قصة
#الوجه_الآخر_للحزن
ج 3
طلعت اركض واصرخ وابجي...هي من شافتني هيج رأسا سدت الموبايل وتصرخ بوجهي شبييييج شكوووو ؟
واني اصرخ منو هذا ؟؟ ويامن دتحجين؟
ابجي واشهك .. هي انصدمت وظلت صافنه عليه لحظات متعرف شتكول..
واني اصرخ واصيح ...الا اكوله الابويه..الا اكول الخوالي عليج...
وعفتها وتوجهت على الباب البره واني فاقده عقلي ومااعرف شداسوي.. بس ابالي اريد اروح على احمد اصيحله واكوله..
واني اركض وحسيت بيها جرتني جره قويه من شعري ..وكعت بالكاع راسا..
هي هم فقدت صارت مثل المجنونه كالتلي لج شدتسوين ..تصرخ وتلطم على وجها...لج تخبلتي...
كتلها لا انتي ..انتي
اريد اكولها انتي تخبلتي بس مااكدر اتجاسر عليها
جرتني من ايدي وظلت تسحل بيه ...وبنص الحوش جابتلي صونده...وبكل قوتها تضرب بيه بدون شعور واني اصرخ واتوسل تعوفني... وهي تكولي اذبحج..هسه اقتلج هنا ...لج تردين تفضحيني ...
كولي مااحجي يله ...
وتصرخ...
واخواني رقيه ومصطفى هم يتصارخون ويعيطون... والباب كامت تندك حيل...
بس هي بقت تضرب بيه بقوتها ...
كل ضربه عبالك لسعة نار على جسمي .. توجعت منها هوايه كلش ..وهي تضرب بله رحمه وكانه الجوه ايدها عدوتها مو بنتها
وشويه شويه كمت اغيب عن الوعي ..اشعر بالوجع من الضرب بس جسمي خدر وتعب...
واغمى عليه...
فتحت عيني الجوارين ملتمين..نسوان يطشن على وجهي مي مااكدر اتحرك ..ولا حتى اون... جسمي يوجعني وجع مو طبيعي
اول مشافوني فتحت عيني كامن يلومن بيه..
ليش هيج اذيتي امج؟ ..وتخربطت او ودوهه للمستشفى ..ليش وليش؟؟ ....وكلهم يحجون عليه..
شكوللكم ليش...احجي بيني وبين نفسي..
اجا احمد ورجعت ورده من المدرسه شافوني نايمه مثل القتيله...
احمد اجا معصب وصاير نار راد يضربني بعد ويصيح عليه...يكولي شلون تسوين هيج بامج كلبه...
واني ماجاوب مااعرف شكالتلهم عليه...شسويتلهه..
بس عرفت هي مغمى عليها او واكعه وموديها للمستشفى... هي تعبت من الضرب الضربته الي.. والصدمه من عرفت اني سمعتها..
بداخلي تمنيتها تموت...ماكو طفل يتمنى امه تموت ..بس اني تمنيتها ..
رجعت نمت ...وحسيت ابويه يكعد بيه..بابا نورس كعدي اكلي..
فتحت عيني ومن شفته كلبي انمرد...
هو حضني وبوسني ... وظل يباوع على اثار الضرب بجسمي...او وجهي كله ازرك...
وعيونه مليانه دموع وقهر عليه ..كومني...كلي غسلي وجهج واني كوه امشي جسمي كله يوجعني...وصلت يم المغسله من شفت وجهي بالمرايه خفت...وظليت ابجي..شلون حداوم بالمدرسه..واليسألني شكوله...شنو الذنب السويته..
غسلت...ورجعت الغرفتي جابتلي ورده لفة بيض وكلاص لبن..
واني اكل وابجي...كالتلي ورده ليش هيج سويتي بامي ..لو ميته من القهر شنسوي ..منو النا...بس فهميني شسويتي وهيج سوت بيج وانقهرت هلكد..
واني ساكته ماجاوب..ماعندي جواب شكوللهه..وهي تكولي لو ميته امي شنسوي وكلساع تعيدهه..
تمنيت اكولها العار ميموت
كرهتها وكرهت اسم ام...شلون الرسول ص يكول الجنه تحت اقدام الامهات ... يعني امي هم تصير الجنه جوه رجلها ؟
مجاوبتها الورده كلشي...
هي ظلت تحجيلي شصار بالمدرسه ...واني مااسمع بس صوت ..بس الكلام ماسمعه..
طلبت من الله يساعدني ويهدي امي تعوف هذا الطريق الاعوج..
بقت امي وراهه اسبوع متحاجيني واني مكدرت اداوم بالمدرسه ... ابويه اخذلي اجازه..
جنت اكثر الوقت كاعده بالغرفه مااطلع اخاف منها ..بس اتصنط عليها واكول خاف هم تخابر عليه...بس شفتها تغيرت..
صح عصبيه وتتعارك ..وكسرت مواعين بالمطبخ ... بس مو مشكله المهم هي تمشي عدل ..خلي تكسرنه كلنه.. مو بس المواعين
ورجعت للدوام..بس طول مااني بالدرس افكر اكول هسه خاف طلعت...تمنيت عندي جهاز اراقبها..بس شنو الفائده اني لاحول ولاقوه...
ورجعت للبيت اركض بيومهه..لكيتها كاعده بالبيت..اريد احجي وياهه ومااكدر ...كمت مااتقبلها بعد
بالليل كاعدين نتعشى..ابويه كلي موعيب بابا متحجين ويه امج...
هي ساكته متحجي...
واني باوعت عليها بخوف توقعتهه تضربني بعد اذا احاجيهه..
ابويه كلي يله كومي بوسي ايدهه وراسهه وكوليلهه اسفه ماعيدهه بعد... عيب بابا...
كلبي مينطيني...اباوع عليها.. بس مضطره
كمت اعتذرت منها وبست راسها وايدها...هي باوعتني بطرف عينهه وكالتلي يله هاي هي بعد تصيرين عاقله ومشاكل ماريد...
شجاوبج يعني ...هي منو المفروض تصير عاقله
بس امي شسوي..
كتلها حاضر امي..اصير عاقله
هي تغيرت شويه ..من نرجع نلكيها موجوده وطابخه ومنظفه البيت..واني فرحانه كلت الله هداهه الحمد لله والشكر...
وبيوم اللي رحنا استلم النتيجه مال اخير السنه او ورده جتي ويايه ..
طلعنا قبل التسعه من البيت..صح جنت خايفه بس مطمنه انه اكون ناجحه..ظلينا ننتظر واخذت نتيجتي ناجحه او ورده هم..
مدرستنا ثانويه وجنا سوه بيها..
فرحنه كلش وبقينه شويه..بالمدرسه نسولف اني وصديقاتي..
بعدين رجعنا للبيت..
بالطريق لاحظت شغله وماعجبتني..طول الطريق واحد يمشي ورانه ولد شاب...او ورده كلساع تلتفت عليه وتضحك ..
اني عصبت..كتلها منو هذا ..
كالت ماعرفه...
كتلهه ليش تلتفتين كلساع وتضحكيله...
كالتلي هاي شبيج شوكت ضحكت ليش تتهميني
مااسمحلج افتهمتي..
احنا جنا بشارع واستحيت اظل اتجادل وياهه ..سكتت وهي كلبت وجها ..والولد ماعافنه الا وصلنا للبيت..
من دخلنا للبيت اني او ورده ..
لكينه هوسه بالبيت .. مفتهمت شديصير...بس خفت..
سمعت صوت بجي وفاطمه تبجي بصوت عالي...
الجيران بالبيت...شكو احجو..
انتبهت امي ومصطفى ماكو..
ظليت اسال ..فاطمه تبجي وتعيط وتكول مصطفى احترك .. ودو للمستشفى..
لالا..رجليه بعد متشيلني مصطفى عمره ثلاث سنين وهو الصغير وكلنا متعلقين بي...وابويه يحبه اكثر الكل..
افتهمت بعدين ..انه امي عايفتهم وطالعه ..
وفاطمه دتسويلهم ريوك وهي صغيره عمرهه تسع سنين وموكعه كتلي مي ديفور على مصطفى بالغلط وصاير على وجهه...
صايحه الجوارين ماخذي للمستشفى...
وهي وينها ؟؟... رجعت النفس الطريق ...
والله كلبي بعد ميتحمل ..
دخلت الغرفه... الدموع جمدت بعيني ... كعدت وصفنت والقهر ياكل بكلبي...اريد حل ..مااعرف اتصرف ..ومصطفى المسكين راح يدفع الثمن ...اووووووف
شلون ..شسوي اني صغيره مااعرف اتصرف ومنو يساعدني..
كلبي بي نار مشتعله ... وحقد على امي...
ساعه ورجعت متدري شكو بالدنيا ... واني اسمع جيرانا تكولها ولج وين انت واندك عليج تليفونج مغلق..
هي الظاهر من شافت الهوسه اخترعت وظلت تسال شكو شصاير
ومن عرفت الصاير..كامت تلطم وتعيط ...
اني كمت من مكاني فتحت باب الغرفه ردت اباوع عالام الحنينه اللي تخاف على بيتها واطفالها..
ردت اتفرج على مهزلة ام ناسيه نفسها ناسيه هي زوجه وام وعمرها راح يوصل اربعين سنه..
حتى احنا المراهقات منفكر مثلها.... بس هي حب الفلوس عماهه..
ظلت تعيط وتلطم وتبجي ..
وطلعت مره لخ ركضت دتروح للمستشفى..
رغم قهري على مصطفى بس ارتاحيت من شفت كلبها احترك...بلكي تحس على نفسها...
بقيت كاعده بغرفتي ... للمغرب واسمع ورده تعيط وتبجي...
وجتني تركض للغرفه وتصيح لج نورس ..مصطفى راحت عيونه بعد ميشوف...
شنو الخبر جان ضربة سيف على راسي وبكلبي ...
لج امي انت عميتي المصطفى ....كمت ادك والطم ..ياربي مصطفى ليش ..شمسوي يعمى وهو طفل...ليش مو هي التعمى...
اظلمت الدنيا بعيني...وكرهت اسم ام...كرهت امي..
****
المفروض الام مدرسه..... جنه....علم....
بس مرات نسمعها يكولون مو كل ام هي ام حقيقيه
انتظروني بالجزء القادم ..
احداث اكثر والدرس والعبره الكل ام طلعت عن الطريق..الكل ام نست نفسها وركضت وره الماده والشهوه والغريزه..
والف تحيه الكل ام صانت بيتها وشرفها وسمعتها رغم كل تعاسة ظروفها
#شيرين_الصفار
