القروية و الوحش

١٢

🌸حب واحترام
الساعه كانت 8 مساء لمن توتيل فتحت عيونها..... اتثائبت وهي بتقعد.... عاينت حواليها ولقتو مافيش حمدت ربها وقامت من السرير على الحمام غسلت وشها واتوضت وجات صلت الصلوات الفاتتها كلها...
رجعت وقعدت ف السرير.
باب الاوضة فتح وجا داخل.... م قبلت عاينت ليه لكن حست بيه ملا ليها الاوضة.... وكانها بقت صغيرة شديد وضيقه عليها.
_ صباح الخير... الليلة نمتي نومه رهيبه.
_ صباح النور.... عشان مرهقه
_ طيب خلينا نطلع نتعشى
_ صراحة م عندي نفس اطلع عايزة اقعد هنا بس.
_ اوكي تمام حاحيب الاكل هنا.
_ طيب.
طلع وجا راجع بعد حكاية ربع ساعه كدا.... وهو شايل علب الاكل.
_ شنو رايك نحضر لينا فيلم
_ حق شنو
_ انتي عايزة شنو ؟
_ اي شي م فرقت.
_ شنو رايك ف الرعب التركي 😈.... لكن م انصحك لو انتي خوافه
_ منو الخوافه ؟ انا ؟ 😏
_ خلاص تمام خلينا نحضر.... الفيلم تركي اسمو سجين.
_ سمح انشوفو
_ أ شنو ؟ 😂😂😂😂
_ نشوفو
_ طيب.... ولو خفتي م عندي مانع اني احضنك
زمت خشمها ووشها حمر وفضلت السكوت.... كانت عارفة ومتأكدة انو حيكون مر بعلاقات كتيرة جدا خلت عندو خبره ف الحركات دي.. بس يا ترى كانت مجرد علاقات تمضية وقت ولا المرا عليهم ديل حب واحدة فيهم بالجد..... اتذكرت لمن وجدان قالت ليها هو عبارة عن زير نساء والكلمه بقت بتتكرر على مسمعها.
قعد في السرير وغطى رجولو.... اما هي زحت شوية من جمبو وقعدت بي استعداد للفيلم....
الفيلم بدا وهم بدو ياكلو.
نخليهم شوية مع بعض وندي ناس السودان طله.
الساعه كانت 1 ضهر..... الجو مغييييييم والهبوب بااااارد.... سيدة وامها كانو قاعدين ف الراكوبة حقتهم المقشوشة والمرشوشة مسبقا.
سيدة كانت قاعدة ف بمبر وبتغلي ف البن استعداد لي عمل الجبنه 😍.
بينما امها كانت متكيه ف السرير وبتتونس معاها
سيدة : والله يا يما اشتقت لي توتيل شوق مبالغه.
_ يا حليلها والله.... فرقت معانا جت علينا هي وامها... لكن يا بتي وقعت ف ود الحلال حالك وحال اخواتك يا ربي.... جابلها قالو 500 ماليون
_ يا يما م بالقروش دحين هسي بتكون فرحانه معاو ؟
_ لي م تفرح ؟ هيا بنيه مالك كل م يجيبو سيرتا تقولي دحين هي هسه هي فرحانه معاو في شنو ؟
_ لا يا يما ماف شي لكن بس عشان سكنها بعيد مننا شديد
_ هيا بتي دا حال كل البنات يعرسوهن ويسوقوهن بعيد من امهاتن وبيوتن... وبكره هن يلدن وبناتن يكبرن ويمشن بعيد منين.... بس المهم كيفن الواحدة تجيبلها ود حلال يسترها.
_ صحي كلامك يا يمه.
_ طبعا م حكيت ليك ام عباس دقت بت اختها عشان قالت م دايره عباس..... والله قالو نهزتها جنس نهز ولبعتها لبيع البنت لامن تفت دم.
_ اححححي منها وماف زول المرا دي يوقفها ف حالا ؟
_والله احمد ادخل قالو وشاكلا وقال ليها اكان هبشتي البنية دي تاني ولا غصبتيها تعرس ولدك الا اسجنك.
_ عاد مشاء الله عليهو احمد راجل وولد رجال 🙈
_ الله يجعلو من مصيبك يا بتي
_ هيا يا يما يعني احمد حيسيب بنوت الحله السمحااات ويعاين لي انا ؟
_ وانتي مالك قال ؟ م سمحه ولا ناقصة كراع؟
قبلو الاتنين وراهم لمن سمعو صوت : السلام عليكم
سيدة وامها :وعليكم السلام
كانت دي ام احمد.
ام سيدة : هيا فاطنة ازيك ان شاء الله طيبة اتفضلي اتفضلي.
_ تماااام والله الحمدلله....عاد ريحة البن مشاء الله.... من نصيبي اجي تشرب لي معاكن فنجان.
_ 😂😂😂😂😂 صيح والله...
_ اها يا ام سيدة دايراك ف موضوعٱ مهم
_ اتفضلي يا ام احمد
_ طبعا اتي عارفة احمد وليدي جا من السيعودية عشان يعرس.... ومن هنا نبهني قال لي يا يما اوعك تختاري لي بختار عروسي براي.. قلتلو سمح بس تكون بنت ناس وبنت ستره ومأدبة.... غايتو كنت قايلاهو عايزولو واحدي من بنات البندر لانو من م جا م قال لي داير فلانه ولا علانه.... اها امبارح جاني قال لي يا يما اتي صحبة توتيل اختي ديك ناضمين عليها ولا شي ؟
_ قلتلو سيدة ؟ قال لي اي
طبعا سيدة ف اللحظات دي نست البن والقلي واي حاجه بقت بتعاين لي ام احمد كدا 😳 وبي انتبااااااه.
ام احمد مكمله : قلت ليهو والله اكان دايره دي بالذات نعقد لك عليها هسسسسه دي.... سيدة مشاء الله المهذبة المأدبة المحشمة الرايقة الرزينه بنت الرجال.... قاااعده اليوم كلو ف بيتهم لا بتتهبع لا بتتلبع لا بتنضم الوقت كلو ف التلفون والله ونعم الاختيار.... قال لي خلاص انا دايره.... والله يا ام سيدة انا من فرحتي بس مستنيه الصباح متين يجي اكلمك.... بس انشغلت من الصباح ومشيت السوق دي دخلتي جيتك طواااااالي..... واهم راي هني راي سيدة اكان موافقابو ادونا الضو الاخدر لاني عارفاكم اتو امها وابوها بتكونو موافقين.
ام سيدة : عاد دا كلام ؟ اكيد سيدة زاتها موافقة.... واحنا نلقى زي احمد وين.
_ يعني خلاص ياختي ؟ نخلي الكلام يبقا حق رجال ورسمي
_ اي طوالي والله يكتب كل الخير ويبعد اي شر
_ ان شاء الله يا ختي.
سيدة قلبها بقا شغال دمبلق دمبلق دمبلق والفرحه قربت تشقها بس اتمنت توتيل لو كانت معاها.
امها هنااااك في في مكاتب الشركه.
وجدان كانت قاعده مع نور ف مكتبها
نور : قلتي لي سافرو كروز
_ اي
_ بالله شوفي غجر القرى البقو بسفروهم.... اتلاقيها م كانت بتحلم تمشي الخرطوم زاتو.... غايتو صحي الدنيا حظووووظ.
_ ميكال بتتكلمي معاه ؟
_ والله يا وجدان بلقاه اون لاين مرات ف الواتسب لكن م قادرة ارسل ليه فاهماني ؟ عايزاه هو اليسأل مني اول.... ياخ اشتقت ليه شديد هو جاي متين 😭.
_ م حاولتي تستفسري اكتر من وائل
_ وائل غتيت م بتكلم يا وجدان
_ خلاص م تستعجلي مصيرهم يرجعو هنا
_ اها ولمن يرجعو حنعمل شنو
وجدان بابتسامه شيطانيه : انتي بس خليهم يرجعو.
__________________________________________
توتيل كانت منطره عيونها بخوف 😳💔 وهي بتتفرج على الفيلم.
الخوف سيطر عليها بطريقه رهيبه وكل شوية تتخلع 😭..... وميكال التقول فيلم خيال علمي مركز شديد.... ولا بيتخلع ولا بيتهجم زي الناس.
توتيل : عاين احضرو براك ووريني بعدين انت الحيحصل شنو ف النهاية
_ مش قبل شوية قلتي م بتخافي ولا كيف ؟ 🤔
_ م بخاف لكن يعني الفيلم جرعتو عاليه 🙂
_ افتكرتك شخصية استثنائية وشجاعه لكن شكلو كدا كنت غلطان
_ انت عايز تستفزني عشان احضرو معاك مصح 🙂
_ والله انتي وتفكيرك.... عايني عايني.
كانت اللقطة مخيفة والموسيقة بتحسسك انو ف خلعه جايا ف الطريق.... ميكال باغتها وخلعها هو وبعدها اتلقت خلعه من الفيلم بطريقة خلتها تصرخ بصوت عالي.
وقفت ف السرير وهي بتقول ليه بعصبيه : لييييييي
ميكال ختا يدينو بوضعيه الدفاع عن النفس لمن هي شالت المخده وبقت بتضربو بيها وهي بتصرخ : اااااااااع خلعتنيييييييي.
كانت بتضرب فيه بي كل قوتها وبي جديه.
بعد مسافه انتبهت لنفسها وبقت ماسكه المخده وبتعاين ليه وظهر التأسف ف عيونها.
اما هو كان بعاين ليها كدا 😳
فجأة الادوار اتقلبت... جرا المخده من يدها بسهولة وقلبها على ضهرها وبقا محاصرها بي جسدو.
بلعت ريقها وهي بتقول ليه : عاين... عاين انا اسفة م قصدي اضربك.... وبعدين انت مستحيل تتسدى ضرباتي ليك دي صح ؟ انا م قدرك 🙁.
لاحظت للوهج الماكر اللمع ف عيونو : هو انتي ضربتيني يعني ؟
_ ط طيب زح مني.
قبلت بوشها على الجهة التانيه : اتعديت حدودك
قال ليها وهو بيتجول بي نظراتو فيها : حدودي ؟ الخاتاها لي منو دي ؟
اتنحنت : انا...
عاينت ليه ورجعت بصرها عنو بسرعه... م قدرت تعاين ليه وشعرو نازل على جبهتو وعيونو فيها نظرات جذابة.
م كانت قادرة تفكر بطريقه صحيحه وهو قريب منها بالشكل دا.... حتى اقل شي تلزو منها م قدرت.
قالت ليه بصوت جاهدت كتير عشان تعليهو : عليك الله زح مني.
قرب منها اكتر : ولو ابيت ؟
_ انا حلفتك بي الله 🙁
عاين ليها مسافه وزح منها.
شالت انفاسها وقعدت : ميكال.
_ نعم
_ اوعدني انك م تعمل لي كدا تاني ؟
_ م اعمل شنو بالضبط ؟
_ انت فاهمني.... انا متفهمه كل شي لكن انا م قادرة اتقبل شي زي دا معاك انت.... برضو ف النهاية احنا زواجنا م عادي.... لا عن حب ولا زواج صالونات.... احنا شي كدا غريب..... عرستني عشان تورث انا عرستك عشان تسيب ابوي واهلي وبيوتنا ف حالهم.... وعرسنا قايم بشروط كلها 11 شهر وكم يوم وخلاص.
خلل شعرو بيدو ونظراتو الآسره حاصرتها : يعني الا زواجنا يكون عن حب ؟
_ الحب وقبليه الاحترام
_ م لاقية ديل معاي ؟
سكتت لمسافة
_ م تخجلي اتكلمي
قالت ليه بي صوت يائس : انت موهوب في اي شي.... وانا م زيك... لدرجة اني م بقدر افرق اذا ف زول جادي معاي او بيلعب بي لغرض
ضحك بصوت عالي : يعني عايزة تفهميني شنو ؟
_ انا م مريت بي علاقات قبل كدا ولا مره بالغلط.... كان نفسي اتزوج عن حب ويكون اول واخر حب لي... لكن ربنا م اراد واتزوجت زواج عجيب وانت عارفو.... انا بس بحب امي وابوي واهلي والارض وعشان كدا.... كان ممكن اعمل اي شي... اي شي حتى لو كنت حخسر كرامتي فيه واتهزأ بي سببو كل مره بسبب الفرق الاجتماعي.... وعشان انا البنت المن قرية وم من مستواك.
رد عليها وهو بقوم من السرير : انتي ملتزمة بالمبادئ اكتر من اللازم... على كل حال انا طالع.... ولو عايزة تجي معاي تعالي عشان م اجي القاك مافيشة.
_ لا انا حافضل هنا شكرا.
_ اوكي تمام.
طلع وقفل الباب بوراه.
اول م طلع شالت انفاسها وم عرفت من وين جابت الجرأة دي عشان تتكلم معاه.
اما هو مشا على الclub....  كانت الاغاني الصاخبه شغالة بصوت عالي والناس بترقص... قعد ف البار وطلب مشروب.
كان مستمتع بصوت الصخب وبطعم الشراب بطريقه غريبة.
فجأة اخترق اضانو صوت صرخة امو.... الصرخه السمعها قبل كم وعشرين سنه ونساها بعد جهد ورجعت ليه تاني بسبب غير معروف.....
كان ف صباح اليوم التالي من لمن شاف الراجل اللي هو ابوه.
الباب دقا وامو قامت تفتح..... شاف الراجل الكان ف العربية امبارح....كان واقف بيتكلم مع امو لوقت.... وظهر صوت امو وهي بتصرخ فيه وبتكورك وبتقول ليه جاي بعد شنو.... وبعدها قفلت الباب بقوة ف وشو ودخلت ليه.
اتأملت وشو وضمتو عليه... كانت انفاسها قايمه وهي بتقول ليه : ميكاال انا م حخليك سمح ؟؟؟؟ انا م حخليك تبعد عني.
بعد حكاية ساعه تاني الراجل اقتحم بيتهم ومعاه اتنين تانيين.
امو صرخت ودستو وراها حاولت تحميه وتزحهم منو لكن للاسف م قدرت ليهم.
الراجل شالو كان بيبكي وبينادي ف امو البتبكي هي برو وبتترجى فيهم يخلوه.
اخر شي متذكرو..... منظر امو وهي جارية حفيانه ومن دون توب ورا العربية وبتصرخ : ميكااااااااال.... ولدييييي
عترت بي حجر ووقعت ف الارض.
كان بيبكي شديد وعايز ينزلوه عشان يمشي ليها.
ابوه كان قاعد جمبو ومسكو عليه : ميكال م تبكي حتجينا قريب هي وتسكن معانا
مسح دموعو بيدو الصغيره : انت منو ؟
_ انا ابوك
_ ابوي ميت
_ انا م ميت يا ميكال... انا هنا وجيتك راجع وم حتخلى عنك تاني ابدا.
_ طيب امي حتجينا متين ؟
_ حتجينا قريب..... اما لو بكيت م حتجينا
_ طيب م حبكي ابدا...
_ شاطر انت
السفره كانت طويلة لحدي م وصلو الخرطوم.
جا نازل وهو ماسك يد ابوه.
اتفاجأ وانذهل من البيت الكبيييير والجنينه الفيه.... لقا جدو عبد العظيم وماما عشه مستنينو.
لقا ترحيب حار.... وجدو طوالي ساقو ووداه الاوضة حقتو.... كانت اوضة واسعه ونضيفة ودافية.... والسرير كبير ومريح وفيها كمية من الالعاب والملابس الجديدة ليه.... فرح زيو زي اي طفل بحاجاتو دي.... وبقا منتظر امو تجي عشان يفرجها على حاجاتو والتزم بوعدو انو م يبكي عشان امو تجيه.... صباح كانت بتتعامل معاه كويس وكل مره بتدخلو عشان يشوف اخواتو الصغار.
دخلوه افضل مدرسة كان وقتها ف 3 اساس.....من اول يوم جا كان ف طفل سنونو مكسره وشقي شديد وبيزعجو ف الحصص وبيكلكلو فجأة ومبشتنو بشتنه فظيعه  😂.... بقا صحبو شديييييد لدرجة حتى اهلهم اتعارفو ودا كان وائل.
مرت السنين وهو منتظر امو تجيه لحدي م خلص مرحلة الاساس ودخل الثانوي.... وقتها كان خلاص كبر وبقا بفهم كل شي.... وعرف من حبوبتو انو امو اتوفت 💔.
كان اكتر زول مقرب ليه هو جدو.... وفهمو من اول يوم جا فيه انو هو لازم يكون زول قوي ومسيطر ف كل شي... وفهمو كمان انو عشان يكون مسيطر وعندو هيبه لازم يكون عندو قروش كتيرة وعشان يكون عندو قروش كتيره لازم يشتغل كتييييير.... وحذروا من انو يكون زول عاطفي ويتعامل بعواطفو.... لدرجة قتلت قلبو وبقا عقلو بس هو المسيطر.... كبر الصبي المراهق واتجاوز مرحلة الثانوي وهنا جدو طوالي سفرو بريطانيا عشان يدرس العلوم الادارية.... سافرو هو و وائل مع بعض.
كبر وبقا الشخصية المعروفة هسه.... مجتهد ف شغلو... مغرور...وبااااااارد تلجه.
وبغض النظر عن كلللل شي.... كان متأكد جدا من انو امو ماتت بي سبب حسرتها عليه وعشان ساقوه منها.... كان متذكر قدر شنو كانت رقيقة وحساسة وبتستحق حياة افضل بكتير من العاشتها.
شرب بس م لي درجة الثماله عشان م تضايق منو.... ورجع غرفتو ونام طوالي وخلاها واقفة ف الشرفه بتتأمل ف النجوم المتلألأة 🌌 طبعا م قدرت تنوم لانها اصلا نامت لوقت طويل.
حضرت شروق الشمس وصلت الصبح بتقديرها براها.
وبعدها جهزت الملابس الحتلبسها الليلة.
صحا من النوم زي 9 كدا وقام عمل حاجاتو الروتينيه من دش وحلاقة وكدا.
كان مصدع فطلب منها يمشو الكافيه..... هناك ميكال طلب قهوة تركيه وطلب ليها عصير فريش.
خدت يدها ف خدها وهي بتسألو : البلد الجاية الحنمشي ليها شنو ؟
_ اثينا
_ اليونان 😍😍😍😍
_ اي... كدي سؤال انتي شكلك عندك خلفية عن البلدان جايبة المعلومات من وين؟
_ انا زولة بحب الجغرافيا والتاريخ شديد... فعشان كدا قريت كتير عن البلدان الاوربية والاسيوية والعربية واطلعت على تاريخهم.
_ اهااا.... كويس طيب.
_ السفينه حتصل متين 😁
_ بكره الفجر ان شاء الله.
_ ان شاء الله
_كملي عصيرك عشان ف فعاليات كتيره ف السفينه عايزك تشوفيها.
خلصت عصيرها وقامت معاهو.... اول شي وداها فوق سطح السفينه محل الملاعب حقت التنس..... بقا بعلم فيها تلعب كيف معاهو.
ف النهاية قرر يخليها لانو ضرب الكورة بالمضرب وجاتها ف وشها 😂.... بعدها وداها المسرح كان ف عرض حق باليه.
استمر لوقت طويل... بعديها مشو اكلو وتاني وداها معرض لوحات حق فنان.... وبعديها مشو السينما.
لمن طلعو وقت الغداء جا اكلو وخلاص بعد دا قررو ياخدو بريك ورجعو اوضتهم.
وقفو الاتنين في الشرفه وبقو بيتفرجو.
توتيل : فاضل تاني كم بلد ؟
_ بعد اليونان بلد واحد وم حوريك ليه اتفاجئي بيه براك.
_ طيب 😂.
_ وبعدها حنرجع السودااان
_ ياريت نرجع اشتقت لي اهلي... وانت ؟
_ انا شنو ؟
_ م اشتقت لي زول ؟
_ م عندي زول اشتاق ليه.
_ حتى اخواتك
_ لا م مشتاق ليهم ولا شي بالذات جوري دي وجع راس متحرك 😑.
_ نفسي ارجع والله
_ اصلا راجعه.... البيسمعك يقول كانك م اسمتعتي هنا وعايزة ترجعي
_ م قلت كدي بس الشوق غلاب.... وكان على الاستمتاع استمتعت شديد خصوصا الاوقات القضيتها براي
_ ممممم.... ودي متين كانت ؟
_ يعني مثلا لمن مشيت مع البنات الشقر ديلك... ولمن خليتني براي ف المطعم 🙂.
_ اعتقد قلت ليك تعالي
معانا وبراك ابيتي وبخصوص خليتك براك ف الطعم فدا كان لي سبب.
_ ساعه كامله الله وروحي
_ قاعدة ف كهف اصلك ؟ مش ف مطعم وحوالينك ناس؟ المهم و على كل حال انا مشيت عشان اغسل الاطباق
_ نعم ؟
_ انتي عارفة اني نسيت المحفظة الخاتي فيها البطاقات حقت القروش... اتكلمت مع مالك المطعم اني ححول ليه القروش لي سبب اني م جيت بي محفظتي بس رفض.... ففي النهاية عرض علي اني اغسل الاطباق الفي المطبخ عشان يخلينا نمشي.
سكتت وبقت بتعاين ليه قبل م تقول ليه ب اهتمام : واها غسيل الاطباق كيف ؟
ضحك بي صدق من كلامها والطريقة القالتو بيها : سيئ كل السوء وقلب لي مزاجي.
كانت اول مره تشوفو بيضحك فيها كدا.
ابتسمت وهي بتعاين ليه والغمازات تقول يا انا 😭😭😭😭😭💖💖💖💖
مرا يومهم بهدوء وجا فجر اليوم التااااني ووصلو اليونان.
جهزو نفسهم وميكال اتأكد من محفظتو اهممم شي ونزلو 😍😍😍😍😍.
توتيل اول م نزلو ف الارض اليونانيه.... غمضت عيونها واتجاوزت اي شي.... لثواني سمعت صوت حوافر الاحصنه حقت الحرس حقين الامبراطورية الاغريقية بهدومهم المميزة.
فتحت عيونها لمن ميكال هزاها : هي مالك ف شنو ؟
_ لا ولا شي
_ اهااااا خلينا نمشي
زاروا مناطق اثرية كتيره وتوتيل اي محل تمشيه بتتخيل شكلو لمن كان جديد والناس الفيه.
توتيل استمتعت شدييييد مع ميكال ف اليوم دا بالذات وظهر ليها الجانب الكوميدي من شخصيتو.
دخلو مركز تسوق.... م اشترت كتير بس شالت عطر وساعه.... وميكال خم لي اخواتو جنس خم م خلا ليهم ميكب ولا عطور ولا نظارات ولا ساعات 😭.... وقال شنو قال م مشتاق ليهم.
بعدها وداها سوق البهارات والزيتون.... كان الجو حلووو واي شي حلو بس بطنها طمت لمن شافت ريسان الخنذير المسلوخه المجهزة للبيع.
بعدها مشو شربو عصاير من محل ف الشارع.... ووقفو ف محل عالي وبقو بعاينو للشاطئ.... كان فيروزي وهااااائ.
بعدها رجعو سفينتهم.
توتيل لاحظت انو بقا م بيعمل ليها حركاتو ديل وبقا م بقرب اصلا منها.
بعد م رجعو وارتاحو ساقهاا معاهو وقعدو ف كراسي عشان يراقبو الغروب وكانو بيشربو ف الميلك شيك.
وبعدها بدت فعاليات حلوه ف السفينه وميكال حرص انو يوديها ليهم كلهم.
نهاية الحلقة الثانية عشر