#لذة_انتقام
بقلم #روز_الفياض
ج١٠
واستمر زعل حسام ووئام فترة طويلة ...
حاولت اصالحهم على بعض بس مانفع ...
حسام كان عنده استعداد كل شي يسووي حتى تقبل اعتذاره لكن وئام جانت مجروحة ...
حاولت احجي وياها اكثر من مره بس ماانطتني مجال دائما من تسمع اسمه تظل تبجي وتسد التليفون وتزعل ...
اخر شي وبعد محاولات كثيرة ... قررت اتركها فترة لحدما تهدأ وتنسى ...
مااكدر الومها موقف حسام وكلامه جان جدا جارح ...
اذا الانسان اللي تحبه ويحبك هيج يتخلى عنك بأول موقف واول اختبار معناها كل شي نتوقع من الغريب ...
جرح وئام جان جبير ... رغم محبتها لحسام ومعرفتها بمقدار حبه الها ... لكن ارجع واكول مااكدر الومها لان كلامه وياها جان قاسي ومؤلم ...
حسام جان اغلب الوقت حزين وضايج و وئام نفس الشي واني ضايجه عليهم ...
بهالفترة كمال اخوي انطه الموافقة على رافد وكذلك حسام رغم جان مهموم ..
وعلى ضوء موافقة الجميع واعتراضهم على كلامي وخوفي واحساسي وافقت ...
وتمت الخطبة ...
وجانت مختصرة ماكو غريب خواتي ومرت اخوي و وئام بنت خالتي وعمتي بلقيس ..
ومن اهل رافد محد جان موجود لان هو اصلا ماعنده احد بس امه واتوفت الله يرحمها ... لكن المفاجأة انه اجه وجاب مرته الاولى وياه ...
ظليت متفاجأة لكن من شفتها تتصرف عادي لاضايجة ولامقهورة ولا حسيتها متأثرة شوية هدأت رغم حسيت بقلق من برودها ...
هالقلق مااتبدد الا من اجه ابني حسوني وكعد بحضن رافد بصورة عفوية وفرحت من شفته باسه وخلاه بحضنه وبقى حاضنه ..
لبسنه الحلقات وكطعنه الكيكة وبقينه كاعدين نسولف ونضحك وحسيته مبهور بيه مامصدك عبالك اول مره يتزوج ..
بقت عيني على مرته متعجبه من تصرفاتها وبرودها ... واحجي بكلبي اكول اني لو بمكانها يمكن البس اسود واسود عيشته ...
بقوا هو وياها عالعشا اتعشوا وراحوا ... واني مستمره والف علامة تعجب واستفهام براسي ...
شلون عدها كل هالبرود منين الها نفس تبقى وتكعد وتتعشى وتسولف وتضحك؟
بعدما راحوا رحت نزعت فستاني وكعدت امسح للمكياج وخواتي يمي يسولفن ...
نوره : هاا سارونه بشري ..
سارة : اكول لاحظتوا الشي اللي لاحظته لو لا؟
هدى : شنو؟
سارة : مرته باررررده ثلج .. عبالك خطوبة اخوها لو احد من كرايبها لو يمكن واحد من الجيران ...
هدى : شلج علاقة بيها ..
نوره : بس لا انقهرتي عليها ؟
سارة : لا قصدي شنو هالبرود العدها يعني اللي يتزوج عليها رجلها تكلب الدنيا وتزعل ويجوز تطلب الطلاك ... بس شو هاي عادي عدها الموضوع تسولف وتضحك واتعشت ولاعبالك رجلها لا وجاية برجليها وياه للخطوبة ... يعني ماجاي استوعب ...
نوره : اكو ناس حساسة تفكر بكل شي وتنقهر على كل شي مثلج يعني ... واكو ناس الله خالقها بارده متتأثر بأي شي يصير ويه الناس اللي حواليها ... عادي تره ...
سارة : لامو عادي هاي مسألة غيره شي بالفطرة موجوده بالمره ...
نوره : على كيفج لاتستعجلين يجوز المره فطيره ويجوز خبيثه وتمثل ... شمدرينه بالناس شنو ..
بيت عمج وشفتيهم شلون طلعوا وشسووا بيج مو بعد هاي مرته الاولى الله يعلم بنفسيتها وتفكيرها ... بس اوصيج وصيه لاتأمنين بأحد ديري بالج منها مو عبالج فقيره تره ماكو مره فقيره بهالسوالف ..
سارة : لا واني وين اشوفها بعد هي ابيتها واني ابيتي الله يبعدنه عن المشاكل مالي خلك عرايك وطلايب لااعرف اتعارك ولااعرف اطالب ...
نوره : خليج قوية الضره مره ..
سارة : وانتي وين تدرين بيها مره هههه؟
نوره : اكو مره ماتعرف ... الله يسهلج ويوفقج ان شاءالله ويسخرلج رافد ويعوضج ان شاءالله عن محموس وحقارته ...
