قصة
#الوجه_الآخر_للحزن
ج 8
ابويه صار همه الجبير يتابع اخبار احمد ساعه بساعه ويخاف عليه..
اني او ورده مسؤوليتنا كبرت ..خواتي الصغار ومصطفى كام يكبر ويسمع الاطفال تلعب وهو ميكدر ..كلش اثر على نفسيته..
فد يوم اني دااشتغل بالمطبخ وكاعدات اثنين من نسوان عمومتي ديسولفن ... وحده كالت للثانيه اريد اخطب الاخويه...
كلتلها الثانيه المن تخطبوله كرايب لو غريبه ؟
كلتلها ميهم ..اهم شي بنيه زينه
كلتلها ورده حبابه وحلوه وام بيت ليش متخطبوهه ؟
هي رأسا صاحت شتحجين انت ورده شنو وهاي امها العار اكو واحد يدخل عار البيته.. هي البنيه عليمن تطلع ...غير على امها
اني حسيت دمي كام يفور باوعت عليها كلتلها عالاقل كولي اختها واكفه لو ماكو مستحه فد مره احترموني
هي راسا علت صوتها وتكولي اشو امكم مااحترمتكم من سوت هالدكه اني اللي احترمكم..
اني راسا كمت ابجي وعفت المطبخ وطبيت للغرفه..
جان يوم جمعه او ورده غاسله هدوم ودتشرها بالسطح ومن نزلت شافتني ابجي ظلت تلح عليه شبيج ...
حجيتلها ... هي عصبيه او متسكت مو مثلي
رأسا طلعت تصرخ وتعيط عليها ... كلتلها خاف عبالج تردين تعيرينا بامي ...امي ماتت بس اللي يعير بذنب غيره ان شاء الله يصير بي الانكس منه
وذيج جاوبتهه وصارت مشكله جبيره ابويه جان طالع ..
وبيبي وجدي صارو ويانه
وعمي زوجها لزمها تعارك وياهه وضربها وطردها من البيت ..
وهي مابطلت معيار وغلط علينه..
من رجع ابويه وشاف الهوسه والمشكله..
رزلها ال ورده كلها انت ليش جاوبتيهه خلي تولي
كلتله ليش تحجي وتعير وهي شنو من البين ..
كاللها هو هذا الرادته امكم ...هو هذا العار
ظلت ورده تبجي ... كالتله وبعدين بابا احنا هسه شنسوي وشنو ذنبنا..
كاللها نتحمل جور الدنيا علينا ... الله نطانه قوانين نمشي عليهه وكاللنا هذا صح وهذا غلط ... هو وجهنا لان الله الحكيم يعرف احنا عايشين بوسط مجتمع بي اشكال بشر...واللي يبتعد عن قانون رب العالمين يوكع بحلك الناس وضيم ...الله يرحم ويغفر ويمحو الذنب ...لكن الناس لاترحم ولا تغفر ولاتنسى... وكل واحد يلزم ذنب على واحد يبقى يعيره العمر كله بي ...وهاي احنا وكعنا بحلكهم ..لازم تتحملون بنتي ...ولازم تتأكدون انه محد راح يجي يخطبكم يعني تعتمدن على نفسجن وتصونن كرامتجن وتكعدن..
ابويه كلامه كله صح ... بعد محد يوصل يمنا ويتقرب علينا..يعني احنا انتهت حياتنا.. مو علمود الزواج لا..بس احنا بنظر المجتمع منسوه كلشي ..
هذا الواقع اللي عشناه كان صعب ومر ..
واحنا نتجرع المراره كل يوم ومنعرف شنسوي ..
وبيوم رجع ابويه من شغله مهموم وضايج..كال احمد اليوم موبايله مغلق ...وكلبي نار عليه
ماقبل يتغده ...اتصل بواحد من جماعته ماحصله
اتصل بالثاني يدك وميجاوبه..
الثالث مجاز وهم كله اتصل بجماعتي واطمنك ومااتصل علينه...
البيت كله انخبص ومنعرف شنسوي ...
كلنا صرنا نار ... حسينا احمد بي شي ..
ابويه ظل كاعد يبجي ...ويكول شلون اذا راح احمد وين انطي وجهي اني هو سندي بهالدنيا ...
ظلينا كلنا نلوب ...رادو يروحون عليه ..بس كالولهم متكدرون توصلون لهناك منطقه بيها معارك ..
وظلينا ننتظر ...
والليل كله كاعدين ندعي الله يفرجها ..وابويه وجدي وعمامي يلوبون بالبيت وميعرفون شيسوون ..
وياهو اللي يتصل عليه ميعرف اخباره..
والصبح ساعه تسعه...وصل احمد
اي وصل
وصلت جنازته
واستشهد اخويه وحزام ظهري ....
استشهد احمد وتلوكله الشهاده..وتلوكله الجنه..وتلوكله رفعة الراس ...
بس حركة كلوبنه شلون .حركة كلب ابويه شلون..
ااااااه من الناررررر
ذاك اليوم معرفنا ليلنا من النهار... ومن دخلو التابوت مال احمد ..وفتحنا وشفنا عبالك نايم والوجه الحلو رغم مليان دم وتراب ...بس ريحة مسك او وجه كله نور ..،
دكينا ولطمنا وملخنا نفسنا...
ماحسيت بشي بذيج الساعه الا بوجع وجع ثكيل وهم مينوصف ..وقهر يتعدى حدود الدنيا ويوصل ابعد منها...
الاخ ..سند وحمايه ومحبه ..السند ظهر وعونه ونضيع من يضيع من عدنا
وكلها بجفه والم ابويه بجفه ...
شنو يصير هذا الانسان من ضربه الضربه
شلون يكد يتنفس الهوى ويوكف على رجله والدنيا راوته امتحانات وابتلاءات ميتحملها انسان
ياربي صبرنا وبرد نار كلبه هذا المسكين ..
أيام مرت علينا منعرف الليل من النهار ..
اصدقاء أحمد اللي كانو ويا بالمعركه ...يكولون ماشفنا شجاعه مثل شجاعته... يذب نفسه بنص النار ويشتري الموت مشترى ...
كلنا متوقعين يستشهد بأي لحظه ...
الشي اللي كان يتمناه تحقق ..
الشهاده ..والشفاعه الامي
مكدر ينقذ امي بالدنيا ويريد ينقذها بالاخر
منتهى البر ...
رغم ماكانت علاقتها بينا زينه بس ويه احمد تختلف..
يطب ويطلع تحضنه وتبوسه ...وتخاف عليه اكثر الكل..
احنا جنا نتوقع لان ينطيها فلوس..
بس الظاهر العلاقه بينهم كانت عشق الام الابنها والابن الامه..
لان احمد تغير وراهه كلش
وضاع احمد من عدنا هسه
وفرغ مكانه..ورجع ابويه الكسرته
النهار كله مخلي ملابس احمد وساعته واحذيته وعطره كباله ويشم بيهن ويبجي ...
وتمر ايام واسابيع وابويه وضعه يسوء اكثر.،
لاينام ولايشتغل ولاياكل ..
الكل يحجون ويا واحنا نتوسل بي ..وكانه عايش بغير عالم ...
ميسمعنا ...الحزن اكله ..وكام يضعف
جبناله طبيب للبيت وماقبل يتفاهم ويا ولاقبل يفحصه..
الصدمات تقتل الانسان من الداخل ...
وابويه من صدمة امي انقتل..وصدمت احمد قضت عالباقي
احنا ظلينا نعاني ...اذا ابويه صار بي شي منو النا ؟؟
ومره كعدنا من الصبح دانروح للدوام واني تو ورده حضرنا الريوك البيبي وجدي واخواني ..وبدلنا ملابسنه..
واخذت كلاص حليب وديت الابويه حتى يشرب لان هو بس الحليب كوه يشربه
دخلت لكيته بعده نايم بس ممتغطي ...
جيت جريت الغطا عليه ..طخت ايدي بايده شفته مثلج..
باوعت على وجهه زينه شاحب على بياض..
كمت ارجف ... شنو ليش هيج لونه ابويه..كلت خلي اكعده اشوف شبي..
صحته بصوت ناصي بابا ..بابا..بابا
ماكو ....ميجاوب ...خليت ايدي على جتفه وعلى كيف ضربته واصيحله ميجاوبني..
احس نفسي جسمي مات....انتبهت على نفسه ..ماكو نفس
كمزت من مكاني وارجف واصرخ وطلعت اركض...
لحكولي...لحكولي ...ابويه مدري شبي
كلهم جوي يركضون جدي وعمامي ...صاحو عليه ..رادو...
بس ....
راح ابويه ....
رجاء رجاء ماريد تم و م ومتابعه ...انطوني رأيكم بالقصه
#شيرين_الصفار
