❥͜͡🦋مريم ࿐❥͜͡سيدة الصمت✮

مريم (الحلقة الاولى )

نشوف فيهم متلامين عليا يحضروا للجنازة نتاعي نساو راني مازلت حية ، و انو نهاية حياتي مش بتقديراتهم اما هي بيد عزيز قدير ، اهلكتني الصدمة لي كانت مجموعة صدمات ما تحملهاش قلبي و عقلي لي راه ماخد اجازة طويييلة .

علابالكم شكون هاذو لي متلامين عليا ؟! هوما ببساطة ولادي الاربعة مع نساهم و بنتي الخامسة بينهم .
و انا نشوف فيهم بوهن مش قادرة نتكلم ندور فالنظر نتاعي بتعب في وجوهم و نسمع واش راهم يقولو راه في بالهم راني في اخر ايامي في سكراتي الاخيرة و ما بقاش على عمري الا سعات و اذا طولت يوم و الا يومين .
كي راحو ولادي و بنتي معاهم بقاو نساهم يحاوطو بيا و كل واحدة تعطي في رايها في حالتي و تفجعت كي سمعت حفيذتي تتكلم :اذا ماتت مش راح نحزن عليها ولدها ما خلانيش نحزن على بنتي يعني مش راح نحزن على امو العجوزة 😡
و تجاوبها لوخرة :ما علاباليش علاش متمسكة فالحياة هكا مرا كيفها غير قاعدة و تتفرج تموت و تهنينا 😒
ترد عليهم  الثالثة: استغفروا مولاكم المرا مزالت حية وحدو ربي لي يقبض روحها ما تعلمتوش من الموصيبة لي صرات في العايلة كلنا تدمرنا فما ادراكم بيها و هي جدة الكل  ام الكل و منبعد شافت فهاذيك الثانية راهي بعمر امك و الا اصغر برك تبان كبيرة بسبب الظروف لي ما خلتهاش تهتم بنفسها بعد موت راجلها 😑
سكتو و سكت الجو بعد ما حكات الرابعة : خالتي مرا زهدت فالدنيا بعد موت راجلها لوكان اهتمت بنفسها راهي كيف قريناتها و الا احسن عمرها 67 سنة اما تبان 76 بسبة قلة اهتمامها في روحها و صحتها ، فوتت 20 عام من عمرها مهملة روحها بلاك تلحق راجلها و لكن الاعمار بيد الله و من بعد شافت فيا و تكلمت و قالت : و مصيبة بنتك هي لي زادت كملت عليها
شافت فيها لوخرة بنظرة تحدي 😏 ما تليقش بمرا تفجعت بفضيحة نتاع بنتها ما تمحيها لا سنين و لا تنساها ناس
بقيت نراقب في كلامهم و موضوع عزاء نتاعي بين لي موافقة و لي معارضة .