#عشك الجبل 2
#حور حيدر
#البارت التاسع جزء 2
...بابا ..باباتي طلعت اولى
ضحكتي ماتت وشهادتي وكعت من ايدي واني اشوف الناس ملتمه ابابنا ...
وجدو يبجي ويمسح دموعه بشماغه الي جان دومه مرفوع على راسه ...
بيبي وامي نايمات على تابوت ميخلون الزلم يشيلوو...
ويصرخن باسمه...
اشوف نضره الشفقه بعيون كل الناس ...واصواتهم تتردد باذني...
خطيه تيتمت...بعدهاا صغيره ...منو الهاا
ابوهاا مات وعافهاا ..
يحجون واني منصدكه ...معقوله بابا عافني وراح
ذبيت كل شي من ايدي ...
ركضت الهم
رحت الجدوو احاجي ميجاوبني بس يبجي ...
جدو وين بابا ...جدو فدوه اريد بابا
ليش مخلي بلتابوت ...راح يختنك
سحبني جدو لحظنه ...يبجي ويكلي
ابوج بطل ...بنيتي ابوج شهيد
مجنت اعرف شنو شهيد ولا همي شي بس ارد اعرف وين مودين بابا ...
بحظنه وعيني علتابوت واشوف منظر امي شلون تملخ بنفسهاا وخالاتي يردن يسحبنهاا من التابوت وهيه تدفع بيهن وتشمر نفسهاا على التابوت وتصرخ ...
طلعواا انتو جذابين ..حيدر ميعوفني
لزمت ادين بيبي الي صايره مثل الميت جسد بلا روح تحجي ودموعهاا تصب...يمه كليلهم حيدر عدل ما ميت ..يمه شبيج وهي تهز بيبي
...رعبني منظرهاا اتهسترت
كمت اسحب بروحي من يم جدو واني اشوفهم يردون يشيلون تابوت ابويه ...اريد الحك على بابا
حسيت ضاع مني اغلى شي بحياتي اختنكت بس اريد احرر روحي وروح لابويه ...كمت اهمس بابا
وين ...اريد بابا
كمت ادفع بجدي بخبال بكل قوتي بس اريد اشوف ابويه ...
ما صدكت عافني ركضت بين الناس الي ملتمه على على تابوته ...
عمامي جانو كاعد يرفعونه وامي تصرخ وصوتهاا راح من العياط خالي لازمهاا ...
بيبي بيد النسوان ...
رحت ذبيت روحي علتابوت ما خليتهم يشيلونه ...
اجه عمي يريد يشيلني شالني وبعدني...
كمت ارافس بين اديه واكله ودموعي تجري ...عوفني وين مودين بابا ... عضيت ايده ورجعت نزلت
رجعتله جنت ارد اطلع ابويه ...دفعت الغطا مال التابوت ...
شفته،شفت بابا نايم ومغنض عيونه ...
ضحكت وباوعت لماما الي واكعه بلكاع وتباوع وساكته ...
شوفي ماما...هذه بابا نايم ليش تبجين هسه اكعده
هناا صرخ جدي بعمامي ...شبيكم واكفين شيلوهاا لتخلوهاا تشوفه ...
عمي يشوفني يبجي ومنزل راسه ...
كمت اتلمس وجه ابويه واني اكله ..بابا طلعت الاولى مثل ما جنت ردت ...
يله كوم وفي بوعدك ...حبيبي بابا اهز بي ميتحرك
كمت اشهك ...
شبيك بابا شي يوجعك ...لعد ليش متكوم
استهضمت واني اشيل ايده وميتحرك ...كوم ارد اانام بخضنك ..لتعوفني حبيبي فدوه
