#القروية_والوحش
-١٣-
🌸رحلة العودة
الساعه كانت 3 فجر
ضو القمر كان ساطع في الموية.... والنجوم مالية السماء خصوصا انو الجو بارد شديد.
توتيل كانت بتنفخ ف الهواء بي خشمها وبيطلع دخان وعجبتها الحركه وبقت معلقه فيها 😂.
ميكال : خلاص كفاية
_ شنو ؟
_ البتعملي فيه دا.
ابتسمت بي احراج وختت يدينها في السور واتمدت شوية لقدام عشان تشوف الموية.
ميكال : الجو برد خلينا ندخل
_ لا لا م عايزة ادخل واصلا م نعسانه.
مد يدو على جيبو وطلع سيجارة وولاعه : اوكي
راقبتو وهو بيولع السيجارة وبينفث الدخان في الهواء.
فركت كف يدها : صراحة الرحلة دي م حنساها.
_ اصلا ماف زول بينسى اول كروز ليه
_ اول واحد ليك كان متين ؟
_ اييييك بدري شديد تقريبا كان عمري 9 سنوات مع جدي.
_ شكلو كان بيحبك
_ شديد وانا كمان كنت بحبو
ابتسمت
عاين ليها ببرود : بتتبسمي لي ؟
_ لانك قلت مرة قلت لي م بأمن بالحب.
سكت لمن حس بيها غلبتو وبقا بيدخن قبل م يستأنف كلامو بعد تفكير : في فرق بين حبي لجدي وبين الحب الكنت قاصدو.
_ كيفن يعني ؟؟؟؟ الحب واحد في النهاية.... انت فاهم هو شنو ؟
( كدي سؤال للقراء الاعزاء بتفضلو الحب و لا السداغه ؟ 🌚)
_ الحب بيضعفنا.... مهما كان.... م شفت لي زول حب واتعلق بي زول الا وبقا ضعيف.... لمن م يكون عندك شي عشان تتعلق بيه حتكون حاجه قوية صعب تتكسر... الحب حيخليك تندم على حاجات كتيره....اديك مثال ؟
_ اها
خلص سيجاتو ورماها ف البحر وولع التانيه طوالي : امي مثلا الله يرحمها حبت ابوي وف النهاية خذلها وكسرها لحد م اتوفت
شاف نظرات الاستغراب ف وشها.
_ اوكي ححكي ليك القصة كامله.... زواج امي وابوي م كان معلن... نظرا لي انو كان في فارق اجتماعي كبير جدا.... اهلها هي كانو عارفين لكن اهل ابوي م عارفين.
بعدها ضغطو على ابوي انو يطلقها.... فاطلقوا وهي كانت حامل بي وم ورتو خوفا من انو يقلعوني منها( م مفهمنو القصة الحقيقية صح واللي هي انو لمن ابوه عرف انها حامل طالبها بي انها تنزلو وبعدين هي نكرت انها حامل )
فاطلقوا وابوي رجع خالتو صباح ودي ام ناس جوري.
_ امك التانيه
_ انا عندي ام واحدة وماتت وماف اي واحدة حتاخد مكانها ولا بتستحق اناديها بي امي غيرها هي وامي عشه.
_ طيب كمل
_ ولدتني انا واتزوجت مخلوق ذكر م عمل شي غير عذبها و.... وضربها واهانها.
لاحظت لي قبضة يدو الكورها بانفعال واضح.
تابع كلامو : نهائي م كانت بتستحق الجحيم دا.... كانت مخلوقة صغيرة ورقيقة وجميلة... وفوق دا كلو قوية.... القوى الجواها م موجودة في اي انسان.... اتعلقت بالشخص الغلط.... بعد م كبرت جا خطفني منها.... وافتكر انو الالعاب والسفرات والقروش والاكل حتنسيني العملو.... م كان عارف اني حكبر يوم وحتذكر انو قلعني من ورا ضهرها بالقوة..... وم حنسى اخر مرة شفتها فيها وهي بتقع ف الارض بسبب انها اتعترت وهي جارية ورا العربية المركبني.
لاول مرة تحس بيه متأثر كدا 💔
_ نفسي بس اشوفها هسه.... وانا كبير وقوي وحعوضها عن ايييي شي.... حوريها انو الكانت بتدسو ورا ضهرها عشان تحميه كبر وهو الحيحميها من كل شي.... ياريت لو تشوفني هسه بقيت كيف.
بحركة لا ارادية ختت يدها في كتفو وربتت عليه : ربنا يرحمها ويجعل مثواها الجنه... بس تفتكر لي امك كانت بتعمل كدا
_ بتعمل شنو؟
_ يعني بتضحي كتير عشان وتحميك
_..............
_ انا حوريك.... عشان بتحبك.... عشان اتعلقت بيك.... الزول لمن يكون بحب زول او شي بيستعد يعمل ايييي شي عشانو مهما كان..... زي ابوي لامن م خلا العساكر يرفعوني لامن فلقت وائل... وثبت على نفسو تهمه هو م عملها..... وانا.... انا قبلت بي حاجات م كنت متوقعه يوم تمر بي عشان اهلي..... الحب دا بيخليك تعمل حاجات غريبة انت ف ذات نفسك بتستغرب منها.
_ مع احترامي ليك.... بس م حتقدري تقنعيني ف النقطة دي وشكلي كمان م حقنعك عشان كدا خلينا م نتناقش فيها..... انا مريت بتجارب خلتني اتأكد من كلامي دا.... وزي م بقولو اسمع كلام الشاف الشمس قبليك.... وانا شفت الشمس قبليك بحداشر سنه.
_ عشره 🙂
_ حداشر 😂.... الشهر الجاي حيبقى عمري 34
_ اهااا العمر كلو ان شاء الله
_ كدي دقيقة انتي مالك من قبيل بتعايني في سيجارتي دي لاحظت ليك مركزة معاها.
_ انا 😁؟ لا لا بس ريحتها شوية مزعجه.
_ اوكي حطفيها..
كان حيرميها لكن عاين ليها وقال ليها بخباثة : تاخدي نفس ؟
_ لا شكرا م دايره
_ دي فرصة م حتتكر ليك تاني صدقيني
عاينت ليه بتردد... كانت خايفة يكون عايز يتمسخر عليها او يحرجها.
مدا ليها السيجارة 😁💔.... وهي مدت راسها بتردد شديد 😂.
ختا يدو ورا راسها وهي م قصرت اخدت نفس جميل كدا وبعديه دخلت ف دوامة القححححه 😂.
ضحك عليها ورما باقي السيجارة.
اتكلو الاتنين على السور وسكتو لمن شافو الاشعه الذهبية البدت تظهر.
كان الشروق جميل شديد 🌇.
بعدها دخلو جوه.... توتيل دخلت اتوضت وصلت... اما هو رقد في الكنبه وغطا جسمو كلو ونام.
وهي مشت على السرير ورقدت برضو... كانت راقدة علي جنبها وبتعاين ليه
في الخرطوم :
ماما عشه كانت قاعدة قدام التلفزيون وبتشرب في شاي الصباح لمن جاتها ريتا.
ريتا : ماما وليد برا
_ خليه بتفضل اعلك موقفاه برا يا الغبيانه.
_ طيب ماما
جرت جري وخلتو يدخل.
ماما عشه : اهلا يا وليد.... ازيك يا ولدي ان شاء الله كويس
_ والله الحمدلله بألف خير يا حجه عشه... وانتي كيفك ؟
_ بخير يا وليدي نحمد الله
_ مبروك لي ميكال... كان بودي احضر زواجو لكن الشغل والسفر
_ م بتقصر م بتقصر... اها وريني تشرب شنو ؟
_ ممكن قهوة.
_ ريتااااا يا ريتاااااا.
ريتا جاتا جارية : ايوا ماما
_ سوي قهوة
_ طيب
طبعا وليد دا خطيب جواهر اخت ميكال.
جات نازلة ليه وكانت اخر اناقة.
سلمت عليه وقعدت معاهم.
ماما عشة وهي بتعاين ليهم من فوق النضارة : اها يا شباب م ناويين تفرحونا قريب.
جواهر ابتسمت وعاينت لي وليد الضحك وهو بقول : ان شاء الله كم شهر كدا.
_ ربنا يتم ليكم على خير.
قامت على حيلها : اها انا اخليكم شوية كدا تاخدو راحتكم.
وتنقش تنقش مشت منهم.
طبعا وليد محترم 😂...
قعد في كرسي قريب شوية منها عشان يتكلم معاها.
_ كيفك يا ست البنات( عولاق البنات وحاتك 🙂)
_ الحمدلله... كويس اتذكرتني وجيت تسلم علي
_ ياخ معقولة اكون ناسيك اصلا ؟ بس مشغول شديد والله
_ عارفة ربنا يعينك ان شاء الله يا حياتي
_كدي قوليها تاني
_ حياتي 🙈.
_ ربنا يديمها بي صوتك 💜
مدا ليها كيس كبير : دي هدية بسيطة جبتها ليك معاي.
_ شكرا 😍
_ العفو ياخ 😍....انا حمشي بعد دا
_ لي بالسرعه دي ؟
_ بجيكم تاني ان شاء الله.... مشغول والله العظيم.
_ خلاص طيب.... م بتقصر على كل حال.
_ وين ميكال مسافر ولا شنو ؟
_ اي سافر
_ ايوا ربنا يرجعو بالسلامه
_ الله يسلمك.
طلعت قدمتو لحدي برا وجات راجعه تاني.... فتحت الكيس لقت فيه مجموعتين بودي شوب من فكتوريا سكريت وعلبة فيريو روشيه.
ابتسمت بسعادة وشالت الكيس وطلعت اوضتها.
____________________________________________
توتيل وميكال نامو نومة اصحاب الكهف.....
م صحو الا والشمس خلاص غربت.
ميكال دخل اخد دش قبليها.... ولمن هي بعديه دخلت وجات طالعه لقتو شايل كتيب صغير.
اشر ليها عليه وهو بقول : اها عايزة تعرفي الوجهة الجاية وين ؟
_ اي 😍
_ طيب بما انك زولة مثقفة ومتطلعه على تاريخ البلدان وكدا فانا حوريك المدينه الحننزل فيها وانتي اعرفيها لي ياتو بلد.
_ طيب
_ ايدين( ايدين ولا كرعين نياهاهاهاهاها )
توتيل سكتت وعيونها بتتحرك دلالة على انها بتفكر.
ميكال ضحك عليها باستهتار واضح.
غمضت عيونها وهي بتنقر بي سبابتها ف راسها.
ميكال وهو بقيف ويطوي الكتيب: خلاص خلاص م قصرتي😂😂😂 خلينا نمشي ناكل شي ونشوف في شنو ف المسرح الليلة.
فتح باب الاوضة ووقف لمن قالت ليه بصوت عالي وفيه قليل من التردد : تركيا
قبل وراهو وعاين ليها مسافة قبل م يقول ليها : براڤو
ابتسمت ابتسامة رضا من نفسها.
فتح ليها الباب.... طلعت وهو طلع بي وراها.
مشو المطعم حق ابو منيو البيقعدو فيه الناس من مختلف الجنسات.
وكان معاهم عائلة انجليزية.... ميكال كان بتكلم معاهم وبترجم ليها عشان تخش معاهو ف الجو.
المرة دي كانت مبسوطه شديد لانو م سفها زي اخر مره ديك.
اختار ليها الاكل هو.
المهم قضو وقتهم بي راحة كدا وبعدها جري على المسرح كان ف عرض بتاع ساحر كاااااتم للانفاس 🔥🔥🔥.
قضو ساعاتهم باستمتاع..... اخدو نومه كدا وبعدها السفينه وصلت تركيا 😍... ولحسن حظهم كان الوصول الصباااح.
توتيل اتأنقت ببنطلون هاي ويست قرمزي... ومعاهو بلوزة مشكله وحجاب اسود وشنطة صغيرة ف كتفها.
ميكال : نركب بص ولا تكسي
_ ولا دا ولا دا خلينا نتمشى
_ اوكي
مشو والجو كان رهييييييييييب 😍.
وداها اكلت شاورما تركية.... ووداها محل بتاع ايسكريم.... العامل كان عندو عصاية بمد ليها بيها الايسكريم لمن تمد يدها عشان تشيلو بجرو منها.... يرفعو ليها فوق ترفع يدها ينزلو تحت....وميكال مبتسم وبعاين ليها... لحدي م في النهاية ادوها الاسكريم حقها ومشو..... اتسوقو وهو كالعادة بخش يخم لي اخواتو ويطلع وهي بتكتفي بي حاجه بسيطة عشان بس تتذكر بيها البلد.... شربها شاي تركي واكلها لكوم تركي 😔.... واستمعت شديد... بس م قدرو يمشو اي محافظة تانيه عشان الوقت.
رجعو السفينه تاني.... لمن دخلو لقو خاتين ليهم ورقة لتقييم الرحلة.... وملاحظاتهم فيها.
قيمو الرحلة بي ممتازة وكتبو ملاحظاتهم.... كانو عاملين احتفال للركاب وخاتين جاتوه كبير فيه صورة السفينه.
وادوهم مجسمات صغيرة تذكارية للسفينه.... كانت خلاص اخر ليلة ليهم فيها.
حضرو فعاليات ختامية كتيره.
ورجعو رتبو شنطهم وحاجاتهم.
حضرو اخر شروق شمس ليهم فيها.
توتيل غمضت عيونها وهي بجواها بتحمد ربها لانو اكرمها برحلة زي دي م كانت بتحلم بيها في يوم بغض النظر عن اي شي تاني.
ابتسمت وعاينت لي ميكال.... اشعة الشمس الدهبية العكست ف عيونو العسلية ادتو منظر رووووعه 😍.
شالت عيونها منو لمن عاين ليها.
دخلو جوه وشالو شنطهم لمن السفينه وصلت ادو الموظفين البطاقات حقتهم واستلمو جوازاتهم.... ومن السفينه ركبو تكسي للمطار.... توتيل كانت بتعاين للسفينه لحدي م خلاص بقت م ظاهره.
وكدا السفينه فضت وحيجو مسافرين غيرهم يعيشيو فيها نفس لحظاتهم 😭.
انتظرو ساعتين ودخلو خلصوا اجراءاتهم والطيارة اتحركت بيهم من ايطاليا لي قطر.... وبعدها من قطر للسودان 🌚💔
ترارارارارارا.
لقو وائل منتظرهم.... ركبو معاه وتوتيل قعدتها ف الكرسي طواااالي نامت.
يا ترى حيغرالك ايه يا توتيل بعد م رجعتي للناس المنتظره رجعتك بفارغ الصبر عشان تأذيك
نهاية الحلقة الثالثة عشر
لبسة توتيل
