قصة
#الوجه_الآخر_للحزن
ج 6
الوضع اللي وصلناله يخوف .. شي اكثر من طاقتنا ..
هي ظلت امدده بفراشها ..
احنا عفناهه وطلعنه بس حايرين شنسوي ...حالنا يصعب عالكافر..يعني لو الانسان يصير عنده عقل شويه ويفكر بعواقب الامور مايوصل الهاي النتيجه..
بس هو وينه العقل؟
ورده فكرت تخابر هذا اللي هدد امي بلكي الله يهدي تتوسل بي...
كلتلها كلشي ميفيد هذا واحد سافل وشغلته هاي ..
كالت لازم نكول الاحد يساعدنا
كلتلها نكول الاحد حتى ننفضح ؟ستري علينا الله يخليج
ياربي شنو هالبلاء .. احنا نسمع البنات يغلطن والامهات يحيرن بيهن ..واحنا عكس البشر ..
شويه واجه ابويه...استغرب من شاف الوضع
سألنا خير بابا شبيكم ؟
كلناله امي تخربطت وداها ابو سعد جيرانا للمستشفى وقبل شويه رجعوها ضغطها صاعد..
هو ركض على غرفتها ويمشي ويكول سلامتها سحوره الف سلامه على الغزاله مالتي
اوووووف ...من اشوف ابويه اجر حسره وتنهيده بكد حزن الدنيا ..بس هذا نصيبنا
كمنا اني او ورده سوينه غده الابويه واحمد هم اجا لان يتغدون ويرتاحون ويطلعون...
راحت ورده ودت الامي اكل مارضت تاكل ..
ابويه كعد يمها توسل بيها تاكل ماقبلت
كالت تعبانه اريد ارتاح
ابويه ارتاح شويه وطلع من البيت لان يطلع العص ر هم يشتغل واحمد هم يروح المدرسته مسائي
احنا ظلينا نلوب ...يارب استرنا وفوت هاي الازمه على خير
وصار الليل وعيوني ماغمضن ...
مااعرف باجر شنو حيصير ..اتكلب واكعد وارجع اتمدد واكوله يارب استرنا ...امي غلطت لاتاخذنا بذنبها ..احنا شنو ذنبنا..
صار اذان الفجر ... اذن وكمت توضيت وصليت ودعيت بالفرج علينا...
ورجعت نمت غفيت شويه وشفت نار ابيتنا ...
فزيت ارجف
ياساتر يارب عبالي حقيقه موحلم
باوعت كاعدين اخواني ديروحون للمدرسه واني او ورده اتفقنا منروح..
لان منعرف شنو حيصير...
سوينه ريوك عالسريع الابويه واخوتي..
ورده ودت الامي اكل ..وابويه توسل بيها تاكل مقبلت
قبل ميطلع ابويه الشغله سالنا
كولولي بابا اكو شي..وضع امكم مو طبيعي ...ضامين عليه شي..
كلناله لا بابا والله ماكو شي هي راحت للسوك وتعبت وتخربطت
كال اليوم العصر اوديهه للطبيب..
بكلبي اكوله الله يساعدك ياابويه..
سوينه غده ونظفنا وامي ماكامت من مكانها..
افوت للغرفه اباوعها احسها بغير عالم ..حتى متسمع الباب من تنفتح ..صحت عليها بس تكول عوفوني..
حسيتها دتعاقب نفسها...
رجعو اخواني الظهر ...
وتغدو وابويه واحمد هم تغدو وارتاحو
ابويه جلب بامي يريد يوديها للطبيب ماقبلت..
ابويه ظل متعجب ..شبيها هاي
رجع سالنا ...كلناله ماكو شي
كال حطلع على باب الله واذا صار شي اتصلو عليه
راحت ورده على امي توسلت بيها تاكل او تشرب ...ماقبلت
وكاعدين ندعي الله يفرجها علينا
ساعه خمسه العصر اندكت الباب بقوه...كلبي انخطف
ركضت فتحت الباب لكيت ابويه واحمد راجعين عيونهم اطلع شرار...شكو ؟؟؟شصاير ؟؟
ابويه مو هو جان غير شكل ...غير واحد
كتله شكو ..دفعني ردت اوكع...
ودخل على امي للغرفه وهو ديغلي
اول مره اشوف ابويه هيج..
جرها الامي من عالجربايه ويصيح بعلو صوته ...لج حقيره ..نكسه انت جبتيلنا العار ياقذره... وبده يضرب بيها وهي متتحرك مستسلمه ولا شالت ايدها ولا دافعت ولا حجت ولاصرخت..كانه جثه...
وهو يضرب بكل قوته ...واحنا نصرخ كلنا عوفها حتموت والكل يبجون...ونجر بي نريده يعوفها.. بس احمد واكف يتفرج وكانه يتمنى ابويه اكثر يضرب بيها..
من تعب ابويه ...صاح احمد كله هاي مفاتيح السياره اخذ الصغار وديهم بيت جدك ومن اخابرك تعال...
احنا كمنا نرجف...
احمد اخذ خواتي ومصطفى وراح البيت جدي
ردت اروح ويا ماخلاني ...كتله خليني اروح ...كال تبقون انت واختج شوفو الدرس كدام عيونكم
طلع من الغرفه كعد عالكرويته...وجهه دم وعيونه شرار واحسه صاير بركان...
اويلي عليك ...بس شلون عرف..اكيد المقطع انشر..
شلون تخزينا ليش هيج يارب..
بس ماجنا نعرف ابويه كاعد شينتظر ؟...
وامي بقت امدده بالكاع ميقبل احد يوصل يمها
واحنا كاعدات بالحوش نرجف ونبجي منعرف شنو حيصير..
اقل من نص ساعه واسمع صوت عياط وهوسه..
هاي شكو... شنو ديصير ؟؟
اسمع صوت بيبيتي ام امي طبت تصيح يبووووووو
لج سحححححححر ....طمستي راسنا بالوحل سححححر
وطب ودخلو خوالي 3 يصيحون ..لج عاااااااااهره ...اليوم نغسل العار ونطمه بيدنا ...وينج يا.....
وظلو يغلطون ويصيحون...
دخلو عليها للغرفه...سحلوها من شعرها وايدها...
اني او ورده من شفناها هيج كمنا نلطم ونبجي ونتوسل بيهم عوفوهه ...دنكت على رجل خالي ابوسها...بس يعوفههه
جانو نار ومشتعله...بس شراح يسوون..
يحاجوهه ليش هيج سويتي ؟؟ لج ليش وبيبيتي تلطم....والجوارين يدكون بالباب يردون يعرفون شكو ...
واحنا واكفين نرجف شنو شراح يسوون..
وابويه كاعد بمكانه بس عيونه تصب دموع...
على شنو يبجي ابويه ؟؟ على كم قهر ؟؟ وكم ضيم ؟؟
الله يعين كلوبنه...
وخوالي واكفين على راسها يدفروها برجلهم ويتفلون عليها..
بعدين باوعو علينا ..كالو فوتو الغرفتكم انتو...
عرفنا راح يصير شي...كمنا نبجي ..ونتوسل
صرخ بينه خالي ولجن فووووتن جوه هسه اقتلكم...
اللي قهرني اباوع على امي جثه ...ومتحضره للموت...
ومتحركت ولا حجت.... اسمع خالي يكولها تشاهدي يازانيه...
وصاح على بيبيتي جيبيلها مي خلي تشرب...
ودقيقتين وكامت تعيط بيبيتي يبووووووو
اني وكعت ماادري شكو بالدنيا ..،او اسمع ورده تصيح ولج يممممممه ليش هيج وتبجي...
ذبحوها... ودججو جسمها بالسجاجين ...
والعالم التمت علينا ...
واحس نفسي صرت بغير دنيا...اسود كلشي بعين
بيوم واحد يخرب البيت ويلحكنا العار وتموت امي
جتي الشرطه ،، اخذت خوالي...
والجثه مال امي
احنا كاعدات بالغرفه نعيط ونبجي
وابويه منع اي عزه او فاتحه وكللنا تسدون الباب وتكعدون ...
طلعو كلهم وابويه كلهم للناس جوارينا طلعو ماعدنا عزه
وبقينا اني او ورده..
طبيت شفت الحوش غركان بدم امي ...
يممممممه....نمت بنص الدم اني او ورده واصرخ ...ليش ياامي ..،ليش ياامي
#شيرين_الصفار
