قصة
#الوجه_الآخر_للحزن
ج الأخير
وأخيرا انكسر ظهرنا..وانتهت حياتنا ...
ابويه عمدة البيت وعموده...
ابويه الحنيه والكلب الجبير ..
ابويه اللي كضاهه تعب بتعب وماخلانه نحس بضيم الدنيا ...
ابويه ضوه البيت وروحه...راح وعافنا مكصكصين
هسه تكصكصنه وهضمنا الوكت وجارت علينا الدنيا..
هسه انقتلنا وتكسرنا وضعنا ...من راحت الخيمه
رغم كل ظروفه اللي مر بيها وحزنه والمه ...
بس جنا نشوف الشمس بعيونه تنور كلوبنه وهسه اظلمت علينه الدنيا ...
الحزن والهم والصدمات قتلته وهو بعد شاب مو جبير ..
مات وره احمد بست شهور...
صايره بي جلطه وهو نايم وميت بمكانه...
الله سبحانه وتعالى خلاه يرتاح وميتعذب بموته...وخلاه يرتاح من هم الدنيا وقهرها ...
لان وصل مرحله بعد ميتحمل..
بس احنا شلون ؟؟ اربع بنات وطفل اعمى ..
منو يعيشنا ويصرف علينا ؟؟
منو يرحمنا بهذا الزمن الاغبر؟؟
احنا جنا جوه جناح ابويه ومحد رحم بينه هسه شلون ؟
ايام حزن وقهر ..
شفنا هوايه وجوه للحزن والامه ...
بس حزنا اله وجه ثاني يختلف عن الكل ...
ابويه كان دائما يوصينه نصون نفسنه ونتوجه الرب العالمين بالدعاء ونتوكل عليه ونسلم امرنا اله...هو الوحيد القريب علينا..
وره ابويه مات كلشي حلو بالدنيا ...
همومنا كبرت ...
بيبيتي وجدي تمرضو وره ابويه
نسوان عمومتي راوونا الويل بمعاملتهم ومنكدر نحجي..
عمامي كلمن ملتهي بعائلته..
اهل امي قليل يسالون علينه..
وضعنا المادي صار كارثه..
منو يصرف علينا..
ناكل وياهم ومرات نبقى جوعانين ..لان مايبقولنه هوايه من الاكل
ملابس ماعدنا ..ومنو اللي عنده ملابس زايده وقديمه يجيبها النا
كل يوم وضعنا للاسوأ...
وتمر الايام وحالنه يبجي ..
تخرجت ورده من معهد المعلمات وكالت ادور شغل لان ماكو تعيينات...
وظلت تفتر على كل مكان آخر شي لكت شغلة عامله منظفه بمدرسه اهليه وراتبها لاباس بي..
اني عارضتها كلتلها انت عندج شهاده شنو عامله ومنظفه ؟
كالت اقبل باي شي بس يصير بيدنه كم فلس ..
وراحت داومت ...يوميه ترجع منتهيه من التعب بس تكول ميخالف..
نسوان عمومتي شدو وياهه لان مابيها حيل بعد تشتغل بالبيت...
رغم اني كملت السادس وكعدت بالبيت وكان معدلي زين بس مكدرت اقدم عالجامعه لان ينرادلي فلوس واني ماعندي..
وصرت خدامه بالبيت ...
قررنا نبقى متعاونين اني وخواتي...
وكلت الكي شغل واني كاعده بالبيت ...
وكنت اعرف اسوي كبه ولحم بعجين وهاي الشغلات..
وكمت اشتغل للجيران ...
تعجبو عليها...بس الحرب مستمره عليه بالبيت ..
وظلن نسوان عمومتي يتحججن عليه ..على الغاز ديخلص ومانلحك ...واشكال سوالف طلعولي..
مادرتلهم بال..
جدي راح اشترالي طباخ صغير وقنينة غاز وفرن كهربائي وخليت الطباخ بالمنور وكمت اشتغل بي..
وزاد شغلي وربحي ..،ورده عافت دوامها وتشاركنا ..وخواتي بالعطل هم يشتغلن ..
سوينا صفحه عالفيس ونشرنا بيها شغلنا..
واتفقنا ويه ولد جيرانا ننطي فلوس وهو كاعد ماعنده شغل ويوصل للبيوت ..
الله رزقنا ... وانفتحت علينا ...وكمنا نصرف حتى ويه البقيه بالبيت..
دخلنا مصطفى بمدرسه خاصه للمكفوفين ...
وفد يوم اجا يمنا جدي كعد كالنا شوفو جدو ..اني تعبان وابوكم ماحصل شي من هاي الدنيا واذا اموت انتو ماالكم مكان بعد هنا ..بيبيتكم باعت ذهبها واني عندي قطعه ارض هم بعتها واشتريتلكم بيت 75م مو كلش جديد بس المهم هذا الكم للزمن ..هسه انتو متكدرون تكعدون بي وحدكم...
بس يصير ميصير عدكم مكان يلمكم وعمامكم ساعدو بفلوسه وحتى عماتكم ...
احنا بكد مافرحنا ... بجينا بسنا ايده وراسه ودعيناله اله الجنه ان شاء الله
بس كال لاتحجون كدام نسوان عمامكم تره يكلبن الدنيا..
كلناله منحجي..
وبقينا احنا بشغلنا والحمد لله والله مفضل علينا..
وبيوم كاعدين ونشوف بيت خالي جوي ...هاي اول مره يجونا ...
استقبلهوهم بيت جدي كلهم.. جايين خالي وزوجته وابنه وبنته...
وظلو يسولفون ..واني اباوع على خالي اشوف امي كبالي يشبها ..
وحتى من بسته شميت ريحتها ودمعت عيني..
احنا كعدنا نسولف ويه مرة خالي وبنت خالي من عمرنا ..
واكثر من ساعه نسولف وياهم وفرحنا بيهم كلش..
رأسا خالي باوع على ورده وجان يكولها ورده اسم على مسمى..
وهذا جدج كاعد وعمامج وهذا عبد الله ابني واريد اخطبج اله...
الصدمه والمفاجأه خلتنه صافنين ...مشاعر عجيبه اختلطت عدنا ..
معقوله ...معقوله احد يفكر يخطب من عدنا ..واحنا العار لابسنا...
ورده ظلت صافنه وكل مشاعر ماكو بوجها ...مااعرف ليش
وجدي وعمامي واحد يباوع بوجه الثاني..
خالي كال اعرف الموضوع مفاجيء...او ورده بنتي ..
اختي غلطت وراحت الرحمة الله... والله غفور رحيم اورده ميصير ناخذها باثم الام ... وعبد الله هو اختارها واحنا كلنا راضين
ونريد موافقتكم...وموافقة ورده ...
ورده راسا كامت دخلت جوه مكدرت تحجي ..
واني كمت وراهه ...
شفتها كاعده تبجي ...
كلتلها ليش تبجين وردايه ..
كالت مو هو هذا خالي القتل امي ؟
كلتلها اي واحد بمكانه يسوي هيج وامي غلطت ومجتمعنا هيج يصحح الخطأ... وبعدين احنا كلنا بنات وماعدنا احد ولاتتوقعين راح تجيج هيج فرصه مره لخ
وافقي ورده ..تره عبودي هم ورده وضحكنا
دخل جدي وبيبيتي علينا ..
كال ها ورده استحيتي جدو
هي الدمعه بعينها...
كال نكولهم موافقين لو تفكرين ؟
هي ضحكت والدمعه بعينها وهزت راسها بالموافقه
طلع جدي بلغهم الموافقه وبدت الهلاهل
حضنت ورده اني وخواتي ونباركلها ونبوسها ونبجي
واخيرا الدنيا ضحكتلنا...
الحمد لله والشكر يارب
بس ورده شرطت شرط واحد....
كالتلهم يكعد ابيتنا وخواتي ومصطفى ويايه مااكدر اعوفهم..
همه قبلو ...
وبدينا بترتيب البيت وتجهيز للعرس
احنا جنا لامين مبلغ زين من شغلنا ..رممنا البيت ..وسويناله اضافه واثثنا ..
ورده اخذت الطابق الفوك واحنا الجوه
وره زواجهم باسبوع تحولنا ابيتنا اللي اشترا جدي
وبقينا نشتغل نفس الشغله..
وقررت اكمل دراستي بالجامعه
والحمد لله كملت ...واني هم هسه مخطوبه الولد ويايه بالكليه انعجب باخلاقي والتزامي
هاي قصتنا ... تمنيت تاخذون العبره والدرس منها
نورس
********************
حبايبي يمكن سببتلكم الم بهاي القصه بس واقعنا بي قصص اكثر مراره منها
* كلنا نخطأ بلحظة غضب او ضعف او احتياج وكل خطأ بسيط ممكن تصحيحه بس من الصعب تصحيح الخطأ الكبير
اختي فكري الف مره قبل ميدخل الشيطان بعقلج ويمشيج بالطريق الخطأ ...هاي مو سمعتج وحدج هاي سمعة عائله جبيره انتبهي النفسج حتى لاتتندمين بعدين
*بعض الذكور اللي الله حرمهم من الشرف والعفه وخلاهم يغررون بالنساء وبعدين يفضحوهم اكولهم الله بالمرصاد ..وكل انسان يحصد اللي زرعه
( والزاني يزني به ولو بعد حين )
( وبشر القاتل بالقتل )
تره اللي قتل ام نورس هو الذكر اللي فضحها..يجوز هي كان تابت وانصلح حالها بس بعض الذكور نسى اكو دين وتسديد دين وقائمة الحساب تجمع
طلب من جميع كاتبات القصص ..حبيباتي ركزو بقصصكم على علاج الاخطاء والسلبيات بالمجتمع ياريت تتركون قصص الفصليات والحب المبتذل ..المجتمع موجوده بي مشاكل كثيره واحنا دورنا نوجه بشكل غير مباشر ونصحح الخطأ
اتمنى ماتعبتكم وتكون القصه عجبتكم اريد رأيكم بيها وبنهايتها وان شاء الله انزل عن قريب قصه جديده
#شيرين_الصفار
