حضنه احتواني

البارت الاول

حسين ولك عباس يله استعجل مو تاخرنه

عباس يي جاي بالطريق انته وين هسه

حسين بالمحطه يمعود الشباب صار ساعه واكفين

عباس يي جاي ولك بس مسافة الطريق

حسين يله الله وياك

بقينه منتضرينه ربع ساعه وصل واحنه كنه بحالة خوف خاف يوصلونه ونروح بيها شويه واجه عباس بسرعه اخذنه الجوازات والاوراق من عنده وصعدناهم للقطار

سامر والله ماعرف شلون اشكركم ع هاي وكفتكم ويانه

حسين ولك احنه خوان شلون مانوكفلكم

علي حبيبي حسين ديربالك ع اختي وامي اريدك تنتبهلهم زين فدوه اروح لطولك

حسين حبيبي لتخاف عرضك هو عرضي مثل ماخاف ع خواتي اخاف ع اختك وامك

عباس يله ولكم اصعدو بسرعه كبل لمحطة بغداد هناك تلكون يوسف والربع منتضرينكم وع اول طياره تصعدون كبل للامارات ولحد دره ولحد سمع

سامر وووف كله مني اني صوجي لو ماشارب بساعتها ماصار الي صار وماورطتكم وياي

علي الي صار صار بعد شنسوي

حسين يله يله روحو بسرعه عوفو الحجي واول ماتوصلون خابرونه

سامر انشاء الله يله مع السلامه

ودعناهم واني گلبي مقبوض عليهم خاف يصيرلهم شي يارب انته الغفار الرحيم ارحمهم برحمتك ساعدهم يطلعون من العراق باسرع وقت

رجعنه اني وعباس للبيت ساعه 3 الفجر كبل لبيوتنه بدون مااحد يحس علينه والله بليلتها ماكدرت انام احس روحي مقبوضه ع صحباني خاف يصيرلهم شي

الصبح كعدت تريكت وي اهلي وطلعت للشغل اني وعباس فتحنه المحل وعدلنه البضاعه وي الصانع وبدينه نسترزق بعون الله

خلوني اعرفكم عن نفسي اني اسمي حسين من سكنت البصره عمري 28 سنه خريج كلية اداره واقتصاد وماكو تعينات بهلوكت ف فتحتلي ماركت عائلي جبير اني وصديقي عباس نشتغل بي والحمد لله حالتنه كلش زينه احنه عائلتنه معروفين ناس اجاويد وكرام وعدنه خيرات من الله عندي 4 اخوان اخوي الاكبر مني منير عمره 37 عنده شركة انشائيات بالبصره متزوج وعنده جهال 3 ولد ثنين وبنيه وحده واخواني البقيه صغار يدرسون بالمتوسطه ثنين وواحد يدرس سادس اعدادي ماخالين علي اي شغل بس دراسه لئن والدي يريده يجيب طب وهو شاطر وعندي خوات 3 كلهن متزوجات بس وحده نور ارملة عدها طفلين ولد حسن و عبد الحسين بالابتدائيه ....طبعا اني مربوع جسمي العب حديد بين فتره وفتره ماملتزم بيه طولي 180 وبشرتي حنطاويه عندي لحيه محدده مثل الخليجين وملامح وجهي بشوشه اضحك للهوى لكن وكت الجد ماعرف امي وابوي

صارت حادثه قبل يومين وي ابن خالتي سامر بغداد كان طالع سفره هناك هو وعلاوي صديقنه احنه كنه 4 اصدقاء مقربين كلش ف اي شي يصير كلنه نتعاون بي