صرخات محبوسه

15

#صرخات_محبوسه
بارت 15...
بقلم نورا ناصر

بارت 15 ..

بقيت صافنه بوجهه وكاتمه ضحكتي الي بينت على ملامحي وشعور غريب بداخلي .. لو باقيه ساكته وممسلمه عليك احسن .. هذا ميفك مني ابد ..

شفت ناس تريد تدخل للصيدليه كدرت اتملص منه واطلع بدون مااجاوبه ..
امشي وصارت الشمس گبالي لان وقت الضحى واخفي ابتسامه سببها قلبي الي احتدم بالمشاعر المختلفه .. مااعرف شنو شعوري اتجاهه  شفت بعيونه لمعة فرح بعد يأس  من شافني خاصة بعد ما رفضت طلبه اخر مره .. اما اني  هم كنت متشوقه اشوفه ماادري كنت افتش ع ذكريات قديمه ويا او كنت اريد اشوفه شخصيا ..

رحت للسياره وجان ابراهيم مخلص وديغسل ايديه صعدت بكل هدوء بس تضايقت من نفسي وبديت الوم روحي ليش رحت وتحركشت بي لو مرايحه احسن اني ويا دروبنه ميتلاگن ابد ..

اجه ابراهيم وحرك السياره ووصلنه البيت عمتي الي عدهه علم مسبقا بجيتنه .. ابراهيم مخابرهه وحاجي الها ..

دكينه الباب طلعت النا كنتهه لان عمتي هيج وقت بالدوام .. رحبت بينه ودخلتنه للبيت ..
كعدنه بالاستقبال .. ضيفتنه ..
بعد ربع ساعه ابراهيم كال اني راح اطلع اذا ردتي شي خابريني كتله ماشي ..

رحت يم جنة عمتي ميعاد بالمطبخ
جانت دتشتغل كتلهه اساعدج بشي
-  لا حبيبتي ارتاحي جايه من طريق طويل .
- لا عادي اسوي وياج شي .
- لا والله مخلصه شغلات بسيطه انت خاف جوعانه اسويلج اكل ؟!
- لااكلت بالبيت ومو جوعانه .. اكلج شخبار الجماعه
- ياجماعه ؟!
- بعد مني اخوان زوجي ..
- هاا ماادري خيه
- شون متدرين يعني بنات عمتي ميحجولكم شي عنهم ؟!
- بصراحه زهوره احجيلج ومتضوجين ؟
- لا وعليمن اضوج
- هواي يحجون عليج ..
- هف تنهدت ضجت كلش .. گتلهه ايييه بعد نوب يحجون عليه شوهو سمعتي شمروني بسجن اخذوا حقي وبعدهم مكفاهم كل هذا ويحجون عليه اني اعلمهم ابد مااسكت الهم ..
- يمعوده شتردين تسوين
- لاوالله خليتهم براسي بعد وكلشي اسوي اكو من ينصفني وماراح اسكت  .. سمعت صوت ابنها ظل يبجي راحتله واني احس بركان وشب بيه كلشش انقهرت من كالت الي هذا الكلام ذنبي اني حجيتهه لو مسائلتهه احسن وهسه هي اله تحجي ناس تحب تجرح المقابل ..
دقايق وطبت شايله ابنهه اباوعله صح مو ابني بس احس نفسيتي ارتاحت .. شكله حلو دبدوب وابيض وشعره وعيونه نفس اللون بني .. ولابس فانيله ضيكه عليه مطلعه لحماته فدوه اخذته منها وخليته بحظني وكعدت ع الكرسي  وابوس بي
كالت هو يستغرب بس شعجب مااستغرب منج
باوعتلها اضحك .. وبقلبي اكول يدري بيه محرومه من الامومه .. اخذته وطلعنه للحديقه وهي بقت تسوي اله ممه .. ماافكيت ابوس بي وبداخلي اسأل يجي يوم واصير ام دمعت عيوني .. يربي مااريد ابجي ..
اجت ميعاد. . اخذت منها الممه وكعدت على صبه بالحديقه وخليته بحضني وانطي الممه وهو يشرب ويباوعلي مستغرب بس ميبجي احسه متضامن ويايه ميعاد .. كالت اروح اكمل كم شغله مدام ساكت عندج