نوارس مهاجره

نوارس مهاجره ٤٠

السلام عليكم
حاولت انشر على الفيس ميحمل
#نوارس_مهاجره40
#زينب_الموسوي
الجزء لثاني

نهضنا من مكانا... متوجهين  لغرفة روان 
صعدنا الدرج   ..وفتحت ا لدرج الي  وضعت المذكرات فيه
وطلعت المذكرات
وگعدت بالارض اگلب الاوراق ب سرعه 
اريد اوصل  للسطور
عيوني تقرا سطر  وتعبر سطر

لحد وصلت لجمله كاتبتها

( وصلني تحسين لكندا  لبيت اخت رعد اسمها ام زهراء )
قريتها لرعد بصوت عالي

: يعني  تعتقدين موجود عند ام زهراء

: انت شتكول 

: احتمال قوي. يلجأ ل اخته تربي بنته  وترعاها  وبنفس الوقت  يعمل  بكندا  عند العرب
ومراح   الدوله  تحس  بيه

: لازم  نعبر  لكندا. ونحجي ويه اخته

: قبل  هذا ناخذ  العنوان من تحسين
ونفهمه  مجرد  زياره  تعارف

: حبيبي  هذي  عليك  انت تقنعه

: بسيطه  باجر  اروحله
للمحطه الي يعمل بيها
واذا حصلت العنوان اجي عليج اخذج

: واخذ ماما  ويانا.يمكن من تشوف حالها  تحجي  وتدلينا عليه

: اوكي اتفقنا
دكومي  هسه انام  لان بديت اغفى واني گاعد

: مااعتقد راح اگدر انام
ابقى للصبح افكر  واتامل
مااصدك اشوف نوارس واخذها بحضني مثل ماكنت اخذ روان بحضني

: دگومي فكري وانتي بالسرير

نطرت الصبح  وعيني على ساعة الموبايل
ادعي بداخلي  ميخيب املنا
( ياربي هذا  اخر امل
يارب. لخاطر. الطفله
ساعدنا يارب )
صارت بالسته  الصبح  سمعت صوت  ماما طلعت من الغرفه
تسحبت من افراشي
حتى ليگعد طلال
ورحت اشوفها 
دخلت للحمام  تتوضى
وطلعت عيونها وارمه. وگوه تمشي
باوعتني  وحجت  بصوت مبحوح

: تعالي قيسي ضعطي

: حاضر. ماما

بين  مدخلت  وجبته  لگيتها على سجادة الصلاه راگعه  وتبجي
خلصت  اقتربت منها  وگعدت
خليت  الجهاز  على ايدها. وانتظرت  صوته  يسجل  القراءه الاعلى

: ضغطج صاعد. لازم تاكلين وتاخذين العلاج

حضرتلها الريوك   وجتي على الميز  تاكل  بلا واهس
وحتى اساعدها. وابث الامل داخلها. حجيتلها عن روحتنا لكندا

:  شوكت  تروحون  اروح  وياكم

: فد  شويه يگعد  طلال. ويروح على تحسين لعمله

؛ اني اروح على تحسين
وابوس ايده ورجله  همين
بس ينطيني العنوان

: ماما  حتى بلا عنوان  هم  نعبر لكندا  ونسال   (بونزر )
عن ام زهراء  ارمله عراقيه عايشه لوحدها. اكيد نلگه ناس تعرفها