ايام من عمري

البارت السادس عشر

منطيتة مجال ابد يبرر لو يكعد ينطيني ويملي علية كذبة جديدة ، شعوري اهتز وثقتي بنفسي انهزت وصرت احس عايشة كذبة جبيرة احساسي زاد انو اني بنت حرام وحدة ما استاهل اعيش وسط عائلة لو اكون عائلة لو افرح واعيش حالي حال الناس صرت افكر ليش معندي اجوبة لاسئلتي شنو اللي صاير للدرجة اللي خلت زوجة بابا واهلهم كلهم يكرهوني لازم الكي احد ميخاف وبذات الوقت يعرف اجوبة لسؤالاتي .مخي ظل يشتغل بذاك اليوم حسيت نفسي راح انجلط احس رجلي ترجف كلبي يدك عبالك دااركض بردت بالرغم احنا بشهر اب اي اب بالحر طلعت وجهي اريد اتنفس جنت اتمنى مكان وحدي اعيط اسوي شي مكدرت حسيت مثل اللي شي على وجهي وكاتم نفسي ياربي اتمنى هالشي حلم ،صح مكان اكو شي وجانو واكفين بين العالم بس يكفي دموعها ومنظرهم شلون جان . اني ما اخذتة منها اني انجبرت اتزوج وماناقشت ،  بابا راد واني نفذت ، قضيت حياتي كلها واني كلب مطيع ابد مكان بقاموسي ليش واشمعنى ، كلة حاضر وصار وتدلل ، ريكي نشف من كثر ما سولفت بصدري دموعي راحت بعد ما اكدر ابجي روحي لايبة حسيتها طالعة من جسمي كخطوة ثانية ردت اكوم من فراشي لكيت غوث بعدة عالكرسي وغافي مكانة حاط ايدة على كصتة ومغمض عيونة مشيت فتت من يمة رحت للمطبخ اشرب مي واول مرة اسويها غسلت واتمضمضت بالمطبخ معندي طاقة كلشي اسوي ظليت اباوع داير ميدوري واضحك اتذكر نفسي من كلت راح ابني عشي الخاص هذا عشي الخاص طلع وهم وكلها مصالح من حولي العصفور يبني عش ويكون عائلة اني بنيت عش ومليتة اشواك واوهام عش كئيب فارغ بدون مشاعر مظلم مشيت ارجع لغرفتي غوث كعد باوعت عالساعة لكيتها ثلاثة الا ثلث حسيتها سنين مرت لكن سبحان الله حتى الساعة ضدي ومتقبل تمشي اتجاهلت غوث ودافوت بفراشي حجى :
سما شلونج هديتي لو بعد
مو شغلك
لا شغلي ، واريدج تفهمين معندي شي وياها ترة فهمتي الموضوع غلط.
لا مو غلط ، لان لو غلط جان مضميتو علية هاي الوقت كلة .
اني مضميت ابوج هو اللي سوة هالشي وهو اللي رفض من اول واتقبلتج واقع حال وما التفتت وراية بعد فلا تسويها قصة خلينا عايشين ونمشي بحياتنا
قصة؟ حياتنا؟ ياقصة ويا حياة غوث ! انتة دتلاحظ شسويت ؟ اني احس اني دينضحك علية واني وبكل بساطة ساذجة واصدك بكلشي ارضى بالقليل اللي تقدم معندي راي بحياتك صوتي ميطلع كدامك شخصيتي نعدمت بسلامتك وسلامة بابا من جان عايش ثنينكم ضحكتو علية شنو ذنبي اني هسا ؟
غوث ساكت ابد ميرد .
اني مرت علية ايام جنت اخاف الكي نفسي بالشارع لا اهل لا سند ماكو شي بحياتي اعيش علمودة فقدت الام والاب الشخصين اللي همة كل ما املك بحياتي لا عم ولا عيلة ولا اهل بعدهم كلت راح انتة تحميني وتحافظ علية غوث بهدلتني هسا فهمت من الناس تباوعلي بنظرة الشفقة كلها تعرف الا اني .
شتعرف سما شفهمتي ؟
زوجي يخوني وية اختي لان بكل بساطة جان يحبها الها .
لج لتكومين تخربطين .
لا ما اخربط لعد بشنو تفسر هالدموع ؟ بشنو تفسر من ضربتني وما حركت ساكن جاوبني .
لج بابا الحجي مو هيج .
لعد شنو ؟ ها! من تكعد
تقارن بيني وبينها .
من تنام فوكاية شتحس اني لو تفكر بيها الها ها؟
لمن تجيني ركض وتكعد تشمشم وتحظن شتحس؟ المن تشوف اني لو هي ؟
لمن تضحك وياية وتتشاقة وتلمسني تلمس منو اني لو هي ؟
كافي سما
لا مو كافي انتة واحد حتى عيب اكول عليك رجال
كام وكف على حيلة ، ترة تماديتي انتي اسكتي خلص.
لا مو خلص اني جنت ساكتة وانتة الحجيتني انتة حركت الرماد وطلعت النار اتحمل النار والجويات  بعد
سكتت شوية عافني وطلع كعد بالهول لكيتة صافن وحاط ايدة بين رجلة ومدنك راسة .
تلفوناتك تالي الليل من جانت ترمش هاي جانت هي مو؟
ساكت ميرد هي مو؟؟ متجاوب؟
لا مو هي وحدة لخ مو ريناس .
صدمني جوابة وحدة لخ .
شلون؟ وحدة لخ؟ تتشاقى لو تحجي صدك .انتة شنو من رجال شنو من ملة انتة ؟
معندي رد غير اسف
اسف؟ وين اصرفها هاي ولك اني راح افضحك الله لايوفقك الله يموتك ما اتذكر شنو حجيت بعد بس اتذكر ضربتة يمكن بالكونترول مال تلفزيون وكمت اصيح وغلطت علية وفشرت وكتلة مثل متسوي اني هم راح اسوي انتة دواك وحدة تخونك وتجيب سمعتك بالكاع وهو ظل يكول كافي ومن شافني اتماديت لزمني وضربني ودفعني بالغرفة وضربني على وجهي وسد الباب وطلع بذيج اللحظة صدكوني مطلعت دمعة مني من انضربت حسيت الدموع ضعف وما اريد اصير ضعيفة .ظليت اجمع افكاري واحاول الكي حل لنفسي بس اول شي ردت اسوي اروح لهالة واشوف احد افتهم القصة منة كاملة .
صارت الدنيا صبح تقريبا ٨ فتت سبحت وعدلت الغرفة والهوسة البيها طلعت برا الغرفة لكيتة نايم عالقنفة وكيس مال ثلج بصفة الظاهر مستخدمة البارحة لكيت الاكل على حطتة بالعلاكة شلتة وذبيتة بالزبل أكيد محمض دورت مفاتيح السيارة لكيتها بالكاع اخذتها ونزلت مقررة اروح لهالة .
طلعت واجة وراية مباوعتلة يحجي وياية واني فاصلة ماارد بس اتذكر يكلي بس كولي وين رايحة اتذكر جاوبتة جواب عيب ( للملهى اريد اتواعد اريد اكود ميخصك ) صدمتة بجوابي عفتة وصعدت بالسيارة تلفوني عفتة ما اخذتة وياية ورحت كبل على هالة جان بيتها يبعد تقريبا عشر دقايق لو اقل عن الشقق اللي اني بيها ويجوز ربع ساعة .
دكيت الباب لان اكيد كهربا طافية طلعتلي بنتها هبوشة هلاو خالة هلو حبيبي ماما بالبيت؟
اي خالة تفضلي فتت كبل للمطبخ  شافتي هالة راسا ابتسمت ها حياتي مبين الحلو رايح وجاية .
لا حلو ولا بطيخ هالة امانة الله اريد اعرف سالفة ريناس وغوث
صفنت بوجهي شكو حلمانة بيهم شكو ياستار .
لا محلمانة اريد اعرف كافي كذب وتضمضم
بهالحجي اجتي هبة انطت الموبيل لامها
امها جاوبت وتباوع اني عرفت هذا غوث داريد احجي حطت ايدها على حلكي وخزرتني  بمعنى اسكتي وهي ظلت تسالة كلي شصاير وفهمني ومعليك اني اتفاهم وياها .
سدت التلفون .ذبتة وراحت عالطباخ صاحت هبة عالريوك .
كالت اتريكي وعود نحجي تعاي اتريكو انتي وهبوش اني صايمة جان شهر شوال.
رمضان اللي محسيت بية والعيد اللي عيدت وحدي كمت اتخيل عايفني ونايم بحظن اختي كلبي تمرمر متت قهر .
ظليت احجي احجي وهالة بس تباوعلي اخر شي كالت
كملتي ؟ كافي عاد خلصتي لغوة خلص
ليش هالة ليش؟ لتكوليلي كافي اليوم كم سنة حتى يوم عرسي خزاني وبهدلني تالي تطلع اختي والله لو وحدة غريبة يجوز ما انقهر بس اختي؟
ولج ماكو شي متوهمة انتي
لا ما متوهمة اجت للبيت وضربتني واعتدت علية وسكتت وهاي سبب جيتي لاربيل ردت بيت كلمتي بية والنوب الكاها واكفة وياة بالمول وعيونها حمر دم تبجي وهو يباوعلها حزين بس عوزة يحظنها عالواهس ولج دمروني ولج حركلي كلبي اشكال الوان الحجي طلعو علية محد دافعلي محد كاللهم انتو غلط اسمع وابلع ليش؟ اريد اعرف ليش ؟ وتالي يجازيني بخيانة ؟
ثقي مثل ما يسوي اني اسوي
شتسوين؟ اطيح حظج والنبي شنو انتي واعية عالتحجية ؟
اي واعية واعرف .
دكلي خرة عاد ولتعيديها السالفة وموضوع اختج عوفية احنا نحلة
اريد اروح لبغداد
خلي ينفتح الطريق عود نروح 
ليش ما مفتوح؟
لا وين خاف نروح وينهبونا داعش .
سوت ريوك وظلت تتوسل بية اكل لكمة وتلفونها دك عافتنا وراحت بالغرفة اني تاكدت غوث داك عليها
اجت رجعت سالتها على قصة المشاكل بين اهل بابا وبابا كالت والله ما اعرف اللي يعرف امي توسلت تخابرها كالت والله من نروح عود ساليها وسولفي براحتج وياها سما اكليلج لكمة بداعتي
والله ما اشتهي
لا والله تشتهين اشو دتعاي مثل مجنتي بكد الخرية اني ااكلج دكلي بداعتي يولي هسا تمرضين
اوف ياريت الله يموتني وافتت واخلص
ولج ليش واني اموت قهر عليج هو اني عايزة قهر؟
هبوش من يمها يبووو خالة وتموتين ونسوي فاتحة والبيت يتوصخ ههه
امها من يمها امداج والله هاي همج عالبيت يتوصخ عبالي خايفة عليها ضحكوني ثنينهم قنعتني اكل رغم جنت جوعانة كلما احط لكمة بحلكي اتخيل اشكال الصور عنهم وابطل اكل احس روحي اختنك
خلصنا كمت غسلت ايدي وكعدنا بالهول عمو ما موجود مددت عالقتفة اجت الكهربا شغلو السبلت جريت سجادة صلاة ما عرف شنو واتغطيت بيها ماعرف شلون غفيت كعدت بحدود ساعة بالوحدة فتحت عيني بالاحرى وعيت اسمعة غوث وهالة ترزل بية تكلة يعني لازم توكف وياها جان من وكفت انتة عوفها وامشي يكلها هددتني والعالم داير ميدورنا وسما وياية كلت خطية موقف محلو وهي جلبت بس والله ما متواعد وياها .
لعد شنو سالفة التلفونات تالي الليل ؟
شنو منو كلج؟
غوث ماكو شي ينضم علية ولك عندك مرية تجنن دباوع شلونها وعلى ايدك انتة اكبر منها يعني تخبزها مثل العجينة شبيك يحظي دباوعلها جسم ورسم ونادرة

ادري والله ادري بس هي هم مرات عبالك كاشة مني عبالك اكو احد بحياتهة.
لاااا غوث حدك لهنا الا سما ابد معدها هاي السوالف يجوز فطيرة ومتعرف تتصرف وية الرجال بس مال خيانة لا .
اني كعدت ليش لا شنو فرقي عنة قابل المرية من تنعاف همينة تكوم تدور لو غلطانة
حجيت هيج ردت احرك كلبة واخلية يحس باللي حسيت بية .
هو من يمة قسما بالله يا سما اذا تعيديها ثقي ما ارحمج مجاوبتة ودرت وجهي على هالة
ها خالة تكولين ما اعرف لعد شو كاعدة تنصحين بية
وروح ابوية ما اعرف الا منة هو حجالي بس امي يعرفون
وهو ديحلف يكول صدفة ومخلتة يمشي
كمل هو من يمة
سما جان يومنا حلو ومتونسين انتي ردتي طلعة الكشرة هاي واني جنت اعرف هي هنا ومردت اطلع حتى لا تعرف اني هنا لو نسبة واحد بالمية تشوفني وطلعنا وتورطنا هي ذبت حجايتين وراحت واني ما مهتم
هااا
وهاي اللخ ما اعرف منو ظل ساكت
غوث انطيني تلفونك
شسوين بي !
اريد اشوف
لا متشوفين
لعد ليش تلفوني حتى القفل مالة تعرفة
لان زوجج ومن حقي
لا ماكو من حقك
ههه بكيفج عاد
ليش تضحك مداضحك وياك
هالة من يمها انطيها تلفونك وبرد الدودة مالتها
كتلها لا عيني ميكدر لان يعرف راح ينفضح واشوف الكحاب مالتة كام ديضربني بعصبية لزمتة هالة دفعتة كعدتة بمكانة رزلتني وضربتني خفيف كالت الرجال مينحجي هيج وياة النوب اني زدتها كتلها اي رجال مو غوث
سمع هاي الحجاية وطفر من كاعة ديجرني ولزمتة تتوسل بية تكلة مو بوعيها والله صدك هاي مصدومة طلعتة يمكن كعد بالمطبخ لو بالممر واجتي ترزلني تكلي ولج منين متعلمة هالحجي
ما جاوبت .ظلت عيوني تدمع.
سما شبيج احجي شمسوي وياج خلاج هيج تحجين انتي مصار شهر جنتي تدورين ضنى وجهال شجاج كلبتي الخلقة
امشي نروح شيخ جعفر ابو التكية خل يقرالج شوية بلكي تهدا النفوس
لاشيخ ولا ساحر كلشي مبية ترة هو المسحور مو اني يوم يجيني كاتل روحة وعشرة يجي كالب الخلقة جان استحى على نفسة عيد الله اكبر عافني وحدي وراح بغداد يتونس من دون العالم كلها جايبة عوائلها ورايحة العرس وهو رايح بطرك روحة ....لو يجوز ماخذ ريناس لو ذيج الكحبة اللخ منعرف منو ...
لج تالي وياج اجي اكفر بيج والله
اش كل قيمة الك مظلت عندي طلكني يلا ما ريدك
انطمي واسكتي
ما مااريدك طلكني
اجة النوب بعصبية هالة واكفة بيناتنا النوب دفع هالة فوكاية ديجرني من ايدي عضيتة بحيث خليتة يكمز مجنت واعية بس سمعت صوت عمو من فات وعاط هاي شكو
من فات عمو الكل سكت وهالة تباوعلي تهدد بس تفشرين اكسر راسج عيب
باوعلي عمو ها بابا شبيج منو وياج
اني اساسا جيتي غلط هنانة مال اخذ حقي كذب كلشي مراح احصل جنت اريد اطلع لزمني عمو من ايدي حصرتني البجية والعياط راسا لزمني من راسي وجلب بية مثل الاب من يحظن بنتة .