ايام من عمري

طفوله ولكن .......

السلام عليكم
انا اسمي سما عراقيه كورديه،مواليد الكويت ايلول 1988 ، والدي الله يرحمه كان ضابط بالجيش العراقي برتبة لواء واحيل للتقاعد سنه 2004 مواليد 1937، والدتي الله يرحمها ايضا كورديه من دهوك مواليد 1960  كانت استاذه جامعيه بجامعه تكريت لان وحسب مفهمت انو اهل ماما من المرحلين الاكراد ايام حكم احمد البكر بالسبعينات .
والدي متزوج من وحده ثانيه قبل ماما تصير بنت عمه عدهم اولادثنين واحد شهيد والثاني اراس مهندس مقيم بسويسرا، واخواتي سالي وريناس وافين. ومتربطني بيهم اي علاقه عدا اراس صارت علاقتي بيه بعد وفاه ماما الله يرحمها.
طفولتي جانت فدشي منغلق كلش وحتى مراهقتي بالاحرى حياتي كلها..... وعيت عالدنيا رجعنا عالعراق صغيره ما اذكر منها غير بس ماما مريضه ودايما عند الطبيب واغلب الايام نايمه مجنت افهم شنو القصه الى حد وصلت عمر متوسطه فهمت انو ماما مريضه بالسرطان وسوت عمليه وثنين وعلاج بالكيمياوي واشعاع ومسيره طويله انتهت بوفاتها سنة 2006 حزيران ذكرياتي عن ماما جانت تتلخص انها بس تصيحلي جيبي دوا تعاي لزميني لو تكعد تعيط من الوجع لو تعلمني اطبخ وانظف من تكون صاحيه وتكلي اعلمج للزمن حتى لا تحتاجين احد اما لو كانت ماخذه علاج كيميائي فلا احد يوكف بوجهها العياط والسب والشتم واني وبابا ساكتين..... اتذكر مره احنا بعمان بالشقه وجانت ماخذه جرعه وبابا طلع ديصرف وصفه مال دوا واستلمتني رزايل وعياط ما خلت عليه واني عمري يمكن ميتجاوز 14 سنه وطردتني برا الشقه طلعت كعدت عالدرج والله بس ابجي شافتني وحده من جيران اسمها ام مهند فلسطينيه جانت متخيله انو بابا وماما بينهم مشكله لهالسبب ماما تعيط حجيتلها القصه كعدت تبجي ويايه ومن يومها صارت تتردد علينا وتساعد ماما وتهديها وانا ما انسى فضلها علمتني اسوي طبخات وامور كثيره وحتى من بلغت هي ساعدتني كيف اهتم لنفسي وامنيتي التقي فيها مره ثانيه
اما تجاربي كمراهقه فما تتعدى غير انو شفت سايق جان عسكري مكلف تحت امره والدي كان يوديني للدوام ويرجعني وهاي قبل ال2004 يعني قبل مينحال والدي للتقاعد وجانت امور البلد تعبانه
توفت ماما العفو غلطت اني 2006 حزيران لان جنت بعدني بالاعداديه.
شويه هدات حياتنا بعد وفاتها بس تركت اثر جبير بحياه بابا اللي ما تهنى بيها اما اني يمكن اكون انانيه اذا كلت اني محسيت وما عرفت شنو يعني ام وحنان ام لانها كانت شبه غائبه عني وكنت انا الاهتم فيها والبي حاجتها عكس مو مفروض هي تسوي هالشي لكن مع هذا مرات احس بشوق عظيم الها لمجرد كونها ام ...هنا يجي دور هاله  ام عبدالله
صديقه وقت المرح وام وقت الحاجه استفاديت ولا زلت اتعلم منها كلشي بحياتي ساندتني ووقفت ويايه جانت تدرسني رياضيات ويبووو شبعت راشديات وكفخات منها الى ان تعلمت ولوفاه ماما لكيت الحضن اللي يعوض الشي اللي ما لكيت بعائلتي ساندتني وقت ما كانت موجوده وانا بحاجه الها وابد ما اعتذرت بيوم وكالت لا دايما حاضره وقت اللزوم..
طوينا صفحه ماما اني وبابا وقررنا نتعاون سويه حتى نستمر بحياتنا وظلينا مثل الاصدقا هو مرات ينشغل بتاليف كتابه عن الجيش واني اكعد اسوي براسه عود اني ام بيت معدله وصرت مره اطبخ ومره اشوي واعجن الى ان تعلمت ووقت الدراسه صار جد ومرات نسافر سويه احنا اصلا عدنا كرين كارد اامريكي كل فتره نسافر امريكا ونرجع وسافرنا مره لدبي ولمصر ورحنا اردن هوايا عدنا شقه ملك هناك يعني عايشين حياتنا ِوبابا كتم حزنه بقلبه حتى لا يقهرني واستمرينا على هالنمط الى ان وصلت مرحله القبول الجامعي وطلعلي كليه علوم تكنولوجيا جنت حابه صيدله بس للاسف معدلي ما وافق ادخل اللي اريد واني ايضا ما جديت بالدراسه كلش نظرا للوضع المخربط اللي مرينا بيه ومن بعدها اختبرت وانقبلت قسم حاسبات جان وقتنا يسموه نظم معلومات وبلشت دراسه بس ظليت بعيده عن العلاقات وغيره وبهالفتره اباوع عالبنات اشو مكياج وتسريحات واني حظي وجهي عبالك فرو غير الشوارب ما شايله وبفضل صديقتي ياسمين جيرانا ( طبعا هاي صديقتي كلش احبها جنا نلعب بالبايسكل ايام الخير بالشارع ووحده سرها يم الثانيه اني معندي اسرار بس من جنا اعدادي مخلت احد ما كالتله احبك واني بس اضحك عليها لو مرات جانت تجي تبدل لبسها يمي حتى اهلها لا يحاسبوها اموت عليها وعلى سوالفها ) جانت تشيلي الشوارب بس لبسي جان حلو اما السوالف البقيه جانت اختصاص هالة ملابس داخلي وتنظيفات جانت هي تقوم بيها وتساعدني شنو اختار الى ان تعلمت والتنظيفات الباقي من هي موجوده هي تجي واذا لا جانت تدزلي اختها تجي هي وهوسة جهالها جنت اكيف البيت من ينترس ويصير عياط بيه لان فعلا بيتنا جان كئيب واسال بابا يكلي ازوجج واترسيلنا البيت جهال ومن اسال على خواتي يغير الموضوع والضحكه تختفي من وجهه ( جنت اسمعه مرات من يخابرهم يعيط ويرزل ودايما يكول الله موجود. بالكوردي خوا كريم ) وما اعرف السبب هذا مختصر حياتي لمدة 19 سنه قبل لا الدنيا تدور بيه ......