#بَصْمَة_ُ العِشْقِ
الجزء9الكاتبة chra kirkuki
أسابيع قضيتها بين ترضية الوالد والتصوير قررت أمشي عدل هالفترة لحد مايرجع ثقته بيا عدلت الديكور والغراض بالمحل جبنا مهندس غيرنا الواجهة فتحنا محلات جديدة صارت كروب المحل الرئيسي اني وأبوية نكعد بي والفرعي رائد أخوية يوميا افتح لايف واي شي اشربه لو اكله انزله بالحسابات مالتي حتى والدي ميخلص مني اصوره يترجاني كل يوم اظل هيجي عاقل ومارجع لخبالاتي بابا شوف متابعيني يكولون تشبه ابوك
هههه الله يحفظك ابني وين اني كبرت بعدك بعز شبابك بس لو تسمع كلامي وتتزوج جان ارتاحيت وريحت أمك همينة
نزلت يمه على ركبتي هو كاعد على الكرسي بابا اني توني احسن بطعم نجاحي يازواج يامرة ليش تريد تورطني
غير خايف عليك من اولاد الحرام لاتتورط بسالفة مو زينة الناس متخاف ربها روح شوف الزباين الله يفتحها بوجهك دايما
اللي يجي يشتري قبلها يستجوبني شعري شستخدمله من شامبو وكريمات وبشرتي وجسمي شلون اعتني بي وبيا نادي رياضي مشترك أضحك واجامل غير التصوير علاقتي بنونة بس مخابرات ليلية وكلش حذر وياها لاتسجل صوتي كل هالشي حتى اوصل للفيديوهات اللي يمها .
شمس : الصبح من كمت جنت نايمة ببيت عزة تذكرت مقابلة رشدي زمن حضنتني وهي تبجي ويايه وعزة تحجي علينا اثنيناتنا
عزة : والله اذا سويتي لايف واعتذرتي من رشدي لاأكون ذابحج بيدي منو هذا تنزلين روحج لمستوى ترى مو شي انسان فاشل وميستحي
زمن : لكيتلج حل لاتخافين حبيبتي راح نسوي لايف وانتي تبينين الخبر مو صحيح ورشدي متعرفينه اصلا وحسابج تهكر يعني حالج حال المتابعات راح نضرب عصفورين بحجر مراح تضطرين تعتذرين من رشدي ولا تنفضحين يم المتابعات بالعكس راح يزيد عددهم صدكيني بس قبلها احجيلي هو حلو مثل الصور لو لا فوتوشوب
يجنن بشرته شعره تقاسيم وجهه جسمه أصلا الصورة ظالمته احلى بالحقيقة وصوته كلش حلو مادري
زمن : الله ياريتني شايفته وياج كله من عزة مخلتني اجي واشوف الجمال
عزة : عابت اي والله ياجمال ترى كله مكياج حاله حالج ياشمس شلون بالتجميل صرتي حلوة هسة مسوي كومة عمليات تجميل مبين من وجه مو طبيعي
زمن ماعليج منها متخلفة والله ياريتج شايفته هاي متفهم غير عبود مادري شنو حمود ابو الستلايت جبار ابو المولدة وابو الفلافل وابو النركيلة الخايسة تذكرت من كالي لو ابوسج اشكد حسيت بحرج عمري ممتخيلة نفسي بهالموقف للظهر حضرت نفسي بكامل اناقتي ومكياج حتى شعري كلش حلو سويته ظفيرة فتحت لايف وبديت احجي طبعا كل اللي جنت اكوله كتبته قبلها بورقة واي تعليق سلبي مارد على صاحبته بعد ماخلصت كسرت السيم كارت حتى لايخابرني رشدي ويهدد ليش ماعتذرت حسيت بأنتصار واكثر المتابعات وكفو بصفي حبيت هاللعبة اسوي أي شي يعجبني وبعدين أنكره اذا شفت المتابعين معجبتهم رحت ثاني يوم يم صباح طبعا عاتبني هو خبير بهالسوالف ميمشي عليه سالفة حسابي تهكر فاتحني بموضوع مشروع جديد اطلق ماركة بأسمي بس لازم اسافر وياه مرديت عليه بنفس اليوم خابرت أمي وحجيتلها اللي صار جانت ضايجة من سالفة رشدي بس فرحت بالمشروع الجديد وخلتني اوافق عليه بعد اسبوع كملت اوراقي وسافرت للصين ويا صباح وأمي قبلنا سافرت وصلنا امي استقبلتني بالمطار كلش جنت خايفة من فكرة اسافر ويا رجال لوحدي ولو هو محترمني اهواية بس بداخلي جنت مرعوبة قضيت اجمل واحلى الايام هالسفرة قربتني من أمي اهواية اشكد هي ناجحة وطموحة وروحها حلوة تنطي طاقة ايجابية .
