صرخات محبوسه

5

بارت 5

مجاوبت ومشيت بسرعه كلبي يسابق خطواتي اول مره هيج واحد يباوعلي احس خطوات ورايه مااعرف هو او لا بس ماللتفتت

بقيت خايفه الى ان وصلت للبيت فتحت الباب بالمفتاح وايدي ترجف على كم مره وكع مني المفتاح
وادنك اخذه واحاول افتحه بيدي الترجف اخر شي
فتحته وطبيت بسرعه ووكفت وره الباب

لسه احس نظراته تتفحصني
قفلت الباب وطبيت ركض واتعثر وهم رجعت قفلت البوب الجوه
وبقيت افكر اني وحدي بالبيت خاف يجي يجفت عليه واني وحيده وهذا شكله مو راحه ..

كعدت بالكاع يم باب المطبخ اجر النفس احاول اهدأ
وافكر هذا بس لااتبعني شووون

بعد دقايق كمت شربت مي ورحت بدلت ملابسي رجعت للمطبخ و على الشغلات الي اسوكتهن  .. اخذت علاليك المسواك وسفطتهن

وسويت الي لكمه اكلهه للغدا
طلعت للقفص صار يومين بعدهن جثث ضحايا لولو
اخخخ يالولو واخخ ياحسام ..

تشكلت ونضفت القفص من الطيور الميته وبقايا الريش والبيض المكسر وسديت الثغره الي طب منهه البزون حفاظا على حياة ماتبقى منهم على قيد الحياة
لايجي حسام وتزيد القهره مالته ..

خلصت وطبيت للبيت .. صار الظهر صليت وتغديت شربت جاي وافكر يربي شلون شلون
يله شيريد يسوي حسام والبزون هو خلي يروح يجيبه ..

مر الوقت عادي .. اللتهيت مثل كل يوم بالبيت انضف واخيط واغفه شويه واكعد

نسيت الهبطه مال الصبح واللتهيت عنها
لشويه دك تليفوني خفت يمكن هذا حسام ياا شراح اكله اكيد يسألني عن جهاله الطيور ولولو
رحت للتليفون اخذته رقم هناء مرت اخويه
ظليت اهف بيدي تهي بهي والله بطرانه عود هم عدي رجال. ويسأل عني لو اظل سنه ميسأل رفعته
الوو هلا ام علاوي شلونج اخبارج
هلا والله زهوره انت شونج
بخير نحمد الله امي شونها
يابه شدعوه عليج ماتسألين امج نهارهه كله اسمج ميوكع من لسانهه وانت ولا كأنما دسألي خابري كولي امي خطيه

اي والله اني مقصره حييل انطينياهه احاجيهه
يمعوده تره محد هسه ماخله نت بس انتي ظاله على هالتليفون
اي والله هسه سدينه الدين وان شاءالله نخلي نت واظل احاجيكم
اي عيني هاج هي خالتي وياج كبل لاينكطع لان رصيد مابي هواي
لمجرد سمعت صوت امي گلتلي هاا يمه زهوره
اريد اجاوبهه انكطع الخط
يمكن خلص الرصيد صحت الو الو
ماكو انسد واني ماعندي رصيد
ظليت رايحه جايه الوب وصوت امي يشهگ باسمي كسر قلبي عليها
لازم اطلع اجيب رصيد بس خايفه من هذا ابو عيون
يلا هو شراح يسويلي هياته المحل هنا بالفرع اشتري وارجع قابل اني وين رايحه
رحت للغرفه فتحت الدولاب جريت عباية راس وشال وياهه وطلعت وقفلت البوب لفيت العبايه عدل ونزلتها ع وجهي حتى لايشوفني ذاك
امشي واتلفت خاف اشوفه بس الحمدلله
وصلت للمحل ومشفته واني ادخل  حجيت بنفسي
هسه شيريد يسويلي يولي هي من نظرات خفت يمكن هو هيج يباوع
دخلت واشتريت رصيد وطلعت ورفعت العبايه هم
ومشفته بعد حمدلله خو ميلزملي الدرب ..
هسه هو شنو سوه واني هيج خفت
مشيت براحتي ووصلت للبيت وطبيت ..
عبيت الرصيد ودكيت على هناء جاوبت وانطت التليفون لامي ...
الو هاا يمه شونج والله ميته على شوفتج
بعد عمري زهراء ولج عيوني راح تعمه عليج هي الي سنتين ماشايفتج خاف اروح الدار حقي واني مشايفتج
اسم الله عليج ماما لتكولين هيج فدوه عسى هاليوم مايجي لااشوفه ولااسمع خبره بس كوليلي شلونج