#غربة_الروح
همس القوارير
بيج قصص همس القوارير
البارت الخامس
من طلع الدكتور وبلغنا بخبر وفاة امي انهارت اعصابي بالمستشفى وضليت اصرخ وادگ على وجهي ولج يمه ليش عفتيني ورحتي ولج يمه مالي غيرج ولج يمه بعدني عروس لو الفرح ميصيرلي يمه لو ادري هيج ما عفتج وتزوجت يمكن جان لحگت عليج وكضوني گوه خطيه تحسين حاضني ويبجي وياي لحد ما اغمي عليه ونقلوني لغرفه وخلولي مغذي وضربوني ابرة مهدئ جنت اتمنى اگعد والگاه حلم وامي يمي بس للاسف مرت عليه ايام ما يعلم بيها بس الله صعبه فقد الأم وهي جانت كولشي ألي عبالك دنتضر زواجي وتطمئن عليه وبعدها تفارگني وتروح ياريت اني الميته ولا هي بقيت بيت اهلي ايام الفاتحه وبيت امي فارغ ومكانها ومكينتها والبيت حسيت بيه بارد وموحش مگدرت ابقى بيه ثالث يوم الفاتحه بليل رحت لبيتي وتحسين واگف وياي وما قصر حتى فرحتنا راحت وصارت حياتي ماصخه دائما تحسين يعذرني ويصبر عليه ويواسيني احاول اتجاوز المحنه واكون طبيعيه اگول هو عريس مسكين شنو ذنبه بس من اختلي بنفسي اگضيها بجي لحد ما گدرت شويه اسيطر واتحرر من الحزن وارجع لحياتي ومخلوني البس اسود ولا احزن بس اربعين يوم لان بعدني عروس المهم سنه كامله مرت على وفاة امي واني وخواتي ما عفنا ابوي واخواني نطبخلهم ونروح لبيتهم ونغسل ملابسهم ونضف مخليناهم يحتاجون شي ورى السنه ابويه وده علينا وگال اريدكم بسالفه
وتفاجئنا بيه
مصطفى
والله اني اريد اتزوج لان ما اگدر اعيش من غير مره واني احتاج احد يخدمني ووياي بالبيت وانتن ملتهيات بحياتكم وبزواجكم
نغم
بويه نزين زوج محمد لو علي ليش انت
مصطفى
لا بعدهم مو مال زواج اني اتزوج اني اريد مره والي ميعجبه الباب يوسع جمل
بصراحه بجينا اني وخواتي لان امي مصارلها هواي من توفت ومنگدر نتصور ندخل للبيت وحده ماخذه مكانها
بس شنسوي حكم القوي عالضعيف
طول فترة حياتي واني الرجال الشايب الي شفته بالامام ممفارگ خيالي وكل ميصير بيه موقف اتذكره وصدگ بكلامه من گال راح تفگدين اعزاز گلبج عدت ايام وسمعت من اخواني ابويه خطب اخت صديقه وما طول شهر اله رتب غرفة امي وتزوج بيها صارت طبتي للبيت صعبه رحت على مرتين مدري تلاثه شبعت بجي وقهر گمت اودي على اخواني واشوفهم بالبيت وتعدت سنه ونص واني لا حملت ولا شي
ام تحسين
يمه نغمه ما نروح نراجع للدكتوره ونشوفج شخيرج ليش ماكو حمل لحد الان
نغم
اي يمه عادي شوكت ما تردين نروح
ام تحسين
