قصة
#الوجه_الآخر_للحزن
ج 4
اول كارثه صارت بينا بسبب نزوات أمي وتهورها ..
المشي بالطريق الاعوج..الذنوب...غضب رب العالمين..ليش الانسان مرات يفكر بس بنفسه ؟
ليش يكون اناني الهاي الدرجه ؟
مصطفى تضررت عيونه بسبب الحرق...وراحت لان الماي الفاير واكع على وجهه مباشرة..
الصدمه كانت جبيره على الكل..
وبالخصوص ابويه...
بقو بي بالمستشفى فتره وعالجو حروق جسمه بس عينه راحت..
كانت مصيبه وكارثه جبيره... ابويه ادمر نفسيا وهي امي هم كاعده وتبجي ليل ونهار بس متهمني..
الشي اللي صار انه حسيت ابويه كام يكره امي بسبب هذي الحادثه وحملها مسؤولية اللي صار..
كمت اشوفه مايطيقها..
وكل متحجي يرزلها..يكولها شلون تعوفين اطفال وتطلعين.. غيري واحد يطلكج
وهي حجتها تكوله جنت بالسوك..
مرات من صفنات ابويه ونظراته الامي احسه بده يشك بيها ..ويجوز مجرد احساس..
ابويه حاول يعالج مصطفى وقرر يبيع الكاع ويسافر بي بلكي يصيرله جاره..
وفعلا باع الكاع وبسعر رخيص لان جان مستعجل .. واخذه وسافر الايران..
وعرف بالنهايه متصيرله جاره كالوله بس نكدر نسويله عمليات تجميل ..
بسبب شغلة مصطفى ابويه وكلنا ادمرنا ...
ومصطفى المسكين جان يبجي هوايه ويكول اريد اشوف كارتون...
ونظل نبجي عليه..
اما هي فشفتها هدأت شويه...كامت متطلع او من تطلع تاخذ وحده من خواتي الصغار..
بقى مبلغ من فلوس الكاع قرر ابويه يشتري سياره ويشتغل حتى لو قديمه لان وضعنا المادي انتهى...
واشترى سياره...ورجع يشتغل تكسي..
احنا رجعنا الدوام المدارس ...ورقيه صارت بالاول ابتدائي ..يعني محد كام يبقى بالبيت بس امي ومصطفى...
هاي الشغله ريحتني ..كلت تنجبر تبقى ومتطلع بعد لان ماكو احد..
كمنا من نرجع نشوفها موجوده...وممبين عليها طالعه..لان ابويه هم شد وياهه وعلاقته بيها تغيرت كلش فهي مبين عليها مكسوره شويه..
الشي الجديد اللي طلعلنا هي ورده..
الولد اللي رجع يلحكنا من باب المدرسه الباب البيت...
مره دنمشي واجا ورانه وظل يمشي بعدين تعدانه وذبلها ورقه الورده..وضحكلها وضحكتله..اني تخبلت كتلها شنو صارت علني..
كالتلي معليج انت ياعقد
كتلها ياعقد ليش اللي متصادق ولد يسموهه عقد؟
كالتلي مو صداقه هذا حب
كتلها ومنين عرفتي وحبيتي
كالت عرفته انت شعليج
كتلها ارجع واكول الابويه والاحمد عليج
كالت متكدرين...واذا سويتيها اطيح حظج
كتلها امشي عدل هذا طريق اعوج ديري بالج هاي سمعتنا وشرفنا
وظلينا نتعارك الطريق كله الى ان وصلنه للبيت...
هي دخلت للغرفه ركض ومبينه دتقره الرساله
دخلت وراهه كتلها شنو كاتب
هي تضحك وفرحانه تكول يحبني
كلتلها ورده هذا يقشمرج شوكت حبج ومنو هذا وشتعرفين عنه ؟
كالت هو مكمل سادس اعدادي وعدهم محل يبيعون كهربائياتوهو ويه ابو يشتغل ويريد يخطبني
كتلها خلي يجي على شنو الرسائل
كالت غير نتعرف على بعضنا
اكتشفت انه هي عدها علاقه بي ..والادهى والامر نطاهه موبايل حتى يتراسلون ويشتريلها رصيد ويدزلها وهذا عرفته وره فتره ...وعرفت هو من عائله متمكنه ماديا ... اني ماارتاحيتله وخفت من هذا الطريق الاسود اللي دتمشي بي ورده...
يعني شلون الام كارثه ومصيبه والاخت هم !!
وابويه واحمد يدكون من الصبح لليل حتى يجيبولنه ..وتالي
اني شكدر اسوي ..
هي متسمع الكلام ..واني مااكدر احجي لان ابويه مناقصه قهر..قهر العيشه وقهر مصطفى...
وامي هي ماشيه بطريق اعوج راح تصلح بنتها..؟
اووووف من الام العوجه الفاسده
علاقة ورده بهذا الولد مستمره وكمت اكتشف هي كامت تنهزم من المدرسه وتطلع ويا..
نوصل سوه ومن ندخل للمدرسه هي تطلع وترجع بنهاية الدوام ويه الطلعه..
بالبدايه محسيت بيها..
كم مره صديقاتها سالوني اشو ورده ممداومه...
اني انصدمت شنو ممداومه...كتلهم جتي ويايه الصبح..رحت الصفها دورتها مموجوده..
عرفت كامت تطلع من الدوام..
وبيومها طلعت لكيتها تنتظرني بالباب..جنت احترك بداخلي
كمت اشوف امي كبالي ...واكول ويه نفسي ..لج انت هم مثلها..،عليمن اطلعين ؟
هي حجت ويايه مجاوبتهه.
كالتلي شكو شصاير متجاوبين ؟
بقيت ساكته لان جنت اغلي شحجي وياهه هاي
كالتلي شبيج نورس اكو شي
كتلها وين جنتي اليوم؟
هي صفنت مجاوبت بالبدايه بعدين كالت طلعت
كتلها وين؟
كالت ممحضره دروسي وكلت خاف اترزل وطلعت
كتلها ويا مو ؟
سكتت ....كتلها احجي
كالت اتفقنا نتعرف على بعضنا كلنا نسوي كم طلعه نسولف ونتفاهم حتى يجي يخطبني
كتلها وتفاهمتو !
كالت اي تقريبا وهو طلع كلش يحبني
كتلها شلون عرفتي كلش يحبج
كالت طول الوقت يحجيلي حجي يخبل
كتلها وبعد
كامت تضحك ...
كتلها وين رحتو ؟
كالت للزوراء افترينا ومكان حلو
كتلها لج انت مخبله لو عميا لو حيوانه ..،
هذا ديلعب عليج ويضحك عليج لو يحبج يجي يخطبج..شنو يتعرف عليج
كالتلي انت طلعي من الموضوع هو يحبني وراح يجي يخطبني واني اسوي اليعجبني ..
كتلها هاي مو تصرفات بنيه ماشيه عدل راح تجيبيلنا العار وتخزينا
كالتلي راح اعوف الشرف الج بس سدي حلكج
كتلها اذا الامور بقت هيج اضطر ابلغ احمد وانت تعرفين بعد..
كامت تغلط وتتجسر عليه وكالتلي مخايفه منكم
عرفت هي بعد طلعت من الطريق..مثل امها
واني اتفرج وماعندي لاحول ولاقوه
لاابويه ناقص ولااحمد
واذا حجيت ينهجم البيت علينا ...
البيت كام يضيع...
بالبدايه وضعنا المادي اللي ادهور...وامي المشت بطريق اعوج..ومصطفى العمى...او ورده اللي مشت بطريق امها..
وكله بسبب امي
وين الامومه بالموضوع...كلشي كمت اشوفه بالمكلوب
الام مدرسه شعلمتنا ؟
زوجه خاينه وام متعرف تربي وهجمت بيتنا
الله يستر من الجاي ..،وكل اللي حيصير بسببج يامن اسمج امي
المشاكل اللي دتصير اكبر مني ومن عمري..،مرات اكول ياريت لو الله ماناطيني هذا العقل ..ياريت لو غبيه ..لو باقيه طفله ..لان اللي ديصير بيه هوايه عليه
ورده كامت تغيب هوايه من المدرسه...
دزت المعاونه عليه سالتني عن سبب غياباتها وانطتني ورقة انذار اسلمها الابويه..
ظليت ابررلها واكولها هي دائما مريضه وبلاعيمها
كالتلي يجي ابوج نتفاهم ويا..
ظل جسمي كله يرجف ... وهسه شنو الحل ؟؟ شسوي ؟ هاي الحقيره راح تسويلنا مشكله واني بعد مااتحمل مشاكل ..
والله ابويه يموت اذا عرف..
من طلعنا بيومها من الدوام ..هي تنتظرني بره
كتلها تدرين راح تنفضحين
كالت ليش شصاير شكو ؟
كتلها عن الانذار ولازم يجي ابويه
كالت وشنو يعني لاتكوليله ..قابل شيسوولي
كتلها اشو انت مسيطره ..صار اشهر انت ويا اشو مخطبج وينه ؟
كالت اي دنتفاهم..
كتلها لو يخطبج لو اسلم الانذار الابويه وانت ويا تتفاهمون
هي شافتني عصبيه كالت هسه اكوله يجيب اهله هالاسبوع
من وصلنه للبيت شفت البيت فارغ ..عدنا مفتاح احنا
لاامي ولا مصطفى وين راحت ؟
وظل كلبي يلعب ...شنو هم رجعت للطريق الاعوج ؟
فتت للمطبخ مامسويه اكل..يعني طالعه من الصبح
وهسه شلون..الام لو الاخت..لو الاب المشلوع كلبه على منو اندار
ساعه ورجعت هي ومصطفى ...
وجايبه وياها دجاج شوي ...
كتلها وين جنتي يمه...
هي خزرتني ..كالتلي وانتي شعليج تساليني
كلتلها يعني بالسوك عند الجيران...كالت ماالج شغل سكتي لاتحققين ويايه افتهمتي حلكج اشكه
اني هم سكتت واتذكرت الصونده اللي رادت تموتني بيها بيومها
هسه وين انطي وجهي والمن اشكي ...والله تعبت..
بس مبينه نهاية هذا البيت خراب
الله يستر
#شيرين_الصفار
