قصة
#الوجه_الآخر_للحزن
الجزء الثاني
بعد كم يوم صعب وثكيل رجع ابويه الوعيه ..
ومن خابرنا عمي وبشرنه ظلينا نبجي ونضحك من الفرح...
الحمد لله اصعب ايام كانت علينا..
اني عندي ابويه اغلى شي بالدنيا وحنيته علينه اكثر من حنية امي علينه..ماادري ليش احس امي مشاعرهه بارده ويانه..
ورجع ابويه للبيت وفرحتنه اكبر من كلشي ...
ساعة اللي شفته وحضنته واني ابجي ممصدكه اشوفه... كل ايام مرضه كانت طعمهه مر وطول الوقت خايفه اذا راح ابويه منو عدنا بعد...
بس السياره تفلشت وماعدنا فلوس تصليح.. بس اهم شي ابو نجا وطلع سالم كلشي يروحله فدوه..
عمامي وخوالي وكفو ويانه ومقصرو.. ولمولنه كم فلس نعيش بيها الى ان تفرج..
الهم زاد والحياة صعبه وابويه مريض ومابي حيل يتحرك ..
بقى ثلاث شهور نايم بالبيت..كان يعاني طول الوقت من وجع براسه وعايش عالمسكنات..
الشي اللي شفته انه رغم حب ابويه الامي ..وهي هم تحبه...بس احسها علاقتهه تغيرت بابويه ..مو كلش تحن عليه او تهتم بي ..
بس اني ماكنت اعوفه ...دائما كاعده يمه ابوس ايده واسولفله على صديقاتي ..احب اشوفه مرتاح وماريده يضوج
اهل ابويه واهل امي ظلو يصرفون علينه..بس الى متى ؟
ابويه بدا يستعيد عافيته..
وعمي طلب منه يجي يساعده بمحله باجر شهري...
ابويه قبل لان ماعنده حل..
راتب ابويه كام ميكفي ...وكلنا مدارس ماعدا رقيه ومصطفى
...
مشت الايام واحنا نعاني.. وكل منكبر نزيد فقر ومأساة..ونحس بالفرق بينا وبين الناس واللي همه اقرب شي علينه...
احمد صار ثالث متوسط..ورده اول متوسط واني خامس ..
أمي دائما ادردم وتتعارك وعصبيه ...
البيت اللي كاعدين بي كله رطوبه بالشتا ويخر علينه من تمطر الدنيا...
و حالنه يصعب الكافر وماكو حل..
المشاكل زادت ويوميه عركه بين امي وابويه... هي تكوله بيع الكاع وافتح مشروع بي خير لان اني مااتحمل هذا الفكر تعبت..
وهو يكولهه اخر شي ابيعه الكاع ..هو شبقالنه مو كعدنه عالحديده..
امي كامت هوايه تتذمر من العيشه..يعني احنا كلنا صغار بس نقدر الا هي ...
من كثرة المشاكل بالبيت وفوكاهه حالنه وحال البيت التعبان .. قرر احمد شغله..
فد يوم اجا على امي كلها يمه اني قررت اشتغل
امي كالتله ومدرستك؟
كلها احول مسائي واشتغل بالنهار..
كالتله..مااقبل اكيد ترسب لان المدارس المسائيه مابيها خير...
كلها لايمه والله اوعدج ادرس وانجح بس حالنا يبجي وابويه ميلحك واحنا لازم نعينه...
كالتله زين و شنو تشتغل ؟ هو وينه الشغل
كلها ويه رجال عنده محل مخضر ابو صديقي واني اوكف ويا..وهم نطلع مسواكنه وهم كم فلس
كلتله..زين وشوكت تدرس مو يضيع مستقبلك يايمه
كلها لا امي ..اني اعرف ارتب وقتي بس مدااتحمل هذا حالنه..ابويه تعب وميكدر يدبر العيشه ..واحنا مصاريفنا هوايه..
امي رغم حرصها على دراستنه بس كان موضوع الفلوس يهمها اكثر ... وشافت كلام احمد منطقي ويفيدنا
كلتله بكيفك يمه ...اذا ادبرهه ساعد ابوك بس كون دراستك متعوفهه..
كاللهه لا يمه ادبرهه وشوفي..
امي فرحت ...حست شويه راح تفرج علينه..
وراهه بيومين سوه احمد اجراءات النقل ..وكام يشتغل بالمخضر ويه رجال بالسوك...
يرجع وره الظهر ويا علاكه مسواك وكل اسبوع ياخذ حسابه وينطي بيد امي..
شويه الوضع تحسن بس احمد كام يتعب وميلحك يقره ...ورسب ذيج السنه..
اني بديت اكبر وافتهم اللي ديصير ..وكمت انتبه على هوايه شغلات دتصير بالبيت ...
ومرات اكول ياريت باقيه صغيره وممفتهمه اللي ديصير..
امي تغيرت...تصرفاتهه صارت مو اعتياديه..
فجأه صارت هادئه..المشاكل قلت ويه ابويه... مو بس قلت بس كمت اشوفهه مبتعده عن ابويه...
امي كانت حلوه كلش وجسم حلو ولسان حلو..وابويه كان دائما يغنيلها غزال ومايصيدونه بس اني صدتج وصرتي الي..ويتشاقه وياهه
بس ابويه تعب وملتهي بشغله..
وكمت مرات هوايه ارجع للبيت من الدوام اني او ورده ..وامي ماكو عايفه اخواني الصغار وطالعه..
ومن ترجع شكلها مال وحده جانت بحفله .. مكياجها ولبسها
نسالها وين جنتي تكول يم فلانه صديقتي دازورهه مريضه.،لو بالسوك ..
بقت امي اكثر من شهرين على هاي الحاله..
حتى مرات مملحكه تسوي غده اجيب وياهه لفات فلافل ..ومرات حتى تشويلنه كباب...كمنه نستغرب احنا ماعدنه مين تجيب امي هذا الاكل..
وجانت توصينه اكلو ولاتكولون الابوكم اكلنه كباب هم يحجي عليه ويكول تبذرين فلوسج..
ومن يجي ابويه واحمد تكليلهم بتيته وطماطه حتى ميعرفون اللي ديصير..
وشويه شويه بديت اكتشف الحقيقه اللي جنت خايفه منها..
كمت افكر امي وين تروح...وتغيرت هوايه..
احس اكو عدهه شي.. بس محد منتبه عليها..
ابويه يرجع بالليل تعبان ميدري شكو بالدنيا..
واحمد نفس الشي...
فد يوم طارت نومتي بالليل ..
سمعت صوت ناصي..ماميزت صوت منو هذا...
كمت من فراشي وصلت يم الباب ..خليت اذني عالباب ..سمعت صوت امي تحجي والساعه وره الوحده بالليل..
مااعرف شصار بيه
شكو....ويامن تحجي امي بالليل..؟!
فتحت الباب على كيف..
طلعت امشي على طرف اصابعي ..والصوت ديجي من فوك ..عالسطح..
كمت اصعد على كيف ..، وكل مااصعد درجه الصوت يصير اوضح..،واني ارجف...الدنيا بارده ...
شلون كاعده امي بهالبرد بالسطح..وصلت للاخير وبديت اسمع زين ..
وياريتني ماسمعت...
اااااااخ يامسكين ياابويه
امي تحجي ويه رجال ..كلام كله حب..لا مو بس حب كلام حقير ... اشياء متحجيهه مره شريفه
واسمعها تواعدت ويا على ثاني يوم بالعشره واتفقت على مبلغ ...
ورغم صغر عمري بس افتهمت كلشي...ساعتها افترت الدنيا بيه وردت اوكع من فوك ليجوه...
لزمت محجر الدرج ..ونزلت اركض...
دخلت الغرفه بسرعه وسديت الباب .. بس احس كلبي راح يوكف ..وارجف...
دخلت جوه البطانيه والرجفه لازمتني... بردانه وخايفه ومصدومه ومنهاره وكلشي بيه
اريد ابجي... اريد اصرخ..،اريد اقتلها الامي اي اقتلها الخاينه..
ياربي اني بعدني صغيره...مااتحمل هيج صدمه اكبر مني بهوايه...
ياربي ساعدني واوكف ويايه
معقوله الفلوس سوت بيهه هيج؟؟
تبيع شرفها... ليش هيج..مو هذا ابويه المسكين حبج وماقصر وياج...بس وكع وافترت بي الدنيا تخوني..
زين هسه الناس شدتكول علينه..
اكيد كلهم يدرون بيها...
شلون بينا ياربي...دخيلك الهي
اذا ابويه المسكين يعرف يموت..
وبقيت للصبح كاعده وماغمضت عيني ... ساعه ابجي وساعه احجي ويه رب العالمين ينجينا...وارجف وجسمي مثلج
وقررت بيومها ماروح للمدرسه....
قررت ابقى بالبيت ..اريد اعرف وين حتروح ...بلكي اكدر امنعها..فكرت اكول الاحمد او الورده..بس خفت تصير مصيبه جبيره..المن اكول...وشسوي ..مااعرف اتصرف ولااكدر اواجهه..
كعدو اخواني من النوم واني سويت نفسي مريضه...
جتي عليه امي تكعدني مكدرت اباوعلها..بس كتلها راسي يوجعني ماروح...
ظلت تصيح عليه وحاولت واني عاندت وابويه هم طبك ويايه كلها عوفيهه لاتغصبيها عالروحه.. تكولج مريضه
هي عصبت وظلت تحجي وادردم ..
طلعو ابويه واخوتي وبقيت نايمه بمكاني متحركت ..افكر شنو اسوي..
جتي مره ثانيه وره شويه فتحت الباب تحاجيني سويت نفسي نايمه مارديت عليها..
وره شويه سمعتها تحجي مره ثانيه بالتليفون وصوتها هم ناصي...بس كاعده جوه مو بالسطح..
كمت اسمع..صوتهه جان مبين ..صح مو كل الكلمات افهمها بس سمعتها تكوله هسه اطبخ واجيك..هم زين اليوم نورس بالبيت حتى تبقى يم اخوتها واني طابخه...يعني ناخذ راحتنه...
اني كمت اضرب على وجهي..
اتهسترت...معقوله هاي امي ...معقوله...
متحملت...متحملت
فتحت الباب وطلعت اركض عليهه واصرخ وابجي...
حبايبي التفاعل ويه القصه قليل كلش..اذا معاجبتكم لاتعلقون حتى اوقف النشر
ورجاء ماريد تم ومتابعه اما تكتبون رايكم او لاتعلقون
اذا تحبون سوو متابعه لحسابي حتى من انشر يجيكم اشعار
#شيرين_الصفار
