ﺯﻳﺎﺩ : ﻋﻼﺵ ﺧﺎﻳﻔﺔ ﻭﻣﺘﻮﺗﺮﺓ ﺍﻛﻴﺪ ﻓﻲ ﺷﻲ ....ﻭﺭﻛﺰ ﻋﻠﻲ ﻧﻈﺮﺍﺕ
ﻋﺒﻴﺮ ﻭﺍﻟﺘﻔﺖ ﻓﺸﺎﻑ ﻟﺮﻳﻢ ﻭﺳﻂ ﺍﻟﻮﺭﺩ ﻭﻛﺎﻧﺖ ﺯﻱ ﺍﻟﻔﺮﺍﺷﺔ ﺍﻟﺤﻠﻮﺓ ..
ﻋﺒﻴﺮ ﺍﺳﺘﻐﺮﺑﺖ ﻣﻦ ﺭﺩﺓ ﻓﻌﻠﻪ ﺗﻮﻗﻌﺖ ﻳﻀﺮﺑﻬﺎ ﺍﻭ ﻳﺪﻳﺮ ﺍﻱ ﺣﺎﺟﺔ ﻏﻴﺮ
ﺍﻧﻪ ﻳﻘﻌﺪ ﻳﺘﺄﻣﻞ ﻓﻴﻬﺎ ﺑﺎﻟﻄﺮﻳﻘﺔ ﻫﺎﺫﻱ .
ﺭﻳﻢ ﺷﺎﻓﺎﺗﻪ ﻳﺘﺄﻣﻞ ﻓﻴﻬﺎ ﻓﻨﺎﺿﺖ ﺑﺴﺮﻋﺔ ﻭﻗﻔﺖ .. ﻭﻗﺮﺏ ﺯﻳﺎﺩ ﻣﻨﻬﺎ :
ﻣﻦ ﺳﻤﺤﻠﻚ ﺍﺗﺠﻲ ﺍﻫﻨﻲ
ﺭﺑﻢ : ﻣﺎﺣﺪ ﺳﻤﺤﻠﻲ
ﺯﻳﺎﺩ : ﻣﺶ ﻗﺎﻟﻮﻟﻚ ﻣﺎﻧﺤﺒﺶ ﺣﺪ ﻳﺠﻲ ﺍﻫﻨﻲ
ﺭﻳﻢ : ﺍﻱ ﻗﺎﻟﻮﻟﻲ
ﺯﻳﺎﺩ ﻋﻄﺎﻫﺎ ﻛﻒ ﺑﻜﻞ ﻗﻮﺗﻪ ﻟﻴﻦ ﺻﻮﺍﺑﻌﻪ ﻋﻠﻤﻮ ﻋﻠﻲ ﻭﺟﻬﺎ : ﻫﺎﺫﺍ
ﻣﺠﺮﺩ ﺍﻧﺬﺍﺭ ﻭﻟﻮ ﺟﻴﺘﻲ ﺍﻫﻨﻲ ﻣﺮﺓ ﺛﺎﻧﻴﺔ ﻣﺎﺗﻠﻮﻣﻲ ﺍﻻ ﻧﻔﺴﻚ
ﺭﻳﻢ ﺣﻄﺖ ﺇﻳﺪﻫﺎ ﻋﻠﻲ ﺧﺪﻫﺎ : ﻣﺎﻳﻬﻤﻨﻴﺶ ﺩﻳﺮ ﺍﻟﻠﻲ ﺑﺪﻳﺮﻩ ﻭﺧﺸﺖ
ﻟﺪﺍﺧﻞ
ﻋﺒﻴﺮ ﻭﺍﻗﻔﺔ ﻭﻣﺼﺪﻭﻣﺔ ﻭﺧﻼﺹ .... ﻓﺎﺗﺖ ﻣﻦ ﺟﻨﺒﻬﺎ ﺭﻳﻢ ﻭﺍﺑﺘﺴﻤﺘﻠﻬﺎ :
ﻋﺎﺩﻱ ﻋﺎﺩﻱ ﻣﺎﺩﻭﺭﻳﺶ ﻣﺘﻌﻮﺩﺓ
~~~~~~~~~~~~~~~~~~~~~~~~~
ﺭﻳﻢ ﺭﻛﺒﺖ ﻟﺠﻨﺎﺣﻬﺎ ﻭﺣﺎﻭﻟﺖ ﺗﺤﺒﺲ ﺩﻣﻮﻋﻬﺎ ﺣﺴﺖ ﺍﻧﻪ ﺭﻏﻢ ﺣﺒﻬﺎ ﻟﺰﻳﺎﺩ
ﺑﺲ ﻫﻮ ﻣﺎﻳﺴﺘﺎﻫﻠﺶ ﺗﺒﻜﻲ ﻋﻠﻴﻪ ﻋﻠﻲ ﻣﻌﺎﻣﻠﺘﻪ ﻟﻴﻬﺎ ...
ﻋﺒﻴﺮ ﺗﺨﺒﻂ ﻉ ﺍﻟﺒﺎﺏ
ﺭﻳﻢ : ﺗﻔﻀﻠﻲ
ﺧﺸﺖ ﻋﺒﻴﺮ ﻭﺗﻔﺎﺟﺄﺕ ﻟﻤﺎ ﺷﺎﻓﺖ ﺁﺛﺎﺭ ﺻﻮﺍﺑﻊ ﺯﻳﺎﺩ ﻋﻠﻲ ﺧﺪ ﺭﻳﻢ
ﺭﻳﻢ ﺍﺑﺘﺴﻤﺖ : ﻋﻼﺵ ﺗﺸﺒﺤﻴﻠﻲ ﻫﻜﻲ؟؟
ﻋﺒﻴﺮ : ﺍﻧﺘﻲ ﻣﻨﻴﻦ ﺟﺎﻳﺒﺔ ﻫﺎﻟﻘﻮﺓ
ﺭﻳﻢ : ﻗﻮﺓ ﻇﺎﻫﺮﻳﺔ ﺑﺲ ﻣﻦ ﺩﺍﺧﻞ ﺍﺿﻌﻒ ﻣﻤﺎ ﺗﺘﺼﻮﺭﻱ
ﻋﺒﻴﺮ : ﻛﻴﻒ ﺿﻌﻴﻔﺔ ﻭﺍﻧﺘﻲ ﺗﺘﺤﺪﻱ ﻓﻲ ﺯﻳﺎﺩ ﻋﻠﻲ ﻋﺼﺒﻴﺘﻪ
ﺭﻳﻢ : ﻋﻤﺮﻙ ﺷﻔﺘﻲ ﻣﻴﺖ ﻳﺤﺲ ﺑﺎﻟﻀﺮﺏ؟؟؟؟ ﺍﻧﻲ ﺣﺎﻟﺘﻲ ﺣﺎﻟﻴﺎ
ﻫﻜﻲ ... ﺯﻳﺎﺩ ﻧﺤﺒﻪ ﻋﻠﻲ ﻗﺴﻮﺗﻪ ﻣﻌﺎﻳﺎ ﻧﺤﺒﻪ ﻭﻣﺎﻧﻌﺮﻓﺶ ﻋﻼﺵ ﻣﻊ
ﺍﻧﻲ ﻋﺎﺭﻓﺔ ﺍﻧﻪ ﻳﻜﺮﻫﻨﻲ ﻭﺯﺍﺩ ﻛﺮﻫﻨﻲ ﺑﻌﺪ ﻣﺎﻃﻠﻖ ﺃﻣﻴﺮﺓ ... ﻳﺎﺭﻳﺘﻨﻲ
ﻧﻘﺪﺭ ﻧﻜﺮﻫﺎ ﺯﻱ ﻣﺎﻫﻮ ﻛﺎﺭﻫﻨﻲ ...ﺑﺲ ﺍﻟﻠﻪ ﻏﺎﻟﺐ ﺍﻧﻲ ﺯﻱ ﺍﻟﻀﺤﻴﺔ
ﺍﻟﻠﻲ ﺗﺤﺐ ﺍﻟﺠﻼﺩ ...ﻭﺯﻱ ﺍﻟﻄﻴﺮ ﺍﻟﻠﻲ ﻳﺤﺐ ﺳﺠﺎﻧﻪ
ﻋﺒﻴﺮ ﻭﺟﻌﺘﻬﺎ ﺭﻳﻢ ﻉ ﺍﻻﺧﺮ: ﺑﺎﻫﻲ ﻧﻮﺿﻲ ﺧﻠﻲ ﻧﺘﻐﺪﻭ ( ﺗﺒﻲ ﺗﻨﻬﻲ
ﺍﻟﻤﻮﺿﻮﻉ)
ﺭﻳﻢ : ﻣﺎﻋﻨﺪﻳﺶ ﻧﻴﺔ
ﻋﺒﻴﺮ : ﺍﻟﻌﻴﻠﺔ ﻛﻠﻬﻢ ﺍﻛﻴﺪ ﻳﺴﺘﻨﻮ ﻓﻴﻨﺎ ﻏﻴﺮ ﻫﻴﺎ ﺗﻌﺎﻟﻲ .
ﻋﺒﻴﺮ ﻭﺭﻳﻢ : ﻋﻠﻴﻜﻢ ﺍﻟﺴﻼﻡ
ﺍﻟﻜﻞ : ﻭﻋﻠﻴﻜﻢ ﺍﻟﺴﻼﻡ
ﺯﻳﺎﺩ ﻛﺎﻥ ﻳﻠﻌﺐ ﻓﻲ ﺻﺤﻨﻪ ﺑﺎﻟﻜﺎﺷﻴﻚ ﺭﻓﻊ ﺭﺍﺳﻪ ﻭﺷﺎﻑ ﺍﺛﺎﺭ ﺍﻟﻜﻒ
ﻋﻠﻲ ﺧﺪ ﺭﻳﻢ ﺍﺳﺘﺤﻘﺮ ﻧﻔﺴﻪ ..
ﺑﻮ ﺯﻳﺎﺩ: ﻫﻼ ﻫﻼ ﺑﺒﻨﺖ ﺍﻟﻐﺎﻟﻲ ﺗﻌﺎﻟﻲ ﻗﻌﻤﺰﻱ .. ﺧﻴﺮﻩ ﻭﺟﻬﻚ؟؟؟
ﺭﻳﻢ : ﺍﻩ ...ﻻ ﺣﺴﺎﺳﻴﺔ ﻫﺎﺫﻱ
ﺑﻮ ﺯﻳﺎﺩ: ﺑﺎﻩ ﺗﻌﺎﻟﻲ ﻗﻌﻤﺰﻱ ﻓﻲ ﺟﻨﺒﻲ .....ﻭﻗﻌﻤﺰﺕ ﺭﻳﻢ ﺟﻨﺒﻪ ﻭﻛﺎﻧﺖ
ﻣﻘﺎﺑﻠﺔ ﻛﺮﺳﻲ ﺯﻳﺎﺩ ...
ﻋﺒﻴﺮ : ﻋﻤﻲ ﺷﻦ ﺭﺍﻳﻚ ﻧﻤﺸﻮ ﻟﻠﻤﺰﺭﻋﺔ ﻧﻐﻴﺮﻭ ﺟﻮ ...
ﺑﻮ ﺯﻳﺎﺩ: ﺍﻧﺘﻲ ﺗﺆﻣﺮﻱ
ﻋﺒﻴﺮ ﺑﻔﺮﺡ : ﺧﻼﺹ ﻧﻤﺸﻮ ﻏﺪﻭﺓ ﻻﻥ ﻧﻬﺎﻳﺔ ﺍﻻﺳﺒﻮﻉ ﻭﺧﺎﻟﺪ ﻣﺎﻋﻨﺪﺍﺵ
ﻣﺴﺘﺸﻔﻲ
ﺍﻡ ﺯﻳﺎﺩ : ﻳﻌﻨﻲ ﺿﺮﻭﺭﻱ ﻳﻤﺸﻲ ﺧﺎﻟﺪ ﻣﻌﺎﻧﺎ
ﻋﺒﻴﺮ ﻣﺘﺤﺸﻤﺔ : ﻗﺼﺪﻱ ﻧﺠﺘﻤﻌﻮ ﻛﻠﻨﺎ ﺧﻴﺮ
ﺑﻮﺯﻳﺎﺩ : ﻋﺎﺩ ﻛﻠﻪ ﻭﺍﻻ ﺧﺎﻟﺪ .... ﻋﺒﻴﺮ ﻣﺎﺗﺼﺒﺮﺵ ﺑﻼﻩ
ﺭﻳﻢ ﺗﻀﺤﻚ ﻋﻠﻴﻬﻢ ﻭﺧﻼﺹ .... ﻭﺯﻳﺎﺩ ﻃﻮﻝ ﺍﻟﻮﻗﺖ ﻋﻴﻮﻧﻪ ﻋﻠﻴﻬﺎ ﻭﻛﻴﻒ
ﻣﻨﺴﺠﻤﻪ ﻣﻊ ﺍﻟﻌﻴﻠﺔ
ﻋﺒﻴﺮ : ﺍﻟﺒﻨﺎﺕ ﻛﻠﻬﻢ ﻳﺤﺒﻮ ﺭﺟﺎﻟﺘﻬﻢ ﻣﺶ ﻏﻴﺮ ﺍﻧﻲ ... ﺍﻫﻮ ﺃﺳﺄﻟﻮ
ﺭﻳﻢ ... ﺻﺢ ﺭﻳﻢ ﻭﺍﻻ ﻻ؟؟؟؟
ﺭﻳﻢ ﻗﺎﻣﺖ ﻋﻴﻮﻧﻬﺎ ﻓﻲ ﻋﻴﻮﻥ ﺯﻳﺎﺩ ﻭﻗﻌﺪﺕ ﺗﺸﺒﺤﻠﻪ: ﻋﻦ ﺇﺫﻧﻜﻢ ﺑﻨﻮﺽ
ﺷﺒﻌﺖ
ﺍﻟﻌﻴﻠﺔ ﻛﻠﻬﺎ ﺣﺴﺖ ﺍﻥ ﻓﻲ ﺗﻮﺗﺮ ﺑﻴﻦ ﺯﻳﺎﺩ ﻭﺭﻳﻢ ﺑﺲ ﻓﻀﻠﻮ ﺍﻧﻬﻢ
ﻣﺎﻳﺘﺪﺧﻠﻮﺵ ﻓﻴﻬﻢ ...
~~~~~~~~~~~~~~~~~~~~~~~~
ﻫﻨﺎﺩﻱ ﺗﺠﻬﺰ ﻓﻲ ﺍﻟﻐﺪﻱ ﻟﻌﻤﻬﺎ ﻭﻣﺮﺕ ﻋﻤﻬﺎ ﻭﺗﺮﺗﺐ ﻓﻲ ﺍﻟﺼﻮﺍﻧﻲ ﻉ
ﺍﻟﺼﻔﺮﺓ ....
ﺍﻡ ﻓﺮﻳﺪ : ﻋﻼﺵ ﺍﺗﻌﺒﻲ ﻓﻲ ﺭﻭﺣﻚ ﺍﻟﺨﺪﻡ ﻣﻮﺟﻮﺩﻳﻦ
ﻫﻨﺎﺩﻱ : ﻻﻋﺎﺩﻱ ﻻﺗﻌﺐ ﻭﻻﺣﺎﺟﺔ
ﺧﺶ ﻋﻠﻴﻬﻢ ﻓﺮﻳﺪ : ﺍﻟﺴﻼﻡ ﻋﻠﻴﻜﻢ
ﻛﻠﻬﻢ : ﻭﻋﻠﻴﻜﻢ ﺍﻟﺴﻼﻡ
ﻓﺮﻳﺪ ﻳﺒﻲ ﻳﻘﻬﺮ ﻫﻨﺎﺩﻱ : ﻛﺎﻥ ﺍﻧﺘﻲ ﺍﻟﻠﻲ ﻣﻄﻴﺒﺔ ﻣﺎﻧﺒﻴﺶ
ﻫﻨﺎﺩﻱ : ﺍﻧﺖ ﺣﺮ ﺗﺘﻐﺪﻱ ﻭﺍﻻ ﻣﺎﺗﺘﻐﺪﺍﺵ
ﺍﻡ ﻓﺮﻳﺪ : ﺗﺤﺸﻢ ﺍﻧﺖ ﻭﻳﺎﻫﺎ ﻗﺎﻋﺪﻳﻦ ﺗﺘﻌﺎﺭﻛﻮ ﻗﺪﺍﻣﻲ
ﻫﻨﺎﺩﻱ ﺑﺎﺳﺖ ﺭﺍﺱ ﻋﺰﻭﺯﺗﻬﺎ: ﺍﺳﻔﺔ ﺳﺎﻣﺤﻴﻨﻲ
ﺍﻡ ﻓﺮﻳﺪ : ﻛﺎﻥ ﺍﺗﻌﺰﻳﻨﻲ ﻳﺎﺍﺑﻨﻴﺘﻲ ﻣﻌﺎﺵ ﺗﻌﺎﻧﺪﻱ ﺭﺍﺟﻠﻚ
ﻫﻨﺎﺩﻱ : ﻏﺎﻟﻲ ﻭﺍﻟﻄﻠﺐ ﺭﺧﻴﺺ
ﻓﺮﻳﺪ : ﺍﻳﻮﻩ ﻫﻜﻲ ﻣﺮﺗﻲ ﺷﺎﻃﺮﺓ ﺗﺴﻤﻊ ﻓﻲ ﺍﻟﻜﻼﻡ
ﺍﻡ ﻓﺮﻳﺪ : ﻧﻮﺽ ﺧﺶ ﻟﺪﺍﺧﻞ ﻭﺑﻌﺪ ﻧﻮﺗﻮ ﺍﻟﻐﺪﻱ ﺗﻮ ﺍﻧﺎﺩﻭﻙ
ﻓﺮﻳﺪ : ﺷﻦ ﻟﺰﺓ ﻳﻌﻨﻲ .....ﻭﺷﺎﻑ ﻟﻬﻨﺎﺩﻱ ﻟﻘﺎﻫﺎ ﺗﻀﺤﻚ ﻋﻠﻴﻪ : ﺍﻧﺘﻲ
ﻋﻼﺵ ﺗﻀﺤﻜﻲ
ﻫﻨﺎﺩﻱ ﺗﺤﻂ ﻓﻲ ﺍﻟﺼﻮﺍﻧﻲ : ﺷﻲ
ﻓﺮﻳﺪ : ﺑﺎﻫﻲ ﺑﺎﻩ ﻳﺼﻴﺮ ﺧﻴﺮ ..... ﻭﻃﻠﻊ
~~~~~~~~~~~~~~~~~~~~~~~
ﻓﻲ ﺍﻟﻠﻴﻞ ﺭﻭﺡ ﺧﺎﻟﺪ ﻣﻦ ﺍﻟﻤﺴﺘﺸﻔﻲ ﻣﺘﺄﺧﺮ ....ﻭﻛﺎﻧﺖ ﻋﺒﻴﺮ ﻣﻘﻌﻤﺰﺓ
ﺗﺠﻬﺰ ﻓﻲ ﺍﻟﺪﺑﺶ ﺍﻟﻠﻲ ﺑﻴﺮﻓﻌﻮﻩ ﻣﻌﺎﻫﻢ ﻟﻠﻤﺰﺭﻋﺔ
ﺧﺶ ﺧﺎﻟﺪ ﻣﺎﻟﻘﻬﺎﺵ ﻓﻲ ﺍﻟﺼﺎﻟﻪ ﻓﻔﺘﺢ ﺍﻟﺪﺍﺭ ﻭﺧﺶ ﻳﺴﺤﺐ ﻣﻦ ﻭﺭﺍﻫﺎ
ﺑﺸﻮﻳﺎ ﻭﻏﻄﺎﻟﻬﺎ ﻋﻴﻮﻧﻬﺎ
ﻋﺒﻴﺮ ﺑﺄﺑﺘﺴﺎﻣﺔ : ﺧﺎﻟﺪ
ﺧﺎﻟﺪ ﻟﻔﻬﺎ ﺟﻴﻬﺘﻪ : ﻛﻴﻒ ﻋﺮﻓﺘﻴﻨﻲ
ﻋﺒﻴﺮ : ﻣﻦ ﺩﻗﺎﺕ ﻗﻠﺒﻲ
ﺧﺎﻟﺪ : ﻳﺴﻠﻤﻠﻲ ﺍﻟﻘﻠﺐ ﻭﺻﺎﺣﺒﺘﻪ ﻳﺎﺭﺑﻲ . ﺑﺎﺳﻬﺎ ﻋﻠﻲ ﺧﺪﻫﺎ : ﺑﻨﻤﻮﺕ ﻣﻦ
ﺍﻟﺠﻮﻉ ﺭﺍﻩ
ﻋﺒﻴﺮ : ﺩﻗﻴﻘﺔ ﻭﻳﻜﻮﻥ ﺍﻟﻌﺸﻲ ﻭﺍﺗﻲ
ﺍﻣﺘﺪ ﺧﺎﻟﺪ ﻉ ﺍﻟﺴﺮﻳﺮ .... ﻭﻃﻠﻌﺖ ﻋﺒﻴﺮ ﺑﺘﺠﻬﺰ ﺍﻟﻌﺸﻲ .... ﻭﻟﻤﺎ ﺭﺟﻌﺖ
ﻭﻣﻌﺎﻫﺎ ﺻﻔﺮﺓ ﺍﻟﻌﺸﻲ ﻟﻘﺖ ﺧﺎﻟﺪ ﻓﻲ ﺳﺎﺑﻊ ﺣﻠﻤﻪ ...ﺍﺑﺘﺴﻤﺖ
ﻭﻏﻄﺎﺗﻪ ....
~~~~~~~~~~~~~~~~~~~~~~
ﺯﻳﺎﺩ ﺭﻗﺪ ﺗﺤﺖ ﻓﻲ ﺍﻟﻤﺮﺑﻮﻋﺔ ... ﻭﻧﺎﺽ ﻗﺒﻞ ﺻﻼﺓ ﺍﻟﻔﺠﺮ ﺑﺮﺑﻊ ﺳﺎﻋﺔ
ﻋﺸﺎﻥ ﻣﺎﻳﺸﻮﻓﻪ ﺑﻮﻩ ... ﻭﺧﺶ ﻟﻠﺼﺎﻟﺔ
ﺑﻮ ﺯﻳﺎﺩ ﻭﺧﺎﻟﺪ ﻛﻴﻒ ﻧﺎﺯﻟﻴﻦ ﺷﺎﻓﻮ ﺯﻳﺎﺩ ﻓﻲ ﺍﻟﺼﺎﻟﺔ ..
ﺑﻮﺯﻳﺎﺩ : ﻭﻳﻦ ﻛﻨﺖ؟؟؟
ﺯﻳﺎﺩ : ﻫﺎ .... ﻧﻀﺖ ﺑﺪﺭﻱ ﻗﻠﺖ ﺧﻠﻲ ﻧﺘﻤﺸﻲ ﺷﻮﻳﺎ.
ﺑﻮﺯﻳﺎﺩ : ﺑﺲ ﺷﻜﻠﻚ ﺗﻮﺍ ﻧﺎﻳﺾ ﻣﻦ ﺍﻟﻨﻮﻡ؟؟
ﺯﻳﺎﺩ : ﻻ ﻻ ﻏﻴﺮ ﺷﻜﻠﻲ ﻣﺎﻏﺴﻠﺖ ﻭﺟﻬﻲ
ﺑﻮﺯﻳﺎﺩ : ﺑﺎﻩ ﺍﻣﺸﻲ ﺍﺗﻮﺿﺎ ﻭﺃﻟﺤﻘﻨﺎ ..
ﺧﺎﻟﺪ : ﺍﺭﻓﻊ ﺑﻄﺎﻧﻴﺘﻚ ﺍﻟﻠﻲ ﻓﻲ ﺍﻟﻤﺮﺑﻮﻋﺔ ...
ﺯﻳﺎﺩ : ﺳﻜﺮ ﻓﻤﻚ ﺑﻮﻙ ﺷﻮﻱ ﺛﺎﻧﻲ ﺳﻤﻌﻨﺎ ﻭﺟﻲ ﺑﻴﻀﺮﺑﻪ ... ﺑﺲ ﺧﺎﻟﺪ
ﻫﺮﺏ ﻳﺠﺮﻱ ﻣﻨﻪ
ﺧﺎﻟﺪ : ﻫﻴﺎ ﺑﺴﺮﻋﺔ ﺑﻮﻙ ﻳﺴﺘﻨﻲ ﻫﻬﻬﻬﻬﻬﻬﻬﻬﻪ
ﺯﻳﺎﺩ : ﺗﻮ ﺗﺸﻮﻑ ﻛﺎﻥ ﻣﺎﻧﺪﻳﺮﻟﻚ ﻣﺸﻜﻠﺔ ﻣﻊ ﻋﺒﻴﺮ ﻣﺎﻧﺒﻘﺎﺵ ﺯﻳﺎﺩ ...
ﺧﺎﻟﺪ : ﻋﺒﻴﺮ ﻣﺴﺘﺤﻴﻠﺔ ﺗﺼﺪﻕ ﻓﻴﺎ ﺷﻲ،
ﺯﻳﺎﺩ : ﺑﺎﻩ ﺗﻮ ﻧﺸﻮﻓﻮ
~~~~~~~~~~~~~~~~~~~~~~~
ﺑﻌﺪ ﻃﻠﻌﺖ ﺍﻟﺸﻤﺲ ﻃﻠﻊ ﺑﻮ ﺯﻳﺎﺩ ﻭﺍﻡ ﺯﻳﺎﺩ ﻭﺧﻮﻩ ﻣﺤﻤﺪ ﻭﻣﺮﺗﻪ
ﻭﺍﻣﺸﻮ ﻟﻠﻤﺰﺭﻋﺔ ﺑﺪﺭﻱ ﻣﻊ ﺍﻟﺨﺪﻡ ﻋﺸﺎﻥ ﻳﻨﻈﻔﻮﻫﺎ ﻭﻳﺮﺗﺒﻮﻫﺎ ....
ﻣﻊ ﺍﻟﺴﺎﻋﺔ 11 ﻟﺤﻘﻮ ﺍﻟﺸﺒﺎﺏ ... ﻭﺭﻛﺐ ﺧﺎﻟﺪ ﻭﻋﺒﻴﺮ ﻭﺯﻳﺎﺩ ﻭﺭﻳﻢ ﻓﻲ
ﺳﻴﺎﺭﺓ ﻭﺣﺪﺓ ...
ﺯﻳﺎﺩ ﻟﻘﺎﻫﺎ ﻓﺮﺻﺔ ﻳﻨﺘﻘﻢ ﻣﻦ ﺧﺎﻟﺪ : ﺧﺎﻟﺪ ﺷﻦ ﺍﺧﺒﺎﺭ ﺍﻟﺸﻘﺮﺍﺀ ﺍﻟﺤﻠﻮﺓ
ﺍﻟﻠﻲ ﻣﻌﺎﻛﻢ ؟؟؟؟
ﻋﺒﻴﺮ : ﻣﻨﻮ ﺍﻟﺸﻘﺮﺍ ﻫﺎﺫﻱ؟؟؟ -_-
ﺧﺎﻟﺪ : ﺍﻱ ﺷﻘﺮﺍ ﺗﺘﻜﻠﻤﻮ ﻋﻠﻴﻬﺎ؟؟؟؟ o_0
ﺯﻳﺎﺩ ﺧﺒﻂ ﺭﺍﺳﻪ: ﺣﻲ ﻧﺴﻴﺖ ﺍﻥ ﻋﺒﻴﺮ ﻣﻌﺎﻧﺎ
ﺧﺎﻟﺪ : ﺯﻳﺎﺩ ﺑﺎﻟﻠﻪ ﻋﻠﻴﻚ ﻓﻜﻨﺎ ... ﺑﺼﺮ ﻓﻲ ﺍﻱ ﺣﺎﺟﺔ ﻏﻴﺮ ﻫﺎﻟﻤﻮﺿﻮﻉ
ﺯﻳﺎﺩ : ﺑﺠﺪ ﻣﺶ ﻗﺼﺪﻱ ..ﺑﺲ ﻛﻨﺖ ﻧﺒﻲ ﻧﻌﺮﻑ ﺷﻦ ﺻﺎﺭ ﻓﻴﻬﺎ ﻻﻧﻚ
ﺩﻳﻤﺎ ﺗﺸﻜﺮ ﻓﻴﻬﺎ
ﺧﺎﻟﺪ : ﻋﺒﻴﺮ ﺭﺍﻫﻮ ﻳﻜﺬﺏ ﻣﺎﺗﺼﺪﻗﻴﺶ
ﻋﺒﻴﺮ ..................
ﺧﺎﻟﺪ : ﻳﻌﻨﻲ ﺻﺪﻗﺘﻴﻪ
ﺯﻳﺎﺩ ﻳﻀﺤﻚ : ﻫﻬﻬﻬﻬﻬﻬﻪ ﻣﺎﺗﺼﺪﻕ ﻓﻴﻚ ﺷﻲ ﻣﺎﺗﺨﺎﻓﺶ
ﺧﺎﻟﺪ : ﻣﻌﻘﻮﻟﺔ ﻳﺎﻋﺒﻮﺭﺓ ﻫﻜﻲ ﺗﺼﺪﻗﻴﻪ ﻫﺎﻟﻤﺠﺮﻡ
ﻋﺒﻴﺮ : ﻋﻼﺵ ﺗﻜﺬﺏ ﻋﻠﻴﺎ ﺯﻳﺎﺩ ...ﺧﻠﻮﺩﻱ ﺳﺎﻣﺤﻨﻲ ﻭﺍﻟﻠﻪ ﺍﻟﻐﻴﺮﺓ ﻋﻤﺘﻠﻲ
ﻋﻴﻮﻧﻲ
ﺯﻳﺎﺩ ﻳﻘﻠﺪ ﻓﻴﻬﺎ : ﺧﻠﻮﺩﻱ ﻭﺍﻟﻠﻪ ﺍﻟﻐﻴﺮﺓ ﺃﻋﻤﺘﻨﻲ ﻫﻬﻬﻬﻬﻬﻬﻪ
ﻋﺒﻴﺮ : ﺭﻳﻢ ﺷﺪﻱ ﺭﺍﺟﻠﻚ ﻭﺍﻻ ﻧﺬﺑﺤﻪ
ﺭﻳﻢ : ﻫﻮ ﻟﻴﻚ ﺩﻳﺮﻱ ﻓﻴﻪ ﺍﻟﻠﻲ ﺗﺤﺒﻴﻪ
ﺯﻳﺎﺩ : ﺷﻔﺖ ﻳﺎﺧﺎﻟﺪ ﺍﻧﺖ ﻣﺮﺗﻚ ﺗﻐﺎﺭ ﻋﻠﻴﻚ ﻭﺍﻧﻲ ﺗﺒﻴﻨﻲ ﻧﻤﻮﺕ
ﻋﺒﻴﺮ : ﺧﺎﻟﺪ
ﺧﺎﻟﺪ ............
ﻋﺒﻴﺮ ﻗﻌﺪﺕ ﺗﺒﻜﻲ ... ﺯﻳﺎﺩ : ﺗﻲ ﺧﻼﺹ ﻳﺎﺭﺍﺟﻞ ﺍﻟﺒﻨﺖ ﺍﻋﻲ ﺗﺒﻜﻲ
ﺧﺎﻟﺪ ﺷﺎﻑ ﻟﻠﻤﺮﺍﻳﺔ ﺷﺎﻑ ﻋﺒﻴﺮ : ﺑﺎﻩ ﺗﻮﺍ ﻋﻼﺵ ﺍﻟﺪﻣﻮﻉ ؟؟؟
ﻋﺒﻴﺮ : ﺍﻧﺖ ﺯﻋﻼﻥ ﻣﻨﻲ
ﺧﺎﻟﺪ : ﻋﺒﻮﺭﺗﻲ ﺍﻧﻲ ﻧﺰﻋﻞ ﻣﻦ ﺍﻟﺪﻧﻴﺎ ﻛﻠﻬﺎ ﻭﻣﺎﻧﺰﻋﻠﺶ ﻣﻨﻚ
ﺯﻳﺎﺩ : ﺍﺣﻢ ﺍﺣﻢ ﺍﺣﺘﺮﻣﻮ ﻭﺟﻮﺩﻧﺎ
ﺧﺎﻟﺪ : ﺍﻫﻮ ﻋﻨﺪﻙ ﺭﻳﻢ ﺗﻐﺰﻝ ﻓﻴﻬﺎ ﻭﺍﻻ ﻏﻴﺮﺓ ..
ﺯﻳﺎﺩ ﻗﻮﻱ ﺍﻟﻤﺴﺠﻞ ﻣﺎﻳﺒﻴﺶ ﻳﺴﻤﻌﻬﻢ ﻭﻛﻞ ﻣﺎﻳﺘﻜﻠﻢ ﺧﺎﻟﺪ ﻳﺰﻳﺪ ﻳﻌﻠﻴﻪ
~~~~~~~~~~~~~~~~~~~~~~~
ﻭﺻﻠﻮ ﻟﻠﻤﺰﺭﻋﺔ ﻭﺧﺎﻟﺪ ﻭﺯﻳﺎﺩ ﻗﻌﺪﻭ ﻳﻨﺰﻟﻮ ﻓﻲ ﺍﻟﺸﻨﺎﻃﻲ ﻭﺭﻳﻢ ﻭﻋﺒﻴﺮ
ﺧﺸﻮ ﻟﻠﺼﺎﻟﻮﻥ ﺣﻮﻟﻮ ﻋﺒﺎﻳﺘﻬﻢ ﻭﻗﻌﻤﺰﻭ ...
ﻋﺒﻴﺮ : ﺍﻭﻭﻭﻭﻑ ﺍﻟﺠﻮ ﺳﺎﺧﻦ ﺑﻜﻞ ....ﺣﻘﺎ ﺭﻳﻢ ﻋﻼﺵ ﺍﻣﻚ ﻣﺎﺟﺖ ﻣﻌﺎﻧﺎ
ﺭﻳﻢ : ﻣﺸﺖ ﻟﺨﺎﻟﺘﻲ ﺗﺴﻜﻦ ﻓﻲ ﻣﺪﻳﻨﺔ ﺛﺎﻧﻴﺔ
ﻋﺒﻴﺮ : ﺍﻧﺘﻲ ﻋﻨﺪﻙ ﺧﺎﻟﺔ
ﺭﻳﻢ : ﺍﻱ ﻋﻨﺪﻫﺎ ﺑﻨﺖ ﺍﺳﻤﻬﺎ ﺭﻧﻴﻢ ﻣﻦ ﻋﻤﺮﻱ ... ﻭﻋﻨﺪﻫﺎ ﺯﻭﺯ ﻭﻻﺩ
ﻣﻌﺎﺫ 22 ﺳﻨﺔ ﻭﻓﺎﺭﺱ 27 ﺳﻨﺔ
ﻋﺒﻴﺮ : ﻋﻼﺵ ﻣﺎﺷﻔﻨﺎﻫﻢ ﻓﻲ ﻋﺮﺳﻲ ﺍﻧﻲ ﻭﻫﻨﺎﺩﻱ
ﺭﻳﻢ : ﻛﺎﻧﻮ ﻣﻊ ﺑﻮﻫﻢ ﻓﻲ ﻟﻨﺪﻥ ﻳﺘﻌﺎﻟﺞ ﻣﻦ ﺍﻟﺴﺮﻃﺎﻥ
ﻋﺒﻴﺮ ﺑﺼﺪﻣﺔ : ﺳﺮﻃﺎﻥ !!!!
ﺭﻳﻢ : ﺍﻱ ﻣﺴﻜﻴﻦ ﺑﺲ ﻛﺎﻧﺖ ﺣﺎﻟﺘﻪ ﻣﺴﺘﻌﺼﻴﺔ ﻓﺘﻮﻓﻲ ﻣﺴﻜﻴﻦ
ﻋﺒﻴﺮ : ﺍﻟﻠﻪ ﻳﺮﺣﻤﻪ ...ﻭﺍﻣﻚ ﻣﺎﺷﻴﺔ ﺗﻌﺰﻱ ﻗﺼﺪﻙ
ﺭﻳﻢ : ﻻ ﻻ ﻣﺎﺷﻴﺔ ﺑﺘﻘﻌﺪ ﻣﻌﺎﻫﺎ ﺩﻳﻤﺎ ... ﻉ ﺍﻻﻗﻞ ﻳﻮﻧﺴﻮ ﺑﻌﺾ
ﺧﺸﺖ ﻋﻠﻴﻬﻢ ﻫﻨﺎﺩﻱ ﻭﻛﺎﻧﺖ ﻛﻴﻒ ﻭﺻﻠﺖ ﻫﻲ ﻭﻓﺮﻳﺪ : ﺍﻟﺴﻼﻡ ﻋﻠﻴﻜﻢ
ﻋﺒﻴﺮ ﻭﺭﻳﻢ : ﻋﻠﻴﻜﻢ ﺍﻟﺴﻼﻡ
ﻫﻨﺎﺩﻱ : ﺧﻴﺮﻛﻢ ﺣﺰﻳﻨﺎﺕ؟؟؟
ﻋﺒﻴﺮ : ﻻ ﺣﺰﻳﻨﺎﺕ ﻻﺷﻲ
ﻫﻨﺎﺩﻱ : ﺷﻦ ﺑﻴﻨﻜﻢ ﺃﺳﺮﺍﺭ ﺷﻜﻠﻪ؟؟؟
ﺭﻳﻢ : ﻻ ﺃﺳﺮﺍﺭ ﺷﻨﻮ ؟؟؟
ﻋﺒﻴﺮ : ﺷﻦ ﺭﺍﻳﻜﻢ ﻧﻄﻠﻌﻮ ﻟﺒﺮﺍ ﺍﻟﺠﻮ ﺣﻠﻮ
ﻫﻨﺎﺩﻱ : ﺗﻮ ﻧﻤﺸﻲ ﻧﺴﻠﻢ ﻋﻠﻲ ﺃﻣﻲ ﻭﻧﺠﻴﻜﻢ
~~~~~~~~~~~~~~~~~~~~~~
ﻓﺮﻳﺪ ﺧﺶ ﻟﻘﻲ ﺧﺎﻟﺪ ﻣﻘﻌﻤﺰ ﻭﺯﻳﺎﺩ ﻣﻤﺘﺪ ﻉ ﺍﻟﻜﻨﺒﺔ ﻭﺣﺎﻁ ﻣﺨﺪﺓ ﻋﻠﻲ
ﺭﺍﺳﻪ ....
ﻓﺮﻳﺪ : ﺷﻦ ﻫﺎﻟﻤﻠﻞ ﻧﻮﺿﻮ ﻧﺘﺴﻠﻮ ﻓﻲ ﺣﺎﺟﺔ
ﺧﺎﻟﺪ : ﺍﻣﺸﻲ ﺍﺗﺴﻠﻲ ﻣﻊ ﻫﻨﺎﺩﻱ
ﻓﺮﻳﺪ : ﻫﻨﺎﺩﻱ ﻣﺸﺖ ﻣﻊ ﺍﻟﺒﻨﺎﺕ
ﺯﻳﺎﺩ : ﺍﺳﻜﺘﻮ ﺧﻠﻮﻧﻲ ﻧﺮﻗﺪ
ﻧﺎﺽ ﻓﺮﻳﺪ ﻭﺧﺪﻱ ﻃﺎﺳﺔ ﺍﻣﻴﺔ ﻭﺻﺒﻬﺎ ﻋﻠﻲ ﺯﻳﺎﺩ : ﺷﻦ ﻗﻠﺖ
ﺑﺘﺮﻗﺪ؟؟؟؟؟
ﻧﺎﺽ ﺯﻳﺎﺩ ﻭﻗﻌﻤﺰ ﻣﺨﻠﻮﻉ : ﻳﺎﻓﺮﻳﺪ ﺍﻟﺸﻴﺎﻃﻴﻦ ﻭﺍﻟﻠﻪ ﻟﻤﺎ ﻧﻮﺭﻳﻚ
ﻭﻃﻠﻊ ﻓﺮﻳﺪ ﻳﺠﺮﻱ ﺧﻂ ﻭﺯﻳﺎﺩ ﻭﺭﺍﻩ ﻭﺧﺎﻟﺪ ﻳﺼﻮﺭ ﻓﻲ ﻛﻞ ﺷﻲ
ﻭﻳﻀﺤﻚ ...
ﻓﺮﻳﺪ ﺧﺶ ﻳﺠﺮﻱ ﻟﺪﺍﺧﻞ ﻭﻛﺎﻧﺖ ﺭﻳﻢ ﻣﺎﺭﺓ ﻓﺨﺒﻂ ﻓﻴﻬﺎ ﻟﺪﺭﺟﺔ ﺭﻳﻢ
ﻗﺮﻳﺐ ﻃﺎﺣﺖ
ﻓﺮﻳﺪ : ﺍﺳﻒ ﺍﺳﻒ ﻭﺗﺤﺸﻢ ﻃﻠﻊ ﺑﺴﺮﻋﺔ ...
ﺯﻳﺎﺩ ﺷﺎﻑ ﻓﺮﻳﺪ ﻃﺎﻟﻊ ﻭﻭﺟﻪ ﺃﺣﻤﺮ : ﺧﻴﺮ ﺑﻼﻙ ﺍﻛﻴﺪ ﻣﺪﺍﻳﺮ ﻋﻤﻠﺔ؟؟؟
ﻓﺮﻳﺪ ﺍﺭﺗﺒﻚ : ﻻ ﻣﺎﺩﺭﺕ ﺷﻲ ﻏﻴﺮ ﺳﻤﻌﺖ ﺻﻮﺕ ﺍﻟﺒﻨﺎﺕ ﻃﻠﻌﺖ ﺑﺴﺮﻋﺔ
ﺯﻳﺎﺩ ﺷﻚ ﻓﻲ ﺍﻟﻤﻮﺿﻮﻉ ﻭﺧﺶ ﻟﺪﺍﺧﻞ ﻓﻠﻘﻲ ﺭﻳﻢ ﻣﻘﻌﻤﺰﺓ ﻉ ﺍﻟﺼﺎﻟﻮﻥ
ﻭﺣﺎﻃﺔ ﻳﺪﻫﺎ ﻋﻠﻲ ﻗﻠﺒﻬﺎ ﻓﻌﺮﻑ ﺍﻥ ﻓﺮﻳﺪ ﺷﺎﻓﻬﺎ
ﺯﻳﺎﺩ : ﺍﻧﺘﻲ ﺷﻦ ﻃﻠﻌﻚ ﻣﻦ ﻏﻴﺮ ﻋﺒﺎﻳﺔ
ﺭﻳﻢ : ﻫﺎ .....
ﺯﻳﺎﺩ : ﻻ ﺍﻧﺘﻲ ﻣﺶ ﻣﻌﺎﻳﺎ ﺑﻜﻞ .... ﺷﻦ ﻃﻠﻌﻚ ﻣﻦ ﻏﻴﺮ ﻋﺒﺎﻳﺔ ﻗﺘﻠﻚ
ﺭﻳﻢ : ﻗﻠﺖ ﻣﺎﻓﻴﺶ ﺩﺍﻋﻲ ﻧﻠﺒﺲ ﻋﺒﺎﻳﺔ ﺩﺍﺧﻞ ﺍﻟﺤﻮﺵ
ﺯﻳﺎﺩ ﻗﺮﺏ ﻣﻨﻬﺎ ﻭﺑﻌﺼﺒﻴﺔ : ﻻ ﺍﻟﺒﺴﻲ ﻭﻣﺮﺓ ﺛﺎﻧﻴﺔ ﻧﺸﺒﺤﻚ ﻫﻜﻲ ﻧﻬﺎﺭﻙ
ﺭﻳﻢ : ﻭﺍﻧﺖ ﺷﻦ ﺩﺧﻠﻚ ﻓﻴﺎ؟؟؟
ﺯﻳﺎﺩ : ﻣﺮﺗﻲ ﻭﺍﻻ ﻫﺎﺫﺍ ﻣﺶ ﻛﺎﻓﻲ
ﺭﻳﻢ : ﻣﺮﺗﻚ ﺑﺎﻻﺳﻢ ﺑﺲ
ﺯﻳﺎﺩ ﻗﺮﺏ ﻣﻨﻬﺎ ﻭﺍﺑﺘﺴﻢ : ﺍﻫﺎ ﻓﻬﻤﺖ ﻋﻠﻴﻚ ﻗﺼﺪﻙ ﺗﺒﻴﻨﻲ ﻧﺨﻠﻴﻚ ﻣﺮﺗﻲ
ﻓﻌﻼ ...
ﺭﻳﻢ ﺗﺤﺸﻤﺖ ﻣﻦ ﺗﻔﺴﻴﺮﻩ ﻟﻜﻠﻤﺘﻬﺎ ﻻﻧﻬﺎ ﻣﺎﺗﻘﺼﺪﺵ ﺍﻟﻠﻲ ﻓﻬﻤﻪ : ﺍﻧﺖ
ﻭﺍﺣﺪ ﻣﺮﻳﺾ
ﺯﻳﺎﺩ ﻃﻠﻊ ﺑﺮﺍ ﻭﻫﻮ ﻣﺒﺘﺴﻢ ﻭﻻ ﻛﺄﻧﻪ ﻳﺴﻤﻊ ﻓﻴﻬﺎ
~~~~~~~~~~~~~~~~~~~~~~~
ﻋﺒﻴﺮ : ﺭﻳﻢ ﺧﻴﺮﻙ ﻣﺸﻴﺘﻲ ﺑﺸﻜﻞ ﻭﺭﺟﻌﺘﻲ ﺑﺸﻜﻞ
ﺭﻳﻢ : ﻻ ﻻ ﻣﺎﻓﻲ ﺷﻲ
ﻫﻨﺎﺩﻱ : ﺑﻨﺎﺕ ﻫﻴﺎ ﻧﻄﻠﻌﻮ ﻧﺸﻮﻓﻮ ﺍﻟﺨﻴﻞ ﻓﻲ ﺍﻻﺳﻄﺒﻞ ﺷﻦ ﺭﺍﻳﻜﻦ؟؟؟
ﻋﺒﻴﺮ : ﻻ ﺗﻮﺍ ﺍﻟﺠﻮ ﺳﺎﺧﻦ
ﻫﻨﺎﺩﻱ ﺷﺪﺗﻬﺎ ﻣﻦ ﺇﻳﺪﻫﺎ: ﻏﻴﺮ ﻫﻴﺎ ﺃﺣﺴﻦ ﻭﻗﺖ ﺗﻮﺍ ﻋﺸﺎﻥ ﻣﺎﻓﻲ
ﺣﺪ ... ﻭﻟﺒﺴﻮ ﺍﻟﺒﻨﺎﺕ ﻋﺒﺎﻳﺘﻬﻢ ﻭﺍﻣﺸﻮ
ﺭﻳﻢ ﻣﺒﺘﺴﻤﺔ : ﺍﻟﻠﻪ ﺍﺷﻜﺎﻟﻬﻢ ﺭﻭﻋﺔ
ﻋﺒﻴﺮ : ﺍﻭﻝ ﻣﺮﺓ ﺗﺸﻮﻓﻴﻬﻢ ﻉ ﺍﻟﻄﺒﻴﻌﺔ ؟؟
ﺭﻳﻢ : ﺑﺼﺮﺍﺣﺔ ﺍﻱ ﺍﻭﻝ ﻣﺮﺓ ﻧﻘﺮﺏ ﻣﻨﻬﻢ ﻫﻜﻲ
ﻫﻨﺎﺩﻱ : ﺗﻌﺎﻟﻲ ﻧﻮﺭﻳﻚ ﻓﺮﺱ ﺯﻳﺎﺩ
ﺭﻳﻢ : ﻻ ﻻ ﻓﻜﻴﻨﻲ ﺑﺎﻟﻚ ﺯﻱ ﺻﺎﺣﺒﻬﺎ
ﺍﻟﺒﻨﺎﺕ ﻗﻌﺪﻭ ﻳﻀﺤﻜﻮ ﺑﺲ ﻣﺶ ﻋﻠﻲ ﻛﻼﻡ ﺭﻳﻢ ﻭﻟﻜﻦ ﻻﻥ ﺯﻳﺎﺩ ﻛﺎﻥ
ﻭﺍﻗﻒ ﻭﺭﺍﻫﺎ
ﺭﻳﻢ : ﻋﻼﺵ ﺗﻀﺤﻜﻮ
ﻫﻨﺎﺩﻱ : ﻫﻬﻬﻬﻬﻬﻬﻪ ﺷﻮﻓﻲ ﻭﺭﺍﻙ .
ﺍﻟﺘﻔﺘﺖ ﺭﻳﻢ ﺑﺴﺮﻋﺔ ﻭﺷﺎﻓﺖ ﺯﻳﺎﺩ ﺣﺎﻁ ﺇﻳﺪﻩ ﻓﻲ ﻧﺼﻪ: ﻭﺧﻴﺮﻧﻲ ﺷﻦ
ﻓﻴﺎ 0_0
ﺭﻳﻢ : ﻗﻮﻝ ﺷﻦ ﺍﻟﻠﻲ ﻣﺶ ﻓﻴﻚ؟؟؟
ﺯﻳﺎﺩ ﻫﻤﺴﻠﻬﺎ ﻭﺑﺨﺒﺚ : ﻗﺘﻠﻚ ﺗﻮ ﻧﺨﻠﻴﻚ ﻣﺮﺗﻲ ﻓﻌﻼ ﻣﺶ ﺑﺎﻻﺳﻢ ﺑﺲ
ﻋﻼﺵ ﺯﻋﻼﻧﺔ
ﺭﻳﻢ : ﺍﺻﻼ ﻣﺎﻧﺒﻴﺶ ﻧﺸﻮﻑ ﻭﺟﻬﻚ
ﻋﺒﻴﺮ ﻭﻫﻨﺎﺩﻱ ﺍﻧﺴﺤﺒﻮ ﺑﻬﺪﻭﺀ ﻭﺧﻠﻮﻫﻢ ... ﻭﺯﻳﺎﺩ ﺑﻌﺪ ﻃﻠﻌﻮ ﺍﻟﺒﻨﺎﺕ
ﻗﺮﺏ ﻣﻨﻬﺎ ﺍﻛﺜﺮ ﻭﺣﻀﻨﻬﺎ ﻣﻦ ﻭﺭﺍ : ﺍﻇﻨﻲ ﺗﻮﺍ ﻣﺶ ﺣﺘﺸﻮﻓﻲ ﻭﺟﻬﻲ
ﺻﺢ .. ؟؟؟؟
ﺭﻳﻢ ﻗﻠﺒﻬﺎ ﺑﺪﺍ ﻳﻨﺒﺾ ﺑﺴﺮﻋﺔ ﻭﺣﺎﺳﺔ ﺭﻭﺣﻬﺎ ﻓﻲ ﻋﺎﻟﻢ ﺛﺎﻧﻲ ﻣﻌﺎﻩ ....
ﺭﻳﻢ ﺗﺤﺎﻭﻝ ﺗﺨﻔﻲ ﺍﺭﺗﺒﺎﻛﻬﺎ : ﺑﻌﺪ ﻋﻠﻴﺎ
ﺯﻳﺎﺩ ﻟﻔﻬﺎ ﺟﻴﻬﺘﻪ : ﻣﺘﺄﻛﺪﺓ
ﺭﻳﻢ : ﺍﻳﻪ
ﺯﻳﺎﺩ : ﺧﻼﺹ ﻣﻌﺎﺵ ﺗﻘﻮﻟﻲ ﻣﺮﺗﻲ ﺑﺎﻻﺳﻢ ﺍﻫﻮ ﺍﻧﺘﻲ ﻣﺎﺗﺒﻴﺶ
ﺭﻳﻢ ﺗﺤﺎﻭﻝ ﺗﻔﻚ ﺭﻭﺣﻬﺎ ﻣﻨﻪ : ﺑﻌﺪ ﻋﻠﻴﺎ
ﺯﻳﺎﺩ ﺣﻂ ﻋﻴﻨﻪ ﻓﻲ ﻋﻴﻦ ﺭﻳﻢ : ﺍﻭﻛﻲ ﺣﻨﺒﻌﺪ ﻋﻠﻴﻚ ﺑﺲ ﺑﺸﺮﻁ
ﺭﻳﻢ : ﻗﻮﻝ
ﺯﻳﺎﺩ : ﺗﺒﻮﺳﻴﻨﻲ
ﺭﻳﻢ : ﺍﺣﻠﻢ
ﺯﻳﺎﺩ : ﺧﻼﺹ ﻣﺎﻧﻴﺶ ﻣﺒﻌﺪ ﻋﻠﻴﻚ
ﺭﻳﻢ ﻏﻤﻀﺖ ﻋﻴﻮﻧﻬﺎ ﻭﺑﺎﺳﺎﺗﻪ ﻋﻠﻲ ﺧﺪﻩ ﺑﺴﺮﻋﺔ : ﻫﻴﺎ ﺧﻼﺹ ﺍﺭﺧﻴﻨﻲ
ﺯﻳﺎﺩ . ﻳﺒﺘﺴﻢ ﺑﺨﺒﺚ : ﻻ ﻫﺎﺫﻱ ﻣﺶ ﺑﻮﺳﺔ ﻧﺒﻲ ﺑﻮﺳﺔ ﺣﻘﻴﻘﺔ
ﺭﻳﻢ : ﻣﺎﻓﻴﺶ ﺍﺭﺧﻴﻨﻲ ﻫﻴﺎ
ﺯﻳﺎﺩ : ﺍﻧﻲ ﻣﺎﻭﺭﺍﻳﺎ ﺷﻲ ﻭﻣﺶ ﺣﻨﻄﻠﻘﻚ ﻟﻴﻦ ﺗﺒﻮﺳﻴﻨﻲ
ﺭﻳﻢ ﺿﻐﻄﺖ ﻋﻠﻲ ﻧﻔﺴﻬﺎ ﻭﺟﺖ ﺑﺘﺒﻮﺳﻪ ... ﻭﻟﻤﺎ ﻗﺮﺑﺖ ﻣﻨﻪ ﺑﻌﺪ ﺯﻳﺎﺩ
ﻭﺟﻪ : ﺗﺤﺴﺎﺑﻴﻨﻲ،ﻣﻴﺖ ﻋﻠﻴﻚ ﻭﺍﻻ ﻋﻠﻲ ﺑﻮﺳﺘﻚ
ﺭﻳﻢ ﺍﻧﺤﺮﺟﺖ ﻣﻦ ﺣﺮﻛﺔ ﺯﻳﺎﺩ : ﻣﺎﺩﺍﻡ ﻣﺶ ﻣﻴﺖ ﻋﻠﻲ ﺑﻮﺳﺘﻲ ﻃﻠﻘﻨﻲ
ﻛﺎﻧﻚ ﺭﺍﺟﻞ ﻭﻓﻴﻚ ﺫﺭﺓ ﺭﺟﻮﻟﺔ ﻭﺍﻻ ﺧﺎﻳﻒ ﻣﻦ ﺑﻮﻙ
ﺯﻳﺎﺩ ﺷﺪﻫﺎ ﺑﻘﻮﺓ : ﻋﺎﻭﺩﻱ ﺗﺮﺍ ﻣﺎﺳﻤﻌﺘﺶ
ﺭﻳﻢ : ﻧﻌﺎﻭﺩ ﻣﻴﺔ ﻣﺮﺓ ﻭﺍﻟﻠﻲ ﺑﺪﻳﺮﻩ ﺩﻳﺮﻩ
ﺯﻳﺎﺩ ﺭﻣﺎﻫﺎ ﻉ ﺍﻟﻮﻃﺎ : ﺧﻼﺹ ﻣﻦ ﻏﺪﻭﺓ ﻧﺮﻓﻌﻚ ﻻﻫﻠﻚ
ﺭﻳﻢ ﺷﺎﺩﺓ ﺭﻭﺣﻬﺎ ﻣﺎﺗﺒﻴﺶ ﺗﺒﻜﻲ: ﻭﻫﺎﺫﺍ ﺍﻟﻠﻲ ﻧﺒﻴﻪ
ﺯﻳﺎﺩ : ﺍﻭﻛﻲ ﻳﺎﺭﻳﻢ .... ﻭﻭﻟﻊ ﺳﻴﺎﺭﺗﻪ ﻭﻃﻠﻊ ﺑﺮﺍ ﺍﻟﻤﺰﺭﻋﺔ ﺣﺎﺱ ﺭﻭﺣﻪ
ﻣﺨﻨﻮﻕ
~~~~~~~~~~~~~~~~~~~~~~~~~
ﺧﺸﺖ ﺭﻳﻢ ﻟﺪﺍﺧﻞ ﻭﻭﺟﻬﺎ ﺑﺎﻳﻦ ﻋﻠﻴﻪ ﺍﻟﺤﺰﻥ ... ﻋﺒﻴﺮ : ﺷﻦ ﺩﺍﺭﻟﻚ ﺯﻳﺎﺩ
ﻋﻼﺵ ﻭﺟﻬﻚ ﺍﺻﻔﺮ ﻫﻜﻲ
ﺭﻳﻢ : ﻣﺎﺩﺍﺭ ﺷﻲ ...ﻋﻦ ﺇﺫﻧﻜﻢ ﺑﻨﺮﻛﺐ ﻟﺪﺍﺭﻱ ...ﻭﻣﺎﻃﻠﻌﺖﺵ ﺭﻳﻢ ﻣﻦ
ﺩﺍﺭﻫﺎ ﺑﻜﻞ .
ﻓﻲ ﺍﻟﻠﻴﻞ ﻛﺎﻥ ﺍﻟﺠﻮ ﺣﻠﻮ ﻭﻛﻠﻬﻢ ﻣﻘﻌﻤﺰﻳﻦ ﺍﻻ ﺯﻳﺎﺩ ﻭﺭﻳﻢ ﻃﺒﻌﺎ ...
ﺑﻮﺯﻳﺎﺩ : ﻭﻳﻦ ﺯﻳﺎﺩ ﻣﺎﺷﻔﺘﺎﺵ ﺍﻟﻴﻮﻡ
ﻓﺮﻳﺪ : ﻣﺎﻧﻌﺮﻓﺶ ﻳﺎﻋﻤﻲ ﺣﺘﻲ ﻧﺘﺼﻞ ﺑﻴﻪ ﺗﻠﻴﻔﻮﻧﻪ ﺍﻣﺴﻜﺮ
ﺑﻮﺯﻳﺎﺩ ﺑﺨﻮﻑ : ﺍﻣﺴﻜﺮ .
ﺧﺎﻟﺪ : ﻣﺎﺗﺨﺎﻓﺶ ﻳﺎﺑﻮﻱ ﺍﻧﺖ ﻋﺎﺭﻓﻪ ﻣﻦ ﻳﻮﻡ ﻃﻠﻖ ﺃﻣﻴﺮﺓ ﻭﺣﺎﻟﻪ
ﻣﻨﻘﻠﺐ،
ﺑﻮﺯﻳﺎﺩ : ﻣﺶ ﻋﺎﺭﻑ ﻋﻼﺵ ﻳﺘﺼﺮﻑ ﻫﻜﻲ ﻭﻫﻮ ﻋﻨﺪ ﻣﺮﺍﺓ ﻭﻻ ﻛﻞ
ﺍﻟﻨﺴﻮﺍﻳﻦ
ﻓﺮﻳﺪ : ﻣﻊ ﺍﻟﺰﻣﻦ ﺗﻮ ﻳﻨﺴﻲ ﻳﺎﻋﻤﻲ
ﺯﻳﺎﺩ ﻃﻮﻝ ﺍﻟﻠﻴﻞ ﻭﻫﻮ ﻳﻠﻒ ﻓﻲ ﺳﻴﺎﺭﺗﻪ ﻣﻦ ﺷﺎﺭﻉ ﻟﺸﺎﺭﻉ ﻭﻣﻀﺎﻳﻖ
ﻭﻣﻬﻤﻮﻡ ... ﻭﺑﻌﺪﻳﻦ ﻛﺘﺐ ﺭﺳﺎﻟﺔ ﻟﺨﺎﻟﺪ ﺍﻧﻪ ﻣﺶ ﺣﻴﺮﻭﺡ ﻭﺑﻴﺒﺎﺕ ﻟﺒﺮﺍ
~~~~~~~~~~~~~~~~~~~~~~~
ﺛﺎﻧﻲ ﻳﻮﻡ ﺍﻟﺼﺒﺢ ﻧﺎﺽ ﺍﻟﻜﻞ ﺑﺪﺭﻱ ﻭﺿﻤﻮ ﺩﺑﺸﻬﻢ ﻋﺸﺎﻥ ﻳﺮﻭﺣﻮ
ﻟﻠﻔﻴﻼ ....
ﺭﻳﻢ ﺭﻭﺣﺖ ﻣﻊ ﺧﺎﻟﺪ ﻭﻋﺒﻴﺮ ...ﻭﻫﻲ ﺭﺍﻛﺒﺔ ﻟﺠﻨﺎﺣﻬﺎ ﺗﺪﻋﻲ ﺍﻥ ﺯﻳﺎﺩ
ﻳﻜﻮﻥ ﻣﺶ ﻣﻮﺟﻮﺩ .. ﻓﺘﺤﺖ ﺍﻟﺒﺎﺏ ﻟﻘﺎﺗﻪ ﻣﻘﻌﻤﺰ ﻉ ﺍﻟﺴﺮﻳﺮ ﻳﺴﺘﻨﻲ ﻓﻴﻬﺎ
ﺯﻳﺎﺩ : ﻣﻊ ﻣﻦ ﺟﻴﺘﻲ؟؟؟
ﺭﻳﻢ : ﻣﻊ ﺧﺎﻟﺪ ﻭﻋﺒﻴﺮ
ﺯﻳﺎﺩ : ﻟﻤﻲ ﺣﻮﺍﻳﺠﻚ ﻋﺸﺎﻥ ﺍﻟﺴﻮﺍﻕ ﻳﺮﻓﻌﻚ ﻟﺤﻮﺵ ﺍﻫﻠﻚ
ﺭﻳﻢ : ﺍﻫﻠﻲ ﻣﺶ ﻗﺎﻋﺪﻳﻦ ﻓﻲ ﺍﻟﺤﻮﺵ ﺍﻣﻲ ﻣﺸﺖ ﺳﺎﻓﺮﺕ
ﻟﺨﺎﻟﺘﻲ ... ﻣﺎﻧﻘﺪﺭﺵ ﻧﻤﺸﻲ ﻟﻤﺪﻳﻨﺔ ﺛﺎﻧﻴﺔ ﻣﻊ ﺍﻟﺴﻮﺍﻕ
ﺯﻳﺎﺩ : ﺧﻼﺹ ﺗﻮ ﻧﺮﻓﻌﻚ ﺍﻧﻲ .... ﻋﻨﺪﻙ ﻧﺺ ﺳﺎﻋﺔ ﻭﺗﻜﻮﻧﻲ ﺟﺎﻫﺰﺓ
ﻓﺎﻫﻤﺔ .
ﺭﻳﻢ ...............
ﻧﺰﻝ ﺯﻳﺎﺩ ﻟﻠﺤﺪﻳﻘﺔ ﻭﻟﻘﻲ ﺑﻮﻩ ﻭﺍﻣﻪ ﻣﻘﻌﻤﺰﻳﻦ .ﺑﺎﺱ ﺯﻳﺎﺩ ﻋﻠﻲ ﺭﻭﺳﻬﻢ
ﺍﻻﺛﻨﻴﻦ ﻭﻗﻌﻤﺰ
ﺍﻡ ﺯﻳﺎﺩ : ﺧﻴﺮﻙ ﻳﺎﺍﻭﻟﻴﺪﻱ ﺷﻦ ﻓﻴﻚ؟؟؟
ﺯﻳﺎﺩ : ﻳﺎﺑﻮﻱ ﺍﻧﻲ ﻧﺒﻲ ﻧﻄﻠﻖ ﺭﻳﻢ
ﺑﻮﺯﻳﺎﺩ : ﺷﻦ ﺗﺨﺮﻑ ﺍﻧﺖ 0_0
ﺯﻳﺎﺩ : ﻳﺎﺑﻮﻱ ﺍﻧﻲ ﺩﺭﺕ ﻛﻞ ﺍﻟﻠﻲ ﺗﺒﻴﻪ ﺑﺲ ﺧﻼﺹ ﻣﻌﺎﺵ ﻧﻘﺪﺭ
ﺍﻡ ﺯﻳﺎﺩ : ﻛﻴﻒ ﺍﻃﻠﻖ ﻣﺮﺗﻚ ﻣﻦ ﻏﻴﺮ ﺳﺒﺐ
ﺯﻳﺎﺩ : ﻣﺎﻧﺤﺒﻬﺎﺵ ﻳﺎﻧﺎﺱ ﻣﺎﻧﺤﺒﻬﺎﺵ ﺑﻨﺘﺰﻭﺝ ﺍﻱ ﻭﺣﺪﺓ ﺍﻻ ﻫﻲ
ﺑﻮﺯﻳﺎﺩ : ﻣﺴﺘﺤﻴﻠﺔ ﺗﻄﻠﻘﻬﺎ ﻭﺍﻧﻲ ﺣﻲ
ﺯﻳﺎﺩ : ﻳﺎﺑﻮﻱ ﻋﻤﺮﻱ ﻣﺎﻋﺼﻴﺘﻚ ﻓﻲ ﺣﺎﺟﺔ ﻣﺎ ﺗﻀﻐﻄﺶ ﻋﻠﻴﺎ
ﺍﻡ ﺯﻳﺎﺩ : ﺧﻼﺹ ﺧﻠﻲ ﺍﻟﻮﻟﺪ ﺑﺮﺍﺣﺘﻪ ﻳﺎﺭﺍﺟﻞ
ﺑﻮﺯﻳﺎﺩ : ﻳﺘﺰﻭﺝ ﻛﺎﻥ ﺑﻴﺘﺰﻭﺝ ﺑﺲ ﺭﻳﻢ ﻣﺴﺘﺤﻴﻞ ﻳﻄﻠﻘﻬﺎ
ﺯﻳﺎﺩ : ﻣﺎﻫﻮ ﻣﻦ ﻗﺒﻞ ﺟﺒﺮﺗﻨﻲ ﻧﻄﻠﻖ ﺍﻣﻴﺮﺓ
ﺑﻮﺯﻳﺎﺩ : ﺃﻣﻴﺮﺓ ﺃﻣﻴﺮﺓ .... ﺳﺎﺩ ﻳﺎﻭﻟﺪﻱ ﺍﻧﺴﺎﻫﺎ ﻭﻋﻴﺶ ﺣﻴﺎﺗﻚ ﺧﻼﺹ
ﺯﻳﺎﺩ : ﺑﺎﻫﻲ ﺑﻨﻨﺴﺎﻫﺎ ﺑﺲ ﺭﻳﻢ ﻣﺴﺘﺤﻴﻞ ﻧﻌﻴﺶ ﻣﻌﺎﻫﺎ .... ﺗﺒﻮ ﻧﺘﺰﻭﺝ
ﻭﻧﺠﻴﺐ ﺻﻐﺎﺭ ﻣﻦ ﻏﺪﻭﺓ ﻧﺘﺰﻭﺝ ﺑﺲ ﺭﻳﻢ ﻻ
ﺑﻮﺯﻳﺎﺩ : ﺑﺎﻫﻲ ﻋﻨﺪﻱ ﺣﻞ ﺍﺭﻓﻌﻬﺎ ﻟﺤﻮﺵ ﺃﻫﻠﻬﺎ ﻭﺧﻠﻴﻬﺎ ﻏﺎﺩﻳﻜﺎ ﻓﺘﺮﺓ
ﺯﻳﺎﺩ .
يتبع........
