#لذة_انتقام
بقلم #روز_الفياض
٩
بعد ماشفت رافد وشافني وعلى كولته هو موافق ..
حسيت اني مامرتاحة ..
جان عندي احساس بالخوف فضيع .. لكن جنت اشوف الكل موافق ومتشجع ..
خالتي اتصلت بيه حتى تقنعني بعدما اتصلت بيها هدى وكلتلها على انه اني مترددة ..
بما انه اني مطلقة حسب حجيهم وعندي ولد فأكيد ماراح احصل هيج فرصة واحد قابل بأبني وحسب كلامه هو متكفل بي وماعنده مانع يحسبه واحد من اولاده ...
بنفس الوقت قابل وموافق يخلي بيت وحدي يم اهلي وميسكني ويه زوجته الاولى ( ضرتي )..
ظليت محتارة اقبل لو ما اقبل ..
بهالاثناء اخواني بدوا يسألون عن رافد بالدوام ( بمكان عمله ) وبمنطقتهم ..
كل مره جانوا من يرجعون يحجون نفس الحجي وهو:
والله لحد الان الكل يكول خوش ولد ومؤدب وماعنده زايدة وناقصة .. رجال يروح بطريقة ويرجع بطريقة ..
ماعنده اذية على احد ولا عنده مشاكل مع احد .. ناس بحالهم وماعدهم احتكاك باهل المنطقة والجيران ...
سارة : ماادري بس اني مامرتاحة ... حاسة بخوف ماادري ليش خايفة ...
كمال : طبيعي تخافين كل اللي عدهم تجربة زواج اولى فاشلة يخافون بالزواج الثاني لذلك لازم الانسان يفكر كللش زين ويتأنه ويسأل قبل ميقرر يوافق او يرفض ..
جنت بكل صلاة ادعي ربي يوفقني بهالزواج ... واذا الزواج مو زين يخلي كدامي عقبات وعراقيل ويهيأ الاسباب حتى ميتم هالموضوع ...
لكن لو بي خيره الي ولابني اتمنى يهديني ويخليني اوافق ويسهل امري ..
جنت منتظرة اشارة او دليل اي شي يخليني ابطل وارفض واكدر اقنع الكل برفضي اكثر مما جنت منتظرة اشارة لتسهيل هالزواج ..
استمر سؤال حسام وكمال عن رافد مدة طويلة حتى يتأكدون انه خوش انسان ويتأمن علي وعلى ابني ..
الى ان سألني حسام عن رأيي ..
بهالفترة سمعنه ام رافد اتوفت ...
حسام : ها سارة شكلتي؟ قررتي لو بعدج؟
سارة : والله ياحسام .. ماادري .. الخوف ماكلني ... ممرتاحة وهسه من سمعت امه اتوفت الله يرحمها صارت عندي كآبة ... مو جنها هالزواجه مو زينة وهاي اشارة من رب العالمين حتى منوافق ...؟ يعني اشوفها هيج ..
حسام : شهالحجي ... هذا الحجي حرام ..هذا تطير وتشاؤم وانتي تعرفين التطير حرام ... استغفري ربج هي المره جبيرة بالعمر ومريضة من الاول ... كل احنه نموت قابل موتنه معناها اشارة مو زينه .. استغفر الله .. لاتظلين توسوسين حرام ...
بعد كلام حسام حسيتهم كلهم موافقين وكل مااحجي يكلولي طبيعي خوفج وحرام تتشائمين وحرام تحجين هيج ..
خفت من نفسي .. خفت انه اكون فعلا جاي اشيل ذنب بكلامي هذا وخوفي ...
استغفر الله ... الله سبحانه وتعالى يكول ( انا عند ظن عبدي بي ) ...
شنو اظن الله راح يجازيني بنفس ظني ... استغفري ربج ياسارة واتفائلي والله يجعله زوج صالح الج واب حنون صالح لابنج ..
