يا محلا ذيج ايامنا الماترد
همس القوارير
البارت الثامن
ضلت حياتي مثل ما هي يوم حلو وعشره مر الى فد يوم من الايام اني كاعده اجاني
هيثم : جوري حبي انتي مو تردين تشترين قنفات
جوري : ياا شعجب راح تشتريلي صارلي اكثر من ست اشهر الح عليك شجاك اليوم
هيثم : لا مو الله رزقني وگلت خليني اعوضج اني أذيتج وهذا تعويض امشي روحي تغدي بيت اختج وبعدين اطلع من الدوام امر عليج ونروح نشتري قنفات
جوري : اي والله علواه هيثم فدوه اروحلك
طبعا قبلت واني حاسه اكو شي غريب بالموضوع شنو السالفه بالضبط ما اعرف الي اعرفه يريدني اطلع من البيت بقيت بشك وحيره وشفته زين لحيته وغير ملابسه وتعطر وطلع كشخه وهو حلو صار بعد احلى ومن سئلته شنو هالكشخه گال عرس صديقي اليوم ورايح لعرسه واني الشك زاد عندي قاطات خابرت على فرح اختي كانت جايه زياره لبيت اهلي وطبعا اني مكنت اضم اي شي على خواتي اخباري كولها يمهم واخبارهم كولها يمي
جوري : الووو فروحه
فرح : هلا
جوري : طلبتج يا بعد عمري
فرح : بخدمت الحلوين اني ترديني اقتلج هيثم عادي سنه سنتين سجن مو مهم
جوري : هههه لا مو هالدرجه بس ردت منج تصعدين لغرفة اخويه وتگوفين بالشباك الي يطل على بيتي ولا تنزلين ابد اريدج تراقبيلي البيت اليوم والموضوع بيني وبينج مسئلة حياة او موت بالنسبه ألي
فرح : الله خباثه من عيوني اليوم صباحي واله اطيحه لهيثم بشر اعماله بس انتي شاكه بشي
جوري : ههههه لا ولج بس هيج ردت اشوف الوضع واطمئن وياريت اكون غلطانه
فرح : ليش انتي اليوم وين رايحه
جوري : راح اتغدى بيت سحر ومناك يجي عليه هيثم نروح نشتري قنفات
فرح : اها اوكي ان شاءالله نفلش القنفات على راسه
جوري : هههههه لا ولج لا تحجين عليه هذا الحب
فرح : يالله عيني روحي توكلي على الله واني راح اصعد برج المراقبه ههههه
وفعلا خليتها تراقب الوضع واني رحت لبيت اختي همين سوالف وضحك واني بالي ما مرتاح احس اكو شي وامنيتي اعرفه كولش ما ارتاحيت هستونا صبينا الغده مديت ايدي داكل
وخابرتني فرح
فرح : لج جوري الحگي ولج هذا هيثم جايبله وحده مبرگعه ولابسه كاب ودخلها للبيت
جوري : يا يمه عزه العزاني ولج صدك تحجين
فرح : اي وربي تعالي بسرعه
واني بدون ما اغسل ولا احس على روحي لگفت عباتي وطلعت حافيه عبالك اول مره يخوني صح كانت بس تلفون وشغلاته بره بس هالمره غير ابيتي وعلى فراشي عزه العزاك هيثم اركض بالشارع حافيه وبس عبايه وابجي لحگتني اختي تركض ورايه وجايبه تكرمون شحاطتي وراي شافنا ابو التكسي اركض وابجي وكف وگال اصعدي خويه شكو واني ما احجي بس ابجي رغم الطريق كان مو كولش بعيد بس حسيته بأخر الدنيا والف حسبه وحسبه بالي شلون راح اشوفهم وشلون وضعهم وشنو راح احجي وشنو راح اگول معقوله يجيبها لبيتي وعلى فراشي وصلت بيه المواصيل لهنا اووووف هيثم الله لا ينطيك هيثم والله لا يوفقك على هاي العمله وكفت السياره واني من غير ما احس نزلت ما ادري بيها وكفت السياره لو بعدها تمشي عفت اختي ونزلت ركض عالبيت فتحت باب الطارمه ودفعته كول قوتي ورحت اركض لباب المطبخ لگيته قافله من جوه فلشت عليه الباب تفلش ما فتحه وضلينا نصرخ ونصيح عليه وهو ماكو ما يرد علينا وكسرنا الجامات مالت الباب اني واختي وفتحناه ودخلنا وياريتني ميته قبل هاليوم ياريتني لا عشت ولا كنت ولا نخلقت ليش ياربي هالعذاب ليش اني حضي هيج ربي رحمتك ارحم بحالي والله ما اتحمل الي يصير وشفت الي محد شافه
