"درررهنلي كبدي وصبت عمتي فاطمة وتبي تديرلهن حاجه صبيت معاها"
انا :-عمتي خليني ندير
عمتي :-شن تعرفي اديري
انا :-شن رايك ندير بسبوسه
عمتي ابتسمت :- الله يربحك غير نا مانعرفش نديرها
"ابتسمتلها ودرت بسبوسه وعمتي ردت قعدت تهدرز معاهن....طابت البسبوسه ودرت معاها نسكافيه وقعدنا ناكلوا فيها ونهدرزوا نواره قالتلي"
نواره :-اسمعي من بدري نشوف في حسام يبحت فيـك...اممم مش عارفه عندك علم انه ع علاقه معايا ولالا؟
انا انصدمت وتعصبت :-انا حساام ماعمرري فكـرت فيه ومش سمعتي عمتي توا قالت معطي فيها كلمة ولالا!!!؟
نواره انحرجت :-اا ماهو...اها باه
نهال :-عندك صورة خطيبك؟
انا بحتتلها عالجنب :-لأ
نواره :-هييي ماتقوليش رواده!!...تؤتؤ مسكينه
انا :-هه لا ع علاقه 4 سنين
نواره ونهال :-اا اها
"درهن كبددددي ومشن ونا خشيت الكوجينه وطلعت منذر غمزلي...غميت عليه وروحوا وقلت لعمتي"
انا :-عمتي ليش قلتيلهم اني بنت خوك...سيورهم يعرفوا انها كذبة
عمتي :-لالاماتخافيش خوي محمد ماعمرهش جـاء هنا ومايعرفوهش
انا :-اها "ونزلت راسي" حـتى بابا اسمه محمد
عمتي :-والله!!!
انا تنهدت :-والله
حسام خش :-ياسجى ماتاكليش هم ومشكلتك توا نحلـوها بإذن الله...انتي غير وكلي امرك لله
انا بحـزن :-ونعم بالله
حسام يفكر بينه وبين نفسه (اااخ وخلاص مش عارف ليش هالبنت خذتلي عقلي...بس...بس مش بنت ومرات قصتها تقعد كذب ومرات تقعد بنت ليل...استغفر الله!...لالا بس عيونها مايقولنش هكي...اوووف حتى نا فاضي نحكي هكي)
"شفت لمعاذ بحتلي بنظرة مش مفهومة وتنهد وخش...قعدت نحكي نا وعمتي وخانقتني العبرة ونتذكر في هلي وذكرياتي معاهم...تنهدت من وسط خاطري وقعدنا نهدرزوا لعند اذان العشاء"
عمتي :-نمشي ندير العشاء
انا :-لالا والله ماتقربي حاجه ياعمتي...توا ندير نا
عمتي :-الله يربحك
"حسام كان قاعد في داره سمع كلمة عمتي ابتسم وقعد يتذكر في ملامحها"
"مشت عمتي تصلي ونا خشيت الكوجينه وقعدت ندير في العشاء...درت رز بالتقليه و3 انواع سلاطه وخش حسام للكوجينه"
حسام :-الله شنو البنة السمحه هذي
"ابتسمت بخجل"
حسام :-شن دايره
أنت تقرأ
غلطة دمرت حياتي
Mystère / Thrillerرواية باللهجة الليبية للكاتبة سرو الحاسي تحكي ع"سجـى" البنت اللي غلـطت غلطة كبيرة فـ حبها لشاب دمر حياتها وخلاهـا تخسر اثمن شـئ عندها وتهرب ويصيرن معاها احـداث كثيرة وشيقة...زعما شنو يصير فيها؟..كله حتعرفوه مع احداث القصه...|❤لا اسمـح بنقــلـها ❌
