#غربة_الروح
همس القوارير
بيج قصص همس القوارير
البارت الثالث
من بعد الانتضار والمعانات اجوي بس مو همه امي شاگه ملابسها ومخرمشه وجها ومحمد وعلي وابوي يبجون ويصرخون من غير شعور ضليت اضرب بأمي واصرخ لا تگولين مات عفيه لا تگولين مات هسه يجي يمه والله هسه يجي شوفي هذن هدومه وغراضه وكتبه هنا جابوهن هو يجي وراهن ابويه سحبني من امي واني اگمز بحضنه عوفوني انه اروح اجيبه واصرخ وابجي لحد ما نهارت اعصابي ونشفت دمعتي من عيني اوووف يا خويه يا حبيبي بعدك صغير عالموت ياربي اختبارك صعب واني ما اتحمله امي نهارت وتمرضت وبقت اسبوعين نايمه بالفراش القهر دمرها وحطم اعصابنا هستوه كان يمنا نايم هستوه امي صبتله ريوگ وانطته مصرفه وراح للمدرسه هستوه باسها لأمي وگالها ادعيلي انجح بالامتحان راح وبعد ما رجع اووف يالقهر المهم كولش صعبه انسان توه عايش وياج ويطلع ويجيبونه الج ميت ياريت كان مريض او بيه شي ونكون تعبنا منه ورى تقريبا اربع اشهر يالله امي رجعت تخيط للناس وتحاول تكون طبيعيه لان ابويه ولا رحمها يوميه يتعارك وياها حتى ترجع تخيط اشوفها مرات لوحدها تگعد وتبجي ومرات تلوم ابويه وتتعارك وياه انت الي حرمته من كولشي وخليته يروح محسر ومرات هادئه وكلشي متسولف بس ام تحسين ما عافتها لأمي ووكفت وياها وصبرت عليها وابويه بقى مثل ما هو صدگ مقهور على صادق ومن يتذكره يبجي بس نفس بخله ونفسيته ما تغير ساعتها اجه ابالي الشايب من گالي راح تفقدين عزاز وماكو اعز من اخويه وفقدته شضامتلي الدنيا بعد فوگ ضيمي مرت سنه على وفاة صادق وتجاوزنا المحنه بعدها تزوجت اختي ريم لابن خالتي كان الولد على گده وزواجهم كان عادي يعني لا حب ولا شي بس ورى الزواج ضلوا يحبون بعض وهو ابن خالتي وقريبين علينا ضلت كل اسبوع تجي يوم تبات يمنا وحملت وجابت ولد شويه خفت جياتها علينا لان مسئوليتها كبرت اتذكر جنا گاعدين نتعشى وندك بابنا رحت اركض افتحه للباب تفاجئت بريم جايبه جنطتها وجايه وتلگتها امي
جنان
يا عزه شنو هاي شجابج بهليل
ريم تبجي
يمه مليت وتعبت وطلعت روحي اختج شنو اسويلها ما ترضى تعبتني وياها اشتغل ما يعجبها اطبخ ما تاكل الي اطبخه تعرفين ليش يمه تگولي تحطيلي سحوره بالاكل وهسه طردتني انه وابني ورجلي ذباني عليكم وراح على بيت اخوه
جنان
تعاي يمه تعاي تعشي ولج نغمه يمه تعالي اخذي حسوني ابن اختج اكليه وياكم
ريم
ما اشتهي يمه ماكله المر
جنان
ميخالف يمه تحملي ماكو بيت ما بيه مشاكل
مصطفى
هاي شبيها جايتنا بنصاص الليالي شخيرها
جنان
ما بيها شي بس متعاركه ويه خالتها وطاردتهم
مصطفى
لا يكون ناويه تگعد على گلبي هي وابنها انه ما صدگت خلصت من مصرف واحد هنوب جايبه ابنها وياها
جنان
عيب عليك يا رجال هاي بنيتك وين تروح اذا ابوها ما يحويها منو يحويها
مصطفى
انه حاير بروحي وبعيشتكم هنوب عايز انه
ريم
لا تخاف بويه هاك هذا مصرفنا انطاني رجلي احمد گبل لا يجيبني اصرفه علينا
مصطفى
اي هذا الحجي العدل گعدوا بويه گعدو انه اروح انام
ريم
ليش يا يمه هيج حضنا لا دنيا بيها خير ولا ابو بيه خير شگول بس
بقت عدنا ريم ١٠ ايام وبعدها اجه رجل خالتي ورجعت وياه من غصبن عليها ترجع لان ابويه يباوع حتى لكلهم من ياكلون عجيب هيج انسان الفلوس اذا ما استمتع بيها وافرح بيها جهالي واكل واشرب بيها شنو فايدتها هيج جان وضع ابويه منو تجي زعلانه ياخذ منها اكلها وشربها وزياده وكتها صار عمري ١٤ سنه وصلت ثالث متوسط وجنت حيل شاطره اجوي جوارينا خطبو اختي ميسم وصارت قسمتها والحمدلله والشكر مرتاحه بحياتها لان حالتهم زينه وبيتها لوحدها اخواني واحد منهم علي كليه اداب انگليزي والثاني محمد بقاله سنتين ويتخرج من الهندسه واختي زمن سادس علمي وطبعا هذا كوله بفضل امي وصلتنا بهيج مرحله مرت علينا ايام وشهور تخرجت زمن ورادت تدخل كليه وابويه مخلاها گعدها بالبيت على ابو ما عدنا بنات يداومن كليات ومن هالحجي الى ان اجه ابن صديقه لابويه خطبها وانطاها اله بقيت بس اني بالبيت وامي وخواني وابويه اني همين داكمل دراستي لان احب الدراسه حيل امي بهذيج الفتره گامت تتخربط علينا سوده عليه اخذناها للدكتور گال عدها سوفان بالرقبه ولازمها راحه لا تدنگ ولا تشيل ثگل ولا شي بس هي متقبل تگعد لازم تخيط حتى تسلم من لسان ابويه وهمين مصرف اخواني علي اخويه دائما يوگف بوجه ابويه ويتعارك وياه هو ميتجاسر بس يحجي الحقيقه وابويه ما يحب واحد يگوله انت بخيل فد مره تعارك علي ويه ابويه
لحكايتي بقيه 💕💕
لا احلل ولا اهب لاي شخص يرفع اسمي او اسم القصه
