#لذة_انتقام
بقلم #روز_الفياض
ج١٨والاخير
وبدينه بأجراءات العقد ..
يوم نروح ويوم يغلس بحجة عنده شغل لو دوام وميكدر يغيب ..
حاول بكل الطرق انه يخليني انسى موضوع العقد .. حاول يغلس بس اني هالمرة جنت مصرة بس هم ماكملة ...
اول مارجعت طلعت ملابسي وحركتهن مو كال ملابسي ضيكه ومااستحي امشي بيهن كدام اخوه الشفيه ..
خلص معناها احركهن ...
بقى هو اسبوعين وهو على اساس هاملني ويروح ينام يم ضرتي واني بصراحة وصلت لمرحلة مااهتم اصلا خفة وراحة لكن بعد هالاسبوعين ظل يحاول يتقربلي ..
ومن نفسه راح جاب فراشة واجه نام يمي بالغرفة ..
الظاهر جان عباله من ينام يم ضرتي راح اغار او اتندم واتحسف واظل ادور رضاه واهتم لزعله ..
بس اتضحله العكس ..
ظل يتلزكلي ويحجي وياي ويتشاقه واني هسه الحاكرته ..
ويومية واجه هيج وصلنه بالبناء وهيج جبت للبناء وهيج اشتريت بيبان وهيج شبابيك ..
سارة : زين خليني اروح اشوفه؟
رافد : لاا
سارة : ليش؟
رافد كيفي ..
واستمر هالوضع فد شهرين الح على موضوع البناء والبيت وهو ميقبل يوديني اشوفه رغم هو يكول مو بعيد عن بيت ضرتي .. وصلت مرحلة اقتنعت انه هو يجذب علي لاباني ولاهم يحزنون ..
وواجهته:
انت كول ماباني ولاحاط طابوكه ..
رافد : اي وماراح ابني ..
سارة : اي ليش مو هذا اتفاقنه ؟
رافد : وهسه بطلت مااريد ابني ..
سارة : والفلوس ؟
رافد : يافلوس ؟
سارة : حصتي من بيت ابوي اللي انطتكياها بعد يافلوس ؟
رافد : ماعندي صرفتهن ..
حسيت نفسي راح اتخبل بس اجبرت نفسي اسكت حتى يكمل عقد الزواج بالمحكمة لان لحد الان مكامل باقي على فحص الدم حتى توقيع القاضي موقع عليه ...
وهم ماقبل نروح نكمل العقد ..
ولايقبل يخليني اروح انزل لاهلي اشوف ابني حسيت هو اللي كايل لاهلي مايريد ابني لذلك كلولي خليه ..
كرهت نفسي كرهت خالي اللي ورطني بزواجي من محمود وهالمره من رجعني غصبن عني لرافد وفوك هذا لزك الا انطيه فلوسي ..
راحن الفلوس وبقى كلبي محروك عليهن لان هذن الفلوس المفروض بنبني بيهن بيت بي ضمان الي ولابني ...
ضرتي حسيتها هالمره من رجعت عبالك جانت تريد تخلص مني حتى جهالها ميحجون وياي ويتجاسرون علي وهي مترهم ولاتكول عيب ...
مااعرف هي طيبة لو جان تمثل علي دور الطيبة مااعرف رافد خلاها توصل لهيج مرحلة ...
يجوز تغار عليه مني يبقى زوجها بس شعاجبها بي وبعيشته ..
المهم وصلت لمرحلة طكت روحي بعد مااتحمل ..
كتله:
رافد هالمره اذا نزلت لاهلي بعد ماارجع تره والله طكت روحي هاي مو حاله لابيت لاعقد لاابني شطلعت هاي المن باقية وياك اني بعد ..
رافد : والله عقلج زغير وتدورين مشاكل
سارة : هسه صرت اني ادور مشاكل لو اسكت يعني واكل تبن لو من احجي اطلع ادور مشاكل وعقلي زغير ..
رافد : هسه مو احبج ومدللج شتردين بعد شناقصج ؟
سكتت لان بس احجي اضل اغرد .. مدللني وشناقصني ويحبني ...
جنت ناويه اذا اروح لاهلي فعلا ماارجع الا اذا يكمل العقد ويبدي يبني البيت يالله ارجع ..
وفعلا بعد كم شهر من المحاولات والتواسيل قبل اروح اشوف ابني ..
جنت اشبع بجي من اخابره ويظل يسألني ماما شوكت راح تجين ؟ ماما شوكت تأخذيني؟ ماما اشتاقيتلج ...
وبس رحت لاهلي كتلهم ماارجع بعد كتلكم ماارجع وخليتوني ارجع بالكوه هاي راحت فلوسي وفلوس ابني وجذب ماسوه شي وحتى العقد ماكمله ..
بقيت عد اهلي كم يوم وانوب هو خابر علي يسألني شوكت ارجع كتله :
ماارجع ..
رافد : ليش بالله ؟
سارة : كتلك رافد طكت روحي اني هم بشر وانت بس حجي كل فعل ماكو العقد وماكو ماكملته بقى بس فحص الدم ومتعمد ماتكمله والبيت نفس الشي وهالمره لو تنطبك السما عالارض ماارجع اذا ما اثنينهن يتنفذن .. زين؟
رافد : لا مو زين .. وظلي عد اهلج لاترجعين بعد احسن توفرين اصلا ..
وسد التليفون بوجهي ...
وبقيت عد اهلي اكثر من ( ٣ ) شهور مااقبل ارجع هالمره جنت مصره عالطلاك لو ينفذ طلباتي وبما انه مايريد ينفذ فالطلاك احسن ..
بهالاثناء كمال اخوي جان رايح للعمره وبس حسام بالبيت وفد يوم راح للجامع ورجع لكه مخلين ورقة يم عتبة بابنه بيها تهديد محتواها :
اطلعوا من البيت والمنطقة لان اليوم بالليل نفجر البيت ..
