قصة
#الوجه_الآخر_للحزن
ج 5
قهري كله كان على ابويه واحمد اللي نايمين ورجليهم بالشمس.. وهذا البيت دتصير بي بلاوي ومحد يدري..
رحنا داومنا ثاني يوم...المديره دزت عليه
كالتلي نطيتي الانذار الابوج
كتلها لاست نسيت
رجعت دزت على ورده
كالتلها اذا ميجي ابوج باجر منخليج اداومين بعد..لان وصلتنا اخبار انت تجين الصبح وتنهزمين وتجين نهاية الدوام ..هاي معناها عندج شي واهلج لازم يكون عدهم علم واحنا نخلي مسؤوليتنا..
هي انجنت كامت تبجي وتتوسل
وتكولها ست والله مرات اجي ممحضره وانهزم اروح افتر الى ان يخلص الدوام ارجع..وابويه مريض واذا يسمع يموتني ويموت..
اني ركضت على ايدها ابوسها
كلتلها ست والله عدنا مشاكل وظروفنا صعبه سامحيها هالمره وبعد متعيدها
وظلينا نبجي ونتوسل...
جتي المعاونه شافت حالنا انقهرت علينا ..
كلتلها هالمره الخاطري سامحيها ...ومره لخ اني اروح على ابوهه للبيت اكوله..
هي باوعت علينا وخزرت ورده
وكالت ماشي هاي الخاطر ست سناء راح اعوفج بس المره الجايه حسابج عسير
طلعنا نبجي اثنينا ...والوقت كله اني تعبانه ودايخه الى ان خلص الدوام..
طلعنا من المدرسه هي جانت مبينه مدكوره كلشي محجت ..بس اني ظليت احجي عليهاوهي ساكته..
وكالمعتاد رجعنا وامي ماكو ...بس رقيه وفاطمه جايين قبلنا للبيت..
وره شويه جتي...وركضت للمطبخ تسوي غده ..
لاشافتنا ولاسألت شبيكم ولاتعرف علينا كلشي..
اني بدلت ملابسي وغسلت ورحت يمها للمطبخ اساعدهه..
هي ويايه علاقتها مو زينه ومو كلش تحاجيني ومتهتم بيه..
بقينا نشتغل ..تليفونها دك رساله..
ركضت عليه فتحت الرساله رأسا وجها اصفر واخضر وكام ينطي الوان..واباوع على ايديها ترجف..
خفت اسألها شبيج لان متجاوبني...
بس ركضت راحت الغرفتها..
جتي ورده سألتني شكو شبيها امي...
كلتلها مااعرف..جتها رساله عالموبايل قرتها وتخبلت..
هي ركضت وره امي للغرفه..دقايق وجتني ترجف..
كالتلي نورس الحكي..
شفتها متخربطه وصفره...كلتلها لج احجي شكو؟؟
كالت امي تحجي ويه واحد وتتوسل وتبجي..
كلتلها شتكوله ؟
كالت تكوله والله ماعندي فلوس منين اجيبلك الله يخليك ارحمني لاتنشر الفيديو...
اني وكعت بالكاع..مااكدر اوكف
اويليييي شصار بينا ..انفضجنا
ورده تلطم وتبجي ... لج نورس احجي شلون..اذا ابويه عرف شلون...اذا خولي وعمامي والجيران وصديقاتنا عرفو..
يممممممه انفضحنا ساعة السوده
كلتلها كافي اسكتي لاتجي وتكتلج بالصونده مثل ماكتلتنيورادت تموتني...هسه عرفتي ليش كتلتني لان لزمتها بنفس الموقف دتحجي ويه واحد..
كالت لج ليش ماحجيتي ؟ شلون ساكته ياحيوانه ؟
كلتلها هو منو يديرلي بال امج لو انت ...احجي ابتلي ..
ورده انجنت ظلت تلطم وامي ساعه بالغرفه ماطلعت ..
مفكرت من تمشي بطريق اعوج هيج يصير بيها ؟
مفكرت بالخوف من الفضيحه ؟
شنو هذا الاستهتار وفقدان العقل...
طلعت من الغرفه وره ساعه ونص بس مبين عليها منهاره وعيونهه وارمه من البجي..
ورده كالتلها شبيج يمه منو هددج ؟
هي تخبلت وكامت تعيط وملخت هدومها ..تهسترت تلطم وبس تصيح عوفووووني بضيمي ..
ورده عدها وكاحه ومتخاف مني
كلتلها يمه لاتخوفينا بصراخج كوليلنا شنو الشغله شمسويه وهددوج بفيديو ؟؟
هي هجمت على ورده تريد تضربها ورأسا وكعت اغمى عليها
طشينا مي عليها...بس شفناهه لونها كام يزرك
ركضنا عالجيران واحد عنده سياره..وجوي الجيران شالوهه واخذوها ...
اوووووف ....شلون شراح نسوي..،وين راح يوصل بينه الحال....
كعدنا اني او ورده نبجي وحده صافنه بوجه اللخ..
رأسا اجا ابالي موبايل امي
كلتلها الورده تعالي نشوف موبايلها شنو بي ليش هيج سوت..
دخلنا غرفتها لكيت الموبايل عالجربايه
فتحنا وفتحنا الرسائل لكينا التهديد من ولد
لو تنطيني مبلغ دفتر لو انشر هذا الفيديو وانت بكيفج بعد ...
فتحنا الفيديو ...
..............
من شفنا امي بهذا الوضع ...شنو نكول يعني ...شنحجي..
شنفكر...
احنا انتهينا
الفيديو نطاهه بي يوم اذا ماجابت الفلوس ينشر عالفيس بوك..
اني بعد مااكدر كلشي اسوي ...جسمي مات كله لادمعه ولاكلمه ولا حركه ..احس نفسي متت بس اتنفس ..
عقلي مدايستوعب كلشي ولااكدر افكر ولا ولا ولا
وده بقت ادك وتلطم وتبجي وادردم...ليش وليش ؟؟
اووووف شيفيد ال ليش بعد ..فاس وكع بالراس
لاعدنا فلوس ننطي ونمنع الفضيحه...
ولانكدر نحجي
ورده كالت اني حتصل بي... واحجي ويا واتوسل بي بلكي يطلع عنده ضمير...ها شتكولين نورس ؟
مكدرت احجي احس الكلام نسيته وتفكيري وعقلي انتهى ...شكوللهه ؟
هزيت راسي بس كلتلها ماادري
كالت المن نسأل ..عليمن نروح ..شنسوي..
ساعتين ورجعوهه من المستشفى كالو ديرو بالكم عليها يكولون عدهه صدمه ...وضربوهه ابره ..خلوهه تنام ترتاح..
وظلو يحققون ..شبيها ؟ منو غاثهه ؟
واحنا منكدر نحجي
اخذناهه للغرفه نامت عالجربايه جانت بوعيها بس مبينه منهاره ومتكدر تحجي ولاحتى تتحرك ..
باوعت عليها...واحجي بكلبي
لج يمه شسويتي بنفسج وشسويتي بينه...ليش هيج ..هسه شلون راح تخلصين نفسج
وراج فضيحه تبقى خالده ولازكه بينا الى يوم يبعثون..
انت ام لو هم ...انت ام لو فضيحة العمر ...انت ام لو خزي علينه...
بس شيفيد...
دمعتي منشفت...مو عليها ..على ابويه وعلى العار اللي راح يلزك بينه طول العمر ...
حبايبي تعذروني البارت قصير لان شويه صحتي تعبانه
اذا كدرت انزل بارت جديد بالليل واذا مكدرت على باجر حبايبي
#شيرين_الصفار
