#صرخات_محبوسه
بارت 3
حسيت نفسي طفله صغيره بحظن امي
ومثل كل طفل محروم من حاجه ويريدهه
ماكدرت اكتم لوعتي بصدري
ظلت امي تمشي ايدهه ع شعري
كالت بعدج يمه اكو نسوان يبقون سبع و8سنين انت يادوب سنتين
كتلهه يمه الرجال واهله ميصبرون يمه مااتحمل حجي ..
ليش يمه مسمعيج حجي مأذينج
يمه طولت سنتين لازم اسمعلي حجايتين تلاثه
رحتي دكتوره شكلتلج
مارحت يمه
امشي اوديج للعلويه تشوفج خاف ملزومه
يمه مايقبل
امشي انه اوديج هو شمدري
يمه مايصير اطلع بدون مايعرف حرام يوم القيامه يعلكوني من رجليه
لعد خلي احاجي عمتج هي توديج
مو خاف يكولون عليه انقل حجي يمه خليهه على الله اني مقتنعه بكل شي بس كون يفكوني
الله كريم حبيبه
بعدهه اجت هناء كالت تعالوا تعشوا
رحنا للمطبخ تعشينه وخلصنا وراحوا الجهال للغرفه واني كمت اغسل مواعين كالت لا عوفيهم اني اغسلهم روحي للغرفه المطبخ حار كتلهه لا متعوده اني ..
غسلتهم ورحت للغرفه نمت بصف امي وظلينه نسولف اني وياهه
اما هناء راحت الغرفتها نامت
يوم ثاني الصبح
وكالعاده امام تذمر هناء ملت روحي اليكلك مشايفين اكل وطبع بيه ماارد عليهه سكتت سوت النه اكل شون ماجان واتمنيت اخويه يجي اشوفه صار هواي ماشفته بس ماكلف نفسه يجي رغم البيت الثاني قريب على بيت هناء الي هو بيت المرحوم اخويه وعبير مرته الاولى بيت وحد ...
وبقيت عدهم ليله ثانيه
يوم ثاني كعدت لكيت هناء عدهه انذار دتطبخ كالت اهلهه يردون يجون
حتى نستنه بله ريوك
للضحى جوي اهلهه وقسم بقوا يساعدوها وقسم جوي يمنه يسولفون ..
ومثل كل كعده نسائيه وكل نقاش يصير ينطرح عليه نفس السؤال ماصار عندج شي ماحملتي ومن هالحجي اني اعتبره جرح لمشاعري لان هالشي كلش مآلمني ومسسببلي مشاكل بس الناس متعرف شنو بدواخلنا
كتلها لا ماصار شي
ليش شعجب
مااريد هسه بعد وكت شوكت ميجي هلا بي
يعني زوجج مايريد جهال
هاا ... ميحجي ميكول
بس عمتج كايله لمرت اسعد لان هي اقاربهم السبب منج متخلفين وجاي تدور على مره لرجلج صحيح هالحجي
اني من كاللت هيج مسمار واندك بنعش روحي متت قهر احتاريت شجاوب ممعقوله هيجي ناس عدهم جرح المشاعر عادي كلش ونقل الحجي والتفنن بصياغته بدون ضمير كلش سهل
كتله اني ماابيه شي واكيد هي امه ومتنطي بي شايفتلج ام تنطي بابنها وبعدين اني ماراجعت طبيبه ولااي شي
هاا مو خاف ملزومه او بيج شي
كلشي مابيه عيني الحمدلله هالخرافات والتفاهات هي اني ماامن بيها الرزق كله يم الرب الكريم هو وحده الي يرزقنا واكيد اله حكمه بيها مارزقني الحد هسه ...
حاجيتهه بحديه وخليته تلصم شكد اكره هيج نماذج متخلفه ورجعيه وتحط روحها بكل شي
كامت التهت وي جهالهه امي كلتلي عيب يمه خطار ليش هيج تحاجينهه كتلهه يمه هي شعليهه اخلف مااخلف معليهه عليت نبرة صوتي تعمدت اسمعها
اللتفتت الي كالت الله يرزقج عيني وطلعت
امي ندستني اني مو يمها حقدت على عمتي اكثر ليش هيج تسوي ليش هيج تحجي عليه تحسبت عليها بقلبي وعلى حسام الي مامقدرني ولا منطيني قيمه حتى اهله يحترموني من يشوفونه مهتم بيه ويقدرني ..
وكت الظهر اجه اخويه ابراهيم يسلم ع اهل هناء واني هم سلمت عليه ئكد جنت مشتاقتله
بس بداهلي انقهرت كلش لان صار يومين عدهم مااجه شافني ومن سمع باهل مرته اجه وايديه متروسه
يمكن بداخلي كلش انقهرت بس مابينت هالشي كدامهم كلت كافي اسمه بالدنيا وهو اخويه الوحيد
خلي شميسوي اني مابيدي شي واتمنى اجي ع طول اشوفهم بس الضروف صعبه وتحكم ...
بس هو ليش ميجي يشوفني واني هسه يمهم ولاحتى يكلف نفسه يتصل يكول خيتي شلونج ..
وكت الظهر صبوا الغدا
جانت السفره متروسه سمج والي مياكله مسوين دجاج ودولمه الخ ...
كعدنا اكلنا وخلصنا
بعد مااحتكيت بيهم صرت اضوج من التجمعات حتى لايسالوني سؤال يضوجني
أنت تقرأ
صرخات محبوسه
ChickLitقصه منقوله للكاتبه نورا ناصر امرأة متهمه بمساعده عشيقها لقتل زوجها فما هي حكايتها.....
