#لذة_انتقام
بقلم #روز_الفياض
ج١٤
وبديت افكر ...
شلون انتقم من رافد على كل هالاهانات ...
وجنت حاقده عليه اكثر لان جنت متأكده الموضوع مو موضوع تعليقات لاصدقائه وانما صاحباته عالفيس ..
جنت اشوفه لازم موبايله (٢٤) ساعة ..
ومن جانت اجي اكعد يمه جان يظل يصيح بدون سبب حتى يخليني اكوم من يمه واطلع من الصاله واخليه بحده ..
نفس الوضع جان ويه ضرتي ...
ومن سألتها :
شبي هذا قالب علينه وبس يصيح ليل نهار علينه ؟
آمنة : شبي بعد ..
سارة : يعني تعرفين؟
آمنة : ميحتاجلها فهم .... مصاحب بنات عالفيس وميريدنه نعرف ونشوف الحجي بينه وبينهن ...
سارة : عابت .. مايشبع شنو ... اثنين نسوان عنده بعد شيريد ... وتحت امره يأمر وينهى واحنه انفذ ... حسبي الله عليه من ظالم ... فوك مامتحملين ضيمه وعيشته واسلوبه هم ماعاجبينه ورايح يصاحب ...
آمنة : وهاي عرفتي صفة جديده بي .. حتى لاتستغربين ليش وافقت يتزوج ... متت منه اريد بس اخلص عسى ما يتزوج عشرة ماعندي مانع بس يعوفني بحالي ...
سارة : الله يسامحج ... خليتيني اتورط وياه ... بس هم اعذرج يمكن لو اني جنت بمكانج راح اسوي نفس الشي حتى اخلص منه ومن همه ...
آمنة : شنسوي ... عمر وخلص بالضيم والقهر هم ماينراد ... الشكوى لله ..
سارة : تره انتي كللش مستسلمة ..
آمنة : شسوي يعني ... مربوطه بي مااكدر اسوي شي هاي الجهال منو الها ... غصبن ما علي اتحمله واتحمل عيشتة وطيحان حظه ... منو يتحملني اني وجهالي .. عالتشوفيني لاشهادة لا وظيفة لا اخوان لا اب مجبوره اتحمل حتى المركب يمشي وجهالي يكبرون ... منين اصرف عليهم اذا اتطلكت متكوليلي ..
سكتت وصفنت افكر بحجيها .. حجيها صحيح شنو الحلو بعيشته .. ماكو شي ..
أذن معناها لازم مااربط نفسي وياه بطفل ..
ولازم اعذبة شوية مثل مااهاني وفضحني يحجي علي كدام اهله جذب وزور وبهتان ... بس شلون اشلع كلبك يارافد وانتي همك بس النسوان ...
انتقام جان على كدي بس برد كلبي شوية ..
قررت اول ماانزل لاهلي اشتري تليفون ثاني يكون حديث لان تليفوني القديم رافد اخذه بعد العركة والمشكلة اللي صارت وجابلي تليفون صرصور ...
وفعلا اول مانزلت لاهلي وصيت حسام وجابلي تليفون وفعلت النت بي ...
بقيت الليل كله احاول اسوي حساب فيس ...
وصار ...
ماادري شلون صار وضبط لان مااعرف اسوي مامسويه حساب فيس من قبل ...
يالله المهم صار ...
جنت اعرف صفحة رافد عالفيس ..
دخلت على صفحته وبديت اقرا التعليقات واشوف الاصدقاء ..
ماشاءالله اغلب الاصدقاء بنات والتعليقات كلها الهن ...
واكو وحده انتبهت على تعليقاتها كأنما عدها ميانه زايدة وياه فقررت قرار ثاني ...
وهو اني اكون من ضمن اصدقائه حالي حال الموجودات ...
ونشوف يارافد صلاتك وسبحتك وين موصلتك ...
دزيتله طلب صداقة .. اول مادزيته قبله ..
بديت اعلق على منشوراته وادوس بالحجي وياه بالتعليقات وهالشي طبعا جنت متعمدة اسويه حتى اشوف ردود افعال صديقاته ...
منو بيهم تغار .. منو بيهم تغلس ...
اللي تغار معناها عدها شي وياه .. واللي تغلس معناها صديقة عادية عالفيس لااكثر ولااقل ...
وفعلا نجحت الخطة ...
واول ما بديت اعلقله انتفضت صديقته ام التعليقات المايعة واللي اول مافتت للصفحة شكيت بيها من تعليقاتها اله ..
