ايام من عمري

البارت السادس

رحنا لماليزيا اسبوعين وتونسنا ، توقعت كلشي حيصير تمام ،والامور تصير طبيعية ،توقعاتي جانت هيج حياة الزوج والزوجة وهو غلط بالاول لان حسب كلامة متوتر وضحك علية زوج اختة وابد ما خطر على بالي عاللايام القبلها ليش جان هالجفى منة وليش تعاملة وياية عفت السالفة اصلا ،وصرت افكر بالجاي وشنو راح يصير وامور هواية تعبت منها.
اني صفر بهيج امور ولا شفت احد فهمني وعلمني كلشي ولا انطيت مجال لاحد يحجي وياية وكل معرفتي بهيج امور جنت افهمها من ياسمين صديقتي وهي اصلا جيراني وانا معرفت غيرها ومعلوماتها جانت كلة غلط بغلط ولهذا جنت اتحاشى الدخول وياها بهيج نقاشات لان جنت اخاف لو اني باردة حسب ما وصفني غوث بعدين ....
هواي هواي شغلات تزاحمت بعقلي بحيث دخت وانسطرت وحزنت على وضعي اللي اني بية والخلاصة استنتجت ابوية من كثر حرصة علية خنكني وصرت هيج نتاج هش وكل حظ ما بية وفعلا على كولة المثل ثور مربوط لو على راي زوجة خالو تكلي انتي مثل جلب الراعي روحي تروحين تعاي تجين .
المهم استمريت برحلتي بالحياة اللي جانت مغامره على صراعات ومجنت احس ليها ولا شي حلو .
اني وغوث هالاسبوعين وحدنا وقررت اانو اتعلم منة وشيكلي اكون حاضرة واتعلم منة ( هاي جان تفكيري واعتقادي ) بحيث هو من شافني كلشي يكول ويطلب اهز راسي بالاول جان مستغرب بعدين صارت عادي او استغلني ما اعرف .
موضوع الشرب كلت هاي الظاهر كلها باول حياتها هيج وبعدين يلتفتون لبيوتهم وعائلاتهم ويوم اللي ميكون شارب احسة شخص مو يمي بروحة جسم ووبس لهذا وبكل صراحة جان يريحني موضوع انو يشرب لحد الانتشاء ويجي مفرفش ومبتسم ويصير عاطفي كلش واني رضيت بهالشي راح تكولون انتي غبية وعايشة كانما واحد خاتل بظل اي فعلا اني هيج بس تورطت بعد وصار الصار ، طبعا هو ميشرب يمي ابد ولا بيوم شفته شرب بغرفتنا وين حجزنا جان مجرد يلبس وينزل يكول شوية وارجع طبعا هي مو شوية بس تعبير ينذكر .
وصار موضوع علاقتنا الخاصة شي يومي نهائيا هو ميفوت هالشي واني مثل محنطة اول مره يجي هو وشيريد يسوي يسوي ومجرد انفذ لحد هاللحظه ومجنت اعرف شديصير بس جنت احس باحساس غريب وياة بس خوفي سوا حاجز وابد مسالت هذا شنو وليش ، ظلت مخزونة بعقلي هاي عيب وميصير نحجي وهو من جانبة الظاهر كلش جان مرتاح بين قوسين صار خدي مداس .........
اتذكر يوم من هالاسبوعين القضيناها نزل مثل عادتة كل يوم بعد المغرب طبعا احنا روحاتنا وفراتنا كلها الصبح لحد العصر مرات قليل جنا بليل نطلع بحجة انو والله اليطلعون بس شرب ونسوان واني ما احب ما رحت مولات وفرفرت وياه بليل كله جان الصبح الا مرة وحده طلعنا وهي الجانت اخر يوم والمفروض ثاني يوم الصبح نغادر ونصعد بهاي البوت اللي يطلعنا من الجزيره يوصلنا عالمدينة اللي نصعد سيارات ونروح للمطار والظاهر هو يعرف مسبقا لان فهمت هو جاي كروب هو واصدقائه مره لنفس المكان وعاجبه .
المهم نرجع لهاي الليله طلع وكال ساعة وارجع ظليت انتظر والتهيت خابرت بابا وحجيت وياة وسولفنا وبابا طبيعتة هادي وميحجي هواية واذا اتكلم يكعد يسرد ذكرياته واذا يصدف فد موضوع معين
دايما يربطة بشغلة وذكرياتة وينطي امثلة علية مرات نكول الحديث ممل لكن اني عمري ما مليت منة جنت اتونس وياة وهاي طبيعة اهلنا وخصوصا انا اجيت بوقت هو جان بالستين يمكن ، وخلصت اتصال وسديت الموبيل وانتظر غوث هسة يجي ماكو مو عوايدة لهيت روحي بالاغاني مال الموبيل وغوث ماكو ادك علية خاف يعصب زين شسوي خابرت ياسمين مجاوبت وظليت على كعدتي وما حسيت بروحي من نمت وفزيت على صوت فد شي انكسر كعدت لكيتة غوث واللي انكسر علبة مال عطر مالتة ومدنك ديلم بيه اباوع الساعة ٢ وشوية اني بكل فطارية كلت:
_لو باقي للصبح ومتريك وراجع مو احسن .
جوابة على طارف خشمة
_مو شغلج ولا تحجين زايد.
صدمني جوابة واسلوبة يعني ربي ومولاي كما خلقتني رجعنا لنقطة الصفر، واني من فشلتي دنكت محجيت ،وهو من يمة كال وبصيغة نتر:
_ تعاي لمي هذا مدتشوفين شداسوي
_ ماشي بش انتة الوكعتة مو اني .
_ ليش مشلتيها منا شكو عايفتها عالطبلة
_ انتة استخدمتها قبل لتروح ومنتبهت انتة عفتة هنا .
سكتت وراهه كملت
_ بعدين مو انته كلت غراضي متلمسيهن الا اني اكلج لو نسيت !!!
بس بهاي جوابي صدك غميت على نفسي وانكسرت جواية مجنت متخيلة هذا شهر عسلي ولا توقعت نفسي بيوم انو اكون فد انسانه غير مرغوب فيهاوخصوصي انا اساسا اهل بابا (زوجتة واولاده ) نهائي لا يكلموني ولا يسالون ابد عني .
صار هدوء من الطرفين وهو اجة اخذ من ايدي الكزاز كال لتتعورين جيبي انطيتة وكان مبين علية هالمرة متعكر كلش ويطوح دايخ ابد معجبني بس كلن يبين انو مسيطر عود وجنت احجي بداخلي متوقعت لساني ديسولف همينة مثل التغيبت سامعين واحد من فشله وجهه يحمى وتصير اذاناتة حمر اني بضبط هيج فجنت اكول جرح اليد لو الجسم عادي دم يطلع ونداوي بمرهم جرح ويطيب ، بس جرح النفس واحد شلون يداويهه محسيت على نفسي من بجيت ودمعت عيني هو من شافني هيج اتغير راح ذب كلشي من ايده واجه كعد قريب مني ديحاول يصلح الامور اللي خربها بهاي اللحظه ورغم كان قريب مني وحبيت لكن ضايقني ريحته مبين شارب شي واكو فد عطر ثاني مامار علية هالايام هاي فحظني وكعد يعتذر يكلي اسف والله بس متوتر ووضعي وشغلي وزواجنا وبعدنا ممتعودين على بعض وهواي شغلات بعقلي بس انطيني فرصه شوية ارتب وضعي اني مابيدي غير اسكت بعدين قلبة ضحك كال هي كلة ساعة لو ساعتين تاخرت ليش هيج مادة البوز .
واني كالعادة جوابي مال وحدة بومة ابد من ينفتح حلكي لازم يطلع شي يخرب الدنيا ويخلي يبعد

_ واني شعلية تتاخر هاي قرارك انتة بعد بس جنت خايفة لا اتيه وحدي وما اكدر ارجع لبابا خطية وحده

_يعني الهامج بس انو احد يرجعج مو هامج اني تاخرت لو صار شي علية؟
سكتت مرديت وهو هم قطع الحديث كال اسبح وارجعلج كومي غسلي انتي هم .
راح سبح نزع قميصة الجان لابس ذبة عالكرسي كلت خلي اشيلة احطة بكيس الغسل همة يجون يومية صبح اذا اكو شي يحتاج غسل همة يغسلون بس الداخليات مالتي واشيا خاص بينا ما اخليهم يغسلون اني ادبرها بالحمام ومرات احطها بكيس خاص بجنطنا احسب حساب عود من نرجع اغسلها شلت القميص كلت لا يسويلي سالفة وعلى انتي متقومين بشغلج تمام اشتميتة فصار عندي تاكيد انو هاي عطر نسائي وريحة مال تدخين انهضمت النوب بالزايد وميكدر ينكر العطر ريحتة حلوة يعني نسائي واللي زاد تاكيدي اتذكرت هو سبح العصر ليش يرجع هسا يسبح؟
ذبيته بالكيس وغسلت وكعدت طلع هو من الحمام شافني كاعده العب بالموبيل ذاك الوقت موبايلاتنا مو مثل هسا شي حيل متطور بال ٢٠٠٩ جان عندي موبايل كلش حلو سوني اريكسون شاشتة واسعه ومنزلة بية العاب جان وقتها من المكاتب تنزليه ماكو مثل هسة لان تلفونات الزينة بدت ٢٠١٢ وبيها ستور ونت وكلشي .
المهم كال ها شتسوين ؟
جاوبت ....
_العب.
_شتلعبين ؟
_ لعبة مال جهال .
_ ها خوش تعاي يلا العبج لعبة مال كبار .
_ هاي لعب الكبار اختصاص انتة بية الظاهر واني ميستهويني العب هواية من هاي الملاعيب.
جوابي الة صدمة او فاجئه المهم مكان متوقع اجاوبه بالاحرى اكدر اجاوبة هيج جواب

واللحكاية بقية.........