#غربة_الروح
همس القوارير
بيج قصص همس القوارير
البارت الثامن
كعدنا ننتضر بقاعة الانتضار وطبعا مو على نار گاعده لا گاعده على بركان تمنيت ادخل اول وحده واعرف شنو سالفتي اشوف تحسين يكوم ويرجع يگعد يروح يم الموضف ويرجع تالي ورى نص ساعه يلا دخلنه گعدنا گبال الدكتور ومنتضرينه يحجي شاخصه عيونه عليه انطيناه التحليل فتحه وضل يباوع علينا
الدكتور
هذا الي جنت خايف منه بنتي انتي عندج الخبيث ولازم عمليتج باجر نرفع الثدي مالتج
هنا صدمه تحسين غمض عيونه ودنگ واني اباع لتحسين وارجع اباع للدكتور من غير ما احس الدموع تجري وحاره يمكن نزلت بيها روحي اوووف ياربي
تحسين
وشلون اعرف اذا منتشر لو لا
الدكتور
من نشيل الثدي مالتها راح ناخذه ونزرعه ونشوف اذا منتشر لو بس بكول الاحوال لازم تاخذ كيمياوي ان كان منتشر يخليها فتره اكثر عايشه وان كان ممنتشر راح يوقف انتشاره
تحسين
وشوكت العمليه
الدكتور
باجر الصبح ضروري متقبل غلط لان الخبيث سريع الانتشار ولازم نستعجل
تحسين
ماشي دكتور باجر جايينك
كتبلنا ورقه دخول للمستشفى وطلعنا منه وگانما فد شي ضاربنا ضربه قويه بحيث مبينا حيل نشيل روحنا اني اباوع على تحسين عيونه حمره نار وكل شويه يفرك بيهن واني الطريق كوله ابجي وصلنا للبيت دخلنا اول ما فتت للبيت رحت لعمتي حضنتها وابجي ونمت بحضنها وابجي بعلو حسي ودخل وراي تحسين
ام تحسين
يا يمه شبيج شجاج تحسين يمه شخيركم شبيها نغم
تحسين
يمه جنا عند الدكتور وطلع بيها مرض خبيث
ام تحسين تبجي وتدگ على وجها
يمه ولج يمه عزه بعيني منين اجاج يمه نغيمه ولج بيه ولا بيج والله بيه اتحمله اني خلص وكتي يمه بنيتي جهالج بعازتج يمه
وتحضني كل حيلها وتبجي وساعه تلطم وساعه تبجي لحد ما طاحت واجه تحسين طش بوجها مي وگعدتها على حضني وبعدها تبجي تحسين خابر على اخواني وخواتي بلغهم لان لازم وحده منهن تروح وياي للمستشفى اجن كلهن يدگن ويلطمن ويبجن حتى اخواني يبجون صارت عدنا فاتحه بدون ميت واتفقنا زمن تبات وياي بالمستشفى بس كلهم يردون يحضرون العمليه بقوا لساعه متاخره من الليل واحنا بجي ونحيب لحد ما راحوا وهم يبجون عليه اني هم تعبت حيل ما ادري من البجي ما ادري من حالي خطيه جهالي ميعرفون شنو المرض ويبجون من يشوفون العالم تبجي من طلعوا الناس گالي تحسين صعدي نامي وارتاحي باجر وراج عمليه الساعه بالتسعه الصبح ونطلع من السبعه علمود نكمل تحاليل اخذت الجهال نومتهم واغطيهم وابجي يمه خاف ما اشوفكم بعد سوده عليه شلون راح تعيشون من غيري منو راح يحس بيكم منو يغطيكم لو بردتو ا واذا تمرضتوا منو يسهر عليكم ومنو يفرحلكم من تنجحون وتزوجون ياربي ليش اني لا اعتراض على حكمك بس والله بعدني مشبعت منهم ربي انت ارحم من الام على ولدها ارحم بحالي دخل عليه تحسين وشافني ابجي حضني وگام ينحب ويبجي اني اصرخ بخنگه تحسين ما اريد اموت ما اريد اعوفكم والله احبكم والله هذولي بعدهم بحاجتي ما اگدر اعوفهم وتحسين يزيد بالبجي
تحسين
نغم خلي ايمانج برب العالمين جبير وارمي حملج عليه والله ميعوفج واذا شالو صدرج شنو يعني اهم شي انتي سالمه وكون ما منتشر ادعي ربج ما ينتشر امشي وياي بالغرفه توضي وصلي وادعي عسى ولعل يستجاب دعائج
ورحنا للغرفه واني دخلت للحمام اسبح ودموعي اكثر من المي يجرن وطلعت وتوضيت وگعدت الليل كوله اصلي واندعي صدك الانسان ميلجأ لرب العالمين اله وكت الحاجه الى ان طر الفجر ونمت شويه عالسجاده مالتي وتحسين الليل كوله منامه يتگلب عبالك نايم على جمر مو فراشه گعدت الصبح بالسته لگيته مغطيني ونازل جوه خليت غسلت ونزلت لگيت عمتي همين منايمه
ام تحسين
تعاي يمه گعدي شوفي هذا علگ من ابو فاضل خليه بيدج يمه لا تنزعينه
نغم
ان شاءالله يمه
تحسين
يلا گومي بدلي خلي نروح ونزعي ذهبج لان ميقبلون يدخل لصالة العمليات
صعدت فوگ بدلت ولبست عباتي وعبالك رايحه يذبحوني فتحت باب غرفة الجهال ودخلت بستهم واحد واحد وابجي نزلت سلمت على عمتي عفتها تبجي وطلعت وصلنا للمستشفى بلسبعه سبعه ونص خواتي واخواني كلهم اجوي وخوات تحسين همين اجوي نملت المستشفى من اهلنا كملت تحاليل ودخلت صالة العمليات نمت على السديه واجه الممرض يسألني كم سؤال وضربني ابره وشفت الدكتور دخل للصالة بس گتله شلونك دكتور وبعدها محسيت بنفسي وراها گعدت على صوت تحسين وزمن يضربون بيه نغم گعدي نغم واني ما اگدر افتح عيوني الى ان شويه شويه صحيت
باوعت
زمن
الحمدلله على السلامه يا بعد روحي
واني اهز براسي مگدرت احجي
تحسين
شلونج هسه حبيبتي
نغم
الحمدلله. بس گوه طلعت
اجه الدكتور شاف الضغط ونبض القلب
لا تخافون ان شاءالله خير خلوها ترتاح لان جسمها خدران من البنج
رجعت نمت وما صحيت اله المغرب فتحت عيني لگيت زمن دتصلي اباع عالغرفه صغيره بيها سرير اني نايمه عليه وبيها مثل القنفه بس مبيها تكيه للمرافق الي ويه المريض وثلاجه صغيره وكبت بيه جرار وعليه ادويه ومشكليلي مغذي كملت زمن صلاة
زمن
هلا حبي صح النوم شلونج هسه
نغم
الحمدلله وين تحسين
زمن
مقبلوا يبقونه هنا لان خلاص غلقوها المستشفى ومنعوا لزيارات باجر يجي
نغم
اي احسن خلي يروح يم الجهال ميصير لا اني ولا ابوهم يمهم
زمن
لا تخافين عليهم كلهم زينين بس انتي شدي حيلج ويانا
نغم
الله كريم
ثاني يوم اجه تحسين من الصبح واجتي وياه اختي ريم واخوي محمد وهمين گوه دخلوهم واجوي شافوني وطمأنوا عليه وبقوا يمي منا للضهر وراحوا وتحسين مراح بقى يمي بقيت بالمستشفى تلاث ايام وبعدها طلعوني بهاي الفتره مگدرت اخلي ايدي على صدري محبيت اشوف نفسي هالشكل رحت للبيت وتلگتني عمتي والجهال يتضاهرون هم فرحانين بسلامتي بس اشوف عيونهم كولها حزن ودمع بقيت نايمه بالفراش وخواتي وحده تروح وحده تجي يخدمني وجهالي يمي بعدها راح تحسين للمستشفى وگالوله الحمدلله گدروا يستأصلون المرض والمرض ممنتشر باقي جسمي بس لازم اضرب كيمياوي وحددولي موعد الاسبوع الجاي يوم الاحد عمتي خطيه ذبحت ذبيحه على سلامتي وبده وضعي يتحسن شوي بس مكدرت اشوف نفسي بالمرايه كلما اباوع اكو نقص بيه متحملت ابجي بحرگه ومرات اتجنب اشوف روحي بالمرايه بعدين متحملت ضليت اخلي قطع قماش وسفنج حتى اساوي صدري وميبين اكو نقص احس هالشكل اريح ألي والمقابل محبيت اشوف نضرت الشفقه بعيونهم بقت حياتي طبيعيه وبقى تحسين يواسيني ويحمد الله ويشكره ان المرض ممنتشر الى ان صار موعد الكيمياوي
لحكايتي بقيه
لا احلل ولا اهب رفع اسمي واسم القصه
