#غربة_وطن_مجروح

التاسع

#غربة_وطن_مجروح
بقلمي فردوس عبد اللطيف
ال (٩)
قد عشت أسأل أين وجه بلادي؟؟
أين النخيل ؟ وأين دفء الوادي؟
لاشيء يبدو في السماء أمامنا
غير الظلام وصورة الجلاد
~~~~
نازك : بقينا بقلق وتوتر ننتظر خبر من سعد وين صار ليش تلفونه مغلق
المدينه صارت موحشه الغربان تجول بسياراتهم بالمدينه
يحاولون صيد اي فريسه
الساعه التاسعة مساءا
سمعنا طبه بالحديقة
خفنا النسوان وحده لزمت الثانيه مقداد وعمي فتحوا الباب
سمعنا هاي وينك
ابو مقداد : حجيه رجع ابنج
مقداد : هلا بيك خوي الحمد لله ع سلامتك حضن وسلامات
دخل علينا سعد مدمم من فوك لجوه جسمه كوله ينزف دم
باوعت على صبا شفتهه جامده واكفه ومتبسمره وكانها ماتريد تشعر بالي جاي يصير
ركضت جبت ضمادات وكاسه بيها ماي دافي ومنشفة
وبدأ مقداد وعمي يعالجون جروحه
مقداد : سعد احجينا شصار
سعد : شحجيلكم ولكم الموصل نباعت الموصل تسلمت
انهزموا وعافونا بقينا صيد سهل انفجارات قصف هاونات مدافع متعرف منو عدوك ومنو صديقك
صفن ... الي الله كاتبله يعيش لو بنص الموت بس مع الاسف
الموصل المدينه العريقة تروح هيج ولكم ذولي غرباء ياخذوهه بسهوله
احنا مستعدين ندافع عن الوطن بارواحنا لكن ماكو قائد بقينا وحدنا وصرنا صيد سهل وكل واحد توجه لصفحه
انفجرت سياره مفخخه بس الحمد لله كنت على بعد مسافة عنها لكن حسيت طرت بالهوا ووكعت عالارض
اللحم اشوفه مكطع تطشر لفوك ناس راحت بيها وجنود جايين للدفاع عن الوطن لعيشة اهلهم راحوا هيج
احنا ابناء الوطن نريد ندافع عن الوطن بس الوطن هم لازم يحمينا مو يسلمونه بيد من لايرحم
يمه الله خلاني يمكن لخاطرج ولخاطر دمعتج فدوه لاتبجين
رجعتلج امي يمكن لخاطر زوجتي وعائلتي
اليوم الموت خطف ناس هواي ابرياء واصحاب عوائل وكل هذا ليش شنو ذنبهم
اخ ياعراق الى متى تبقى تزف شهداء واحد تلو الاخر ؟
مقداد : سعد كوم ارتاح بغرفتك شوف مرتك وجهه اصفر جانت قلقة عليك بس شوفها مخترعه روح خليها تشعر برجوعك خليها تشعر بالامان
ابو مقداد : بعد من اليوم محد يطلع من البيت عدنا مونه وخبز انتو خبزو ا ونقفل الباب ما نفتحه ولا واحد منكم يطلع حتى ميشوفوكم
بس مقداد يطلع على حد المخضر يتسوك ويرجع انتو ماريد واحد منكم يعتب الباب سعد ورعد ماريد احد يشعر بوجودكم
~~~~~
الايام تركض والدواعش بدوا يسيطرون عالمدينه وتمكنوا من فرض ازلامهم بكل مفاصل المدينه واحنا محبوسين لانطلع ولا نفتح بابنا وكل اهالي المدينه مثلنا
بعد مرور شهر من احتلال المحافظه
كاعدين بالهول كولنا مجتمعين وسمعنا طرق الباب بقوه
ام مقداد : يمه جونا الدواعش ولكم ركضوا مقداد ختل اخوتك
حاياخذوهم يعدموهم
مقداد : تعالو فوك بحمام غرفتي ختلوا وانت نونه هم دخلي معاهم على اساس زوجتي بالحمام
نونه اني وبطني واركض خوف ورعب .. يمكن الانسان من يموت بسرعه ارحم من ان كلسع يتعرض للموت وينتظر
باي وقت حايموت
ابو مقداد فتح الباب
منو انتم
دخلوا اربعه اثنين شباب توهم بعمر المراهقة واثنين شكلهم مرعب ضخمين طوال ولبسهم وشعرهم كصايب ماسكين اسلحه رشاشه ولابسين على صدرهم يلك بي عتاد وطلق
يتكلمون عربي فصحى
الداعشي : السلام عليكم كم ولد لديكم في المنزل وهل لديكم منتسبين بالجيش ؟
ام مقداد : يمه والله العظيم ماعندي غير هذا الولد مقداد هو ابني ويشتغل مقاول
الداعشي الضخم : حجيه انت حلفتي ماعندج منتسب بالجيش
بس ترى احنا مرايدين منهم شي
بس نجمعهم بالمسجد يبايعون الدوله الاسلاميه ويتبرؤن من الجيش ويوقعون عالتبرئة
ام مقداد : علت صوتها والجيران يسمعونها من وره السياج
ماعندي غير ولد واحد روح اسأل الجيران
الداعشي : حجيه اذا طلع كلامج كذب تتحملين المسؤليه
ام مقداد : ولك يا مسؤليه قابل اسلمك ولدي فلذات كبدي حتى تقتلهم مو كتلتوا كل المنتسبين
نعم يا سيدي اتحمل المسؤليه
طلعوا الدواعش من بيت ابو مقداد ودخلوا لبيت جيرانهم
الداعشي : كم ولد عند بيت جيرانكم ؟
الجيران : ولد واحد
الداعشي : انت متأكد ؟
الجيران : نعم
استمر التفتيش بكل الشارع والله يعلم شاخذوا منهم
الجيران شهد لصالح ام مقداد لان متعاونين بيناتهم وسمع ام مقداد تتكلم معاهم وساعدهم وانقذ حياة اولادهه
بقو الولد بالحمام
نونه : تتلوى من الهبطه اخ يمه ظهري وبطني توجعني
مقداد : اشبيج نونه
نونه : الحكني مقداد راح اموت الم فضيع حسيت بشي دافي ينزل بين رجلي
باوعت نزيف قوي من شفت الدم اغمى علي من الخوفه
مقداد : يوم تعالي وياي بسرعه
ام مقداد : يمه اشبيها مرتك ليش شايلهه ؟ هاي شنو الدم
مقداد : يمه ماكو وكت جيبيلها عبايه وشرشف لفيها
نونه : اخذوني للمستشفى دخلوني صاله الطوارئ
الطبيبه : منو ويه نازك ؟
ام مقداد: اني يمه
الطبيبه : عدها نزيف وفقدت الطفل اسقاط
ام مقداد : يا يمه خطيه وهسه اشلونها
الطبيبه : سوينالهه كرتاج فد كم ساعه اخذوها
ام مقداد : يمه العوض على الله المهم سلامتهه وليدي
مقداد : ظل يبجي المهم سلامتهه بس جنت متأمل يجيني طفل بعد اربع اشهر واحسبله يوم يوم
تاليتهه اخسره بسبب هالانجاس الله لا ينطيهم
~~~~~
نونه : حبيبي مقداد اسفة ماكدرت احتفظ بابنك
مقداد : لاتحجين هيج المهم سلامتج حبيبتي وربج يعوضنا بطفل ثاني
نونه : جنت منتظرته بفارغ الصبر
مقداد : ان شاء الله تجيبيلي دسته
نونه : ههههه ضحكتني ان شاء الله
~~~~~~~
رجعت للبيت مقهوره فقدت شي عزيز علي ورجعت انتكست مره ثانيه نفس الحاله من وفاة والدي
هالمره رجلي بس تتيبس ما اكدر امشي ازحف زحف وايدي اكدر احركهم
تاذيت نفسيا هبطات وخوف ومحبوسين حتى لاهلي ما اكدر اروح
بقيت نايمه بالفراش وما اتحرك مده شهر ..مقداد انقهر علي
مقداد : انت هوايه تأذيتي راح اخذج ونروح للحويجه يم كرايبنا ومناك نروح لكركوك ونبقى بيها لحد ما يصير حل لتكريت
مقداد : انتو كلكم تعالوا ويانا وامي ابوي كلكم حضرو نفسكم 
لملمو ملابسكم مستمسكاتكم غطوا الاغراض بالبيت
~~~~~~
نونه : صعبه تعوف بيتك وتطلع للمجهول متعرف حاترجع لو تموت بالطريق لو يبقى الوضع هيج والبيت ياخذوا الدواعش كلشي منعرف الجاي مجهول والحاضر وطن مجروح باوعت كل قطعه بغرفتي والي اعتبرهه مملكتي تخصني ..بيها ذكرياتي بيها احلامي حتى ملابس الطفل الي جنت اشتريهم كلما انزل للسوك عفتهه بالكنتور طفلي الي فقدته بسبب هالغرباء الي احتلوا بلادي
لملمت ذهبي واخذتلي كم قطعة ملابس  ومستمسكاتنا والباقي عفته
عفت كولشي حتى انجوا بحياتي
صعدنا بالسيارات كانت سيارتين ودعنا اهلنا احنا الجناين كل وحده راحت ودعت اهلها عالسريع ودعنا جوارينا
مقداد : ماريد اخوفكم بس احنا طالعين من الموت للموت هذا طريق وبي خطوره بس لازم نجتازه اريد منكم طول الطريق تقرون قران وتدعون رب العالمين يسهل علينا
ابو مقداد : امين كلمن ويومه توكل على الله
~~~~~
طلعنه من تكريت وصلنه للحويجه يم اقارب ابو مقداد
رحبوا بينا واستقبلونا احسن استقبال وضيفونا بيتهم
بيت ابو حمد : عائلة طيبه واصحاب اصول ماحسسونا  احنا ضيوف وانما حسينا احنا في بيتنا
ابو حمد : ابو مقداد ترى طلعتكم منا لكركوك بيها خطوره وانت عندك ولد اثنين منتسبين لا يكشفوهم
اشو القريه هنا امان وناسهه طيبه واحنا يمكم والي يجرى عليكم يجرى علينا تبقون هنا اامن الكم
حمد : بويه سمعت طريق كركوك انسد
ابو حمد شفتوا بعد ماعدكم منفذ اخر ابقو هنا يمنا
مقداد : عمو احنا عائلة كبيره مترهم بس اذا نحصل بيت نستأجره ويمكن احسن حل
ابو حمد : والله عمي مونسينا بس اذا تردون ندورلكم على بيت للايجار ندور واحنا نساعدكم بالفرش وشغلات الي نكدر عليها نساعدكم بيها وحالكم من حالنا
مقداد : والله عمو انتو اصل الكرم
~~~~
حصلنا بيت للايجار
البيت فارغ وبيت ابو حمد ساعدونا بشغلات كثيره
مرات بيتك متروس لكن يجي يوم تترك كولشي وتحتاج ابسط شي كنت متصوره تافه
البيت بي اربع غرف ومطبخ وملحقات
خلينا شراشف عالشبابيك
جابولنا طباخ زغير وقنينه غاز وكم جدر ومواعين
طلع مقداد وعمي يتسوكون جابولنا النواقص 
اكيد نواقص كثيره بس لازم نمشي الحال بالموجود احنا مجايين سياحه جايين نازحين تخيلوا نازح داخل بلدي
نزوح داخلي هكذا سموا الاعلام
لكني اسميه غريب في بلادي ..غربة وطن مجروح
~~~~~~~
بعد مانسدت الطرق لكركوك بقينا بالقرية اهلها طيبين يساعدون كلوبهم نظيفة ساعدونا اكرمونا ماشعرنا معاهم بغربة
نونه : مقداد صارلنه ست اشهر واحنا بهالقرية بس ناكل وننام والوضع نفس الشي اشتاقيت لاهلي اريد اسمع اخبارهم
ممعقوله شبكه اتصالات ماكو بالقريه
مقداد : خلينا هيج احسن لو مدينه مهمه جان جولج الغربان السود بس لان قريه مهمشه محد بحالهه
نونه : والكهرباء ترى تعبنا
مقداد : حمدوا الله وشكروا لا تتذمرون اكو عوائل عايشين بالخيم والحر ياكل بيهم اكل اطفالهم ماتوا من الحر والفكر
هذا اختبار من رب العالمين
~~~~~~
نونه : صبرنا وتحملنا البهذله عائلة كبيره وجهال وبيت مابي غير حاجات بسيطه ونكول نصبر ومرت سنه واحنا هذا حالنا
كهرباء ابد ماكو شبكه اتصالات مقطوعه الغاز نفذ من القرية
اضطرينا نطبخ عالحطب ومن نريد نسبح نحمي ماء عالحطب رجعنا لحياة اجدادنا
بس احنا مامتعودين على هذه الحياة من فتحنا عيونا عالدنيا
عايشين ببيوت بيها خدمات
لكن لازم نصبر ونتحمل طريق كركوك مغلق وحتى اذا فتح خطر لان باي لحظه تظهر سيطره داعشيه ورعد وسعد يرحون بيهه
المحلات بالقريه نفذت البضاعه الي عدهم لان الطرق مقطعه
الاكل بالقريه خلص بالمحلات الصابون خلص سائل نغسل مواعين ماكو خلص فرغت المحلات والبيوت
بهالفتره الجيش حرر بعض مناطق من تكريت
والدواعش كلما يخسرون مناطق تزيد اذيتهم عالناس المدنيين
يضغطون عليهم والناس لاحول ولا قوه
انحصرنا بالقريه لا نكدر نروح لتكريت ولا نكدر نروح لكركوك وصارلنه سنه متبهذلين ننام عالارض والقريه نفذت بضاعتها
مقداد : احنا تعبنا من هالوضع اني قررت اروح على الموصل ومن الموصل اعبر الى سوريا ومن سوريا نرجع للعراق ندخل من الاراضي الي تحت سيطرة الجيش العراقي
نونه : مقداد اروح وياك ماتروح وحدك
رعد : اني هم اروح وياك ما اعوفك وحدك
مقداد : الطريق بي خطوره اني سألت هواية ناس هي مجازفه بس لازم نجتازهه
ابو مقداد :  انتوا روحوا واني وسعد نبقى هنا مسؤلين عالموجودين
ملاحظه : داعش عدهم قانون " الي يحاول يعبر الى ارض الكفر (حسب تسميتهم ) ويترك ارض الخلافة " يحكم عليه بالقصاص وقصاصهم هو القتل بطرقهم الغريبه
رغم هذا القانون قررنا اني وزوجي وحماي العبور
ابو مقداد : انت منين تعرف الطريق ؟
مقداد : صديقي ابو صهيب يندل الطريق
يكول ندخل من نص صحراء (البعاج ) هذا الطريق مابي سيطرات دواعش
ابو مقداد : والله خايف عليكم
مقداد : الي كاتبة الله يصير
قررنا السفر ورتبنا امورنا
ترقبوا البارت القادم ..خلي نشوف ما ينتظر مقداد ونازك
~~~~~بقلم فردوس عبد اللطيف~~~~~~