نوارس مهاجره

نوارس مهاجره ٣٠

#نوارس-مهاجره30
#زينب-الموسوي

الجزء الثاني
السلام عليكم ... حبايبي

(اعتذر عن اي كلمه خادشه للحياء  راح تكون  في سياق هالجزء 
وذلك لكونها حقائق تاريخيه لايمكن تغاضيها لتاثيرها على شخصية طلال اعتذر مره ثانيه )
💔💔😭😭
———————-

ملاك

الهدوء اهنا راح يفترسني ...
صوت سياره مااسمع... بشر ماكو
والثلج مغطي المزرعه... اني بنت مدينه طول عمري عايشه بيها
واحب صخبها... واسواقها ..وغبارها... وشوارعها المزدحمه

اهنا مافي شي جديد يصير كل يوم يشبه القبله ...
وصوت الديوك من الفجر سببلي ارق... اظل انتظر شوكت يصيح وبعدها انام... وساعات النهار. ملل قاتل  بعد مداوم واثق
. وتركني بالمزرعه... يرجع الساعه اربعه العصر... واول سوال يساله من يدخل

: طلعتي للمزرعه شفتي العمال شيسوون

: طلعت  شفتها  ماكو جديد الاشجار بمكانها.... والدجاج يبيض
والكلب  يركض وراي بس يشوف خلقتي

: واضح الملل عليج  من نبرة صوتج

: ملل وبس. ...اختنكت
احنا عرسان المفروض نطلع نسهر

: باجر اخذج لمطعم ريفي اجوائه كلش حلوه

: لا دخيلك مااريد الريف 
اخذني ل اهلي اشوفهم واسولف وياهم... افتر بالشوارع

: مثل متحبين

حجى الجمله وهو خاطره مكسور.

ومن گعد يتغدى مجاب طاري المزرعه مثل كل مره

: حاسه زعلت من كلامي

. لا مازعلت  عادي
مااگدر اجبرج على حياة متريديها

: مو مااريد الحياة وياك

ركز  عليه ...  وكانما  يريد يسمع. دفاعي  عن وجهة نظري
وبلا  وعي مني اندفعت بالكلام

:مااريد الريف. ..والمزرعه ...والبيض الطازج ...والحليب الطبيعي ميه بالميه ..والخضروات الي تجي بترابها

متعوده على كلشي اصطناعي ...
وعلى صوت الناس ...وصوت سيارات
واضوية...  ومحلات للصبح مفتوحه...  متبعد عن البيت غير دقايق
الفره بالمول... والسهر
ومنظر الناس ...والطلاب الصبح متوجهين كلمن لوجهته... وازدحام... وهورنات

سحب  ايده  من طاولة الاكل .. وهو يذكرني بالاتفاق

: احنا اتفقنا. قبل الزواج تقسمين الاسبوع بين اهنا وهناك

: ان شاء . احاول

ترك الاكل وهو  ياكد عليه  اتعود

؛ لازم تتعودين ملاك هذا زواج مو عمل واتركيه... اذا معجبج