بَصْمَةُ العِشْقِ
الجزء 3
صدك ناوية تروحين وتعوفيني لو جنت اعرف نيتج بالليل ولا انام يمج وخري اروح
عزة تعبت من الوحدة يعني انتي اكثر وحدة تعرفين شلون يعاملوني عماتي وبيبي اريد اروح ويا اهلي اشبع منهم اني كبرت بعيدة عنهم
عزوز مو عزة هالمرة اموتج عيوشة انتي متأكدة اهلج راح ياخذوج وياهم
خليت الملابس اللي بأيدي تقريبا حضرت غراضي كلها ناوية اروح ويا اهلي من يرجعون فكرت بكلامها جاوبتها أكيد اذا اطلب منهم راح ياخذوني
يعني امج ولا ابوج منطيج خبر ليش تحبين تفشلين نفسج وبعدين تنقهرين عيوشة لاتسوين هالشي بروحج
صار عندي خوف وقلق من كلامها كمت هجمت عليها كومي ارتبج شوية عبالك ولد حقها بيبي تكول عليج لا من الذين أمنو ولا من الذين كفرو
خلي تولي المنافقة من تريد غراض تمدحني حتى اقلل السعر واجيبه للبيت ومن تشوفني وياج ببيتكم اكل واشرب تعلق بحجي سخيف مثلها لو لا معزتج ولا اطب لهالبيت الوسخ واشوف خالد وزيد اللي مسوين روحهم رياجيل ولا الفزاعات اسيل وسلوى
هههههه حرام عليج والله خالد وزيد حلويين كلش
عمية مشايفة حلوين حقج اذا تعتبرين خالد وزيد حلويبن لو احمد اللي شواربه عبالك شارلي شابلن يع
كافي لاتسمعنا بيبي تحرمنا من الاكل نظفنا البيت ويا عزة كلها حضرت غرفة لاهلي ورتبتها وجبتلهم مفارش جديدة بيوم اللي يوصلون جنت واكفه على المغسلة اغسل الفواكه حتى اخليها بالثلاجه وبيت عماتي وبيت عمي بالصالة ينتظرون وصول أهلي وصينا اكل من المطعم وغير اللي طبخته اني وبيبي والفواكه والحلويات احس العيد اليوم واني اتخيل نفسي ايام واودع هالبيت اللي مشفت منه غير الاهانة والكلام المحلو سمعتهم يضحكون تقربت من الصالة واني اسمع ضحكاتهم وهم يعيبون على خلقتي احمد ابن عمي مسوي نفسه كوميدي ويقلد صوتي وشكلي
أحمد : اتصور بيبي متشترون جلافة يكفيكم شعر عيوشة احسن جلافة
سلوى : مادري شلون اكل من ايدها بشرتها سودة وصخه اكيد هسة القمل تارسة شعرها
خالد :انتو شايفين خشمها المعوج تشبه الساحرات من اريد اخوف الجهال احجيلهم تفاصيل وجه عيوشة ههههههه
ام زيد مادري امي شلون هالسنين ربت بنت انتصار وجه البومه مشفنا خير من يوم اللي جتي للدنيا ودخلت امها بيتنا حتى اخويا غيرته الله يساعدج ماما الامراض اللي بيج كله منهم
متحملت اسمع هالكلام واسكت دخلت عليهم بصياح اشرت عليهم واحد واحد كافي متستحون شنو حلوة لو محلوة سودة وخشمي وحلكي عيب عليكم تاكلون وتشربون من خير امي وابويا وتظلون تحجون من ورا ظهرنا اني بشعه ومحلوة الله خالقني بهالشكل اذا عدكم اعتراض روحو اشتكو يمه فتحو عينهم وبدو يستغفرون ضحكت على شنو تستغفرون اول شي خافو ربكم بعدين صيرو ملايه براسي واللي ميعجبه يطلع من هالبيت
