#غربة_وطن_مجروح

البارت ال٢

#غربة_وطن_مجروح
بقلم فردوس عبد اللطيف
البارت (٢)
ما أصعب أن تعيش في حيرة بسبب شخص، يوماً تراه حبيباً ويوماً لا تدري من يكون.
نازك : بقيت افكر كنت محتاره اذا ارفض اكيد راح اخسر انسان صادق وبي كل مواصفات  فارس احلام اي بنت
شئ ثاني تعودت الصبح اوكف بشباك غرفتي وانتظر طلعته لشغله واشوف ابتسامته
زين اذا وافقت بس ابقى محافظه على نفسي وعلى سمعتي وسمعة اهلي بس خلينا كلمن بمكانه لحد ما يتقدملي
اليوم الثاني
السبت عطله بالمدرسه لكن مقداد يطلع لشغله
الصبح اجاني مسج
( صباح العسل يا احلى قمر اوكفيلي بالشباك اريد اشوفج اصبح بوجهج قبل ما اطلع )
طفرت رتبت شعري ووكفت بالشباك
انفتح بابهم طلع السياره يم الباب ونزل فتح البنيد وعينه عالشباك ويبتسملي
يمه فديته يخبل شنو هالطول شنو هالاناقة
نبضات كلبي احس بيها سريعه يمه كلبي يريد يطلع
نريمان : نونه شعندج واكفه بالشباك من الصبح خلينا ننام جايبه علينه البرد ؟
نازك : نامي وغطي وجهج ومعليج بي
نريمان : ترى اكوم اشوف عليمن تباوعين اعترفيلي احسنلج
نازك : هسه نامي وبعدين احجيلج
رجع صعد بسيارته وحرك اشرلي بايده باي
واني هم اشرتله باي
رجعت لفراشي اريد اكمل نومتي بس كلبي احسه منتعش
اوووف هيج الحب حلو اشوف البنات يحبن ومتونسات بالحب
احلى احساس لما تشعر اكو شخص يهواك ومهتم بيك من دون باقي البشر
جتني رساله
مقداد : اليوم صبحت بوجه الگمر احلى صباح عندي
      شوكت تردين علي وتقبلين تكونين حبيبتي
نازك : هيج مستعجل خليني اعرفك اكثر
مقداد : حبيبتي البارحه كلسع اباوع على تلفوني واكول شوكت تجاوبني قمري
اكول حبي شتحبين اسميج
نازك : اهلي يسموني نونه اختصار لاسمي
مقداد : الله حتى اسم الدلع حلو فديتج
نازك : انت بالشغل ما ريد اشغلك عن شغلك
مقداد : بصراحه شغلنا حايبدي ب ٨ ونص لحد الظهر هوسه
     حبي الظهر راح اكدر افرغ واراسلج
نازك : اوك مع السلامه
مقداد : نونه لادكولين مع السلامه كولي الى اللقاء
نازك : الى اللقاء
~~~~~~~~~
نازك : اريد انام ما اكدر من هذه اللحظه مشاعري وكلبي امتلكها مقداد اول حب واول انسان دخل بكلبي
نزلت جوه اغني وفرحانه
سهير : ها نونه اليوم كاعده من وكت شعجب وتغنين
لا شغلتج مو طبيعيه
نازك : مو زين كعدت من وكت حتى اساعدج اليوم شتردين اسوي تعزيل البيت كوله مستعده اعزله وارتبه
سهير : تعالي تريكي اول وراها روحي عزلي غرفه الخطار
نازك : صار ماماتي
~~~~~~~
مقداد :
. لا تجعلي قلبي وحيداً فلو كنتِ بعيدةً عن نظر العيون فطيفك لايفارق القلب والعقل .
من يوم الي شفت بي نزوكه وروحي تعلكت يمها كلبي ينطق بأسمها حبيتها من كل گلبي
صحيح عرفت بنات هواي وكنت اعتقد اني حبيت
هالمره غير مجاي اعرف ليش تعلقت بيها وليش حبيتها كل هالحب بهالفتره القصيره اخ ياكلبي هالبنيه قلبت كياني
بس لازم اعرفها اكثر ونعيش احلى قصة حب
~~~~~~~
اليوم الثاني
نازك : كعدت من وكت اريد الحك اشوف مقداد واشوف ابتسامته الحلوه
جاني مسج (صباح البنفسج اشلونج ياعمري اوكفيلي بالشباك اريد اشوفج )
بقينا بالايام الاولى بس مسجات واوكفله بالشباك اشوفة ويشوفني وكل يوم يمر اشعر بتعلقي بمقداد اكثر
روحي وعقلي وتفكيري كوله يم مقداد حتى الدراسه  ماتهمني بكد مايهمني شوفه حبيبي مقداد
كل اثنين يحبون بعض يتمنون اللقاء ولو لحظه
مقداد : حبي نونه مو كافي خجل اريد اتصل واسمع صوتج اريد اسمع منج كلمة احبك مقداد
نازك : كل هذا وبعدك مامتأكد من حبي الك ؟
مقداد : اريد اسمعها منج تطربني حبيبة عمري وسنيني
نازك : طيب خلي اصعد لغرفتي واتصل بي
      يمه يمه تلفوني يرن خايفة ايدي ترجف رديت الو بصوت ناصي وخايفة
مقداد : هلا وغلا حبيبتي حياتي عمري نونه
نازك : يمه خربت كلامه يذوبني يمكن لو اني كباله اموع بين ايديه فديتك
هلو اشلونك
مقداد : كولي حبيبي مقداد
نازك : حبيبي مقداد
مقداد : علي صوتج ماسمعتها
نازك : اخاف يسمعوني
مقداد : لا ميسمعون كوليها نونه
نازك : حبيبي مقداد
مقداد : يابعد طوايفي وهلي مقداد مشتاق اريد اشوفج عن قرب اريد اباوع بوجهج الملائكي
نازك : يمه يمه اخاف وين تشوفني مو كتلك من اول ما اطلع
مقداد : لا عمري مو نطلع
باجر الصبح راح اتأخر بطلعتي وانت تعالي قبل موعدج بعشر دقايق وافتحلج باب الكراج ونسولف لا تخافين محد يشوفنا
نازك : اخاف مقداد تالي شيكولون اهلك علي واختك وفاء شدكول
مقداد : لاتخافين ولاتصيرين جبانه مراح نسوي شي بس نحجي بالكراج اريد اشبع عيوني من شوفتج
نازك : راح احاول
مقداد :نونه انتظرج على نار
~~~~~~~
نازك : بقيت افكر واشلون اخاف احد يشوفني
وارجع اكول هو بس راح نباوع لبعضنا وهذا حقنا احنا نحب بعض وشوفة الحبيب تنعش الگلب والروح
لازم اكون شجاعه ومقداد صادق بحبه لان ممجبور يحاول وياي وهو بوظعه الحالي يمكن يحصل اي وحده بسهوله وبدون تعب واني اكدر احافظ ع نفسي
~~~~~~~
اليوم الثاني : الوقت ٧ وعشرين دقيقة
كملت تبديل نزلت تريكت امي تحجي وياي واني بعالم اخر
شعور بالخوف بالرهبه كلسع اباوع عالساعه اشوفهه تركض
الوقت يمشي بسرعه لحد ما صارت ٧ و٣٥ دقيقة
نازك : جاني مسج من مقداد ( وينج انتظرج )
ماما اني رايحه مع السلامه
مشيت من بيتنا لبيتهم ورجلي ما اشعر بيهم مدري خدرن مدري يرجفن المهم لكيت نفسي يم الباب
انفتح الباب دخلت
صباح الخير 😊
مقداد : صباح الحب تفضلي دخلي
سد الباب فزيت
مقداد : اشبيج فزيتي لاتخافين مراح آكلج
نازك : وين وفاء ؟
مقداد : راح اكولها اني اوصلكم خليها تبدل براحتها انت صعدي بالسياره بارده عليج هنا
نازك : صعدت بالسياره كعدت بالكشن الوره
اجه مقداد صعد بالسياره مشغل تدفئة سد الباب فزيت
مقداد : هاي اشبيج ام فزه ؟
نازك : وينها وفاء اخاف تتأخر ؟
مقداد : خايفة مني حبيبتي ؟ فديت هالعيون الحلوه باعيلي خلي اشبع منج
مد ايده يريد يلزم ايدي
جفلت جريتها
مقداد : انطيني ايدج اريد ادفيج انت دا ترجفين خايفة لو بردانه ؟
نازك : ها بردانه ..ليش اخاف هسه تطلع وفاء ونمشي
مقداد : نونه صحيح هذا اول لقاء بينا بس مو لهالدرجه انت خوافة ومنين تخافين من حبيبج مقداد
نازك : رفعت عيني وباوعت لعيونه وصارت عيني بعينه
يمه يمه احس تماس كهربائي دخل بجسمي كهرباء شلتني
يمكن اذا ابقى اباوع بعيونه حايغمى علي خلي ادنك ما اكدر
مقداد : ترى يوميه اريدج تجين ونسولف حتى لو عشر دقايق
تغنيني العمر كوله
لقائي بيج الصبح يفتح نفسي عالشغل
تدرين نونه من يوم الي عرفتج بي واني اشتغل بواهس لان صار عندي هدف بالحياة عندي انسانه تنتظرني اتقدملها واطلب ايدهه ونكون لبعض
نازك : يمه كلبي حايوكف من كثر ما ينبض سريع
وفاء : صباح الخير اسفة اخرتج اليوم
نازك : لا اني جايه من وكت والله خجلت ومقداد حايوصلنا
مقداد : عود انطوني كروه
باوعلي بالمرايه ويغمزلي
يمه حايفضحني كدام اخته اشلون بي ميكعد راحه
انوب اني مرتبكه اكيد هسه وفاء انتبهت علي ومبين على وجهي ..ياربي شهالورطه بس لا تنتبه
فتح مسجل ومخلي اغنية حسين الجسمي (اكبر من الحب )
يمه تمنيت نبقى وياه تمنيت الطريق طويل ونبقى ويه مقداد وكت اطول
وصلنا للمدرسه
فتحت الباب
شكرا مع السلامه
مخلي ايدة عالكشن ويباوع علي ... مع السلامه وغمزلي
اوووف فديته
دخلت المدرسه واني بعالم ثاني عالم مقداد والحب والرومانسيه كاعده بالدرس بس جسد بلا عقل بلا تفكير
استمر الوضع على هالمنوال كل يوم نسرق من وقتنا عشر دقايق نكعد بالسياره نشبع عيونه من النظر لبعضنا
انه غذاء الروح ياساده
الاستمرار مع من تحب ورؤيه بعضنا تعيش بعالم اخر عالم وردي ملئ بالحب
من اليوم الي حبيت مقداد ....حبيت كل الناس حتى الي يغثوني بكلامهم احبهم حبيت الاغاني الرومانسيه اغاني الحب والعشق
بس اغاني الفراق لا ما احب اسمعها
وفاء حست بعلاقتنا وكلمت مقداد
وفاء : مقداد اني مو غبيه اعرف انت ونونه تحبون بعض وانت تتاخر وتوصلنا علمودهه
مقداد : ديري بالج وفاء تحجين ويه نونه ترى تخجل وبعد ماتجي هي حيل خجوله وكوه دا تجي نسولف بهالعشر دقايق
وفاء : ليش ما تخطبها وتفض الموضوع
مقداد : خلي اكمل المقاوله الي بايدي واخطبها اني احبها واريده بس حاليا مامتفرغ مسأله وقت
وفاء : ربي يسعدكم
~~~~~~~~
خلصت السنه الدراسيه وطلعت كمال بدرسين
بدت العطله وبعد صعب التقي بمقداد
~~~~~~~
ابو مقداد : السلام عليكم اشلونك ابو احمد اني جيرانك ابو مقداد عندي هذه المعامله
زكي : اهلا ابو مقداد
فتح الفايل ... هذا صاحب السياره متوفي اشلون نحولها باسمك لازم اجراءات
والقسام الشرعي يكول عنده ورثة ولازم وكالات عامه مطلقة حتى تتحول
ابو مقداد : يا اخي اني اشتريتهه من المرحوم من كان عايش
    وخلال فترة التحويل توفى
وصارلي سنه اركض وره عائلته انوب طلعو عنده اثنين بالخارج وعليهم حجز اموال
اني شنو ذنبي
زكي : انت جيراني وعلى راسي بس ما اكدر امشي معامله مو اصوليه
ابو مقداد : عمي جاي اكولك اشتريتهه ودفعت فلوسهه
         شنو ذنبي اخسر
زكي : هذا قانون
ابو مقداد : اني جيتك حتى تساعدني
زكي : اشلون اساعدك ؟ تريدني ازور لو اقبل بمعامله غلط
ابو مقداد : لا ابو احمد بس اجيبلك اهل المتوفي ويحجولك
زكي : اسف ابو مقداد علي بالاوراق الي كدامي معلي بكلام فلان وفلان
ابو مقداد : هذا اخر كلام عندك ؟ اني جارك وجاي تساعدني وحلفتلك كلامي صح بس انت متريد تساعدني واذا الموضوع محتاج فلوس اني حاضر
زكي : اخي انت شتريد بالضبط منو دازك علي تفضل اطلع بره تريدني اخذ منك رشوه ؟
ابو مقداد : تطردني من مكتبك واني جارك بس يظهر انت انسان متعجرف واكولك شي ترى مادامت لواحد لا تطغى
زكي : دا اكولك بره والا اخليهم يطلعوك بره
~~~~~~~~
طلع ابو مقداد وبكلبه حقد على ابو نازك
وزكي تنرفز وصار اعصاب
ابو مقداد : وينك مقداد تعال شوف هذا ابو احمد الحقير
رحتله يساعدني بمعامله السياره طردني من مكتبه وبهذلني
بعد لاتحجون وياهم وحتى السلام حرام تسلمون عليهم
مقداد : اهووووو انلاصت
اعصابك يابه فداك الف سياره اني اشتريلك غيرهه ليش تنقهر ؟
ابو مقداد : بابا اني ممقهور عالسياره بس هذا زكي انسان مغرور ومقبل يساعدني وكلب وحقير وانت وينج وفاء بعد لاتحجين ويه بنتهم افتهمتي ؟
وفاء : اي بابا افتهمت
مقداد : بابا اني احجي وياه
ابو مقداد :دير بالك تكبر راسه جاي اكولك سلام لاتسلم عليه
مقداد : بابا جيران
ابو مقداد : جاي اكولك هذا امر مو طلب فهمت
مقداد : صار بابا
~~~~~~~
زكي : وينج نازك
نازك :نعم بابا
زكي : انتو كلكم سمعوني بعد ممنوع تحجون ويه بيت ابو مقداد وممنوع تسلمون عليهم وانت نونه بالذات لاترحين ويه بنتهم للمدرسه
نازك : يمه احس كلبي نزل جوه وكع بالارض
سهير : ليش اشبيهم ابو احمد ؟
زكي : اليوم ابوهم جاني للدائره ويريد ني امشيله معامله بالتزوير وظل يلح لحد ماطردته
نازك : الحمد لله الموضوع مايخصني
بس اشلون التقي بمقداد يبوي ابوي متعارك ويه ابوه شراح يصير
ومن يومها بدت المقاطعه بين اهلي وبين اهل مقداد
وبدأت الحرب مابين جاريين متقابلين بسبب اختلاف بوجهات النظر ومنو راح يدفع الثمن
تابعوني بالبارت القادم خلي نشوف نازك ومقداد وين توديهم
المشاكل بين ابو مقداد وزكي
~~~~بقلم فردوس عبد اللطيف~~~~~