Malayang Pag-Tula

Pilit

Mga hikbing pilit na itinatago
Mga hinanakit na maririnig lang sa isang sulok ng kwarto
Tanging dilim ang nagsisilbing sandalan
Sa tuwing ang malamig na gabi'y sisibol na naman

Tanging mga unan ang yakap
Sa tuwina'y ang luha'y kukumpas
Walang kasiguraduhan ang umaga
Ang mga mata ba'y nanaising ibukas?

Nanaisin mo bang gumising
Kung ang bubungad sayo'y bungangang walang tigil
Matang mapanlisik
Boses ng mga taong sa kalayaa'y pumipigil

Pilit na ibinababa ang aking pagkatao
Pinamukhang sa buhay ay hanggang dito lang ako
Na hindi na gugustuhin pang lumipad ng malayo
Pagka't hindi pa lang naguumpisa'y pinutol na ang pakpak mo

'Tanga' ang sarili'y tingin
Hindi gustong sumubok
Pagka't takot magkamali
Yan ang salitang aking kinalakhan
Yan ang aking nakasanayan
Gustuhin mang alisin sa isipan
Paano? kung araw-araw ang taong nagsabi nya'y kasama parin hanggang sa susunod na bukas.