القروية و الوحش

١٥

🌸حلم
وقف بينما كتف يديه امام صدره العريض وهو يستمع الى حديث الطبيبه باهتمام : حصل ليها تسمم.... باين انها اكلت او شربت ليها شي فاسد.... على كل حال احسن شي عملتو انك جبتها المستشفى... هسه حكتب ليها دواء حيريحها.... وبالله ترتاح راحه تامه ف البيت... وابقو خلو بالكم من اكلها.
_ اوكي شكرا.
مشا ليها محل قاعده : خلينا نمشي.
ركبها العربية.... ومشا جاب ليها دواها وجا راجع تاني.
حرك العربية وكان ساكت.... بعد مسافه كدا سألها : انتي اكلتي شنو اللليلة ؟
_ ولا شي
_ طيب شربتي حاجه
_ جبنه بس
_ كبيتي فيها شنو ؟
_ اصلا م عملتها انا...
سكتت لثواني قبل م تسألو بسرعه : كدي دقيقة دقيقة انت قاصد شنو من سؤالك دا ؟
عاين ليها وهو شادي يدينو ف الدريكسون : انتي عايزة تلفتي الانظار ولا تأذي نفسك ؟
_ هه الفت الانظار ؟ الفت الانظار عشان شنو ولي منو اصلا ؟ انت فاكرني النوعية دي ؟ اي نعم عايشة معاك لكن م لي درجة اقتل نفسي ولا اذيها عشان الفت انظارك.
عاين ليها بغيظ : انتي لسانك سليط كدا اصلا ولا دا اتعلمتيه جديد ؟
قالت ليه بصوت متهدج : والله لساني م سليط لكن لاحظ لي كلامك كيف.
ضحك باستفزاز : اوكي تمام.
رجعت لي ورا : سمح سوق براحه انا براي راسي لافي.
لثواني ندمت عشان قالت ليه كدا... لانو طوالي ساق بسرعه.
كان سايق بسرعه وبيتخطى.
ختت يدها ف وشها بعدم استيعاب للهو بيعمل فيه دا.... اتغاظت شديد منو وفضلت تكتم خوفها وتسكت وبالمره تستشهد 😂.
سواقتو بسرعه ضرتها بجها واستفادت منها ف جهة انها وصلت البيت بسرعه.
نزلت من العربية بسرعه وقفلت الباب بطريقة عبرت عن استيائها.
اول م طلعت فوق لاقتها وجدان.
_ توتيل 😍.... كنتي وين ؟
_ اه... احم تعبت شوية ومشيت المستشفى
_ واي سلامتك الف سلامه حبيبتي انا... سمح ادخلي ارتاحي
_ الله يسلمك.... طيب عن اذنك
مشت وخلتها.
وجدان : الله.... الكبيتو ليها دا مفروض يرميها ويلجمها البنت دي مناعتها مناعة حصان م مناعة بت عادية.
قفلت باب اوضتها ووقعت ف السرير وهي بتشيل ف انفاسها.
ختت يدها ف بطنها الكانت لسا بتألمها.... فجأة اتذكرت امها... بس كل العايزاه تشوفها هسه.... لكن خافت لو جابت ليه سيره يتغاتت عليها ويمنعها شوفتهم..... دموعها نزلت قبل م تتقلب على جمبها اليمين وهي بتدعي : يارب ساعدني 💔.
غفت شوية.... بس صحت بصوت فحيح مخيف.
فتحت عيونها وجسمها برد واتخدر لمن شافت 4 ثعابين كبيرة بتزحف جمبها ف السرير.
م قدرت تتحرك نهائيا قدر م حاولت.... الاوضة كانت شوية مضلمه.
واحد من الثعابين اصدر فحيح عالي وهز لسانو وهو بقرب منها ببطئ.
دموعها نزلت..... حست بجسمها بقا بيرجف لمن فتح فكو وانيابو الحادة السامه ظهرت.... وبقا مقرب عليها وعيونو بتلمع.
استسلمت لفكرة الموت بعد الشافتو.... لكن فجأة ظهرو ليها طيرتين واحدة صغيرة وواحدة كبيره...وبقو طايرين فوق راس الثعبان وبينقرو فيه... الثعبان التاني قرب منها وهنا ظهر ذئب كبير وعضاه ف رقبتو.... لحدي م قتلو وبعدها وقع وظهر الضعف ف ملامحو وبدا الفرو بتاعو يتساقط.
هنا يادوب قدرت تحرك جسمها.... واول شي عملتو صررررررررخت بصوت عالي... كانت صرخة مدوية لدرجة ميكال كان قاعد تحت مع ماما عشه واخواتو نطا من مكانو وقام جاري فوق بسرعه..... فتح الباب.... لقاها قاعدة ف الارض وخاتا يدينها ف وشها وبتتعوذ.
ختا يدو ف كتفها : توتيل مالك ف شنو؟
رفعت راسها بخوف وعاينت حوالينها
_ كابوس ؟
هزت ليه راسها بمعنى آي.
عاينت بي شباك الاوضة كانت الواطه مغربية كدا( الوقت الكئييييب داك )
قعدت ف طرف السرير وهي بتشيل ف انفاسها.
ميكال : م تخافي ماف شي.
_ ممكن لو سمحت تنور انوار الاوضة كلها.
_ خايفة ؟
_ اي 💔
_ طيب حولعها ليك.
داس على ازرار الكهرباء الجمبو ف الحيطه والانوار ولعت.
ميكال : اخدي راحتك
قال جملتو دي وطلع من الاوضة.
تفت على يمينها وعلى شمالها وهي بتقول : اللهم اجعله خير
وطوالي مشت الحمام اتوضت وجات صلت.
ميكال نزل تحت...
ماما عشه : البت دي مالها بتصرخ ؟
_ بتكبس
_ بري دي م صرخت كبيس اظن لي مشوطنه
_ م للدرجة دي كابوس عادي جدا بتحصل كتير
_ مممممممم.... كدي على كل حال اسمعني.... اتا البنيه صحبت وجدان دي كيف ؟
_ منو دي ؟
_ الشغالة معاك خديرا كدا وحلاااااتا الصلاة على النبي سمحه عدييييل.
_ نور
_ ايوااااااا....  نور.
_ مالا
_ حلاتا يعني ماشاء الله وشكلها بت ناااس( يااااما تحت السواهي دواهي )
ميكال ضحك باستهتار : هه.... وبتسألي عنها لي يعني ؟
_ النصيحه يا ميكال عجبتني.... يعني معقولة م شفتها كويس البت دي ؟ ومشيت عرست فلانه دي
_ الموضوع دا ممكن نقفلو ؟ انا ممكن اتكلم معاك ف اي موضوع م عدا دا.... لانو ف النهاية الزواج دا شي راجع لي انا بس.... وانا البحدد اذا مفروض استمر معاها ولا اخليها واشوف غيرها.
_ انا يا ولدي ف النهاية عايزة مصلحتك
_ ماف زول بعرف مصلحتي زيي صح ؟
عاينت ليه بعتاب : بقيت بتتكلم معاي كدا ف النهاية يا ولدي 💔.
جرا يدها وباسها لي : انا اسف.... لكن بس عايزك تفهمي انو انا حاليا عايش باستقرار وم عايز اتزوج او اي شي... كدا كفاية علي.... وم تنسي اني زول واعي وكبير جدا ومسؤول وبعرف اتخذ قراراتي كويس.
_ سمح.... سمح يا ولدي الله يسعدك
_ اي كتري لي من الدعوات دي بالله.
ميكال ميكال
ابتسم وقبل وراه : يوسف يوسف
يوسف جاهم بي قدام وسلم عليهم: شنو قاعدين كدا قعدتكم دا م مطمنه 😀
ماما عشه : يا ولدي اهدا واقعد ف كرسيك 😑
يوسف قعد قصاد ميكال : شنو يعني ياخ تعمل عرسك وم تستناني 😐
_ معليش كنت مستعجل
_ مستعجل على شنو قدر دا 🤔.... لكن بغض النظر عن اي شي احيييييك على اختيارك..
مد ليه يدو وسلم عليه 😂
تابع كلامو : مرتك ماشاء الله تبارك الرحمن.
ماما عشه : شكل ساي.... وزاتو م للدرجة دي
_ كضابه 😀
_ يا ولد بتقول لي انا كضابة ؟ 😠
_ هي معليش 😁انفعلت.... لكن والله يا حبوبة سمحه شديد م تنكري
_ عادية ثم عادية اتو براكم العورا وبخلعكم اي شي 😒
يوسف وهو بعاين لي ميكال : حبوبتك دي مالا 🙂💔
ماما عشه : انت اظن لي السفر جابك قليل ادب 😒
_ وراثة وراثة 😁
_ شنو الوراثةة😲
_ ولا شي يا ماما عشه 😁💔.
ميكال وقف على حيلو : عن اذنكم
يوسف : انت تاني م بتقعد معانا 😉
ميكال لزا ليه راسو ومشا 😂
طبعا يوسف دا الوحيد البيقدر يهظر ويتكلم معاه.... لانو اصغر زول عندهم.
دخل الاوضة لقاها قاعدة ف الكنبه وفاتحه التلفزيون.
جا قعد جمبها وبقا بعاين ليها قبل م يسألها : بقيتي كيف ؟
_ احسن الحمدلله
_عايز اعرف شي
_ اها
_ انتي اتناولتي شنو خلاك تتسممي ؟
_ لي اوريك وقت اصلا كدا كدا شايفني بعمل كدا عشان الفت الانظار.
_ طيب انتي اثبتي لي انو فهمي غلط
_ فهمك غلط من دون م اثبت ليك.... اعيد واكرر انا م من النوعيه دي.
_ طيب.
تلفونو ضرب شال ورد : الو.... في شنو يا نور مالك بتبكي ؟
اسم نور خلاها تركز بي كل حواسها معاه.
_ شنو ؟ اوكي تمام جاييك هسه.
حست اطرافها بردت وقلبها ضرباتو زادت وانفاسها قامت بي غيظ.
_ ف شنو ؟
_ دي السكرتيرة حقتي ابوها تعبان انا ماشي اوديهم المستشفى.
لاحظت لي اهتمامو وهو بيشيل مفاتيحو وبينزل بي سرعه احساس الحنق والغضب اتملكها وهي بتشوفو نازل بي سرعه.
بالرغم من انها كانت مرهقة وحاسا بفتور الا لنو م قدرت تنوم وبقت بس قاعده منتظراه يخش وبقت بتتخيل ف منظر نور حيكون عامل كيف وهل حتكون حلوة ف اللحظات دي ؟ وبعدين طريقة كلامو معاها ومشيهو بي سرعه ليها دا اكيييييد وراه سبب.
اصلا حيكون لسا بحبها 💔.
قالت الجملة دي بي احباط وبؤس شديد.
_ اه انا مالي ومالو.. يعمل العايزو 💔.... اصلا م عندي ليه شي.
واصعب شي لمن تكون بتقنع نفسك بي شي وجواك انت عارف انو ف شي تاني بس م عايز تعترف بيه 💔.
فضلت قاعدة لوقت طويل راجياه.
لحددددي الساعه م بقت 3 فجر حتن جا داخل.
عاين ليها باستغراب : دا شنو ؟ انت لي لحدي هسه صاحيه ؟
_ ها ؟ ب... بس م جاني نوم.
_ مممممممم.
_ اها نور حاصل عليها شنو ؟
_ ابوها هو التعب هي كويسة
_ اي مالو ؟
_ هو راجل كبير وعندو مشاكل صحيه لكن بقا كويس الحمدلله.
_ الحمدلله.... على كل حال خلاص انا حنوم
_ طيب.
قامت على السرير ورقدت.... عاينت ليه وهو بيمشي على الحمام.
بعد دقايق كدا جا طالع وهو لابس هدوم مريحة ورقد برضو.
فضلت تتقلب والنوم جافاها وهي بتفكر في علاقتو هو ونور.
لحدي م الفجر اذن.
قعدت وهي مربعه يدينها.... عاينت ليه بغيظ.... وقامت اتوضت وصلت.
قامت من مصلايتها ولكزتو ف كتفو : هي ميكال
فتح عيونو ببطئ : شنو ؟
_ قوم صلي الصبح 😒
طنشها وغطا راسو باللحاف.
جرت اللحاف منو : قلت ليييييك قوم صلي.... الصلاااااة الصلاااااة.... قوم كلها ركعتين.
_ انتي جيتيني من وين انتي.
جرا اللحاف منها : اسكتي وم تزعجيني خليني انوم وراي شغل.
_ يعني مهتم بي شغلك وصلاتك لا ؟ والله لا بتفلح ف شغل ولا غيرو من دون صلاة انعل شيطانك وقووووووم ياخ.... قوم دا شنو دا.
قعد ف السرير وعاين ليها بطريقة خوفتها شديد 😭.
بعدها وقف على حيلو وقال ليها بصوت هامس : عايزاني اصلي ؟
_ اي
_ طيب.
قام ومشا على الحمام.
جا فرش المصلاية ووقف للصلاة.
حست بي سعادة غريبة وهي بتشوفو بيصلي قدامها.... سعادة نستها احساس الضيق الكان مسيطر عليها قبل شوية منو هو ونور.
صلى وقام وبعدها رجع لي سريرو.
رقدت جمبو وهي مبسوطة.... اتقلبت ولقتو ف وشها وكان بعاين ليها.
اتبادلت معاه النظرات لثواني بطريقة خلت ضربات قلبها تزيد...
مشا يدو ف وشها وهو بقول ليها بهمس : ممكن تنومي من دون م تتقلبي كتير ؟
هزت ليه راسها وغمضت عيونها.... حست بي نظراتو المتفحصة بالرغم من انها كانت معمضة عيونها عشان م تشوفو.
لمن قال توتيل طوالي فتحت عيونها.
قال ليها وهو بعاين ف عيونها : انتي اشتقتي لي اهلك ؟
ابتسمت بي توتر : شديد والله.
_ طيب جهزي هدومك بكره حسفرك ليهم
_ لي ؟
توتيل فكرت باستغراب لي فجأة قرر يخليها تمشي لي اهلها ... انتابها الشك لثواني انو نور ليها دخل في الموضوع 😕.
قعدت وشالت انفاسها قبل م تعاين ليه وتقول ليه بنبره مترددة وكانت مبتسمه عشان م يحس بيها جادة : عايز تتخلص مني 😂؟
اتكل على يدو وهو بيرفع نفسو شوية : لا .... اكيد لا .
_خلاص يعني حمشي بكره ؟
_الوقت البريحك ... لكن احسن ليك م تأجلي السفره طالما انك مشتاقه ليهم .
_شكرا 💜
_ ممكن بعد دا تخليني انوم شوية عشان مرهق .
_ سمح
اتقلب على الجهة التانيه بي هدوء ونام ..... بينما هي فضلت تعاين ليه لوقت طويل ..... انفاسو البترتفع وبتنخفض بهدوء .... وشعرو المنكش نوعا ما .
النوم جافاها .... فقامت وطلعت على البلكونه الفاتحه على النيل ...
عينها هناااااك يوسف قاعد وشايل ليه جريو وبلعب فيه 😂.
مشت اتسوكت واتدوشت وغيرت ونزلت ليهو .
لمن شافها الابتسامه دي للضرس 😆.
_صباح الخير يا يوسف
_ كدي قولي يوسف دي تاني 😍
_يوسف 😂😂
عاين للجرو الفي يدو : بندق اعرفك على تواتل
_ توتييييل
_ اي توتيل .... وتوتيل اعرفك علي بندق
_اتشرفنا يا بندق ... وجايب الاسم دا من وين 😂
_م بتعرفي بندق 😳؟
_ لا والله اول مره اسمع بالاسم دا .... الا كان قاصد البندق البياكلو
_ لا لا ياه .... بندق صاحب ميكي
_ ميكي ؟
- ميكي ماوووس .... زيزي ... وبطوط .... ميمي .... وبندق الكلب
_ ايواااا الشخصيات الكرتونية دي 😂
_ ايوااااا شاطره 😍..... واقفة لي اقعدي اقعدي قعدو في الكراسي المختوته بورا .
يوسف : اهااا شفتي لي العروسة 😌
_ 😂😂😂😂😂😂 م ناسياك بشوفها ليك
_ ايوا كدا 😌💜.
_ م عندك اخوات يفتشو ليك 😂 ؟
_ اخت واحدة ومهاجره ف السويد ..... كنا معاها لينا شهرين .
_ ايواااا يعني انت اصغر زول ؟
_ اي .... سيف .... فيحاء وانا يوسف 😌.
_ وم عندكم اولاد اعمام تاني ؟
_ لا .... اصلا جدو عبد العظيم عندو ولدين بس واللي هم ابوي وابو ميكال عمو ياسر ربنا يرحمهم .
_ الله يرحمهم ان شاء الله .... وماتو من متين ؟
_ يعني زي 5 سنوات كدا في حادث ..... غايتو كان اسوء يوم ف حياتنا كلنا .... لكن ربنا مشا الايام وربط على قلوبنا .... بالذات ماما عشه تعبت شديد ... احساس اولادها الاتنين ماتو ف نفس اليوم .
_ ياهو حال الدنيا 💔.
_ الحمدلله... كدي دقيقة امبارح قالو كنتي عيانه سلامتك
_ الله يسلمك ان شاء الله.
_ مالك عندك شنو ؟
_ والله تعبت شوية كدا.
_ اكلتي شنو ؟
_ والله م اكلت شي بس شربت لي جبنه مع وجدان وبعدها الحصل حصل
_ مع منو ؟ وجدان ؟ وانتي العزمتيها ولا هي العزمتك
_ هي العزمتني والله
_ بالله وجدام بتعزم ؟ وجدان دي سلام الله م بتقولو... غريبة يعني.
_ هي مش بتبقى ليك ؟
_ اي بتبقى لينا بت خالتنا....لكن هي اعووووذ بالله منها ياخ مخلوقة كدا عجيبة م بطيقها نهائيا.... امي زوجتها لي سيف على اساس م تجي واحدة بعيدة وتسيطر عليه.... هسه السيطره المسيطراها هي فيهو ندمت امي على اختيارها ولسوء الحظ سيف زاتو م عندو شخصية عشان يوقفها ف حدها ويكون الراجل المسيطر وكدا...لا متساهل ليها ااااخر حاجه وخاليها تلعب بيه كوره.... كنت متمني لو شخصيتو تكون ربع شخصية ميكال بس.... اكيد كان حيحسم الفارغه دي.... وانا كرهتي ف الدنيا الراجل الشخصيتو ضعيفة قدام مرتو وبتسيرو بي مزاجها 😠.... اي نعم مفروض و واجب عليه انو يحترمها ويقدرها ويختها تاج ف راسو لكن اي شي بحدود.... من البداية يوريها ف حدود م تتجاوزها ولا تدخل فيها خالص.......................... معليش بريتك صح 🙂💔.
_ لا لا اخد راحتك.
_ هسه انتي حياتك كيف مع ميكال 😅
_ كيف يعني ؟
_ قادرة تتعايشي معاه عادي ؟ ميكال صراحة صعب شديد حتى مع اخواتو... وبعدين شنو راسو قوي يعني غير قابل للنقاش والتحاور لمن يكون عايز يعمل شي بيعملو بيعملو م بشتغل بكلام اي زول.
_ اي واضح.
_ بندق زهج من ونستنا شوفيو صرا وشو كيف 😢
توتيل وهي بتضحك: غايتو يا ناس الالفينات انتو طول ساي لكن المخوخ لسااااااا شفع
_ انا مواليد 99
_ برضو تبعهم كلكم نفس الشي 😂
_ اها وريني خططك وكدا 😌
_ ياتو خطط 🤔
_ الخطط المستقبليه يعني
_ والله حاليا م بفكر ف شي كدا محدد بس خلي الفتره دي تعدي.
_ طيب بقترح عليك انك تعملي ماستر.... وتاخدي دروس اون لاين بالنسبة للغه الصينيه دي
_ صراحة اقتراح جميل بس هسه م اعتقد اقدر
_ لي لي ؟ المانعك شنو لو عايزة مساعدة ف اي شي انا بساعدك ولا انتي خايفة ميكال يعرف ويمنعك 😂.
_ لا لا م خايفة من اي شي.
_ بالمناسبة هو م عندو مشكله ف مواضيع التعليم وكدا دا ققوي قلبك
_ والله م خايفه 😂.... بس م مستعدة حاليا.... اصلا مسافره بكره
_ ماشا وين 😢
_ مسافره
_ مسافر وين مخلييينا 😢
_ والله ماشا لي اهلي كم يوم كدا وبرجع
_ تمشي وتجي بالسلامه يارب 💜
_ تسلم
_ يسلموا غواليك
_ اها مسافره متين 😢؟
_ بكره 😂
_ طيب بس البيت حيضلم والله 😭
_ انت حناك ولا كيف ؟
_ م حناك بس بقول الحقيقة 😢
_ 😂😂😂😂😂😂 طيب عن اذنك انا طالعه فوق
_ طيب... لكن قلتي لي مسافره متين ؟
_ بكككككره 😂😭😂😭😂😭😂... والله العظيييم بكره.
_ طيب حنشتاق ليك
_ كم يوم وبرجع 😂
_ بالسلامه 😢
_ الله يسلمك.
وبسرعه اتحركت وطلعت فوق.. لقت ميكال لسا نااايم..
سمعت صوت نغمة الرسايل ف تلفونها شالتو بسرعه ومشت قعدت ف الكنبة كانت رسالة من لجين.
( عروستنا الحللوة توتيل كيفك 😍)
( صباح الخير يا لجين )
( صباح النور 💜... سلامتك امبارح قالو فجأة تعبتي مالك عندك شنو ؟)
( والله يا لجين بس شربت لي قهوة بعدها النار بقت ف بطني )
( حبيبتي يا حليلك 😭.... لكن القهوة دي جبتيها من وين )
( شربتها مع وجدان )
( وجدان تاني؟ نفس الفهم حق يوم عرسك برضو ادتك قناع لوشك خربتو ليك.... ووجدان دي صراحة م بتتعامل مع زول انا منبهره فيها.... بس م عايزاك تشكي فيها.... لكن بس كنصيحه حاولي ابعدي منها )
( بسم الله م اعتقد كدا.... الحاجات دي كلها صدف بس )
( اللهم بس اعملي حسابك )
( طيب ان شاء الله تسلمي )
( يسلم زوجك ان شاء الله 😂💜)
ختت تلفونها وبدت تفكر.... معقولة الكلام عن وجدان يكون صح ؟ لكن يوسف ولجين اكيد م حيتكلمو ساي من راسهم لانهم قريبين ليها واحتكوا بيها قبليها.... لكن هي لي حتعمل كدا ؟
لعنت الشيطان وقامت لي شنطتها الجات بيها.... ختت الهدوم المحتاجاها وقفلتها.
_____________________________
نور كانت قاعده ف الصالة مع امها.
امها : انتي يا نور.... عارفة ابوك بقا زول كبير وعيان... امبارح تتشاكلي معاه وكلمه بي كلمه لحدي م وقع ف الواطه وقرب يموت ؟
_ امي انا ما غلطت عليه.... بعدين ابوي كلامو غريب هو عارف اني تعبانه وشقيانه عشانكم... ماف داعي يقول لي انتي بتتأخري وانتي بتفعلي وبتتركي.
_ يا بتي خايف عليك هو ف النهاية ابوك
_ انا م بنت صغيره ولا طفلة عشان يخاف علي هندا ماشاء الله كبييييره وواعيه وبعرف الصح من الغلط م محتاجه خوف زول علي يا امي.
_ كويس يا بتي ربنا يهديك ويغطي عليك
_ شفتي يا امي الجانا امس دا؟
_ دا ياهو مديرك البتحكي لي بيو ؟
_ اي ياهو
_ عاد ماشاء الله تبارك الرحمن يملا العيييين.
_ لكن معرس 💔
_ مالك ومال عرسو.... الشرع حلل 4 يا ماما.... اتي ابقي بس فالحة ونجيضة وجيبيه.
_ ان شاء الله.
🌸🌸🌸🌸🌸🌸🌸🌸🌸🌸🌸🌸🌸
نص اليوم مرا عااااادي بخيرو وبي شرو وتوتيل م طلعت ولا شبر بره شقتها عشان م تنزل تحت وتلقاها ماما عشه وتفضل ترمي ليها الكلام.
باب شقتها دق..... قامت فتحت الباب لقتها وجدان وكانت شايلة ليها قدر زجاجي صغير كدا... اول م شافت توتيل ابتسمت ليها : توته.... عملت ليك شوربة خضار رووووووعه خفييييفة وحتشبعك وتريحك.... عملتها ليك بي يديني.
_ شكرا يا وجدان م كان تتعبي نفسك.... اتفضلي عليك الله ادخلي.
طوالي دخلت.
توتيل مشت وجات راجعه بملعقتين.... وكلام لجين ويوسف لافي ف راسها
وجدان : دا شنو دا كمان
_ اشربيها معاي
_ هو انا عملتها كتيره وعندي ف البيت اشربي انتي بس
_ لا والله تشربي معاي مستحيل اشربها براي دا اسمو كلام دا ؟
_ لكن انا.... انا عامله رجيم م بقدر اشرب
_ مش قلتي خضار ؟
_ اي لكن لكن يعني هي مشبعه بالدهون وحتنفع معاك بالذات يا عروسة
_ طيب شكرا يا وجدان م بتقصري
_ ولو ياخ واجبي والله
توتيل استغربت لي وجدان ابت تشرب معاها واتوترت كدا.... قلبها اكلها من الشورية وطوالي شالتها ودفقتها..... بقت قاعده ومنتظره ميكال.
جا قرابة الساعه 5 كدا.
اخفت فرحتها بشوفتو وعملت نفسها متابعه التلفزيون....سلم عليها ودخل على الحمام....بعد جا طالع سألها : جهزتي نفسك لي بكره ؟
_ اي
_ تمام... بكره العربية حتجيك 6 فجر... لازم تصحي بدري عشان توصلي بدري.
مشا على سريرو طوالي ونام.
باقي اليوم مرا عادي جدا م اتكلم معاها كتير وكان مشغول بتلفونو وهي الشمار حرقها ماسك تلفونو ومركز كدا يا ربي بيتكلم مع منو.....لكن ممثله انها م مهتمه.
الليل كلو م نامت بس فضلت مفتحه عيونها وتعاين للسقف.... م عرفت السبب شنو الخلا النوم يجافيها.... الفجر لمن اذن قامت صلت وصحتو برضو بالقوة للصلاة..... بعدها جهزت نفسها.... لبست ليها توب سممممح والوانو هادئة... وشبط رقييييق... ولفت حجاب بدرجة لون التوب.
السواق ضرب لي ميكال ووراه انو وصل....
كانت عايزة تشيل شنطتها لكن قال ليها : خليها بنزلها ليك انا
_ لكن هي خفيفة م فيها شي بقدر اشيلها
_ برضو حنزلها انا.
عاينت للارض بخجل ومدت ليه يدها : نتلاقي
م مد يدو وقال ليها : حتاخدي كم ؟
رجعت يدها بي احراج: اسبوع كدا ان شاء الله
_ تمام
قبلت على باب الاوضة وفتحتو.
_ توتيل ؟
قبلت وراها وعاينت ليه.
مسك يدها وعاين ليها : خلي بالك من نفسك
_ ان شاء الله.
اتفاجأت لمن لقتو بينحني عليها وبيعانقها💜..... م عرفت ياتو جرأة الخلتها تمد يدينها لي عنقو.... واحدة غاصت في اطراف شعرو والتانيه استقرت تحت عنقو( ان شاء الله م ينفعكم 😌💔)
م عرفو مرة كم من الوقت وهم ف الوضع دا... لحدي م تلفون ميكال ضرب تاني.... ورجعهم لواقعهم.
زحا منها وهي رجعت يدينها.... تاني بقت م قادرة تعاين وحست بالغباء بالذات لمن اتذكرت الحركة العملها ليها ف السفينه...
قال ليها بصوت هادئ : اسبوع بس وحترجعي صح ؟
_ ان شاء الله
_ م حتتأخري ؟
_ م معروف
اتعمدت تديه اجابه مبهمه عشان م تحسسو انها مهتمه عشان ترحع ليه بسرعه.
فتحت الباب ونزلت بي سرعه.... وهو نزل بوراها.
ركب ليها شنطتها ووقف يعاين ليها.... كانت نفسها تقدر ترفع راسها وتعاين ليه.... تملا عينها منو لانها م حتشوفو تاني لي كم يوم لكن م قدرت.... فضلت مدنقره راسها.... وشوية العربية اتحركت.
عاينت بالمراية.... شافتو وهو واقف وشوية شوية بدا يبقى بعيد لحدي م اختفى نهائيا 💔
شالت نفس عمييييق ورجعت بي ضهرها لورا.
طول السفره كانت بتنوووووم وبتصحى بتلقاه مسيطر على تفكيرها.
لحدي م خلااااااااص بدت من بعيد بيوتهم تظهر ليها...... ابتسمت تلقائيا لمن عرفت انها وصلت قريتها 💜.
نهاية الحلقة الخامسة عشر

______________________________________