻭﺧﺶ ﻓﺮﻳﺪ ﻟﻠﺪﺍﺭ ﺍﻟﻠﻲ ﻓﻴﻬﺎ ﻫﻨﺎﺩﻱ ﻟﻘﺎﻫﺎ
ﻣﻘﻌﻤﺰﺓ ﻉ ﺍﻟﺴﺮﻳﺮ ﺑﻌﺒﺎﺗﻬﺎ: ﻣﺒﺮﻭﻙ
ﻫﻨﺎﺩﻱ ............
ﺭﻭﺡ ﻓﺮﻳﺪ ﺑﻬﻨﺎﺩﻱ .... ﻭﻫﻨﺎﺩﻱ ﻃﻮﻝ ﺍﻟﻄﺮﻳﻖ ﻓﻜﺮﻫﺎ ﻓﻲ ﺍﻟﺒﻴﺒﻲ ﺍﻟﻠﻲ
ﺟﺎﻱ ﻭﺷﻦ ﻣﺼﻴﺮﻩ ...
ﻭﺻﻠﻮ ﻟﻠﺤﻮﺵ ﻭﺧﺸﺖ ﻫﻨﺎﺩﻱ ﻗﺒﻞ ﻓﺮﻳﺪ ... ﺍﻡ ﻓﺮﻳﺪ : ﻫﺎ ﻫﻨﺎﺩﻱ ﺷﻦ
ﻗﺎﻟﻮﻟﻚ؟؟؟
ﻫﻨﺎﺩﻱ ﺑﺼﻮﺕ ﻫﺎﺩﻱ : ﻗﺎﻟﻮﻟﻲ ﺣﺎﻣﻞ
ﺍﻡ ﻓﺮﻳﺪ : ﺗﺘﻜﻠﻤﻲ ﺑﺠﺪ؟؟؟
ﻓﺮﻳﺪ ﻫﻮ ﺧﺎﺵ : ﺍﻱ ﺑﺠﺪ
ﺍﻡ ﻓﺮﻳﺪ : ﺍﻟﺤﻤﺪ ﻟﻠﻪ ﺭﺑﻲ ﻃﻮﻝ ﻓﻲ ﻋﻤﺮﻱ ﻭﺑﻨﺸﻮﻑ ﺻﻐﺎﺭﻙ
ﻓﺮﻳﺪ ﺑﺎﺱ ﻋﻠﻲ ﺭﺍﺳﻬﺎ : ﺭﺑﻲ ﻳﻄﻮﻝ ﻓﻲ ﻋﻤﺮﻙ ﻭﺗﺸﻮﻓﻲ ﺻﻐﺎﺭ
ﺻﻐﺎﺭﻩ
ﻫﻨﺎﺩﻱ : ﻧﺴﺘﺄﺫﻥ ﺑﻨﺮﻛﺐ ﻧﺮﺗﺎﺡ
~~~~~~~~~~~~~~~~~~~~~~~~
ﻭﺍﻧﺘﺸﺮ ﺧﺒﺮ ﺣﻤﻞ ﻫﻨﺎﺩﻱ ﻓﻲ ﺍﻟﻌﻴﻠﺔ ﻭﻓﺮﺡ ﺍﻟﻤﻞ ﺑﻴﻪ ... ﺍﻣﺎ ﻋﺒﻴﺮ
ﻗﻌﺪﺕ ﺧﺎﻳﻔﺔ ﻭﺗﺨﻤﻢ ﻋﻼﺵ ﻟﺘﻮﺍ ﻣﺎﺣﻤﻠﺘﺶ ﻭﺗﻨﻜﺪﺕ ﻭﺧﺼﻮﺻﺎ ﺍﻥ
ﻋﺮﺳﻬﻢ ﻣﻊ ﺑﻌﺾ ...ﻭﺧﺎﻳﻔﺔ ﺍﻧﻪ ﺧﺎﻟﺪ ﻳﺘﺰﻭﺝ ﻋﻠﻴﻬﺎ ﺯﻱ ﺯﻳﺎﺩ ﻟﻮ
ﻣﺎﺟﺎﺑﺖ ﺻﻐﺎﺭ
ﺭﻭﺡ ﺧﺎﻟﺪ ﻣﻦ ﺷﻐﻠﻪ ﻭﺧﺶ ﻟﻠﺪﺍﺭ ﻟﻘﻲ ﻋﺒﻴﺮ ﻣﻘﻌﻤﺰﺓ ﻭﺩﻣﻮﻋﻬﺎ ﻋﻠﻲ
ﺧﺪﻫﺎ
ﺧﺎﻟﺪ ﺑﺨﻮﻑ : ﺣﺒﻴﺒﺘﻲ ﺧﻴﺮﻙ ﺗﺒﻜﻲ
ﻋﺒﻴﺮ ..................
ﺧﺎﻟﺪ ﻗﻌﻤﺰ ﻓﻲ ﺟﻨﺒﻬﺎ : ﻋﺒﻮﺭﺓ ﺗﻜﻠﻤﻲ ﺷﻦ ﻓﻴﻚ
ﻋﺒﻴﺮ ﺑﻌﺒﺮﺗﻬﺎ: ﺧﺎﻳﻔﺔ ﺗﺘﺰﻭﺝ ﻋﻠﻴﺎ ﻋﻠﻲ ﺧﺎﻃﺮ ﻣﺎﻧﺠﻴﺒﺶ ﻓﻲ ﺻﻐﺎﺭ
ﺧﺎﻟﺪ : ﻭﻣﻦ ﻗﺎﻟﻚ ﻣﺎﺗﺠﻴﺒﻴﺶ ﻓﻲ ﺍﻟﺼﻐﺎﺭ
ﻋﺒﻴﺮ : ﺷﻮﻑ ﻫﻨﺎﺩﻱ ﺣﺎﻣﻞ
ﺧﺎﻟﺪ : ﻫﻬﻬﻬﻬﻬﻬﻬﻪ ﺍﻟﻠﻲ ﻳﺴﻤﻌﻚ ﻳﻘﻮﻝ ﻟﻴﻨﺎ ﻋﺸﺮ ﺳﻨﻴﻦ ﻣﺘﺰﻭﺟﻴﻦ
ﻋﺒﻴﺮ : ﻏﺪﻭﺓ ﻧﺒﻲ ﻧﻤﺸﻲ ﻟﻠﻤﺴﺘﺸﻔﻲ ﻧﺒﻲ ﻧﺸﻮﻑ ﻋﻼﺵ ﻣﺎﺣﻤﻠﺘﺶ
ﺧﺎﻟﺪ ﺑﺎﺱ ﺟﺒﻴﻨﻬﺎ: ﺣﺎﺿﺮ ﻣﻦ ﻋﻴﻮﻧﻲ
~~~~~~~~~~~~~~~~~~~~~~~~~
ﺗﺰﻭﺟﺖ ﺍﻣﻴﺮﺓ . ﻭﺩﺍﺭﺕ ﻓﺮﺡ ﻋﺎﺋﻠﻲ ﻭﺑﺴﻴﻂ ﻭﻟﺒﺴﺖ ﻗﻔﻄﺎﻥ ﺍﺑﻴﺾ
ﺑﺴﻴﻂ ﻭﻛﺎﻧﺖ ﻃﺎﻟﻌﺔ ﺯﻱ ﺍﻻﻣﻴﺮﺍﺕ ...
ﻋﺎﺩﻝ ﺷﺪﻫﺎ ﻣﻦ ﺇﻳﺪﻫﺎ : ﻣﺒﺮﻭﻙ ﻳﺎﻗﻠﺒﻲ
ﺍﻣﻴﺮﺓ: ﺍﻟﻠﻪ ﻳﺒﺎﺭﻙ ﻓﻴﻚ
ﻋﺎﺩﻝ : ﻣﺶ ﻣﺼﺪﻕ ﺍﻧﻚ ﺻﺮﺗﻲ ﻣﻠﻜﻲ ﺍﻣﻮﺭﺗﻲ
ﺍﻣﻴﺮﺓ: ﻻﺻﺪﻕ
ﻋﺎﺩﻝ : ﺭﺑﻲ ﻳﻘﺪﺭﻧﻲ ﻭﻧﺴﻌﺪﻙ ﻳﺎﺭﺏ
ﺍﻡ ﺍﻣﻴﺮﺓ ﺍﺗﺼﻠﺖ ﺑﺄﺧﺘﻬﺎ ﺍﻡ ﺯﻳﺎﺩ ﺗﺨﺒﺮ ﻓﻴﻬﺎ : ﺿﺮﻭﺭﻱ ﺗﺠﻲ ﺗﺰﻭﺭﻳﻨﻲ
ﻭﺗﺰﻭﺭﺑﻬﺎ
ﺍﻡ ﺯﻳﺎﺩ : ﺍﻛﻴﺪ ﻫﺎﺫﻱ ﺍﻟﻐﺎﻟﻴﺔ ﺿﺮﻭﺭﻱ ﻧﺰﻭﺭﻫﺎ ... ﺭﺑﻲ ﻳﺴﻌﺪﻫﺎ
ﻭﺗﺸﻮﻓﻲ ﺻﻐﺎﺭﻫﺎ ﻳﺎﺭﺏ
ﺳﻜﺮﺕ ﺍﻡ ﺯﻳﺎﺩ ﻣﻦ ﺍﺧﺘﻬﺎ ﻭﻛﺎﻥ ﺯﻳﺎﺩ ﻣﻘﻌﻤﺰ ﻳﺴﻤﻊ ﻓﻲ ﺍﻟﻤﻜﺎﻟﻤﺔ :
ﻣﻦ ﺍﻟﻠﻲ ﺑﺘﺰﻭﺭﻳﻬﺎ
ﺍﻡ ﺯﻳﺎﺩ : ﺍﻣﻴﺮﺓ ﺗﺰﻭﺟﺖ ﺍﻣﺲ
ﺯﻳﺎﺩ ﺍﻧﺼﺪﻡ : ﻣﻦ ﺗﺰﻭﺟﺖ؟؟؟
ﺍﻡ ﺯﻳﺎﺩ : ﺍﻱ ﺗﺰﻭﺟﺖ ﻋﺎﺩﻝ ﻭﻟﺪ ﻋﻤﻬﺎ
ﺯﻳﺎﺩ : ﺑﺲ ﻋﺎﺩﻝ ﻣﺘﺰﻭﺝ
ﺍﻡ ﺯﻳﺎﺩ : ﻣﺮﺗﻪ ﻣﺘﻮﻓﻴﺔ ﻣﻦ ﻓﺘﺮﺓ
ﺯﻳﺎﺩ : ﺑﺎﻫﻲ ﺭﺑﻲ ﻳﺴﻌﺪﻫﺎ ﻭﻧﺎﺽ ... ﻛﺎﻧﺖ ﺭﻳﻢ ﻣﻘﻌﻤﺰﺓ ﻓﻲ ﺍﻟﺤﺪﻳﻘﺔ
ﻭﺷﺎﻓﺖ ﺯﻳﺎﺩ ﻃﺎﻟﻊ
ﺭﻳﻢ : ﺑﺘﻄﻠﻊ؟؟؟؟
ﺯﻳﺎﺩ : ﺍﻛﻴﺪ ﺑﻨﻄﻠﻊ ﻭﺍﻻ ﺗﺒﻴﻨﻲ ﻧﻘﻌﺪ ﺟﻨﺐ ﻭﺟﻬﻚ
ﺍﺳﺘﻐﺮﺑﺖ ﺭﻳﻢ ﻣﻦ ﻋﺼﺒﻴﺘﻪ ...ﻫﻮ ﺻﺢ ﻣﺎﻳﻘﻮﻟﻠﻬﺎ ﻓﻲ ﻛﻼﻡ ﺣﻠﻮ ﺑﺲ
ﻣﻌﺎﺵ ﻋﺼﺐ ﻋﻠﻴﻬﺎ ﻭﻻﺟﺮﺣﻬﺎ ﻣﻦ ﻭﻗﺖ ﺭﺟﻌﻬﺎ
~~~~~~~~~~~~~~~~~~~~~~~
ﺍﻡ ﺯﻳﺎﺩ ﺍﺗﺼﻠﺖ ﺑﺒﻨﺘﻬﺎ ﺣﻨﻴﻦ ﻭﺧﺒﺮﺗﻬﺎ ﺑﻜﻞ ﺷﻲ ...
ﺣﻨﻴﻦ : ﻣﻌﻘﻮﻟﺔ ﺍﻣﻴﺮﺓ ﺗﺘﺰﻭﺝ؟؟؟
ﺍﻡ ﺯﻳﺎﺩ : ﻣﺎﻋﻨﺪﻫﻤﺶ ﻧﺼﻴﺐ ﻓﻲ ﺑﻌﺾ
ﺣﻨﻴﻦ : ﻛﻠﻪ ﻣﻦ ﺑﻮﻳﺎ ﻫﻮ ﺍﻟﻠﻲ ﻓﺮﻗﻬﻢ
ﺍﻡ ﺯﻳﺎﺩ ﺑﻌﺼﺒﻴﺔ : ﺑﻮﻙ ﻣﺎﻟﻴﺸﻲ ﻋﻼﻗﺔ ﻓﺎﻫﻤﺔ
ﺣﻨﻴﻦ ﺳﻜﺮﺕ ﻣﻦ ﺍﻣﻬﺎ ﻭﺍﺗﺼﻠﺖ ﺑﺄﻣﻴﺮﺓ : ﻫﻼ ﺍﻣﻴﺮﺓ ﺷﻦ ﺍﺧﺒﺎﺭﻙ
ﺍﻣﻴﺮﺓ: ﺍﻟﺤﻤﺪ ﻟﻠﻪ ﺷﻦ ﺍﺧﺒﺎﺭﻛﻢ ﻭﻛﻴﻒ ﺣﺎﻝ ﺧﺎﻟﺘﻲ؟؟؟
ﺣﻨﻴﻦ ﺑﻤﻜﺮ : ﺍﻣﻲ ﻣﺮﻳﻀﺔ ﺷﻮﻱ
ﺍﻣﻴﺮﺓ ﺑﺨﻮﻑ: ﺳﻼﻣﺘﻬﺎ ﺧﻴﺮﻫﺎ؟؟؟؟
ﺣﻨﻴﻦ : ﺗﻌﺎﻟﻲ ﺷﻮﻓﻴﻬﺎ ﻭﺍﻃﻤﻨﻲ ﻋﻠﻴﻬﺎ
ﺍﻣﻴﺮﺓ: ﻻ ﻣﺎﻧﻘﺪﺭﺵ ﺍﻧﺘﻢ ﺗﻌﺎﻟﻮ
ﺣﻨﻴﻦ : ﻗﺘﻠﻚ ﻣﺮﻳﻀﺔ ﻳﻌﻨﻲ ﺍﻧﺘﻲ ﺗﻌﺎﻟﻲ ﺷﻮﻓﻴﻬﺎ ... ﻭﺑﻌﺪﻳﻦ ﻫﺎﺫﺍ ﺣﻮﺵ
ﺧﺎﻟﺘﻚ ﻋﺎﺩﻱ
ﺍﻣﻴﺮﺓ: ﻣﺎﻧﻌﺮﻓﺶ ﺑﺲ ﺗﻮ ﻧﺸﻮﻑ
ﺳﻜﺮﺕ ﺣﻨﻴﻦ ﻣﻦ ﺍﻣﻴﺮﺓ ﻭﻓﻲ ﺭﺍﺳﻬﺎ ﻣﻴﺔ ﻓﻜﺮﺓ ﻭﻓﻜﺮﺓ ...
~~~~~~~~~~~~~~~~~~~~~~~~~
ﻣﺸﺖ ﻋﺒﻴﺮ ﻟﻠﻤﺴﺘﺸﻔﻲ ﻭﺩﺍﺭﺕ ﻓﺤﻮﺻﺎﺕ ﻛﺎﻣﻠﺔ ﻭﻗﺎﻟﻮﻫﺎ ﺍﻟﺪﻛﺘﻮﺭ
ﺍﻧﻬﺎ ﺳﻠﻴﻤﺔ ﻭﻣﺎﻓﻴﻬﺎ ﺷﻲ ﻭﺍﻟﻘﺼﺔ ﻣﺴﺄﻟﺔ ﻭﻗﺖ ﺑﺲ
ﻓﺮﻳﺪ ﺭﻛﺐ ﻟﺠﻨﺎﺣﻪ ﻟﻘﻲ ﻫﻨﺎﺩﻱ ﺭﺍﻗﺪﺓ ﻭﺑﺎﻳﻦ ﻋﻠﻴﻬﺎ ﺍﻟﺘﻌﺐ : ﻫﻨﺎﺩﻱ
ﻧﻮﺿﻲ ﻧﺮﻓﻌﻚ ﻟﺤﻮﺵ ﺍﻫﻠﻚ ﻛﺎﻥ ﺗﺒﻲ
ﻫﻨﺎﺩﻱ : ﻳﺎﺭﻳﺖ
ﻓﺮﻳﺪ : ﺑﺎﻩ ﻭﺗﻲ ﺭﻭﺣﻚ ﻭﺗﻮ ﻧﻮﺻﻠﻚ
ﻫﻨﺎﺩﻱ : ﺍﻥ ﺷﺎﺀ ﺍﻟﻠﻪ
ﺭﻭﺡ ﺯﻳﺎﺩ ﻟﻠﺤﻮﺵ ﻣﺘﺄﺧﺮ ... ﺍﻡ ﺯﻳﺎﺩ : ﺷﻦ ﺭﺟﻌﺖ ﻟﻌﺎﺩﺗﻚ ﺍﻟﺴﻬﺮ ﻻﺧﺮ
ﺍﻟﻠﻴﻞ ﻭﻣﺨﻠﻲ ﻣﺮﺗﻚ
ﺯﻳﺎﺩ ﺑﺈﺑﺘﺴﺎﻣﺔ : ﻭﻻﻳﻬﻤﻚ ﻫﺎﺫﻱ ﺍﺧﺮ ﻣﺮﺓ
ﺍﻡ ﺯﻳﺎﺩ : ﺭﺑﻲ ﻳﻬﺪﻳﻚ
ﺭﻛﺐ ﺯﻳﺎﺩ ﻟﺠﻨﺎﺣﻪ ﻭﻣﺎﻟﻘﺎﺵ ﺭﻳﻢ ﻋﺮﻑ ﺍﻧﻬﺎ ﻋﻨﺪ ﻋﺒﻴﺮ ﻋﻠﻲ ﺧﺎﻃﺮ ﺧﺎﻟﺪ
ﻳﺮﻭﺡ ﻣﺘﺄﺧﺮ ﻣﻦ ﺍﻟﻤﺴﺘﺸﻔﻲ
ﺍﺳﺘﺄﺫﻧﺖ ﺭﻳﻢ ﻣﻦ ﻋﺒﻴﺮ ﻭﻣﺸﺖ ﻟﺪﺍﺭﻫﺎ ﻟﻘﺖ ﺯﻳﺎﺩ ﻣﻤﺘﺪ ﻋﻠﻲ ﻇﻬﺮﻩ
ﻭﺇﻳﺪﻳﻪ ﻭﺭﺍ ﺭﺍﺳﻪ : ﻣﺎﺯﺍﻝ ﺑﺪﺭﻱ ﻋﻼﺵ ﺟﺎﻳﺔ؟؟؟؟
ﺭﻳﻢ : ﻧﺤﺴﺎﺑﻚ ﻣﺎﺯﺍﻝ ﻣﺎﺟﻴﺖ
ﺯﻳﺎﺩ : ﻭﺣﻀﺮﺗﻚ ﻛﺎﻥ ﺍﻧﻲ ﻣﻬﻨﺎﺵ ﻣﺎﺗﻘﻌﺪﻳﺶ ﻓﻲ ﺩﺍﺭﻙ ﻳﻌﻨﻲ
ﺭﻳﻢ ﻋﺮﻓﺖ ﻣﻦ ﻋﺒﻴﺮ ﺍﻥ ﺍﻣﻴﺮﺓ ﺗﺰﻭﺟﺖ ﻭﻋﺎﺭﻓﺔ ﺍﻥ ﺯﻳﺎﺩ ﻣﺘﻌﺼﺐ
ﻭﺯﺍﻳﺪﺓ ﻋﺼﺒﻴﺘﻪ ﻣﻦ ﻫﺎﻟﻤﻮﺿﻮﻉ ..
ﺭﻳﻢ : ﻣﺎﻧﺤﺒﺶ ﻧﺮﺍﺟﻲ ﺣﺪ ﻭﻫﺎﺫﺍ ﻃﺒﻌﻲ
ﺯﻳﺎﺩ : ﺣﺘﻐﻴﺮﻳﻪ ﻃﺒﻌﻚ ﻫﺎﺫﺍ
ﺭﻳﻢ : ﻣﺎﺩﺍﻣﻚ ﺗﺤﺒﻬﺎ ﻋﻼﺵ ﺧﻠﻴﺘﻬﺎ ﺗﺘﺰﻭﺝ ﻳﺎﺃﺧﻲ
ﺯﻳﺎﺩ ﻏﺮﺯ ﻇﻮﺍﻓﺮﻩ ﻓﻲ ﺇﻳﺪﻳﻦ ﺭﻳﻢ : ﺳﻜﺮﻱ ﻓﻤﻚ
ﺭﻳﻢ ﺗﺒﻜﻲ ﻣﻦ ﺍﻟﻮﺟﻊ: ﺍﻳﺪﻱ ﺍﻳﺪﻱ
ﺯﻳﺎﺩ ﺩﻓﻬﺎ ﻭﻃﻠﻊ ﻭﺳﻜﺮ ﺍﻟﺒﺎﺏ .... ﻭﺭﻳﻢ ﺍﺭﺗﻤﺖ ﻉ ﺍﻟﺴﺮﻳﺮ ﻭﺗﺒﻜﻲ
~~~~~~~~~~~~~~~~~~~~~~~~
ﻫﻨﺎﺩﻱ : ﻋﺒﻴﺮ ﻃﻔﻲ ﺍﻟﻀﻲ
ﻋﺒﻴﺮ : ﻧﻮﺿﻲ ﺍﻟﻴﻮﻡ ﻛﻠﻪ ﺭﺍﻗﺪﺓ ﻣﺎﺳﺪﻛﺶ ﻧﻮﻡ
ﻫﻨﺎﺩﻱ : ﺍﻱ ﻣﺎﺳﺪﻧﻴﺶ ﺍﻃﻔﻲ ﺍﻟﻀﻲ
ﻋﺒﻴﺮ : ﻭﺍﻟﻠﻪ ﻣﻮﻟﻴﻪ ﻣﻤﻠﺔ
ﻃﻠﻌﺖ ﻋﺒﻴﺮ ﻣﻦ ﺟﻨﺐ ﻫﻨﺎﺩﻱ .. ﺍﻟﻠﻲ ﻣﻦ ﻳﻮﻡ ﺟﺘﻬﻢ ﻭﻫﻲ ﻣﺎﺗﻄﻠﻌﺶ
ﺑﺮﺍ ﻣﻦ ﺍﻟﺪﺍﺭ ﻭﻛﻞ ﻣﺎﻳﺠﻲ ﻓﺮﻳﺪ ﻳﺴﺄﻝ ﻋﻠﻴﻬﺎ ﺗﻘﻮﻝ ﺍﻧﻬﺎ ﺗﻌﺒﺎﻧﺔ
ﻭﻣﺎﺗﺒﻲ ﺗﺸﻮﻑ ﺣﺪ ..
ﺭﻳﻢ ﻟﻴﻬﺎ ﻛﻢ ﻳﻮﻡ ﻣﻌﺎﺵ ﻃﻠﻌﺖ ﻣﻦ ﺩﺍﺭﻫﺎ ﻭﻛﻞ ﻣﺎﺗﺴﺄﻝ ﻋﺒﻴﺮ ﺯﻳﺎﺩ
ﻳﻘﻮﻟﻠﻬﺎ ﺗﻌﺒﺎﻧﺔ
ﻋﺒﻴﺮ ﺗﺨﺒﻂ ﻋﻠﻲ ﺟﻨﺎﺡ ﺭﻳﻢ: ﺭﻳﻢ ﺭﻳﻢ ﺍﻓﺘﺤﻲ
ﺭﻳﻢ ﻓﺘﺤﺖ ﺍﻟﺒﺎﺏ ﻭﻛﺎﻥ ﺳﺒﺐ ﻋﺪﻡ ﻃﻠﻌﺘﻬﺎ ﻫﻮ ﺍﺛﺎﺭ ﻇﻮﺍﻓﺮ ﺯﻳﺎﺩ ﻓﻲ
ﺇﻳﺪﻳﻬﺎ ﺗﺒﻴﻬﻢ ﻳﺨﺘﻔﻮ ﻗﺒﻞ
ﻋﺒﻴﺮ ﺣﻀﻨﺘﻬﺎ: ﺍﺷﺘﻘﺘﻠﻚ ﻳﺎﺣﻤﺎﺭﺓ
ﺭﻳﻢ : ﻫﻬﻬﻬﻬﻬﻪ ﺣﺘﻲ ﺍﻧﻲ ﺑﺲ ﻣﻌﻠﻴﺶ ﻛﻨﺖ ﺗﻌﺒﺎﻧﺔ ﺷﻮﻱ
ﻋﺒﻴﺮ : ﻭﺍﻟﺘﻌﺒﺎﻥ ﻣﺎﻳﻔﺘﺤﺶ ﻟﻠﻨﺎﺱ
ﺭﻳﻢ : ﻛﺎﻥ ﺷﻜﻠﻲ ﻣﺮﻫﻖ ﻭﻣﺎﻛﻨﺖ ﻧﺒﻲ ﻧﺤﺪ ﻳﺸﻮﻓﻨﻲ ﻫﻜﻲ
ﻋﺒﻴﺮ : ﺑﺎﻫﻲ ﺻﺪﻗﺘﻚ .... ﻫﻴﺎ ﺗﻌﺎﻟﻲ ﻧﻨﺰﻟﻮ ﻧﺪﻫﻮﺭﻭ ﻓﻲ ﺍﻟﺤﺪﻳﻘﺔ ﺗﺤﺖ
ﻭﻧﺰﻟﻮ ﻣﻊ ﺑﻌﺾ
~~~~~~~~~~~~~~~~~~~~~~~~
ﺣﻨﻴﻦ : ﺍﻫﻼ ﺍﻣﻴﺮﺓ ﺍﻧﺴﺘﻲ
ﺍﻣﻴﺮﺓ: ﺍﻫﻠﻴﻦ ﺑﻴﻚ ﻭﻳﻦ ﺧﺎﻟﺘﻲ ﺑﻨﺸﻮﻓﻬﺎ ﻭﺑﻨﻤﺸﻲ ﻣﺶ ﻣﻄﻮﻟﺔ
ﺣﻨﻴﻦ : ﺑﺎﻫﻲ ﻏﻴﺮ ﻗﻌﻤﺰﻱ .... ﻭﻃﻠﻌﺖ ﺣﻨﻴﻦ ﺍﺗﺼﻠﺖ ﺑﺰﻳﺎﺩ ﻭﻗﻠﺘﻠﻪ ﻳﺠﻲ
ﺑﺴﺮﻋﺔ ﺗﺒﻴﻪ
ﺧﺸﺖ ﺍﻣﻴﺮﺓ ﻭﻗﻌﻤﺰﺕ ﻓﻲ ﺩﺍﺭ ﺍﻟﻀﻴﻮﻑ .... ﺩﻣﻌﺘﻬﺎ ﻧﺰﻟﺖ ﻏﺼﺒﺎ
ﻋﻨﻬﺎ ﻭﻫﻲ ﻓﻲ ﺍﻟﺤﻮﺵ ﺍﻟﻠﻲ ﻋﺎﺷﺖ ﻓﻴﻪ ﺍﺣﻠﻲ ﺍﻳﺎﻣﻬﺎ ﻣﻊ ﺯﻳﺎﺩ ...
ﺯﻳﺎﺩ : ﺍﻟﺴﻼﻡ ﻋﻠﻴﻜﻢ
ﺣﻨﻴﻦ : ﻋﻠﻴﻜﻢ ﺍﻟﺴﻼﻡ
ﺯﻳﺎﺩ : ﺧﻴﺮﻙ ﺷﻦ ﺗﺒﻲ؟
ﺣﻨﻴﻦ : ﻏﻴﺮ ﺗﻌﺎﻝ ﻣﻌﺎﻱ ...ﺧﺶ ﻟﺪﺍﺭ ﺍﻟﻀﻴﻮﻑ ﻭﺗﻮ ﻧﺠﻴﻚ
ﺧﺶ ﺯﻳﺎﺩ ﻭﺍﻧﺼﺪﻡ ﻟﻤﺎ ﺷﺎﻑ ﺍﻣﻴﺮﺓ .. ﺍﻣﻴﺮﺓ ﻭﻗﻔﺖ: ﺯﻳﺎﺩ .!!!!!!
ﺯﻳﺎﺩ ﺑﺤﺰﻥ : ﺍﻱ ﺯﻳﺎﺩ
ﺍﻣﻴﺮﺓ: ﺷﻦ ﺍﻟﻠﻲ ﻃﻠﻌﻚ ﻓﻲ ﺣﻴﺎﺗﻲ ﻣﻦ ﺟﺪﻳﺪ ﻳﺎﺯﻳﺎﺩ
ﺯﻳﺎﺩ : ﻋﻼﺵ ﺗﺨﻠﻴﺘﻲ ﻋﻨﻲ
ﺍﻣﻴﺮﺓ: ﺍﻧﺖ ﺗﺨﻠﻴﺖ ﻋﻠﻴﺎ ﻭﺯﻭﺍﺟﻚ ﺍﻛﺒﺮ ﺩﻟﻴﻞ ﻋﻠﻲ ﻫﺎﻟﺸﻲ
ﺯﻳﺎﺩ : ﺑﺲ ﺍﻧﺘﻲ ﻛﻨﺘﻲ ﻋﺎﺭﻓﺔ ﺍﻧﻲ ﻣﻐﺼﻮﺏ ﻋﻠﻲ ﻫﺎﻟﺰﻭﺍﺝ ... ﻭﺍﻧﺘﻲ
ﻣﺎﻃﻠﺒﺘﻴﺶ ﺍﻧﻲ ﻧﻄﻠﻘﻬﺎ ﻭﺍﻻ ﻛﻨﺖ ﻃﻠﻘﺘﻬﺎ
ﺍﻣﻴﺮﺓ ﺑﺤﺰﻥ : ﺍﻟﻜﻼﻡ ﺗﻮﺍ ﻣﻌﺎﺵ ﻳﻨﻔﻊ
ﺯﻳﺎﺩ : ﻻﻳﻨﻔﻊ ﺍﻧﺘﻲ ﺗﻄﻠﻘﻲ ﻣﻦ ﺭﺍﺟﻠﻚ ... ﻭﺭﻳﻢ ﻣﻦ ﻏﺪﻭﺓ ﻧﻄﻠﻘﻬﺎ ﻟﻮ
ﺗﺒﻲ
ﺍﻣﻴﺮﺓ ﺧﺪﺕ ﻋﺒﺎﻳﺘﻬﺎ : ﻻ ﺍﻧﺖ ﻟﻴﺎ ﻭﻻﺍﻧﻲ ﻟﻴﻚ
ﺯﻳﺎﺩ ﻭﻗﻒ ﻗﺪﺍﻣﻬﺎ: ﺍﻣﻴﺮﺓ ﻣﺎﺗﻤﺸﻴﺶ
ﺭﻳﻢ ﺑﻘﻬﺮ : ﺍﻱ ﻣﺎﺗﻤﺸﻴﺶ ﺍﻣﻴﺮﺓ
ﺯﻳﺎﺩ ﺍﻟﺘﻔﺖ ﻋﻠﻲ ﺭﻳﻢ ﻭﺑﻌﺼﺒﻴﺔ : ﺍﻧﺘﻲ ﺷﻦ ﺟﺎﺑﻚ ﺗﻮﺍ
ﺭﻳﻢ ﻭﺩﻣﻮﻋﻬﺎ ﻋﻠﻲ ﺧﺪﻫﺎ : ﺟﻴﺖ ﻧﺸﻮﻑ ﻓﻲ ﺭﺍﺟﻠﻲ ﺍﻟﺨﺎﻳﻦ
ﺯﻳﺎﺩ ﻋﻄﺎﻫﺎ ﻛﻒ ﺑﻜﻞ ﻗﻮﺗﻪ : ﺍﻧﺘﻲ ﻃﺎﺍﺍﺍﺍﺍﺍﺍﻟﻖ >_< ﻟﻤﻲ ﺣﻮﺍﻳﺠﻚ
ﻭﺍﻃﻠﻌﻲ ﻣﻦ ﺍﻟﺤﻮﺵ
ﺭﻳﻢ : ﺍﻭﻛﻲ ....ﻭﻃﻠﻌﺖ ﻭﻫﻲ ﺗﺒﻜﻲ .... ﺍﻣﻴﺮﺓ ﻃﻠﻌﺖ ﻭﻫﻲ ﺣﺎﺳﺔ
ﺭﻭﺣﻬﺎ ﺣﺘﻲ ﻫﻲ ﺧﺎﻳﻨﺔ ﻟﺮﺍﺟﻠﻬﺎ ﻋﺎﺩﻝ ﺍﻟﻠﻲ ﻳﺤﺒﻬﺎ ﻭﻫﻲ ﻣﻊ ﺭﺍﺟﻠﻬﺎ
ﺍﻻﻭﻝ ...
ﻋﺒﻴﺮ : ﺭﻳﻢ ﺧﻴﺮﻙ
ﺭﻳﻢ : ﻃﻠﻘﻨﻲ ﻳﺎﻋﺒﻴﺮ
ﻋﺒﻴﺮ : ﻃﻠﻘﻚ !!!!!!!
ﺭﻳﻢ : ﻧﻬﺎﻳﺔ ﻣﻌﺮﻭﻓﺔ ﻭﺍﻣﺸﺖ ﺑﺘﻠﻢ ﺣﻮﺍﻳﺠﻬﺎ
~~~~~~~~~~~~~~~~~~~~~~
ﻋﺒﻴﺮ ﺧﺸﺖ ﻟﺤﻨﻴﻦ: ﻋﺎﺟﺒﻚ ﺗﻮﺍ ﺍﻟﻠﻲ ﺩﺭﺗﻴﻪ
ﺣﻨﻴﻦ : ﺯﻳﺎﺩ ﻫﻮ ﻗﺎﻟﻲ ﻛﻠﻤﻴﻬﺎ
ﺍﻡ ﺯﻳﺎﺩ : ﺧﻴﺮﻩ ﺻﻮﺗﻜﻢ ﻭﺍﺻﻞ ﻻﺧﺮ ﺍﻟﺸﺎﺭﻉ
ﻋﺒﻴﺮ : ﺣﻨﻴﻦ ﺧﻠﺖ ﺯﻳﺎﺩ ﻳﻄﻠﻖ ﺭﻳﻢ
ﺍﻡ ﺯﻳﺎﺩ : ﺯﻳﺎﺩ ﻃﻠﻖ ﺭﻳﻢ !!!!
ﺣﻨﻴﻦ : ﺍﻧﻲ ﻣﺎﻟﻴﺎﺵ ﻋﻼﻗﺔ ﻓﺎﻫﻤﺔ
ﺍﻡ ﺯﻳﺎﺩ ﺣﺴﺖ ﺑﺪﻭﺧﺔ ﻭﻗﻌﻤﺰﺕ ﻉ ﺍﻟﻜﺮﺳﻲ ......
ﺭﻳﻢ ﻟﻤﺖ ﻛﻞ ﺩﺑﺸﻬﺎ ﻭﺭﻓﻌﻬﺎ ﺍﻟﺴﻮﺍﻕ ﻟﺤﻮﺵ ﻋﻤﻬﺎ ﻻﻥ ﺣﻮﺵ ﺧﺎﻟﺘﻬﺎ
ﻓﻲ ﻣﺪﻳﻨﺔ ﺛﺎﻧﻴﺔ ﻭﻣﺎﺗﻘﺪﺭﺵ ﺗﻤﺸﻲ ﻣﻌﺎﻩ ﺑﺮﻭﺣﻬﺎ
ﻭﺻﻠﺖ ﺭﻳﻢ ﻟﺤﻮﺵ ﻋﻤﻬﺎ ﻭﺧﺸﺖ : ﻣﺮﺕ ﻋﻤﻲ ﻭﻳﻦ؟؟؟
ﻋﻤﻬﺎ ﻛﺎﻥ ﺳﻜﺮﺍﻥ ﻭﻣﻌﺎﻩ ﺭﺟﺎﻟﺔ ﻓﻲ ﺍﻟﻤﺮﺑﻮﻋﺔ : ﻃﻠﻘﺘﻬﺎ
ﺭﺑﻢ : ﻃﻠﻘﺘﻬﺎ !!!!!!
ﻋﻢ ﺭﻳﻢ : ﺍﻳﻪ ﺧﺸﻲ ﺧﺸﻲ ﺩﺍﺧﻞ
ﺧﺸﺖ ﺭﻳﻢ ﻭﺿﻤﺖ ﻭﺣﺪﺓ ﻣﻦ ﺍﻟﺪﻳﺎﺭ ﻭﻗﻌﻤﺰﺕ ﻓﻴﻬﺎ ﺗﺒﻜﻲ ﻭﺗﻨﺪﺏ ﻓﻲ
ﺣﻀﻬﺎ .... ﻭﻋﻤﻬﺎ ﺭﺟﻊ ﻳﻜﻤﻞ ﻓﻲ ﺳﻬﺮﺗﻪ ﻣﻊ ﺟﻤﺎﻋﺘﻪ
ﺷﻮﻳﺎ ﻭﺳﻤﻌﺖ ﺭﻳﻢ ﺍﻟﺒﺎﺏ ﻳﺨﺒﻂ ﻭﻛﺎﻥ ﻋﻤﻬﺎ ﺳﻜﺮﺍﻥ ﻭﻣﺎﻳﻔﺮﺯ ﻓﻲ
ﺷﻲ : ﻧﻮﺿﻲ ﺭﻳﻢ ﻳﺒﻴﻚ ﻭﺍﺣﺪ ﻣﻦ ﺍﻟﺠﻤﺎﻋﺔ
ﺭﻳﻢ : ﻧﻌﻢ 0_0
ﻋﻢ ﺭﻳﻢ : ﻧﻮﺿﻲ ﺑﺴﺮﻋﺔ ﻳﺴﺘﻨﻮ ﻓﻴﻚ .... ﻭﻃﻠﻊ ﻭﻫﻮ ﻳﺪﺭﻭﺥ
ﺭﻳﻢ ﺗﺮﻋﺶ ﻣﻊ ﺑﻌﻀﻬﺎ ﻭﺧﺪﺕ ﺍﻟﺘﻠﻴﻔﻮﻥ ﺗﻜﻠﻢ ﻓﻲ ﺍﻣﻬﺎ ﺭﻗﻤﻬﺎ ﺧﺎﺭﺝ
ﺍﻟﺘﻐﻄﻴﺔ ....ﺷﻮﻳﺎ ﻭﺳﻤﻌﺖ ﺻﻮﺕ ﺧﻄﻮﺍﺕ ﺟﺎﻳﺔ ﺍﺗﺠﺎﻫﻬﺎ ﻓﺒﺪﻭﻥ
ﻣﺎﺗﻨﺪﺭﻱ ﻋﻠﻲ ﺭﻭﺣﻬﺎ ﻃﻠﻌﺖ ﺭﻳﻢ ﺗﺠﺮﻱ ﻟﻠﺸﺎﺭﻉ ﺑﺪﻭﻥ ﻋﺒﺎﻳﺔ ﻭﻫﻲ
ﺗﺒﻜﻲ ....ﻭﻣﻌﺎﺵ ﻋﺮﻓﺖ ﺑﻤﻦ ﺗﺴﺘﻨﺠﺪ ﻭﺍﺧﻴﺮﺍ ﺍﺫﻛﺮﺕ ﻋﺒﻴﺮ ﻓﺎﺗﺼﻠﺖ
ﺑﻴﻬﺎ ...
ﺭﻳﻢ : ﺍﻳﻮﻩ ﻋﺒﻴﺮ ﺍﻟﺤﻘﻴﻨﻲ .
يتبع............
