#لذة_انتقام
بقلم #روز_الفياض
ج٣
الكآبة جانت بأقصى درجاتها ...
البيت وحشة ..
واللي زاد الطين بله انه منكدر نحجي لامي ..
لزوجته ... انه زوجها اتوفى ...
اتوقعوا عدكم عزيز الله ياخذ امانته وميكلوللكم ..
شعور مؤلم ..
جدا مؤلم ...
محد يكدر يحس بي بس اللي مار بي ...
اتخيلوا تعرفون بعد ماتمر فترة ...
ياترى تكدرون تصدكون؟
لا ...
تكدرون تتحملون الخبر والصدمة؟
لا ..
شلون امي المريضة تكدر تتحمل هيج صدمة ...
هي جانت المريضة على فراش الموت وهو مابي شي ..
هي جانت متوقعه تموت ..
لذلك اتفقنه كل احنه على انه امي مالازم تعرف عالاقل بالوقت الحالي ..
راح كمال للشيخ وسأله اذا امي بهيج حاله واجبه عليها العده ..
لكن الشيخ كله اذا وضعها الصحي ميتحمل هيج خبر ماله داعي تعرف والعدة غير واجبة ..
امي بهالفترة نقلناها من بيت خالي لبيت خالتي لان خالي جان ملتهي ويانه ميكدر يعوفنه بحدنه ..
قررت ابدي ادرس حتى امتحن ...
حاولت وكلت الباقي على الله ..
نفسيتي جانت حيل تعبانه ..
خواتي يوميه وحده زوجها يجيبها يمي تبقى لان يعرفون اني اكثر وحده جنت متعلقه بابوي ...
مر كم يوم ورجعنه كل اسبوع تروح وحده تداري امي وتخدمها ...
امي : ولج سارة ليش هيجي .. ذبيتوني انتي وخواتج واخوانج ومتسألون عني ..
سارة : ماما شسوي جاي ادرس للامتحانات مو تدرين طلعت بدرسين ..
امي : لا هذا مو عذر .. وابوج هم شبي ذبني وماسأل عني يريد حجه حتى يخلص مني ...
ماغزرت بي العشرة ... ليش..
سارة : مريض والله مو كل مانجي من تسألين يكلولج مريض..
امي : لا مو مريض كلبي كارصني ... اكو شي .. ميعوفني هلكد هو ميسأل عني .. كلبي كارصني ..
سارة : ياماما هسه انتي بس صيري زينه مالج علاقة بأحد ..
امي : آخ من ابن آدم آخ .. ليش هيج متسأل عني ليش؟ شقصرت وياك ...
كل شويه تظل تبجي وتبجيني وياها ..
واستمر هالوضع وامي حالتها مابي اي تحسن .. وكل طبيب تروحله يكول مرضها ماله علاج ..
تشمع الكبد ماله كل علاج لان الكبد ميشتغل ميأدي وظيفته بالجسم .. هذا ابسط شرح لوضع امي ..
وجانت مصرة ترجع للبيت ...
امي : محمد وديني لبيتي ..
خالي : لا وين اوديج لبيتج ... تعاي عندي فرغتلج الديوانية ورتبتها الج ..
امي : لا محمد لا ... هذا متزوج علي ... اعرف بس انتو متردون تحجون .. لازم اروح لبيتي .. كلبي كارصني .. اكو شي صاير من وراي ... ميعوفني هو كل هالمدة لا اكيد اكو شي .. متزوج علي يمكن .. متزوج ..
خالي : يمعودة وين بي حيل يتزوج هالرجال المسكين .. وبعدين انتي تعرفين شكد يحبج ومدللج بس شلون يتزوج عليج ... عوفي الرجال مريض يصير زين ويجليج وانتي هم صيري زينه وارجعج لبيتج يمه ... هسه ماارجعج منو يداريج هناك يحتارون بيج لو بي ...
صل على نبيج واستهدي بالرحمن ...
امي : اللهم صل على محمد وآل محمد .. ياربي خير ان شاءالله ياربي خير ...
اسمع وابجي ... حاسة اكو شي مو طبيعي لان من حبه الها تعرف مستحيل تمر كل هالفترة وميجيلها ويطمئن عليها ...
