يا محلا ذيج ايامنا الماترد
همس القوارير
البارت السادس
من بعد ما كعدت بيت لوحدي كولش ارتاحيت وهدأت اعصابي وارتاحوا بناتي همين توجهت لربي وكضيت حياتي عباده وقراءة قرأن وصلاة الليل وبديت اقضي الصلاة الي فاتتني وعلمت بناتي عالصلاة والصيام وضليت اصوم بالاسبوع يومين الاثنين والخميس وتندمت على كول ذنوبي الي سويتها وعلاقتي قبل بالسايق وابن خالتي تمنيت لو يرجع بيه الزمن وعقلي كامل مثل ما اني هسه سبحان الي ميغلط بحياته واملي برب العالمين كبير ان يغفرلي ذنوبي ما تصورون حالة الندم الي كنت بيها والخوف من عقاب رب العالمين
من كعدت يم عيالي واهلي وحماتي وحماي طبعا ما خلصنا من المشاكل صحيح مرات تصير مشاكل عالجهال ويحاسبون شعدها فلانه جيرانج عندج اليوم وشتريد منج علانه زايرتج بس كنت ما اهتم ساده بابي وكاعده وكمت اعبر هواي شغلات واحاول اتدارك المواقف ومرات شغلات متسوه بس الانسان هيج طبعه يحب المشاكل والقلت والقال
المهم عشت ابيتي الجديد سنتين مرتاحه وما عندي مشكله ويه هيثم كول مشاكلنا من ورى اهله بس وضعنا المادي الحمدلله والشكر من احسن لأحسن وصار عدنا خير من الله بعد فتره سمعت من امي انو ابن خالتي الي كنت احبه طلگها لزوجته واجتي خالتي خطبت اختي حلا اله اني تفاجئت يعني ليش ما قبلتي عليه وقبلتي على اختي شنو الجديد يعني المهم اجتي امي حجت وياي وگولتلها اني اصلا ما معترضه وحياتي عشتها ويه زوجي واولادي وكلشي بالقسمه ما مقسوم ألي سبحان الله ونقسم لأختي وفعلا سوينالها عرس يخبل وبعدها راحت سكنت لبغداد ونفس السنه تزوجت علا همين جيرانا وبصفنا وزوجنا اخواني همين والحمدلله والشكر هذه مسيرة الحياة ورى السنتين حسيت بهيثم بده يتغيير هواي شغلات المره تحس بيها صار اهتمامه بالموبايل وضل ميعجبه يكعد ويانا مثل الاول ولا يشاقي الجهال ويسولف وياهم مثل قبل ويعيب عليه وعلى لبسي وعلى مكياجي وبالرغم اني كولش نازكه ومهتمه بروحي بس اشو كولشي اسويه ميعجبه وبده يخلي باسورد للموبايل گولت يجوز ميريد الجهال يلعبون بيه وعلى ابسط الامور تصير عركه وهوسه وحتى لو الجهال يسوون شي بسيط يضربهم وبده يهمل البيت والمسواك يعني بلگوات يتسوگلنا بالرغم عنده خير من الله بس اشوفه بده يبخل علينا و هواي شغلات گلت يجوز ضغط بالشغل احاول اقنع نفسي بهالامور بس العقل ميرضى يقنع يا ناس رجلي واعرفه مو الأولي كل مره تعرف رجلها اذا يتغير بمجرد شعره تكدر تلگفه واني هواي امور تغيرت وبدت تخليني اشك بيه مرات اطلع بالوحده لو ثنتين بليل بالحديقه اخذ سجادة صلاتي وكتاب مفاتيح الجنائن واكعد ادعي يارب ترجع هيثم مثل مكان وترجعه لبيته وجهاله مالي غيرك يارب معقوله هذه العاقبه ياربي فدوه اروحلك لا تخليه يعوفنا انت ادرى بالحال ربي الناس نايمه واني متوجهه لوجهك الكريم ما اريد منك معجزه بس رجلي ترجعه مثل ما كان لو تكشفه ألي وتخليني اعرف شلون اتصرف ودليني عالطريق الصحيح والله ودموعي نار ينزلن على خدي لحد ما فد يوم من الايام اجه من وكت ما متأخر مثل عوايده وضل كاعد يمنا اشوفه لرجلي مو طبيعي ضايج ويگلب بالموبايل ويدز رسايل وصور ومحد يگدر يحجي وياه الجهال دخلوا انذار لا صوت ولا لعب وهوسه گلت اخاف عنده مشروع خسران او شي عفته تعودت على وضعه انطيته الف عذر وعذر حتى لا اصدم نفسي او اقهر روحي
حاولت كم مره من ينام اخذ موبايله وافتش بيه بس ما اعرف الباسورد من بعد محاولات وارجعه مكانه بس اضل ألوب بروحي عبالك وحده بيها مرض بس اني مرضي ما اعرف شنو اليوجعني روحي هي الي توجعني وخوف وقلق على مستقبل مجهول ما اعرف شنو ضاملي المهم بساعه متأخر من الليل دك موبايله واحنا نايمين وهو كان بصفي وسويت نفسي نايمه حتى ميحس عليه اخذ الموبايل وطلع من الغرفه وهو يمشي على كيفه حتى لا احس عليه وراح عالصاله واني طلعت وراه من غير ما يحس واشوفه يتلفت يخاف انو اكون طلعت وراه وكلما يلتفت عليه اضم روحي گلت خليني اشوف شنو السالفه بلكي اطيحيلي بخيط لو شي داريت نفسي حتى لا يشوفني وضليت ضامه روحي اوووف يا احساسي وكتها ما اعرف شلون اوصفه الكم خوف وقلق واتمنى ارجع من المجهول بس الفضول قتلني گلت لازم ابقى واشوف شنو السالفه
