#لذة_انتقام
بقلم #روز_الفياض
ج١٦
بقيت افكر ..
شلون انهي هالعلاقة ويه رافد بس بطريقة كون تخليه ينسى شي اسمه فيس ويحرم يلعب بذيله بعد ...
يوم ..
يومين ..
تلاثة ...
واني فكرة تاخذني وفكرة تجيبني ...
اتمنيت اشلع كلبه مثلما شالع كلبي ...
ومن اتذكر شلون هاجرنه اني وضرتي علمود وحده عرفها عالفيس اتمنى كون يوكع بورطة من وره سوالفه عالفيس يخليه يمشي ويحاجي نفسه مثل المخبل ...
وهنا اجتني فكرة ...
وبديت اكلبها براسي يمنه .. يسره ..
لحدما اقتنعت .. وبديت افصل الخطة ..
صحيح هي خطة بسيطه بس راح اضربها بيها عصفورين بحجر ...
هم اخلص منه لان مالي خلكه وخلك سوالفه مال الفيس واتغزل بي جذب ...
وهم اخلي يحرم بعد يسوي حساب للفيس ...
بقيت مختفية كم يوم عنه على اعتبار اخوي مانع عني التليفون ...
بس بعدها فتحت التليفون وسويت حساب ثاني على اساس حساب صديقتي وهي راسلته بدالي حتى تحذره ...
لان اخوي ضابط بالامن وعنده علاقات ومعارف ومن خلال علاقاته مخليهم يراقبون تليفوني ويطلعون كل شي محذوف بي من صور وبرامج وحتى المحادثات مطلعيهن ...
رافد : يعني شنو ؟
سارة : يعني تكول خل يختفي ويحذف الفيس لان اخوها عرف اسمك الكامل واكيد يكدر يطلع رقمك وعنوانك .. يمكن بأي لحظة يجون عليك الامن ياخذوك ..
رافد : لاااا .. ادري قابل شمسوي اني خو يروح يلزم اخته ويأدبها ...
كتله بكلبي ايا حقير ... هسه خل يلزم اخته ... مو هاي اخته الرحت منا للمستنصرية بالشمس والحر وبقيت يوم كامل منتظرها حتى تشوفها .. مو ظليت تتوسل حتى تشوفها مو اخته اللي نايم بالصاله بحدك حتى تحجي وياها ...
بسيطه ..
سارة : ليش انت قابل بريء همه هسه يكولون هي زغيره وماعدها خبره بالحياة والناس بس انت جبير وجماله متزوج اثنين ... يعني ميه بالمية جنت تلعب عليها واحتمال تريد تقشمرها حتى تاخذ منها حاجتك وتشرد ...
رافد : لااا اهووو هاي منين طلعتلي هالسالفة ... ساعة السودة العرفتها بيها ..
سارة : اذا لزموك ميعوفوك بعد انت تعرف الامن اللي يطب عدهم ميطلع سالم مو بعد انت مصاحب اخته ومواعدها ...
رافد : يالله يالله اني اتصرف خلص ...
سارة : احذف الفيس كله والغي الحساب واذا تكدر اغلق التليفون حتى لايكدرون يوصلون لمكانك ... ابقى بالبيت هالفترة خاف يرحون يسألون عنك بالدوام ..
رافد : شيريد يعني ؟..
سارة : بالله هذا سؤال اذا هي اخته مكسرها تكسر وحالتها حاله نايمة بالمستشفى خطية .. ظلت تتوسل بيه حتى احجي وياك وابلغك حتى تاخذ حذرك وتلغي الفيس قبل ميوصلون لعنوانك ..
رافد : هو واخته يكسرها يموتها تموته اني شكو بيهم قابل شسويت حتى اخاف ...
سارة : تكول لايطلع من البيت خاف يعممون صورته عالسيطرات ..
رافد : اهووو هاي منين الله بلاني بيها ..
شبعت ضحك واني احسه يرجف من الخوف ومسوي نفسه البطل رامبو ... باوعت من وره الباب على كيف شفته كاعد على حيله وعاكد حواجبه مبين الخوف على وجهه هههه ....
طلعت من الفيس ولغيت الحساب وخليته بحده يضرب اخماس بأسداس ..
