صرخات محبوسه

4

بارت 4

كتله ديلا طلكني شناقصني وتعيرني 24ساعه

اباوعله ملامحه تغيرت وظل يياوعلي وسكت هدأ بس اني ماهدأت ولاهدأت روحي احس روحي جمره
من الغضب كتله واني اشر بيديه شبيك ولك منو تصبر وياك بكد الصبرته اني وكله ومااطي بيك هطول ولك. من تزوجت الهسه ربع ماحاط بيدي وكمت اشتغل واعينك وساكته على كل شي لاهلي ماتوديني تريد تتزوج ذاك الدرب روح اتزوج بس طلگنييييي
كال سكتييي كافي حسره واحد يحجي وياج سكتييي وسدي حلكج شكد تحجين
وكام طلع بره ...
حسيته مهزوز خايف من تهديدي اله وماواجهني
وهم مستسلم للامر الواقع
زين شبي ليش هيج يصرف ويايه بلحظه يخليني اثور ويطلع بدون ميكمل ترهاته
كعدت خليت ايدي ع خدي ماكو واهس للدنيه كلها
كمت اباوع لوجهي بالمرايه شناقصني اني
صح مو جميله كلش بس شكلي مقبول بالنسبه لشكله
اني ويا نفس الطول هو اكبر مني ب3سنوات وحتى ابتدائيه ممخلص بينما اني وصلت لمعهد طبي بس الحظ مخلاني اكمل جان اني هسه موضفه
عيوني بلون البن ورموشي طوال ومن اخلي كحل يصير لعيوني سحر ثاني هيج امي تكولي لاتخلين كحل يحسدوج واني اضحك
ذات بشره حنطيه
شعري صح بي كسرات بس ثخين ومن اسشوره يطلع يجنن
جسمي مرتب وماكو بيه شي معيب
شبي ويايه ليش هيج يصرف شيريد بعد
كلش ضجت بليلتهه والمكينه شلتها وي الغراض ماكو شي اتلهه بي ولاحتى عندي تليفون مثل الاوادم هو هذا الصرصور باقيه عليه
شسوي ياربي .. رحت تلفلفت بالفراش
وبقيت اتنفس حسرات وآهات شبيه اني وهيج يقلل من قيمتي ...
نوب صارت ب1لااني الي نمت ولاهو الي طب للغرفه
بقيت افكر بي وين راح هو مامتعود ينام بالهول لو بالصاله
مانطاني گلبي يبقى هيج عليه زعلان
مهما يكون هو زوجي واني مالي سند غيره
محد الي هو خيمتي
كمت من الفراش طلعت ادور عليه .. ماكو بالهول ماكو بغرفة الخطار اصلا هم مابيهه شي يكدر ينام عليه لان احنه مستعدين للانتقال وكلشي فارغ ..
شفت ضوه غرفة امه مشعول انكسر گلبي عليه يمكن نايم بيهه خطيه. . رحت بهدوء امشي وفتحت الباب
شفته نايم بغرفة امه
خفت اروح اصحي هسه يعيط بوجهي ..
عفته نايم ورحت للغرفه .نمت وماكو واهس للحياة كلها . يوم الثاني كعدني ولاكأنما صاير شي بالليل .. اصلا اني متعوده ع تصرفاته مرات يتصور الي مو صاحي وعقله بي شي ..
مرات لا اكول مبي شي بس هو ميعرف يتصرف ويايه وابقى دايخه بي واحاول اللتمس شعوري اتجاهه لااشوف نفسي احبه ولاامااحبه بس مااريد انفصل عنه لان ويا افضل من ان اعيش في كنف اخوي ع الاقل هذا رجلي ويمون عليه وامون عليه

كعدت سويت اله ريوك بدون مااحجي ويا وهو ممهتم رجعت نمت ساعتين وكعدت .. مثل كل يوم
اندكت الباب جوي نسوان اضربهم ابر
وبعدهه راحو وجوي ناس يخيطون يمي كتلهم مااخيط لان راح ننتقل الغير مكان .. وهكذا مرت الايام الاخيره بهذا البيت
جهزنا كل شي وطلعنا . اغلب اغراضنا الكبيره بيعناهم مااخذنه شغلات هواي بس المهمات ..
تركنا البيت الي جانت بي ايام مره وايام حلوه وجان كدامي مشوار طويل مجنت اعرف كل هذا مضموم الي
ظلت حسره بقلبي شوفة امي تمنيت اروح اشوفهه بس حسام مكروه طبعه و100% راح يرفض اذا كتله وديني اشوفها