#لذة_انتقام
بقلم #روز_الفياض
ج١١
واتزوجت رافد ....
وعشت وياه ايام مثل ايام الف ليلة وليلة ...
احلى ايام عمري ...
لكن ماكانت الف ليلة ولا الف يوم ...
كانت بس ( ١٥ ) يوم ...
احلى (١٥) يوم بحياتي ..
ايام جنت احلم بيها بس ويه محمود لكن ماعشتها ولاحسيت بجمالها وطعمها وحلاوتها ...
عبالك شهر لا سنة ... ماحسيتها مجرد ايام ..
عبالك شهر عسل كامل ... بكل مابالكلمة من معنى ...
بيتنه بحدنه .. ومسدود بابنه علينه ..
رافد موجود يمي شاريد بعد ؟...
يوميه نطلع نتغدا لو نتعشا بره ...
كل مره بمكان شكل ..
واحلى مابالموضوع ابني وياي ...
بيوم زواجنه ...
لبست البدلة بالصالون وكفت كبال المراية اباوع لنفسي واحجي بكلبي ..
اخيرا ياسارة ...
اخيرا الله عوضج بواحد يسوى محمود وراسه ..
اخيرا لكيتي واحد مشتريج ومقدر قيمتج ومقدرج ...
اخيرا راح تستقرين ...
اوووف ...
يارب اجعلها زواجة خير علي وعلى ابني يارب ...
يارب سخرلي زوجي ولين كلبه علي وعلى ابني ...
يارب اني يتيمة وابني هم يعتبر يتيم لان ابوه مابي خير ربي لاتكسر كلبي وتكسرني .. وعوضني وعوض ابني ...
يارب ياحبيبي دخيلك ..
اتذكرت قبل زواجنه بكم يوم من سألت رافد :
حبيبي .. اشو مارحنه عقدنه بالمحكمة لحد هسه؟
رافد : على شنو مستعجلة؟ خليها بعد الزواج شورانه ...
ساره : وليش مو هسه؟
رافد : ماعندي مجال ... عندي دوام ... مااريد اخذ اجازة هسه ولايوم خاف بعدين ماينطوني اجازة للعرس ...
خليها وره العرس شعدنه ... شورانه ... نشوفلنه فد يوم ونروح ...
سكتت شوية متردده بعدين كتله :
ان شاءالله ...
براحتك ..
.........رجعت صفنت على نفسي بالمراية وطردت الافكار السوداوية اللي ابالي والخوف والقلق وكلت لنفسي بصوت مسموع :
خلص اتوكلي على الله مبين خوش رجال ... يارب ..
..............................
ولان فترة الخطوبة طولت فأتعودت على رافد ...
وحبيته ...
جنت اثق بي حيل ...
كل طلباتي نفذها ... شلون مااثق بي ...
اثبتلي انه هو فعلا يحبني ومشتريني ...
وماعقدنه بالمحكمة ...
اكتفينه بعقد الشيخ .... وأجلنة عقد المحكمة الى مابعد الزواج ان شاءالله ...
بيوم الزواج .. جنت فرحانه حيل حيل ... وابني وياي فرحان لان طفل ومايفهم ...
او يمكن لان مثلي حب رافد وحس الله عوضه بأب احسن من ابوه عوضه بسند ...
رافد جان فرحان اكثر مني ومن ابني ....
زفونة لبيتنه .. وجان بصف بيت اهلي ...
ماجان ناقصنه شي .. كل شي اشتريت وكل شي جهزت من فرحتي ماخليت نواقص بالبيت ...
جنت اكول ماكو فرق بيني وبينه ..
الفلوس آخر همي ...
المهم الله عوضني بزوج حنون وطيب ويحبني ...
دخلنه لبيتنه اني وياه ... حسوني بقى يم اخواني وخواتي ابيت اهلي ...
خواتيي مقبلن يجي وياي كالن ميجوز وانتو عرايس مو حلوه يجي وياكم ...
بقيته على اعصابي ...غصبن عني متعودة على وجوده وياي مافاركته قبل هالمره ولايوم ...
