يا محلا ذيج ايامنا الماترد
همس القوارير
البارت الثاني
المهم ضلينا نداوم بالتجاره وكانت وياي صديقتي استبرق وكنا كولش فرحانين لان انتقلنا مرحله جديده بس بقت عدنا مشكله حاولنا بكل الطرق نحصل خط يودينا ويجيبنا وملگينه كمنا نروح بتكسي ونرجع بتكسي لحد ما فد يوم من الايام صادف صيف والدنيا حاره وردنا تكسي يوگفلنا ماكو وبطلعان الروح لگينا واحد صعدنا بالتكسي واباع لابو التكسي دارها للمرايه عليه ويباوعلي بطريقه اعجاب واني بصراحه بادلته نفس النضرات هو يباوع عليه واني اباع عليه لحد ما وصلنا وانطيناه الكروه ونزلنا دخلنا المعهد وبدينا نداوم وكملنا حصصنا بالمعهد التجاري وبالرجعه لگيناه لنفسه ابو التكسي دينتضرنا
استبرق : يا هذه شلون صدفه جوري تعالي نفسه هذا ابو التكسي الي وصلنا الصبح
جوري : اي عيني دمشي خلي نلحگ عليه لا ياخذنه البنات واني بداخلي متونسه واعرف بيه دينتضرنا هههههه
وفعلا صعدنا بالسياره وضلت نفس النضرات الي يباوعلي بيها واني همين نعجبت بيه وصلنا للبيت وانطيناه الكروه ونزلنا رحت للبيت واني فرحانه كل ساعه يتخيلي شكله وهو يباوع عليه واني شلون اباوعله شكد كان حلو حب العيون تحسين انتي ساكته وعيونج هي الي تحجي وكنت فرحانه بنفسي عود كبرت والشباب تباع عليه شعور حلو
بعدها ثاني يوم الدوام طلعنا اني واستبرق ومنشوف اله الاخ بالله دينتضرنا ههههه ياا عزه اشو هذا لزگ شلون ورطه بس لا تشك بيه استبرق يووو واني شعليه خلي يوصلنا ولا ضيم التكاسي
استبرق: لج هاي شنو جوري هذا نفسه دينتضرنا شسويتي يمعزايه
جوري : شنو اني ياهو مالتي هو يمكن على باب الله واجه يسترزق ليش تباعيلي هالشكل
استبرق : شنو ليش اباعلج لج خاف باوعتيله لو غمزتيله اعرفهن دروبج خلينا نروح ونشوف خبر اليوم بفلوس باجر ابلاش امشي عيني امشي خنشوف شنو تاليته
جوري : لج اني ياهو مالتي ذبيتيه براسي دهسه سولفي وياه وشوفيه
اجينا يم السياره
السايق : السلام عليكم يلا عيني صعدوا خلي اوصلكم
استبرق : اخويه انت شعندك هنا ترى احنا مو من البنات الي ابالك
السايق : لا عيني لا انتي فهمتيني غلط اني اسمي حسن وگلت بلكت تحتاجون خط اني اوديكم واجيبكم واذا تلگون بعد وياكم بنات يكون افضل
استبرق : هااا اوكي بعد احسن ياريت والله دورنا هواي على خط وما لگينا اجيتلنا من السما
حسن : لا خويه بخدمتكم اني ان شاءالله نتفق
وفعلا صعدنا السياره وهو يباع عليه ويبتسم واني همين ضلينا واحد معجب بالخ وصلنا وهمين بقى ينتضرنا وبعدين رجعنا ومن ردنا ننزل دانطيه الكروه وگناله من باجر نتفق عالشهريه انطيته الكروه لزم ايدي وخله بيها رساله واني بسرعه اخذتها وضميتها بجنطتي خفت لا تشوفها استبرق وتفضحني هاي مينگدر للسانها
من وصلت للبيت دخلت سبحت وغيرت ملابسي وتغديت وگلتلهم راح اروح انام رحت من غير ما احد يحس قريت الرساله كاتب بيها
حبيبتي اني احبج وانتي عاجبتني واتمنى تبادليني نفس الشعور واريد اطلب منج طلب بس شوفيلج صرفه لصديقتج باجر اريد اشوفج لوحدج عندي حجي وياج وراسم گلوب حمره وگلب مضروب بسهم وورد هاي عود مزين الورقه هههههه من جيل الطيبين اني هههه
بعدها شلون اتصرف فكرت بيني وبين نفسي گولت خلي اگول لاستبرق اني ما اداوم باجر حتى يخلالي الجو ويه الكبد هههه واكدر اروح لوحدي صحت لاختي حلا كنا ندلعها حلاوه
جوري : حلاوه تعالي حبيبتي روحي لاستبرق وكوليلها جوري باجر متداوم
حلا : ماشي بس انتي ليش متداومين انتي مريضه
جوري : كوليلها اي مريضه معليج انتي
وفعلا راحت وگالتلها كانت استبرق اذا اني ما اداوم هي متداوم واذا هي متداوم اني همين ما اداوم
وثاني يوم بدلت وتعطرت وجلفت روحي جلف ورتبت نفسي ولبست قميصي الي بيه كركش من الردان كان موديله وكتها وطلعت ولگيته ينتضرني وجاي من وكت همين ههههه
حسن : صباح الخير يا حلو
جوري : ههههه صباح النور
حسن : ها عيني وينها صديقتج
جوري : اليوم متداوم مو گتلي زحلگيها ههههه
حسن : ههههههه عفيه عليج دصعدي خلينا نروح ونتعرف على بعض
وصعدت وياه وفعلا تعرفنه على بعض كان انسان عادي حاله حال شبابنا قبل يعني ماكو شي مميز بيه بس هو حباب الولد الشاهد الله وكان كلامه كوله غزل وحب واعجاب وكعدنا الطريق كوله يسئلني واسأله عن حياتنا عود دنتعرف ههههه واشترالي بسكت وعصير وگالي بعد انتي ما اخذ منج كروه بس لا تحجين لصديقتج حتى لا تشك بينا ووصلني للدوام ومن وصلت همين حجيت ويه البنات واجوي اثنين ويانا بعد بالخط صرنا اربعه بالسياره وكنت كوله اكعد بالصدر يم حسن وما اقبل اي وحده تكعد مكاني عود حسب الميانه واحس اني فد شخصيه عود هههههه واشوف روحي عليهن
بقينا فتره على علاقه طول فترة الدوام وكان مياخذ مني كروه بس كنت اگول لهلي ياخذ حتى لا يشكون بيه واشتركت بفلوس الكروه بسلفه ويه صديقاتي بالدوام هههههه وضليت اروح وياه وارجع وياه بلوشي مكان ياخذ مني كنت طايشه بس والله طيبه وحبوبه ههه
