#غربة_وطن_مجروح

البارت الثامن

#غربة_وطن_مجروح
بقلمي : فردوس عبد اللطيف
البارت (٨)
كعادة القدر لا يعطينا الزهور إلا ومعها بعض الأشواك.
نازك : بعد مرور شهرين من زواجنا تقريبا بداية الشهر الثالث لسنه ٢٠١٤ بديت اشعر بغثيان ودوخه بدت علي بوادر الحمل
ام مقداد : يمه نونه اشبيج وجهج اصفر وماتكدرين تاكلين
نونه : خاله معدتي نار مدري اشبيها
ام مقداد : اشو دراويني صدرج
نونه : ليش خاله استحي
ام مقداد : ولج قحط بس اريد اتأكد من شغله
نونه : شنو هي ؟
ام مقداد : هاي هي مادام حلماتج لونها طوخ معناها انت حامل الف مبروك بنتي بس اوكفي لا تحجين يم الجناين هسه
نونه : صدك خالتي اني حامل اشلون تعرفين ؟
    خلي اوصي مقداد يجيبلي اختبار الحمل من الصيدليه حتى اتأكد
خالتي حا اصير ام ويجيني طفل ويكولي ماما واخيرا نونه ضحكتلج الدنيا
~~~~~~~
نازك : بعد ما تاكدت من الاختبار اني حامل ماصدكت
    فدوه مقداد اريد توديني للدكتوره اتأكد اكثر مامصدكه وبلكي تنطيني علاج للدوخه ولعبان نفس
ام مقداد : وديها ابني خلي تصدك بروحها
~~~~~~~
نونه : راجعت الطبيبه وفعلا كنت حامل
  هنا حسيت اني ملكت الدنيا وحاتكمل فرحتي وسعادتي
مع ان هذا اول حمل والنساوه تعب لكن فرحتي كانت اكبر
وكدرت اتحمل النساوه وشفتهه حلاوه الحمل
مقداد : نونه جبتلج معلاك اريد ابني يطلع قوي
نونه : ما احبه انت اشبيك ما اكدر اكله
ام مقداد : يمه حتى لو ماتحبي لازم تاكلين
سندس زوجة رعد : اكولج نونه ترى كولنه هيج لانحب معلاك ولانحب الخضره وانجبرنه ناكلهن علمود تغذيه اطفالنا تدرين هذا يتغذى من دمج
راح اشويلج جم شيش وجبري نفسج
نونه : تسلمين سندوسه ربي يحفظلج جهالج تدرين بوظعي تلعب نفسي من اوكف عالطباخ من وره الوحام
سندس : اعرف دا ه كلنا مرينا بهالمرحله
صبا : تدرين اني جنت من اروح لاهلي ماما تشويلي بالليل والصبح وشوفي بنتي عسل طلعت متفحه
نونه : خوش لعد اني هم اريد ابني يطلع متفح
~~~~~~
مرت الاشهر
الشهر حزيران لسنه ٢٠١٤
نونه : كبرت بطني ولو البجر ميبين بس لبست فستان حمل وفرحانه بحملي واشتريتلي كم فستان لفتره الحمل حتى بناطير خاصة للحمل وياها قميص طويل هم اشتريت
ابو مقداد : اكولكم اشو الوضع ميطمن والاخبار ماتبشر بخير
     هالدواعش شيريدون من العراق
والولد منتسبين رعد وسعد والله خايف عليهم
سندس : يايمه ربي يحفظهم ويحميهم من كل شر
صبا : عمو بس يصير شي ينهزمون هي بقت عليهم
ابو مقداد : لج بنتي حتى لو ينهزمون يلحكوهم لبيوتهم يذبحوهم وبعدين اذا كلهه تنهزم منو يحمي الوطن
وانتن منو يحميكم اذا دخلوا علينا غير الزلم توكف وتدافع
ام مقداد : والله خايفة عالولد لو يبطلون من الجيش ويكعدون كبالي ولا يذبحوهم يمه شيسوى العمر بدونهم
مقداد : والله يابه الوضع مايبشر بخير
داعش دا يهجمون من كل منفذ ما اعرف منين يطلعون عبالك الكاع تنبع دواعش
ابو مقداد : لا ابني ذولي مسوين انفاق تحت المدن ومنهه يدخلون الانتحاريين
مقداد : اي يابه لعد الانتحاري يظهر بنص الناس منين عبر والسيطرات اشلون ماشافو
مبينه يابه مبينه بس كول اشلون حايكشفوهم وخصوصا اذا عدهم اعوان ومساعدين داخل المدن
ابو مقداد : الخيانه هي سبب خسارة الحروب
      اذا كان هناك خائن واحد ممكن ان يتسبب بقتل الف جندي
ربي يحفظ اولادنا واولاد المسلمين من كل شر
مقداد : شدكول يابه نتسوك ونخلي بالبيت مونه اخاف تالي يجي يوم مانكدر نطلع نتسوك
ابو مقداد : خلي نتسوك بس مو هواي لان اخاف يجي يوم نطلع بهدوم الي علينا ونعوف بيوتنا وكولشي
مقداد : الله يستر لازم اجمع فلوسي عند العالم واسحب فلوسي من الصرف ماندري شحايصير
~~~~~~~
نونه : حبيبي ميمو اريد اروح لاهلي ذبني عليهم الصبح باجر من تطلع ومن ترجع بالليل ارجع وياك
مقداد : مو جنتي يمهم اسبوع الفات
نونه : اشو كلبي مفرفح عليهم وخايفة اريد اشوفهم قبل لا يجي يوم مانكدر نطلع
مقداد : شكولج دا نسمع اكو هجوم على اطراف تكريت والموصل واطراف كركوك بس يجوز كم يوم وينتهي
نونه : معود الجيش موجودين بكل مكان اشلون يكدرون يدخلون وكل هالجنود والقاده بالمدينه
مقداد : نامي هسه ياحضرة المحلله العسكريه وباجر الصبح الله كريم ..
اليوم الثاني
نونه : باوع مقداد الجيش منتشر بالشوارع معقوله يدخلون بهالسهوله ؟
مقداد : ما اعتقد يكدرون يدخلون والجيش متحضرلهم ومنتشرين بكل مكان
حبيبتي انتو لاتطلعون لاي مكان لحد ما اجي بالليل عليج
وديري بالج على ابني مو تجوعي شبعي اكل
نونه : ها مقداد هسه صار ابنك اهم مني وخايف على كرشه
مقداد : لج بس خلي يجي الا اوكله لحد مايصير دبي واكرصة من خدوده لحد مايصرخ ويبجي وانت دكوليلي عوفة حبيبي
نونه : واذا جتي بنيه ؟
مقداد : نفس الشي بس اكولج اذا تصير دبيه وسمينه محد يتزوجها
نونه : مقداد جاي تتحلم وصلت .. خلي اروح انت دير بالك ع نفسك كبل للمكتب مو تروح منا منا وتقلقني
مقداد : حاروح اخطب مره وتجين تلكيني متزوج وجايبلج ضره
نونه : سديت الباب حيل طبعا الشي الي ينرفز الرجل من تسدين باب السياره بقوه عبالك دستي على كلبه ههههه
باي حبيبي
اشرلي بايده بابتسامه صغيره وراح لشغله
نونه : هلو حمودي اشلونكم مشتاقتلكم موت شخبارك حبيبي
     وين ماما ونريمان ؟
احمد : على كيفج .....جم سوآل سألتيني
نونه : ماماتي وينج ؟
نريمان : هلا بالحامل وينه حبيب خالته شوكت يشرف
سهير : يمه وجهج اصفر اشبيج ماتاكلين ؟
نونه : يمه مقداد ثبرني بالمعلاك كل يوم لازم معلاك حتى كرهته وكلسع يجيبلي ف
سهير : عمتج وعمج اشلونهم شخبارهم ؟
نونه : يسلمون  اكولكم وينه صلاح ؟
سهير : صلاح يم صديقة ... شمشتهيه علغده حبيبتي اسويلج لحم لو دجاج ؟
نونه : عاجبني برياني دجاج وباميه ماما بس انت تطبخيها طيبه محد يلحك طبخج
طلعنه الدجاج وكاعدين بالمطبخ نسولف ونضحك
بس كلبي مامرتاح احس اكو شي حايصير
صبينا الغده ودا ناكل رن تلفوني
سهير : منو يتصل لا تردين وره الغده اتصلي
نونه : ماما مقداد اخاف صاير شي كلبي مامرتاح
مقداد : لج نونه رجعي للبيت لاتنسد الطرق وتالي ماتكدرين تجين
نونه : ليش شصاير احجي مقداد قلقتني ؟
مقداد : حاتسقط تكريت
نونه : معود من جبتني الصبح ماكو  شي والجيش منتشر بكل مكان بعد اشلون تسقط المدينه ؟
مقداد : نونه سمعي كلامي ولاتعاندين
نونه : صار صار راح اخلي احمد يوديني للبيت
سهير : يمه اخاف على احمد وحده اجي وياكم
نونه : لا ماما خلي يجي وحده البيت قريب وبسرعه يرجعلج هو ولد اي شي يصير يختل بزويه بحديقة انت وين بيج تركضين
روحي يمه واتصلوا بي واني هم حاخابركم
نونه : هو مقداد بعيد علينا جان اجه علي
طلعنا من بيت اهلي ونمشي بالشارع
اكولك احمد هنا جانو جيش منتشرين وينهم جانوا هواي اشو ولا واحد
احمد : الله يستر من انسحب الجيش معناها حاتسقط تكريت
نونه : احمد باوع شوف شنو ذولي سيارات ورافعين اعلام سوده ..اعوذ بالله مثل الغربان السود
احمد : ولج ذولي دواعش اعوذ بالله اشلون دخلوا ؟
نونه : المنظر الي شفته حسسني اني بحلم ويمكن حاصحى منه ...ياريته كان حلم ...هذا كابوس وحقيقي
جنت اتمنى هذا حلم لو كابوس لكن حقيقية ومنظر الدواعش بسياراتهم وراياتهم السود
منظر مشايفته قبل حسيت نفسي بفلم رعب اول مره بحياتي اشوف هيج منظر
احساسي خوف ورعب ما اعرف راح اوصل للبيت لو ننقتل بالطريق فكرت بامي بمقداد شحايصير بيهم زين اخاف احمد
من يرجع ينكتل
سهير : الو نونه وين وصلتوا ؟
نونه : حانوصل لبيت عيالي ادعيلنا ماما
نونه : حمودي اخاف عليك ترجع وحدك هذولي شكلهم يخوف باع على شعرهم شنو ذولي
وصلت لبيت عيالي
احمد : نونه اروح قبل المغرب
نونه : حبيبي بس توصل خابرني
احمد : ان شاء الله
نونه : دخلت للبيت ام مقداد تلطم وملخه روحها وسندس وصبا كاعدات بالارض وجهالهم بحضنهم وكلهم يبجون
عمي منهار ويلوب بالحديقة
نونه : شكو شصاير ؟
سندس : لج رعد وسعد بالواجب تلفوناتهم مغلقة وسمعنا الجيش تذبحوا
نونه : بصراحه عبالي مقداد بي شي بس حمويني هم خطيه ومثل اخوتي انهارت اعصابي كعدت وياهن عالارض واصبر بيهن وابجي عليهن  ... اجه مقداد
مقداد : ها يوم لا تخافين ولدج  سباع هسه يفلتون منهه بس كولي يا الله
ام مقداد : ولك يمه الموصل سقطت اطراف كركوك سقطت تكريت سقطت اشلون حايجون الدواعش لزموا السيطرات
اشلون راح يعبروهم ؟ انوب ليش تلفوناتهم مغلقة
يمه وليداتي اثنينهم ولجن ترملتن يمه ذولي الجهال بعد مايشوفون ابهاتهم
مقداد : يمه كافي ليش تفاولين عليهم
نونه : مقداد احتار هي لحظات تحول من استقرار الى الفوضى ومتنعرف شنو النهايه وشحايسوون بينا
جاؤ باسم الاسلام ونشر الدين ولكن الحقيقة تختلف
مقداد احتار مابين ابوه المنهاره اعصابه ولازم الباب ينتظر ولده وينتضر احد يمر ويجيبله اخبار الولد اخبار جنودنا لان كل الجنود هم ابناء هذا البلد وكلهم عدهم اهل وام واب وزوجه واطفال ينتظرون
مقداد : يابه ادخل شتسوي  واكف بالباب ادخل واستر علينا خلينا نفكر بعقل
ابو مقداد : ولك بويه وين بقى عندي عقل ذولي ولدي اثنينهم اخاف ذبحوهم وذبوهم للذيابه
نونه : هلو احمد ها حبيبي وصلت ؟
احمد : اي الحمد لله توني دخلت للبيت حموينج ما رجعوا ؟
نونه اسكت وخليها البيت انكلب عزا ولحد الان ماكو خبر
احمد : الله يرجعهم بالسلامه
زوجه رعد سندس اغمى عليها غسلنالهه وره شويه كعدت
هبطتنه وام مقداد منظرهه يبجي الصخر
هي كم ساعه كظيناها الكل انهارت اعصابهم منعرف شنسوي ووين ندور عليهم ومحد يكدر يطلع
ويه اذان المغرب
ابو مقداد : ولكم اجه ام مقداد اجه وليدج
مقداد : يمه هذا رعد
حضنته الحمد لله ع سلامتك خوي اشلونك
كعد بالارض يم جهاله ويبجي
ام مقداد : ولك يمه بعدك عدل تعال يابعد امك تعال خلي اشمك واشم ريحتك
حضن امه ويبجي
يمه ليش تبجي لازم تفرح رجعت لبيتك سالم
رعد : خلوني ابجي ابرد  كلبي من هول الي شفته عمري ماجنت متوقع حايجي يوم ويصير هيج بجيش العراق
مقداد : هاي اشبيها ايدك هذا دم انت مصوب
ركضي نونه جيبي الضمادات وكلونيا انت ماحاسس بنفسك متصوب ؟
رعد : لا ابد ما حسيت بوقتها وحتى لو حاسس اهم شي هو اهرب والحك اجي كبل ما يلزمونا
تدرون شنو الي صار
احنا بمقراتنا ما حسينا الا الضرب علينا من كل مكان
ندور عالقاده ينطونه الاوامر
اختفوا ... تخيل انت محوط بالعدو والقائد هرب والرمي عليك من كل الجهات
اصدقائي استشهدوا هوايه ماتوا كدامي
ظل يبجي وسكت عن الحجي وهو يبجي
بقينا الي عايشين ماعدنا غير الهروب والا بقائنا معناه الموت
واذا نمشي هم راح نواجه الموت ونسبه نجاحنا يمكن ١ بالميه لان الدواعش انتشروا بسرعة البرق في كل مكان
بس ميعرفون المنطقة
واحنا ابناء المدينه كدرنا نتخفى عنهم ونمشي بين البيوت وعالحيطان خايفين مرعوبين مواجهين الموت
هو الفرار من الموت الى الموت ولكن لابد منه تفرقنا كل مجموعه توجهو على المناطق الي توديهم لبيوتهم
شافنا رجال خير كال تعالو اخذو دشاديش لبسوهه وذبوا ملابسكم العسكريه لا يذبحوكم
اخذوا ملابسنا وحركوهم بالتنور لبسنا دشاديش ومشينا خايفين حتى من لبسنا دشاديش عبالنا يعرفونا
وكانما مكتوب على وجوهنا نحن منتسبين
مشينا بالساعات بين الدرابين لحد ما وصلتلكم
وظل يبجي
مقداد : كوم خوي كوم غسل وارتاح كومي سندس سويله لكمه تلكي جوعان سويله جاي خلي تهدأ اعصابه
ام مقداد : يمه سعد بالموصل وليدي راح
هذا شيجيبه من الموصل هذا انكتل لو تأسر
مقداد : يمه كلمن يموت بيومه كومي الله يخليج غسلي وجهج ملختي روحج كافي يمه كافي لا تفاولين
كومي صلي اقري قران حتى يرجع ابنج
نونه : كومي خالتي لزمتها من ايدهه واخذتها غسلتلهه
وتوضت وصلت وتندعي يرجع سعد من هوسه الموصل
اما صبا من خوفها بقت ساكته حتى دمعتها نشفت تخاف تبجي حسيتها منهاره بس ساكته ماتريد تعيش لحظات القلق والتوتر الي احنا بي كانها غابت عن الوعي وهي ويانا تنتظر يجي خبر من سعد زوجها
للحكاية بقية
~~~~بقلمي فردوس عبد اللطيف ~~~~~