قصة
#الوجه_الآخر_للحزن
الجزء الاول
إذا ندخل ببيوت العراقيين راح نشوف بكل بيت قصة حزن...
ومن نخلي عيونا بعيونهم نشوف نظرة الحزن نفسها...
واذا دخلنا كلوبهم يمكن منلكي ذرة فرح..
وكل هذا بسبب الظروف الصعبه واللي اثرت بشكل او بآخر على الناس... بالدرجه الاولى..ومرات يكون سوء التصرف وحساب عواقب الامور هو السبب ايضا..
راح آخذكم اليوم البيت عراقي قصه طويله..
بيها ألم وبيها عبره ودرس ...والحديث يكون على لسان وحده من العائله وهي بنتهم الوسطانيه نورس
تكول نورس
الدنيا مثل الدولاب من تصعد بينا نحس نفسنا لزمنا كلشي بيدنا ..السعاده والفلوس والجاه..
لكن برمشة عين كلشي يتغير والشي اللي محسبناله حساب يصير بينا..
احنا عائله عشنا براحه... والدي كان عنده محل اقمشه وخير من الله... المحل ماكان وحده ويه اثنين من عمامي .. اخوانه ...بس كان بي ربح زين ...
بداية زواج امي وابويه كانو كاعدين ابيت جدي..بس البيت كبير وبي عدد كبير لان كل عمامي المتزوجين وهمه 3 كاعدين بي ..وقسم من عماتي ممتزوجات وهنه اثنين ماعدا بيبي وجدي واطفال وخطار ماينطع عن البيت ...
ابويه كان يحب امي كلش هوايه ....وقرر يأجر ويطلعها من البيت ... لان كانت تشكي دائما من الشغل والتعب والهوسه والمشاكل بينها وبين نسوان عمومتي..
كنت اسمع من أمي تكول اجرنا بيت حلو لان امي كان عدها بس احمد اخويه الكبير او ورده اختي الاكبر مني...تكول كان خير من الله..
وكل شهر ابوكم يجيبلي قطعه ذهب يكولي زينه وخزينه..
وبمرور الوقت اشترو قطعة ارض حتى يبنوهه بيت ..وكالو عالتساهيل الى ان الله يرزقنا..
أمي كانت تعترف انه هي مو مدبره ..
تكول كل فلس ودينار يجينا نصرفه..اكل وطلعات ولبس واثاث جديده ...
تكول مرات اجمعلي كم فلس واكول هسه الله مفضل علينا خلي اغير البردات..
واذب البردات الجديده واشتري غيرها..
لو ابدل تخم القنفات ...
لو نصبغ البيت..ونبدل الكاونترات لان مودتها راحت ..
وابويه كان يتمنى رضاهه وميحاسبهه ابد..
وبقو على هاي الحال ...
وره خمس سنوات جيت اني للدنيا..والوضع مثل ماهو ...لازادنه شي ولاتغير شي..
ورايه بثلاث سنين امي جابت فاطمه وراهه رقيه...ومرت عشر سنوات على زواجهم واكثر ..والحال مثل ماهو..
لا بالعكس المصاريف تزيد وابويه بعد ميلحك ... ومرات السوك يوكف الشغل بي ويبقون اسابيع يادوب يطلعون ايجار المحل..
اني كنت صغيره بوقتهه ماافهم كل الكلام ..بس اتذكر كان ابويه دائما يطلب من امي تلم كم فلس للزمن لان هو بعد ميلحك والدنيا صارت اصعب..
وهي تكوله اي...
والظاهر بس حجي..
مرت اشهر ..كمت اشوف ابويه يرجع مهموم وحزين بس مااعرف شنو اللي ديصير ...
وبدت امي تلح عليه عالمصرف وهو يكولهه ماعندي مو كتلج لمي كم فلس للزمن.. السوك واكف
وضع البيت كله تغير وبدت معاناتنه تزيد
مصرفنا ..لبسنا..اكلنا ..بين علينا سوء الحال والوضع تعب اكثر ....
الى ان اضطرو ابويه وعمامي يسدون المحل ويطلعون خسرانين وكل واحد اخذ حصته من المحل تفاليس وكلشي انتهى بيوم وليله..
ايجار البيت صار صعب علينا ندفعه ..وابويه فكر يرجع البيت اهله ...
بس صعب العيشه بي لان العدد زاد وجدي كان مريض وحالته تعبانه ..وامي ماقبلت وهاي اهم نقطه
وظل ابويه يدور الى ان لكه بيت قديم بمنطقه قديمه ..شوارع ضيقه..امي رفضت تكعد بي ..
ابويه كاللها فتره يتحسن الحال واكعدج باحسن منه... والله يرزقنا نبني الكاع مالتنه ...
بس هي ظلت تلح عليه ..بيع الكاع ..
كاللها نستقر والتردي يصير..
وكعدنه بهذا البيت القديم...والفلوس اللي ابويه طلع بيها من المحل اشترى بيها سياره حتى يشتغل بيها ..
كل هذا والمشاكل مستمره
امي متقبل يشتغل بسياره وتكوله بيع الكاع وافتح محل..شغلة السياره متفيدنه...
امي كان همها انه تكون فلوس هوايه جوه ايدها وتصرف بله وجع كلب...
بس كدر ابويه يقنعها انه يشتغل بالسياره الى ان الله يفرجها...
بهاي الفتره امي جابت اخويه الصغير مصطفى..
صرنا سته...وابويه بعد ميلحك...
ويشكي اللي يطلعه من التكسي مايسد حاجة البيت...المصرف كام يقل...حتى ملابس كوه نشتري الا بالعيد...
المشاكل بين امي وابويه زادت..
امي كامت تبيع بذهبها وتصرف..،لان متكدر بدون مصرف...
وابويه ميقبل يكولها نبيع الذهب ونبني الكاع ...
وهي متسمع منه.. تريده يبيع الكاع وتظل تصرف بالفلوس...
اتذكر مره رحنا البيت جدي بالعيد والكل ملتمين هناك..
شفت جهال عمامي كلهم مرتبين وشايلين كومة فلوس واحنا صرنه نختلف عنهم كلها بسبب تصرفات أمي
بوقتها انفتح حديث عن الشغل والعيشه...وعمامي اللي خسرو ويه ابويه بالمحل كدرو يوكفون على حيلهم وفتحو غير مشاريع لان نسوانهم يعرفن يلزمن فلوس ويجمعن..،
اتذكر بيومها بيبيتي كانت مقهوره على حال ابويه واتجادلت ويه امي وحجت عليها كلتلها كل اللي وصله( سلطان ) وهو ابويه..بسبب تبذيرج ..لالزمتي فلس..ولاسويتي بيت...العندج كله ذبيتي عالاكل واللبس ..وهسه شفادج من وصلتو الهالحال..انت مو مره...انت مرمره او وكعت على كلب ابني وخنكته وكسرته..
اتذكر بوقتها امي جاوبتهه وعلكت بينهم عركه جبيره..
ابويه اخذنا وطلع والطريق كله امي تبجي وتتعارك وياه ..
وكلتله هذا يوم اخر يوم الي فوته يم اهلك..فوك مامتحمله فكرك وعيشتك التعبانه.. نص مصرفي من اهلي وانتو المعاجبكم..
وابويه يسكت بيها ويتوسل بيها حتى متزعل
من يومهه كمنا من نروح البيت جدي بعد امي متقبل تجي ويانه
وكل منروح يكعدون يحجون على امي ...
الكلام بده يأثر على ابويه..وكام يحس بالفرق بين حياته وحياتهم وشلون أمي ماساندته ولمت فلوس وبذرت وبعثرت الى ان وصل هذا حاله وحالنه
كل الناس نصحوهه تبتعد عن الصرف الزايد بس مافاد ..وبالنهايه ابويه هو التعب ... وحتى هي تغيرت ..
صارت عصبيه ومتتحمل احد لان هي متعلمه على صرف والشي اللي وصلناله خلاهه تعاني ..
ابويه تغير عليها ... وكل متحجي على حالتنه لو تطلب منه شي يرزلهه ويذكرهه بأنه هذا الحال وصلناله بسبب سوء تصرفهه...
فد يوم بالليل وره اذان العشا اندكت الباب بقوه..
طلع احمد ركض فتح الباب...ورجع يصرخ ..يمه يمه الحكي
امي تصيح احجي شكو..شبيك
واحنا جمدنه ...الخوف خلانه منفتهم شي
وهو يصرخ ويبجي ابويه مسوي حادثه بالسياره يمه
امي رأسا كامت تعيط ..واحنا كلنا نتباجه
بوقتها اني بس ابجي وارجف ومااعرف شنو اللي ديصير
الجيران فاتو للبيت واني وفاطمه ورقيه كاعدين على جهه ونبجي
او ورده شايله مصطفى وتصرخ وتعيط ابويه راح
واني اسال نفسي شنو يعني ابويه راح
شنو يعني بعد ميرجع
لا لحد يكول راح ابويه هسه يرجع ...
تذكرت من طلع العصر للشغل تعاركت ويا امي ..حتى غده مكدر يتغده اكل لكمتين وعاف البيت وطلع..
ليش ياامي هيج سويتي بأبويه... ابويه الطيب الحنين الفقير ميستاهل هذا كله
خيمه على راسنه ...واذا وكعت الخيمه كلنا نتبهذل
البيت بقت ناس تدخل وناس تطلع
واني وخواتي ظلينا نبجي الى ان تعبنا ونمنا بمكانه بالهول عالقنفه ....
كعدت الفجر صوت هوسه وركضه بالبيت...
فتحت عيني لكيت امي وبيت جدي جايين والكل يبجون..
ابويه بالمستشفى وفاقد الوعي ... وميعرفون يصحى لولا..
وتمر الساعات صعبه..
اتذكر بيومها الجيران جابولنه ريوك وغده..
واهل امي بيبيتي وخالتي وخالي ظلو يمنا ..لان امي بقت يم ابويه تروح وتجي
وافتهمت بعدين ..انه ابويه من ديمشي بشارع وركض ولد صغير كدام السياره عبر وابويه كسر بسرعته ودعم عمود كهرباء والضربه صارت براسه اكثر شي ...والسياره تكسرت..
وهذا ابويه بقه بين الحياة والموت
واحنا ننتظر رحمة الله وبس
انتظروني بالجزء الثاني
#شيرين_الصفار
