يا محلا ذيج ايامنا الماترد
همس القوارير
البارت الخامس
بعد فتره اجتي امه لهيثم واخته الكبيره وخطبوني اله اني كيفت بس امه لهيثم گالت
ام هيثم : والله يا حبيبتي احنا جايين نخطب بنتكم لابنا هيثم والولد شاري البنيه وشنو تطلبونه احنا بخدمتكم
امي : اهلا وسهلا بيكم وان شاءالله ما نختلف اهم شي واحد مقتنع بالخ
ام هيثم : بس ابنا عصبي وما يتحمل واحنا امكانيتنا على گدنا وراح تگعد ويانا بالبيت وتكون بنتنا
امي : يعني شنو مو لبيت لوحدهم
ام هيثم : لا عيني منويله هو هستوه متوضف وبعده ممكون نفسه على الله وعلى هالراتب وابوه يساعده ان شاءالله بالعرس
امي : ان شاءالله خير كم يوم انطونا نسأل ونتستفسر ونرجعلكم الخبر
وعرفت انو لا بيت لوحدي ولا خاله ولا بطيخ راح اكعد وياهم بالبيت وحالي حالهم طلع الحجي كوله كذب بكذب بصراحه بالبدايه ضجت لان بده حياته بالكذب وياي بس بعدين كولت ميخالف مو مشكله عادي كان الحب عامي عيوني وما اشوف غيره واتفقنا انو امي واختي يرحون يشوفون البيت وفعلا راحن امي واختي لبيتهم وشافوه
ورجعن وجهم ما يتفسر كولش ضايجات
ماما : لج جوري انتي من كول عقلج تاخذين هذول الناس
جوري : ليش ماما شبيهم
ماما : هو شنو الي ما بيهم ماما ناس كولشي ما عدهم وبيتهم صغير وخنگه وقديم انتي شنو راح تذبين نفسج بالنار
جوري : ميهم ماما اني الي راح اعيش وياه مو انتم وبعدين هو گال اني ارتب البيت بعد ما نتزوج
ماما : لج ماما وعصيبته مسمعتي امه شنو گالت
جوري : ماما عصبي عليه مو عليكم اني اريده ماما حبابه لا تعترضين حبابه قنعي بابا
ماما : والله ماما انتي تتحملين نتيجة سوء اختيارج شلون اقنعه بشي لج اني ممقتنعه ماما بطلي والله متعرفين مصلحتج
جوري: ماما لا تضلميني فدوه لعينج خليني اعيش حياتي وسعادتي ويه انسان احبه يعني واذا بيتهم قصر واني ما احبه راح تشوفيني بس ابجي وانقهر
ماما : والله ما ادري يا ماما حياتج وانتي حره خلاص احجي ويه ابوج والله كريم
جوري : مشكوره يا اغلى واحلى ام بالدنيا
وراح بابا سأل عليهم وطلعوا كولش خوش ناس وابلغناهم بالموافقه وصارت الخطبه وطبعا عاتبته ورى الخطبه بأنو كذب عليه وگال خفت احجيلج وضعي لا اخسرج واني احبج واموت عليج وكله يهون ماطول احنا سوه
وفعلا مهمني وضعه المادي گولت ما طول نحب بعض عدنا مثل العسل وما طولنا شهر خطبه كانت خطبتي حلوه بس مكنا هواي نكعد مع بعض لان بابا يضوج المهم كملنا شغلنا من غرفه ونيشان وهالسوالف وتزوجنا وكنا كولش فرحانين ومخبوصين بيوم زواجنا وشگد ما اگوللكم هيثم رومانسي يعجز اللسان واجيت لبيت حبيبي وكنت طايره بيه وهو همين كولش يحبني وطاير بيه كانت حياتي وياه حلوه وكنا واحد يحب الخ هوايه خبلته لهيثم خليته ميشوف غيري البس اشكال والوان عالبال ومو عالبال وليليه عبالك عروس وزافينها من مكياج ولبس ودلع وسوالف حلوه حتى رگص ارگصله اسمع حمايه يصلي ويقره قرأن بغرفته واني مشغله المسجله وارگص وگام هيثم يموت عليه واذا اهله حجوا وياي حجايه وحده يلعب بيهم لعب بالرغم كانت عمتي فقيره وحبابه بس ماكو بيت يخلو من المشاكل من الشهر الاول حملت بنتي زمن وكنا فرحانين بيها اني وهيثم وبعدها صارت عندي بنيه ثانيه وسميتها ولاء ما انكر ضجت بالبدايه وهيثم همين ضاج لان توقعناها ولد بس رب العالمين ما قسملنا وبعدها حماي الي اصغر من هيثم اسمه علي هو همين قرر يتزوج وفعلا تزوج وكانت زوجته كولش حبابه وصرنا اني وياها مثل الاخوات نكعد سوه ونسولف سوه واسرارنا سوه عمتي معجبها الوضع نكون سوه باعتقادها راح نسوي انقلاب ضدها ههههه كامت تجيب حجي وتودي زوجة حمايه اسمها اطياف تجيني عمتي تكولي اطياف هيج حجت عليج وتروح يم اطياف وتكول جوري هيج حجت عليج وخربت علاقتنا اني وياها مع الاسف وبعدها هي صار عدها جهال واني همين صار عندي ٣ بنات وولد وهي ٢ بنات وصارت مشاكلنا من ورى الجهال والبيت صغير فقررنا نبيع البيت وكل واحد ياخذ حصته ويشتريله بيت فقرر عمي ابو هيثم وابويه يشترون دونم ونكعد بيه كولنا كل واحد يبني بالي عنده وفعلا اشترينا دونم وبدينا نبني اني وبيت حماي وبيت حماتي وبيت عيالي وبيت اهلي كل واحد بيت معزول عن الخ وبيت بصف بيت واهنا ارتاحينا والحمدلله والشكر وكعدنا كل واحد بيته وحياته واستقراره وخفت المشاكل والهوسه كنت كولش فرحانه بيتي ليل ونهار انضف بيه وزاد اهتمامي بنفسي قاطات مو قاط واحد بس الفرحه ما تدوم والجايات اكثر من الي راحن
