🌸و وقعت الفريسة في حب الصياد
كان الجو غائما نوعا ما عندما توجه الركاب في مطار الشيخ حمد نحو الطائرة المتوجهة الى ايطاليا.
جلست بالقرب من النافذه الصغيره المغلقه وهي تقاوم شعور الغثيان الذي انتابها.... كانت اسوأ ساعات مرت عليها ف الجو من الخرطوم الى الدوحه.
خصوصا أنها تجربتها الاولى....تجاهلت نظرات زوجها التي تشع سخرية منها واكتفت بالاستغفار عسى ولعل ان يطمأنها ويزيل شعورها السيئ
مضى القليل من الوقت ثم اقلعت الطائره لتستقر على بعد مئات الاقدام عن سطح الارض.
تنفست الصعداء اخيرا وبدأت ب بمراقبة حركة الطائرة عن طريق الخريطه الموضحه الشاشة.
_ اخيرا عرفت شي بيقهرك وبيخوفك ويخليك زي الفاره كدا 😏
لاحظ لي عيونها البترمش بي سرعه دلالة على توترها.... ميل راسو شوية وهو بعاين ليها... قبل م يضحك : اهدي اهدي م حتقع بيك 😂.
شالت انفاسها وقالت ليه بصوت منخفض : هو احنا ماشين ياتو بلد بالضبط ؟
_ م بلد واحد
_ كيفن
_ مممممممم.... كيفن.... يعني حنوصل ايطاليا وفيها حنركب السفينه وحتلف بينا كم بلد وترجعنا ايطاليا تاني وبعدها بنرجع بلدنا.
_ انت عندك شغل يعني ؟
_ كيف ؟
_ يعني السفر عشان شغلك
_ لا... عشان عرسي.... بتعرفي شهر العسل ؟؟؟ المدة البسافرو فيها العرسان دي... عارفاهو ولا اشرح زيادة.
_ لا عارفة.
_ كويس شاطره.
مد ليها كيس وهو بقول بنبرة ساخره : هاك دا
_ دا شنو دا ؟
_ م مطمن ليك... كان حسيتي انك عايزة ترجعي انجزي ف الكيس دا.
_ لا م دايراو شكرا.
ختاه ف رجولها : امسكي امسكي دا م الاكل حق البيت داك البتحرديه وتقولي م دايراو.... الكيس حيحفظ ماء وجهك عملتيها.
قال جملتو ورجع كرسيه شوية لي ورا وهو بخت السماعات ف اضانو.
طيارتهم وصلت مطار ليوناردو دافنشي الدولي( او مطار فيو ميتشينو).
ميكال لبس نضارتو الشمسية الكان خاتيها ف راسو ومشا... وتوتيل تابعتو وهي بتعاين حواليها بدهشة للناس والمكان.
مشو جابو شنطهم وبعدها طلعو.... تتوتيل اتملكتها سعادة عجيبة من الجو والناس الماشة.... ميكال قبل عليها : صدقيني لو استمريتي كدا حضيعي وتاني لا حتلقيتي ولا حلقاك عشان كدا احسن تمشي جمبي.
مشت جمبو ولسا تعاين وتتلفت والجو تحفففففففه.
ميكال كان عارف الخطوات وحيعمل شنو عن ظهر قلب لانها م كانت اول مره بالنسبة ليه.
دخل محل بقالة اشترا منو تذاكر.... المهم لحدي م ركبو القطر المتوجه لمنطقه اسمها Civitavecchia.
ميكال : القطر من ما يقيف انزلي طوالي م تمشي براحه براحه وتتلفتي لانو حيتحرك طوالي وتاني م برجع الا بعد ساعه.
_ كويس.
ف النهاية القطر وصل بيهم ونزلو.... الساعه كانت 3 ضهر والسفينه حتتحرك 4.
اي واحد فيهم كان جاري شنطتو لي قرابة الربع ساعه....
ميكال لاحظ لي انفاسها البدت تقوم من المشي...شال شنطتهت منها وهو بقول : الشتل بص حيوصل هسه.
_ الشتله بص دا شنو ؟
_ م شتله 😑.... شتل... دا بص تبع الشركه السياحيه حقت السفن.... بيوصلنا لحدي السفينه.
هزت راسها: ايواااا
وصلو الميناء.... توتيل رفعت راسها لمن قال ليها : هديك السفينه.
كانت ضخمه ومكونه من عدة طوابق... وحاجه كدا تكتتتتتم الانفاس... وقفو في الصف للتشك ان... كان طابور طوييييل والناس واقفه.... وطبعا توتيل كانت مررررهقة وتعبانه من الوقفة لكن الحماس والفرحه خلوها تتجاوز كل دا.
الصفوف لانها كانت منظمه خلصوا منهم كلهم في قرابة ال9 دقايق بس..ٌ..شالو جوازاتهم وادوهم اوراق وبطاقات.
توتيل : هي شالو جوازي 😢
ميكال : بيخلو معاهم
_ لي ؟
_ لمن نطلع اوضتنا ونرتاح بوريك لي... انا هسه مرهق.
اول م دخلو كانت الدهشة الحقيقية.... الرهااااااابه ف مكان واحد..... السفينه ااااااي شي يخطر ع البال موجود فيها.
السقوف كانت عالية ومليانه بالاضاءة والناس من مختلف الجنسيات ماشين وجايين ويصورو ويتصورو.
مشا بيها ف الممر بتاع الغرف.... الغرفه حقتهم كانت مطله ع البحر.
الاوضة كانت حللللوة شديد.... لونها بيجي وفيها اضاءة هاااااادية والسرير بأغطيتو البيضاء والبنفسجيه ظاااهر جدا انو مريح... كان ف كنبه وثيره باللون البنفسجي الغامض.... والستاره حقت الشرفه المطله على البحر برضو بنفس اللون البنفسجي.
دخلو الشنط حقتهم.... ميكال ملص جزمتو وانجدع ف السرير الوثير المريييح 😍.
كان خاتي يدينو تحت راسو ومستكين.
اما هي مشت ناحية الكنبه وقعدت فيها.... لثواني سرحت فيه وهو راقد.
شعرو الناعم الكثيف.. وحواجبو الاتلاقت بسبب انو تعبان... وانفو الحاد والدقن والشنب المزينين وشو... عضلاتو القوية الظهرت بسبب رقدتو.... ولونو الاسمر الرايق.
ختت يدها ف قلبها البيدق بسرعه.
هزت راسها كانها بتطرد ف الاحساس الغريب الاتملكها قبل شوية.
قامت وزحت الستاره وفتحت الباب حق الشرفة المطله على البحر الأزرق💙.
الهواء داعب وشها الجميل بطريقة خلتها تبتسم لكن فجأة كدا اتذكرت امها وابوها وسيدة.... وهم وين وهي وين ؟ حتى امها وابوها من اخر مره ديك م شافتهم تاني ولا حتى ودعتهم.
فجأة نست اي شي لمن سمعت صوت انذار عاااالي ومزعج قبل وراها بسرعه لقت ميكال مفتح عيونو.... دخلت جوه : دا شنو دا الحاصل شنو ؟
قام من السرير بسرعه : دا انذار الطوارئ
_ كيف يعني طوارئ
_ معناها السفينه عايزة تغرق ومفروض الناس تطلع بسرعه عشان ينزلوهم ف قوارب النجاة.
ختت يدينها ف راسها : لااااا حول ولا قوة الا بالله.... اشهد ان لا اله الا الله واشششهد ان محمد عبده ورسوله.
فتح ليها يدينو : تعالي خلينا نطلع بي سرعه.
جات عليهو وهي بتتحوقل وبتقول سترك يارب.
اتفاجأت بيه بينحني عليها و بيعانقها بقوة..... قالت ليه بخوف وبصوت مخنوق : السفينه حتغرق خلينا نطلع
_ السفينه م حتغرق بس دا زي التدريب عشان لو حصل شي زي دا لا سمح الله الناس تكون عارفة تعمل شنو.
بعد شوية انتبهت لنفسها وللوضع الهي فيه معاه.
قبل م تزحو منها زحا هو براه وعاين ليها لي مسااااافة..... ارتسمت ابتسامه غياااااااظه ف وشو ومستفزة لمن شاف ملامح الغضب الارتسمت ف وشها.... بس تاني الملامح دي اختفت وظهرت بدلها ملامح غثياااااان.🙊
ختا يدو ف وشو بي ملل : دوار البحر 😑💔
مسكها من كتافينها وفتح ليها باب الحمام : اخدي راحتك
طلع من الاوضة وجاها راجع بحبه لدوار البحر البوزعوها للركاب.
بلعتها وبعدتها رقدت ف السرير وهي مغطية وشها بيدينها.... حست بيدو وهو بطلع ليها الجزمه اللابساها.
قالت ليه لا بخفوت لمن مد يدو عشان يطلع ليها حجابها.... حست بيه شماها واتغاظ منها.
_تمام.... ارتاحي
طلع وقفل الباب بوراه.... م عرفتو ماشي على وين.
بقت بتهمس لنفسها : اوعك يا توتيل تخلي عاطفتك تسيطر عليك... هو م بيعمل كدا حبا فيك... هو بحاول يتودد ليك ويظهر انو كويس عشان حاجه واحده هو عايزها
مرت قرابة الثلاثه ساعات.... ميكال م ظهر وتوتيل راقده ف سريرها.... بعد م بلعت الحبه الدوار راح وهي اصلا كانت تعبانه فنامت.
لمن صحت من النوم كانت الساعه 7 مساء..... اول شي عملتو اتوجهت ناحيه الشرفه وزحت الستاير.... كانو ف عرض البحر.... والقمر المتربع ف السماء عاكس بي لونو الفضي ف الموية.... كانت منظر جمممميل خصوصا نسمات الرياح المداعبه.
قبلت وراها لمن باب الاوضة اتفتح.
جا داخل وهو بقول : اها بقيتي كيف.
_ احسن بكتير الحمدلله.
_ الحمدلله
_ السفينه دي ماشابنا وين ؟
مد ليها الورقه الكانو خاتينها ليهم قدام الباب.
_ دي شنو ؟
_ دي ورقة بختوها ليك كل يوم بتوريك مواعيد الوصول والتحرك والبلد الماشين ليها ودرجة الحرارة فيها والحالة الجوية والمناطق السياحيه الممكن الزول يزورها.
_ اها
مدت يدها عشان تشيل الورقة... لكن رجع يدو منها: اقول ليك شي خليها مفاجأة.
_ خلاص طيب.
اتلفتت حواليها : هنا ماف اذان ولا جامع الناس تصلي فوقو ؟
_ لا ماف.... لكن على العموم نزلت تطبيق للقبلة والاذان .
_ اي م قصرت.... وريني ليو عايزة اصلي.
_ وقت صلاة العشاء دخل.... والقبلة باتجاه الشرق.
_ شكرا
_ العفو.
دخلت الحمام اخدت ليها دش سمممممح كدا وغيرت هدومها وطلعت لبست توبها( التوب محظوظ سافر )
فرشت طرحه وبدت تصلي فيها.
قعد ف الكرسي وراقبها وهي بتصلي.... كانت بتصلي بخشوووووع وبراحه براحه.... بعد م خلصت قامت وطبقت الطرحه.
_ العشاء الساعه 8
_ جمعا
_ هو شنو الجمعا ؟
_ مش قلت لي حرما ؟
_ قلت ليك العشااااء الساعه 8
_ اهاااا....سمح.
رجع بضهرو لورا : انتي عايزة تقولي لي شي ؟
_ مممممم لا.
_ طيب
_ عايزة اشوف المكان 😅
_ الففك يعني ؟
_ اي 👈👉.... لو فاضي يعني
_ م وراي شي.... خلاص اجهزي بجيك بعد شوية
_ طيب
طلع من الاوضة وهي مشت على شنطتها الرتبتها معاها لجين.... لبست ليها بنطلون قماشي واسع.... ومعاهو بلوزة قطنيه يدينها كاملة.... وجزمه زاحفة لونها نود فاااااتح وطرحة شيفون بدرة بنفس لون الجزمه...وشنطه برضو بنفس اللون( حعزكم بي صورة 😌💜)
اكتفت بي كحل وليب غلوس خفيف وماسكرا.
قعدت ف طرف السرير منتظراه شوية كدا جاها ودق الباب.
عاين ليها بتفحص.... لكن م اطرا على لبستها او طلتها اكتفى بإنو يقول ليها : ارح
طلع معاها وهي زي الطفلة تتلفت ساااااي
ميكال وهو مدخل يدينو ف جيب البنطلون : السفينه فيها 4 مطاعم.... مطعم فيهو بوفيه للوجبات التلاته.... ومطعم فيه منيو للاكلات حقت اليوم ودا الحنمشي ليه بعد شوية وبتحدد الوقت الحتجي فيه ودا شي راقي شديد وممتع وبتقعدي فيه مع جنسيات تانيه ف تربيزة واحده بهدف التعارف وكدا.... وفي مطعم مفتوح 24 ساعه بيقدمو فيه البيتزا والوجبات الخفيفة طبعا ديل كلهم الاكل فيهم مجان.... م عدا المطعم الاخير... فيه وجبات مختلفة وبتدفعي فيه... طبعا هنا الموية وعصير الليمون والبرتقال مجانيات اما باقي المشروبات بتدفعي فيها.
في مسرح بيقدمو فيه عروض يوميه واول عرض حيقام الليلة الساعه 9 حيجي ربان السفينه يتكلم مع الناس....المهم في 8 احواض للسباحه.... في قسم للالعاب الرياضية ممتع شديد.....والعاب كهربائية ومعرض للصور وفي صالونات تجميل رجالية ونسائية وحضانات للاطفال وفي عيادة.... ولو حصلت حالة طارئة شديد لي اي شخص في طيارة هيلو كوبتر بتودي الزول اقرب مستشفى في اقرب بلد متوجهة ليه السفينه.
_ انت عارف المعلومات دي كلها من وين ؟؟؟
_ دي م اول سفره لي فيها.
_ اهاااا
لفلفها شوية وبعدها مشو المطعم فتشو على رقم طاولتهم وقعدو.... المطعم كان فخخخخخخم شديد.... فيه 3 اعمده ضخمه..... وفي ثريا ضخمه جدا متدلية من السقف وهو عبارة عن طابق ارضي وطابقين تاني فوق على شكل شرفات.... قعدو ف الطاولة حقتهم وكان معاهم اسره صينيه... ومجموعة بنات ايطاليات ونيجيريين.
توتيل فتحت المنيو وم فهمت فيه اي شي.
ميكال م اشتغل بيها طلب لي نفسو وبقا بيتكلم مع الايطاليات شوية والنيجيريين شوية تاني.
اختارت بس الشي القدرت تقراهو وبقت ساكته وبتعاين.
جواها حست بالضيق انها م قادرة تتجاوب معاهم وميكال م شغال بيها....ولا حتى حاول يترجم ليها شوية من الكلام الهو بيقول فيه معاهم.... كان بتكلم ايطالي وانجليزي.... وهي م بتعرف اصلا ايطالي وانجليزيها م بيسمح ليها تتكلم مع الناس.
قال بينها وبين نفسها( حيشتغل بي كيف وقدامو البنات الحلوات ديل ).
جابو ليهم المقبلات.... بعدها الشوربة.... اسمتعت شديد بالشوربة وعجبتها.... بعدها جابو ليهم الطبق الرئيسي.
ميكال اخيرا عاين ليها لمن ختو الاكل : دا شنو الطلبتيه دا ؟
قالت ليه بي احراج واضح : والله م عارفة بس دا الارتحت ليها.
شالت بي ملعقتها وكانت حتاكل بس وقفت بي صوتو وهو بقول ليها : بالمناسبة الاكل دا مطبوخ بي خمور.
رمت الملعقة : اعوذ بالله.... كيفن يعني
_ عديل.... بيعملوه بالخمور.....اطلبي شي تاني.... ولا اطلب ليك انا ؟
_ لا لا خلاص نفسي انسدت م دايره
_ خليني اطلب ليك
_ لا شكرا.... انت تابع ونستك 😊
_ اوكي براحتك
وبي كل سغالة ف الدنيا قبل على الكان بتونس معاهم ورجع لي ونستو وسابها 💔.
كانت حاسا بوحده بالرغم من الكم الهائل من الناس القاعدين معاها.... انتابها شعور الشفقة على نفسها لدرجة خلت دموعها ترقرق ف عيونها لكن قدرت تتغلب عليها.
عاين ليها تاني وهو بياكل : زهجتي ؟
_ لا 😊.
_ لو كنتي ملمه باللغات شوية كان م زهجتي 😂.... الونسه حلوة شديد وفايتاك.
عاينت ليه بغيظ من كلامو المستفز وسكتت.
الاسره الصينيه كانت معاهم طفله صغيره.... قالت كلام وهي بتعاين لي ميكال خلا اهلها يضحكو.
ميكال عاين ليهم ببرود.... توتيل ضحكت.
ميكال : شنو المضحك هسه
توتيل ردت للبت باللغة الصينيه..... امها وابوها بقو بيتكلمو معاها وهي بترد عليهم وبعد شوية استعدلت ليهم عديل وبقو بيرطنو روطانه تقول يا انا.... وطبعا ماف زول في الباقيين فاهمهم..... ميكال استغرب فيها بتعرف صيني من وين.
بقا بتكلم مع المعاهو شوية ويعاين ليها شوية.
بعد م الناس خلصو اكلهم جابو ليهم الحلويات... وتوتيل لسا اخر ونسه وضحك معاهم.
لحدي م ميكال قال ليها : خلاص احنا نمشي بعد دا.
سلم على جماعتو بطريقة حااارة كدا واتصورو سوا بعدها ودعهم..... وتوتيل برضو ودعت ناسها.
طلعو من المطعم وكان موديها للمسرح.
_ انتي بتعرفي صيني من وين ؟
_ انا خريجة لغة صينيه جامعة الخرطوم.
عاين ليها وهز راسو : وووو الطفلة دي قالت شنو عني ضحكتكم كدا ؟
ابتسمت ابتسامه عريضة : ماهو لو انت كنت ملم باللغه الصينيه كان عرفت 😌
عاين ليها بغيظ واضح وتابع طريقو من دون م يسألها تاني( حلللوة ياخ لمن تتسدى حقك 😂).
دخلو قاعة المسرح الكانت مزدحمه بالناس.... الكراسي كانت مدرجه.... قعدو ف الدور العشرين وهم ساكتين.... شوية كدا الربان جا وسلم على الناس واتكلم شوية كدا وبعدها نزل.... شوية تانيه بدا عرض حق جمباز..... كان ممتع شديد والناس اتفاعلت معاهو... وتوتيل كانت مبسوطه بيه شديد... اما ميكال بس يعاين ليها بطرف عينو.... ولا بصفق مع الناس ولا بعمل اي شي.
بعد م العرض انتهى طلعو.
توتيل : البت القبيل قالت انك بتشبه استاذها حق الرياضيات البتكرهو 😁.
حست بي احراج لمن م رد عليها💔
طلع بيها على واحدة من الشرفات المطله على البحر الكانو واقفين فيها الناس باختصار كدا بخلطو فيها الكابلز 😁.
قال ليها وهو بطلع سيجاره عشان يدخنها : بركه بقيتي بتعرفي لغه تانيه تتكلمي بيها
_ لي يعني ؟
_ م ظاهر فيك انك بتنجزي ف حياتك وكدا... شكلك النوع الهدفو يعرس بس.
م عرفت ترد عليه كيف قالت ليه بدون تفكير : وانت انجازك شنو ف الحياة ؟
رجع لي ورا شوية وابتسم بغرور : هه انا انجازي شنو ؟؟؟ يا جميلة يكفيني فخرا بس اني ود ناس الشرقي
_ ودا انجاز ؟؟؟؟ دا شي قمت ولقيت نفسك فيه... ربنا كتبو ليك... م سعيت ليه.... حتى لو عايز تتكلم عن وضعك وشغلك فدا برضو من فتحت لقيت نفسك فيه.
ضحك بصوت عالي : منو القال ليك فتحت لقيت نفسي فيه ؟ انتي عارفة شي عن حياتي اصلا ؟
شال نفس طوييييل من سيجارتو ونفثو ف الهواء : انا عشت طفولة سيئة شديييييد.... كنت عايش مع امي.... فقير معدم باكل يوم ويومين م باكل.... اتعذبت شديد وعانيت مع انو امي كانت مكافحة وبتشتغل عشان تصرف علي واستحملت كمية من التحرش اللفظي والجسدي عشاني انا.... كنت صغير وقتها م فاهم شي ولا قادر احميها... ولمن كبرت واستوعبت اي شي كان خلاص فات الاوان على اني اساعدها.
ختا يدو في سور الشرفه وهو بيستعيد شريط ذاكرة طفولتو السوداء.
كدي ناخد لينا رجعه شوية لي كم سنه كدا
Flash back
شتاء 1985
وقفت الفتاة الجميلة وهي تستمع الى كلمات زوجها بدهشة : نعم ؟ عايزني انزل الفي بطني ؟؟؟ وانا الافتكرتك حتفرح لمن تعرف الخبر.
_ لازم تنزليه يا كوثر لازم
_ ليه انزلو يا ياسر ؟ جبتو بالحرام ؟ انت يا راجل م نصيح ولا شنو
_ عايني بالواضح كدا انا اهلي م عارفين بزواجي منك... واناااا
_ انت شنو ؟
_ انا حتزوج واحده تانيه....واحتمال اغيب عنك كتير وم عايز اشيل ذنبك انتي والفي بطنك بغيابي كفاية انتي
هزت راسها باستيعاب بعد م اتملت عيونها بالدموع : على فكره انا لا حامل ولا يحزنون.... كنت بهظر معاك وياريتني لو م هظرت.... اكتشفت اني عندك صفر على الشمال.
_ يا كوثر انا والله بحبك لكن
_ هش هش خلاص م عايزة اسمع اي شي.... كتر خيرك.... والحمدلله الجات على كدا.... انا عارفة انها امك حتكون عرفت وعايزاك تطلقني عشان تعرس واحده من مقامك وهي تتفاخر بيها قدام الناس ودا حقها ف النهاية بس م لي درجة تقول لي نزلي الجنا الفي بطنك والحمدلله انو زاتو كذب.
_ كوثر
_ م عايزة اسمع شي.... بس طلقني
_ لكن
_ ياسر م تكتر كلامك حتى لو م طلقتني م بقعد معاك.... طلقني هسه دي وبالتلاته.
_.............
طلعت من الاوضة وهي بتقول ليه : ورقة طلاقي توصلني.
طلع بي وراها : لكن انا م عايز اطلقك..
_ وانا م عايزة اقعد
معاك لانك لا راجل لا بتلزمني..... طلقني هسه دي
_ انتي متأكدة ؟
_ اي
_ طيب.... طيب يا كوثر... انتي.... انتي طالق
دموعها جرت... مسحتها وهي بتطلع بسرعه من البيت.... فتحت باب الشارع ومرقت... ربتت على بطنها وهي بتقول : م تخاف.... م حتخلى عنك.
نهاية الحلقة العاشره
لبسة توتيل ☝️☝️☝️☝️☝️
